ཞོགས་པའི་ཉི་ཟེར་ལུས་ལ་ཕོག་རུང་།།

སེམས་ཀྱི་རུམ་ཁར་དྲོད་ཅིག་མི་འདུག །

གཞན་ཡུལ་འཚོ་བའི་ཉིན་མ་རེ་རེར།།

ཕ་མ་དྲན་པ་ཐེངས་གཅིག་མིན་ནོ།།

ལྷོ་བྱང་གཉིས་ཀྱི་ཆུ་འཛིན་དཀར་མོ།།

ས་མཐར་རྒྱུ་བའི་མི་ང་འདྲ་བྱུང་།།

ཆུ་འཛིན་གསེབ་ཀྱི་ཉི་ཟླ་མཐོང་དུས།།

དྲིན་ཆེན་ཕ་མ་ཝ་ལེར་དྲན་བྱུང་།།

སྒྲ་སྙན་འབྲུག་མགོ་ལག་ལ་ཐོགས་ན།།

སོར་མོས་དབྱངས་ལ་རམ་འདེགས་བྱེད་དེ།།

མཚུངས་མེད་ཕ་མ་དྲན་པའི་གླུ་ཆུང་།།

ངག་ནས་དབང་མེད་ལེན་པར་ཐལ་ལོ།།

རེ་བའི་སྡོང་པོས་མགོ་ལྕོག་ལྡེམ་དུས།།

རྒྱ་ལྕང་ལོ་མ་ས་ལ་ལྷུངས་སོང་།།

ཡ་ཆུང་སེམས་པ་འཕར་ཞིང་ལྡིང་དུས།།

བྱམས་ལྡན་ཕ་མ་ལྷང་ངེར་དྲན་བྱུང་།།

ནམ་ཟླ་དགུན་ཁའི་རླུང་བུ་ངར་མས།།

དམར་ཆུང་སེམས་པ་གྲང་གིས་གཙེས་བྱུང་།།

ཁྲི་གདུགས་ཉི་མ་དགུང་ནས་འཛུམ་དུས།།

ཕ་མའི་བཀའ་དྲིན་ཝ་ལེར་དྲན་བྱུང་།།

སྐྱ་རེངས་བུ་མོ་མཐོངས་ནས་འཕགས་དུས།།

ཁྱིམ་དང་ལྷས་ཀྱི་སྒོ་ཁར་བྲེལ་བའི།།

སེམས་ཀྱི་མར་མེ་ཀོང་བུ་རྣམ་གཉིས།།

དྲན་ནས་མིག་མཐའ་མཆི་མས་བརླན་སོང་།།