འཛུམ་མདངས།
འཛུམ་མདངས་ནི་སེམས་ཀྱི་རྨ་ཁ་གསོ་བྱེད་ཀྱི་བདུད་རྩི་སྨན་མཆོག་དེ་ཡིན་ལ། ཕན་ཚུན་ལག་གདང་སྦྲེལ་བྱེད་མཛའ་གཅུགས་ཀྱི་ལྷ་རྫས་དཀར་པོ་དེ་ཡང་ཡིན།
འཛུམ་མདངས་ནི་གངས་འཁྱགས་ཀྱི་འཚོ་བའི་ཁྲོད་དུ་མེད་དུ་མི་རུང་བའི་བརྩེ་སེམས་ཀྱི་དྲོད་འཁོལ་དེ་ཡིན་ལ། ཁ་བ་བུ་ཡུག་ཁྲོད་ནམ་ཡང་ཡལ་བར་དཀའ་བའི་མེ་སྟག་ཕྲ་མོ་དེ་ཡང་ཡིན།
འཛུམ་མདངས་ནི་ཡ་རབས་ལས་ལ་འཇུག་པའི་ཡར་ཐོན་གྱི་ཐེམ་སྐས་དེ་ཡིན་ལ། ཤེས་དཔལ་གྱིས་ཕྱུག་པའི་འཛད་མེད་གསེར་གྱི་ནོར་བུམ་དེ་ཡང་ཡིན།
འཛུམ་མདངས་ནི་འཆམ་མཐུན་གྱི་དར་སྐུད་ཕྲ་མོ་དེ་ཡིན་ལ། གཞན་ཡིད་འཕྲོག་པའི་ལྷག་བསམ་གྱི་པད་མ་དཀར་པོ་དེ་ཡང་ཡིན།
འཛུམ་མདངས་ནི་མཚར་སྡུག་རྣམ་པར་བཀྲ་བའི་དཔྱིད་དུས་ཀྱི་ཁམ་བུའི་མེ་ཏོག་དེ་ཡིན་ལ། གཡུར་དུ་ཟ་ཞིང་ཞིམ་མངར་ལྡན་པའི་སྟོན་དུས་ཀྱི་ཁམ་འབྲས་རྡོག་པོ་དེ་ཡང་ཡིན།
འཛུམ་མདངས་ནི་མཛེས་པའི་ལང་ཚོའི་ཅོད་པན་དེ་ཡིན་ལ། དཀའ་སྡུག་གི་ལོ་ཟླས་བཅིངས་པའི་སེམས་ཀྱི་སྒོ་མོ་འབྱེད་མཁན་གསེར་གྱི་ལྡེ་མིག་དེ་ཡང་ཡིན།
འཛུམ་མདངས་ནི་སེམས་ཀྱི་སྨག་རུམ་མུན་པ་སེལ་བྱེད་ཀྱི་ཆུ་ཤེལ་ཅན་དེ་ཡིན་ལ། ལ་རྒྱའི་ཅང་ཤེས་འགུག་པའི་འགྱུར་མེད་ཀྱི་སྲབ་མདའ་དེ་ཡང་ཡིན།
འཛུམ་མདངས་ནི་སེམས་ཀྱི་མཚོ་མོར་བགྲོད་པའི་ཤིང་གྲུ་ཆུང་ཆུང་དེ་ཡིན་ལ། ལས་ཀྱི་ཉ་མོ་འཁོན་པའི་ལྕགས་ཀྱུ་ཕྲ་མོ་དེ་ཡང་ཡིན།
འཛུམ་མདངས་ནི་ཀུན་གྱིས་སྨོན་པའི་ཆར་ལྡན་དུས་ཀྱི་སྤང་རྒྱན་མེ་ཏོག་དེ་ཡིན་ལ། རེ་བ་དང་འདུན་པས་ཁེངས་པའི་དྲོ་སྐྱིད་ཀྱི་ཉིན་བྱེད་དེ་ཡང་ཡིན།
མདོར་ན། ལྷད་མེད་ཀྱི་འཛུམ་མདངས་ནི་ལྷད་མེད་ཀྱི་གསེར་དངུལ་ལས་ལྷག་ཅིང་། དེང་གི་འཚོ་བའི་ཁྲོད་དུ་ཞི་ལྷོད་དང་འཛུམ་མདངས་ནི་ང་ཚོར་དགོས་པའི་མཆོག་ནོར་དེ་ཡིན་པས། ཚང་མས་རྟག་ཏུ་འཛུམ་མདངས་ཀྱི་འདབ་བརྒྱ་ལྷུག་པོར་གྲོལ་ཅིང་། དཔལ་དང་ལོངས་སྤྱོད་ལྡན་པའི་དེང་གི་འཚོ་བ་གསར་པར་རོལ་ཐུབ་པའི་འབད་འབུངས་གནོངས་དང་།