ཁྱེད་ཕེབས་ཤུལ་གྱི་མི་ལོ་འདི་དག
ཉེར་གཅིག་ལོའི་དབྱར་གྱི་དཔལ་ཡོན་རབ་ཏུ་བཞད་པའི་དུས་ཚིགས་ཤིག་ལ། ནམ་རྒྱུན་གྱི་བྱ་བྱིའུ་དང་བཅས་པའི་སེམས་ལྡན་ཡོངས་ཀྱིས་དགའ་འབོད་ཀྱི་གླུ་སྒྲ་བར་མེད་ཆུ་རྒྱུན་ལྟར་བླངས་ནས་རང་སྣང་གང་སྐྱིད་ཀྱི་རྩེད་འཇོར་རོལ་ཞིང་། རྩྭ་ལྗང་གསར་པས་ཡོངས་སུ་བཀླུབས་པའི་ཕ་ཡུལ་གྱི་ཕུ་མདའ་གང་སར་སྙེ་མའི་ཁུར་གྱིས་ལྗིད་པའི་ལོ་ལེགས་ཀྱི་གཏམ་བཟང་གྲགས་འགོ་བརྩམས། རྩྭ་ལྗང་དག་ལ་སྐྱེ་སྟོབས་ཀྱི་གསོན་ཤུགས་ཆེས་ཆེར་རྒྱས་པའི་དབྱར་གྱི་ནམ་ཟླ་བཟང་པོ་དེར། དྲོ་སྐྱིད་ཀྱི་འོད་ཟེར་ཆེམ་ཆེམ་དུ་འཕྲོ་ཞིང་འཆམ་མཐུན་འཕེལ་རྒྱས་ཀྱི་གསོན་ཤུགས་མེ་སྟག་ཅིག་དང་འདྲ་བར་ཚག་ཚག་ཏུ་མཆེད་འོང་བའི་བདག་གི་ཁྱིམ་གཞིས་ཆུང་ངུའི་སྙིང་ཁར་ནམ་ཡང་གསོས་ཐབས་བྲལ་བའི་སེམས་ཀྱི་རྨ་ཁ་ཆེན་པོ་ཞིག་ཆགས་པ་སྟེ། སྙིང་ཉེ་ཞིང་བརྩེ་བ་རྒྱ་མཚོ་ལས་ཟབ་པའི་སྐྱེ་བོ་ཁོང་ང་ཚོ་དང་གཏན་དུ་བྲལ་ལོ།
སྐྱེ་རྒ་ན་འཆིའི་བཟློག་མེད་ཆོས་ཉིད་ཀྱི་ཞགས་པ་ལས་སྐྱེ་འགྲོ་སུ་ཞིག་ཀྱང་ཐར་ཐབས་བྲལ་བས། ང་ཚོས་སྐྱིད་ལ་སྡུག་པའི་མི་ཚེ་ཡི་ལམ་ཁ་རིང་མོ་ལས་བདེ་སྐྱིད་ཀྱི་འོད་སྣང་ཚོར་ཐུབ་པ་དགོས་ལ། ཕན་ཚུན་བྱམས་དང་བརྩེ་བའང་འཆང་ཤེས་པ་དགོས། ངས་སྙིང་ཁོང་རུས་པའི་གཏིང་ནས་བརྩེ་བ་བཅངས་པའི་སྐྱེས་བུ་ཁོང་དུས་ཡུན་རིང་མོ་ནད་ཀྱིས་མནར་ནས་ཉིན་ཞིག་ང་ཚོ་དང་གཏན་དུ་གྱེས་ཏེ་དག་པའི་ཞིང་ཁམས་ཤིག་ཏུ་་གཤེགས། འགྲོ་དྲུག་གི་ཚེ་སྲོག་ཕྲ་མོ་སྲིད་པ་འཁོར་བའི་ཆོས་ཉིད་དང་ལུས་དང་གྲིབ་མ་བཞིན་འགྲོགས་པ་ལས་ནམ་ཡང་ཁ་བྲལ་ཁེར་རྐྱང་དུ་གནས་ཐབས་ཅི། ཁྱེད་ཀྱིས་སྟོང་ཁམས་ཡངས་མོའི་འཇིག་རྟེན་འདི་ནས་ང་ལ་ཆེས་མཐའ་མཇུག་གི་མིག་མདའ་འཕེན་དུས། ངའི་སེམས་ཁོང་དུ་ང་དང་ཁྱེད་ཀྱིས་ལོ་མང་བསྙལ་བའི་གཏམ་རྒྱུད་དྲན་ནས་སྨྲ་བ་མེད་པར་ལུས་ལ། ཁྱེད་འཇིག་རྟེན་ལས་གྱེས་ཁར། གསུང་སྐད་ཆུང་ལ་ནན་ཏན་གྱིས་གནང་བའི་བསླབ་བྱ་རེ་རེས་བུ་ཕྲུག་བདག་ལ་མ་འོངས་ཀྱི་ལམ་སྟོན་མཛད། ཁྱེད་ཀྱིས་དབུགས་ཧལ་བཞིན་དུ་འདྲེན་བྱེད་ཟུང་གིས་ཆེས་མཐའ་མཇུག་གི་འབྱེད་བཙུམས་དེ་བྱས་རྗེས་ང་ཚོ་དང་གཏན་དུ་ཞལ་གྱེས་སྐབས། ཁོ་བོའི་ཀླད་ཁམས་ཡངས་མོར་སྤྲིན་ནག་ལང་ལོང་དུ་འཁྲིགས་པ་དང་། ངུ་ངག་གི་ཆོ་ངེ་དབྱར་སྐྱེས་རྔ་བོ་ལྡིར་ལྡིར་དུ་གྲགས་ཤིང་། ཁྲ་ཆུང་མིག་ཟུང་ལས་ཆུ་བོ་ཐུར་དུ་རྒྱུག་འདྲའི་མཆི་ཞག་ལྷུངས་ནས་ངོ་གདོང་ཡོངས་སུ་བརླན་ཏེ། ཡོད་ཚད་སྟོང་པར་གྱུར་པའི་སྣང་བ་ཞིག་ངང་གིས་སྟེར།
ཁྱེད་ཕེབས་ཤུལ་གྱི་མི་ལོ་འདི་དག་རིང་ངས་ཁྱེད་དྲན་ཞིང་མཆིས། འཁྱོལ་དཀའ་བའི་ལོ་ཟླ་འདི་དག་རིང་ངས་ཁྱེད་དང་མཉམ་དུ་སོང་མྱོང་བའི་གནས་དག་ལ་ཕྱིན་ཏེ་མངར་སྐྱུར་འདྲེས་མའི་འདས་དོན་ལ་བསམ་གཞིག་བྱེད་ཞོར་ཁྱེད་ཀྱི་གཟུགས་བརྙན་བཙལ། ཁྱེད་ང་དང་གྱེས་པའི་ཉིན་དེ་ནས་བཟུང་། རྒྱབ་གཟུགས་མང་པོ་ཁྱེད་རང་གི་གཟུགས་བརྙན་དུ་འཁྲུལ་ནས་ཁྱེད་འཇིག་རྟེན་འདི་ནས་བྲལ་མེད་པར་ད་དུང་སྐུ་འཚོ་བཞུགས་གནང་བའི་སྣང་བ་སྟེར། ཁྱེད་ནི་ངའི་མི་ཚེར་བག་ཆགས་ཟབ་ཤོས་འཇོག་མཁན་དང་བྱམས་དང་དུང་བ་ཡོད་ཚད་བསམ་མེད་བུ་ཆུང་བདག་ལ་གནང་མཁན་ཞིག་ཡིན་སྟབས། ངས་ཁྱེད་ཀྱི་གཟུགས་བརྙན་བརྗེད་ག་ལ་སྲིད་ཨང་།
ཁྱེད་བཞུད་པའི་ལོ་ཟླ་འདི་དག་རིང་། ངས་ཁྱེད་དང་མཉམ་དུ་རོལ་བའི་སྔར་སོང་གི་འཚོ་བར་ཕྱིར་དྲན་བྱེད་བཞིན་མ་འོངས་ཀྱི་འཚོ་བར་བློ་ཁ་ཇི་ལྟར་ཕྱོགས་མིན་ཐད་མནོ་བསམ་མང་དུ་བཏང་། སྐབས་འགར་ཁྱེད་ཤིན་ཏུ་དྲན་དུས། ངས་རྗེས་དྲན་ཚུལ་དུ་ཉར་བའི་ཁྱེད་ཀྱི་འདྲ་པར་ཁ་ཤས་ལ་ནན་གྱིས་བལྟས་ནས་ཁྱེད་དང་གླེང་མོལ་བྱེད། ཁྱེད་ནུབ་རིར་བཞུད་པའི་ལོ་ངོ་འདི་དག་ལ་ངས་ཁྱེད་ཀྱིས་གནང་བའི་བཀའ་སློབ་དག་ཡང་ཡང་ཡིད་ལ་དྲན་གྱིན་མནོ་བསམ་གཏོང་། མཁས་པའི་དབང་པོ་དོར་ཞི་གདོང་དྲུག་སྙེམས་བློས། “ལོ་བརྒྱར་སྐྱེས་པའི་སྡོང་སྐམ་ཐབ་ཁུང་གི་ཁ་ཟས། །ཞག་གཅིག་སྐྱེས་པའི་མེ་ཏོག་གསེར་བུམ་གྱི་ཁ་རྒྱན། །མི་རུ་སྐྱེས་པའི་རིན་ཐང་མི་ཡུལ་དུ་བསྡད་པའི། །དུས་ཀྱི་རིང་ཐུང་སྟེང་ནས་འཇལ་རྒྱུ་ཞིག་ཡིན་ནམ”ཞེས་གསུངས་ནས་མི་ལུས་རིན་ཆེན་གྱི་རིན་ཐང་མི་ཡུལ་དུ་འཚོ་བའི་དུས་ཡུན་གྱི་ཆ་ནས་འཇལ་ན་མི་འགྲིག་པར་བསྟན་པ་ལྟར། མ་གཞི་ངའི་སྣང་ངོར་ཁྱེད་མི་ཡུལ་དུ་འཚོ་བའི་དུས་ཡུན་ཐུང་སོང་སྙམ་མོད། ཁྱེད་ཀྱིས་བདག་ལ་གནང་བའི་ལེགས་སྐྱེས་ནི་རི་བོའི་དཔངས་ལས་མཐོའོ།
ཁྱེད་བཞུད་པའི་མི་ལོ་འདི་དག་རིང་། ངས་སྙིང་གཏམ་ཡོད་ཚད་ཁོག་ཏུ་མིད་ཅིང་། དགའ་སྐྱོ་ཅི་རིགས་ཨམ་ཕྲག་ཏུ་བཅུག་ནས་འཇོག་རྒྱུ་ལས་ཅི། ཁྱེད་འཇིག་རྟེན་འདི་ལས་ཕེབས་པ་སྔ་སོང་བས། ཁྱེད་ཀྱིས་ཞབས་རྗེས་བཞག་མྱོང་བའི་ནམ་ཟླ་རིང་པོར་བསྐྱར་དུ་ལོག་ཐབས་ཡོད་ན་ཅི་མ་རུང་།།