འདི་ནི་རྡོ་རྗེ་དོན་གྲུབ་ཀྱིས་གཞི་རིམ་དུ་འཁྲབ་སྟོན་བྱེད་བཞིན་པ།

འདི་ནི་རྡོ་རྗེ་དོན་གྲུབ་ཀྱིས་རང་གི་དགེ་རྒན་དྲིན་ཅན་ཀྲུང་གོའི་དམངས་གཞས་ཀྱི་རོལ་དབྱངས་དགེ་རྒན་ཆེ་མོ་གསུམ་གྱི་གྲས་ཡིན་པའི་ཀྲུང་དབྱང་མི་རིགས་སློབ་ཆེན་གྱི་གླུ་དབྱངས་དགེ་རྒན་སྨི་རུའོ་རུའུ(གཡས་ཀྱི་དང་པོ)དང་དྲན་རྟེན་མཉམ་པར་རྒྱག་བཞིན་པ།

འདི་ནི་རྡོ་རྗེ་དོན་གྲུབ་ཀྱིས་ཁྱིམ་དུ་རོལ་དབྱངས་ལ་དགའ་པོ་ཡོད་མཁན་སློབ་མ་ཚོར་རིན་མེད་དུ་གཞས་སློབ་བཞིན་པ།

འདི་ནི་ལྷ་ས་གྲོང་ཁྱེར་གླུ་གར་ཚོགས་པའི་མི་རིགས་མཐུན་སྒྲིལ་གྱི་རོལ་དབྱངས་ཟློས་གར“ང་ཚོ་མཉམ་དུ་གནས”ཞེས་པའི་ནང་རྡོ་རྗེ་དོན་གྲུབ་ཀྱིས་འཁྲབ་པའི་སྐྱེས་པའི་འཁྲབ་སྟོན་པ་གཙོ་བོ་སྤོ་བོ་བཀྲ་ཤིས་ལགས་ཡིན་པ།

འདི་ནི་རྡོ་རྗེ་དོན་གྲུབ་ཀྱི་མི་སྒེར་གྱི་གླུ་གཞས་ཆེད་བསྒྲིགས་དང་པོ《གནས་ཆེན་ཡུལ་གྱི་སྨོན་འདུན》ཞེས་པའི་ཁ་ཤོག་ཡིན་པ།

འདི་ནི་རྡོ་རྗེ་དོན་གྲུབ་ཀྱིས་གཞི་རིམ་དུ་འཁྲབ་སྟོན་བྱེད་སྐབས་མང་ཚོགས་ཀྱིས་ཁོང་ལ་དཀར་གཙང་ཁ་བཏགས་གཡོག་བཞིན་པ།

འདི་ནི་རྡོ་རྗེ་དོན་གྲུབ་ཀྱིས་2023ལོར་ཅང་སུའུ་ཞིང་ཆེན་རིག་རྩལ་སྐོང་འཁྲབ་ཚོགས་པའི་མཉམ་དཀྲོལ་རོལ་དབྱངས་འདུ་ཚོགས་ཐོག《ཕ་ཡུལ་གྱི་ཆང་གཞས》གཏོང་བཞིན་པ།

འདི་ནི་རྡོ་རྗེ་དོན་གྲུབ་ཀྱིས་ལྷ་སའི་རྫོང་རྒྱབ་ཀླུ་ཁང་དུ་ཡུལ་སྐོར་བ་དང་གྲོང་མིར་མངའ་རིས་ཀྱི་དམངས་གཞས་གཏོང་བཞིན་པ།

“རོལ་དབྱངས་དོན་གཉེར་གྱི་ལམ་དུ་སྐྱོད་མཚམས་མི་འཇོག་པར་ག་དུས་ཡིན་ན་ཡང་སེམས་ཁམས་དྭངས་གཙང་དང་སྤྲོ་སྣང་ལྡན་པ་རྒྱུན་འཁྱོངས་བྱེད་དགོས”ཞེས་པ་ནི་རྡོ་རྗེ་དོན་གྲུབ་ཀྱིས་རྒྱུན་དུ་ཤོད་པའི་སྐད་ཆ་ཞིག་རེད།

འདི་ལོ་ལོ་52ལ་སླེབས་པའི་རྡོ་རྗེ་དོན་གྲུབ་ནི་ལྷ་ས་གྲོང་ཁྱེར་གླུ་གར་ཚོགས་པའི་རྒྱལ་ཁབ་ཀྱི་རིམ་པ་གཉིས་པའི་འཁྲབ་སྟོན་པ་དང་གཞོན་ནུ་གླུ་དབྱངས་མཁས་ཅན་ཞིག་རེད། ཁོང་གིས་གཞན་དང་མི་འདྲ་བའི་སྙན་འཇེབས་ལྡན་པའི་ངག་གི་འགྱུར་ཁུག་ལ་བརྟེན་ནས་བོད་ཀྱི་རིག་གནས་ཀྱི་ཡིད་དབང་འཕྲོག་ཤུགས་མཚོན་པར་བྱས་ཡོད།

རྡོ་རྗེ་དོན་གྲུབ་ཀྱི་རོལ་དབྱངས་ཀྱི་ལམ་བུའི་སྐོར་གླེང་ཚེ་ཀྱག་ཀྱོག་གི་མི་ཚེའི་ལམ་བུ་མང་པོ་བརྒྱུད་དེ་མཐར་བློ་རྩ་བརྟན་པོས་ཕུགས་བསམ་དོན་དུ་གཉེར་ཞེས་ཆོད་སྡོམ་བཞག་ཆོག

རྡོ་རྗེ་དོན་གྲུབ་ནི་མངའ་རིས་ས་ཁུལ་སྤུ་ཧྲེང་རྫོང་གི་འཁོར་ཆགས་གྲོང་ཚོར་སྐྱེས་པ་དང་། ཕ་ཡུལ་གྱི་ཐུན་མོང་མ་ཡིན་པའི་ས་ཁམས་ཆགས་ཚུལ་གྱིས་དམིགས་བསལ་གྱི་མི་རིགས་རིག་གནས་སྣ་ཚོགས་དར་ནས་ས་གནས་ཀྱི“ཤོན”དང་། “བྲོ” “ཤོན་ཆས”འཁོར་ཆགས་ཀྱི་ལྷ་མོ་སོགས་ཚང་མར་ལོ་རྒྱུས་ཡུན་རིང་ལྡན་ཡོད།

1988ལོར་རྡོ་རྗེ་དོན་གྲུབ་མངའ་རིས་ས་ཁུལ་སློབ་འབྲིང་གིས་ས་ཁུལ་གྱི་གཞོན་ནུ་གཞས་པ་གཞས་མའི་འགྲན་བསྡུར་ཆེན་པོ་སྐབས་དང་པོར་འོས་སྦྱོར་བྱས་པ་མ་ཟད། རང་ཉིད་ཀྱིས་བྲིས་པའི་གཞས་ཚིག《མཛེས་སྡུག་ལྡན་པའི་སྤུ་ཧྲེང》ལ་བྱ་དགའ་ཨང་དང་པོ་ཐོབ་ཡོད།

“སློབ་གྲྭར་འགྲོ་སྐབས། རྟག་ཏུ་རླུང་འཕྲིན་ནས་གཞས་གཏོང་བ་ཐོས་སྐབས་དེའི་འགྱུར་ཁུག་བློ་ལ་གསལ་པོར་ངེས་རྗེས་རང་ཉིད་ཀྱིས་ཚིག་གསར་པ་བཟོ་གི་ཡོད”ཅེས་རྡོ་རྗེ་དོན་གྲུབ་ཀྱིས་ཕྱིར་དྲན་བྱེད་བཞིན་དུ་བཤད་པ་དང་། ཁོང་གིས“དེ་དུས་ངས་རྒྱུན་དུ་གཞས་ཚིག་བྲིས་ནས་གཞས་གཏོང་བ་དང་སྐབས་རེ་གཞས་གཏོང་ཞོར་ཞབས་བྲོར་དེ་བས་དབྱིངས་ཚུད་འགྲོ་ཡི་འདུག”ཅེས་བཤད།

ཐེངས་དང་པོར་དེ་ལྟ་བུའི་གྲུབ་འབྲས་ཐོབ་པས་རྡོ་རྗེ་དོན་གྲུབ་ཀྱིས་རང་ཉིད་ཀྱི་རོལ་དབྱངས་ཀྱི་འཇོན་ཐང་ལ་ངོས་འཛིན་གསར་པ་ཞིག་བྱུང་ལ། མངའ་རིས་ས་ཁུལ་རིག་རྩལ་ལས་དོན་ཚོགས་པའི་ཚོགས་གཙོ་ཉི་མ་ཟླ་བས་ལྷན་སྐྱེས་སྐད་ངག་ཡག་པའི་ན་གཞོན་དེར་དོ་སྣང་བྱུང་སྟེ་གདན་ཞུ་བྱས་ཀྱང་། དེ་དུས་རྡོ་རྗེ་དོན་གྲུབ་ཀྱི་སེམས་ནང་ཕྱི་རོལ་འཇིག་རྟེན་ལ་ལྟ་བར་འགྲོ་འདོད་ཁོ་ན་མ་གཏོགས་མེད་པས། མི་མང་པོས་ཡིད་སྨོན་བྱེད་པའི་གདན་ཞུ་བཞག་ནས་བོད་ལྗོངས་མི་རིགས་སློབ་གླིང་ལ་དྲུང་ཡིག་ཆེད་ལས་སྦྱོང་བར་འགྲོ་རྒྱུའི་གདམ་ག་བྱས། སློབ་གྲྭར་སྡོད་རིང་རྡོ་རྗེ་དོན་གྲུབ་ཀྱིས་གཞས་རང་སྦྱོང་དང་རང་ཉིད་ཀྱིས་གཞས་བཏང་ནས་རོལ་དབྱངས་ཀྱི་འགྲན་བསྡུར་མི་ཉུང་བར་ཞུགས་པར་གྲུབ་འབྲས་མི་དམན་པ་ཐོབ་ཡོད།

1992ལོར་སློབ་གྲྭ་ཐོན་གྲབས་ཡོད་པའི་རྡོ་རྗེ་དོན་གྲུབ་ལ་སླར་ཡང་ཉི་མ་ཟླ་བའི་གདན་ཞུ་འབྱོར་བ་དང་། མངའ་རིས་ས་ཁུལ་རིག་རྩལ་ལས་དོན་ཚོགས་པའི་ཆེད་ལས་མིན་པའི་གཞས་པ་འབའ་ཞིག་དེར་གྱུར། “དེ་དུས་རིག་རྩལ་ལས་དོན་ཚོགས་པའི་གཞས་པ་དང་གཞས་མ་མང་ཆེ་བར་ཆེད་ལས་རོལ་དབྱངས་ཀྱི་སློབ་གསོ་དང་གསོ་སྦྱོང་ཐོབ་མྱོང་ལ། ལ་ལ་བྱིས་པའི་དུས་ནས་འགོ་བཙུགས་ཏེ་ལོ་བཅུ་གྲངས་སྦྱོང་བརྡར་བྱེད་མྱོང་བས་རྨང་གཞི་ཧ་ཅང་ཡག་པོ་ཡོད”ཅེས“རང་སྦྱོང་བྱས་ནས་གཞས་པར་གྱུར་པའི”རྡོ་རྗེ་དོན་གྲུབ་ཀྱིས་རང་ཉིད་ལ་གནོན་ཤུགས་ཆེན་པོ་འཕྲད་པའི་མྱོང་ཚོར་བརྗོད།

དེ་རྗེས་རྡོ་རྗེ་དོན་གྲུབ་བོད་ལྗོངས་སྒྱུ་རྩལ་སློབ་གྲྭར་དུས་ཡུན་ལོ་གཅིག་དང་ལོ་ཕྱེད་ཀྱི་གླུ་དབྱངས་རིགས་པའི་གཞུང་ལུགས་ཀྱི་ཟབ་སྦྱོང་བྱེད་པར་བསྐྱོད་ཅིང་། དེ་སྔོན་སྦྱོང་མྱོང་མེད་པའི་རིགས་པའི་གཞུང་ལུགས་ཀྱི་ཤེས་བྱ་གསབ་སྦྱོང་བྱེད་འགོ་ཚུགས།

“ངའི་དེ་རིང་གི་གྲུབ་འབྲས་ནི་རྒན་ལའེ་ཧྲེང་ཙེ་ལགས་ཀྱིས་བཀའ་སློབ་གནང་བ་ལས་ཐོབ་པ་ཞིག་ཡིན། སློབ་གྲྭར་སློབ་སྦྱོང་བྱེད་རིང་། ང་རང་སེམས་སྐྱིད་པོ་མེད་པ་དང་རྣམ་གཡེང་ལེ་ལོའི་དབང་དུ་འཕྱན་སྐབས་རྒན་ལའེ་ལགས་ཀྱིས་ང་ལ་སྐུལ་ལྕག་དང་བློ་སྒོ་འབྱེད་ཀྱི་ཡོད”ཅེས་རྡོ་རྗེ་དོན་གྲུབ་ཀྱིས་བརྗོད།

རྡོ་རྗེ་དོན་གྲུབ་ཀྱི་ངོས་ནས་བརྗོད་ན། དུས་ཐུང་གི་སློབ་སྦྱོང་གཅིག་པུས་འགྲིག་ཐབས་གཏན་ནས་མེད་ཅིང་། ཁོང་ད་དུང་དེ་བས་ཆེད་ལས་དང་བརྒྱུད་རིམ་ལྡན་པའི་རིགས་པའི་གཞུང་ལུགས་ཀྱི་ཤེས་བྱ་སྦྱོང་འདོད་ཆེ། མངའ་རིས་ས་ཁུལ་རིག་རྩལ་ཚོགས་པར་ལོག་རྗེས་བསམ་བློ་ཡང་ཡང་བཏང་ནས་ལས་ཀ་ནས་དགོངས་པ་ཞུས་ཏེ་ཀྲུང་དབྱང་མི་རིགས་སློབ་ཆེན་གླུ་དབྱངས་ཆེད་ལས་ལ་རྒྱུགས་གཏོང་རྒྱུའི་ཐག་བཅད།

1997ལོར་རྡོ་རྗེ་དོན་གྲུབ་དམིགས་བསལ་སྒོས་ཀྲུང་དབྱང་མི་རིགས་སློབ་ཆེན་གླུ་དབྱངས་ཆེད་ལས་ཀྱིས་བསྡུས་པ་དང་། གྲགས་ཅན་གླུ་དབྱངས་སློབ་གསོ་མཁས་ཅན་སྨི་རུའོ་རུའུ་དགེ་རྒན་ལ་བསྟེན་ནས་གླུ་དབྱངས་སྒྱུ་རྩལ་གྱི་ཤེས་བྱ་རྩེ་གཅིག་ཏུ་སྦྱོང་བའི་སྐལ་བཟང་ཐོབ།

སློབ་གྲྭ་ཐོན་རྗེས་རྡོ་རྗེ་དོན་གྲུབ་སྔ་རྗེས་སུ་མངའ་རིས་ས་ཁུལ་རིག་རྩལ་ཚོགས་པ(རྗེས་སུ་མངའ་རིས་ས་ཁུལ་ཞང་ཞུང་སྒྱུ་རྩལ་ཚོགས་པ་ཞེས་པར་མིང་བསྒྱུར)དང་ལྷ་ས་གྲོང་ཁྱེར་གླུ་གར་ཚོགས་པར་ལས་ཀ་བྱས་ནས་ཆེད་ལས་ཀྱི་སྐྱེས་པའི་སྒྲ་གདངས་མཐོ་བའི་གླུ་གཞས་གཏོང་མཁན་གྱི་འཁྲབ་སྟོན་པ་ཞིག་ལ་གྱུར། རོལ་དབྱངས་གསར་རྩོམ་ལ་དགའ་བའི་ཁོང་གི་གླུ་གཞས་ཀྱི་ཉམས་འགྱུར་ནས་གཞས་ཚིག་ཚང་མར་ཕ་ཡུལ་གྱི་ཁྱད་ཆོས་ཟབ་མོ་ལྡན་ཡོད། ཕ་ཡུལ་གྱི་གནས་ཡུལ་དང་། ཁོར་ཡུག་གི་ཁྱད་ཆོས། མི་ཆོས་རིག་གནས་ཀྱི་བརྩེ་སེམས་བཅས་ཀྱིས་ཁོང་གི་རོལ་དབྱངས་ཀྱི་ཉམས་འགྱུར་ལ་ཤུགས་རྐྱེན་གཏིང་ཟབ་ཐེབས།

2014ལོའི་ཟླ་3ཚེས་28ཉིན་རྡོ་རྗེ་དོན་གྲུབ་ཀྱི་མི་སྒེར་གྱི་ཆེད་བསྒྲིགས་དང་པོ《གནས་ཆེན་ཡུལ་གྱི་སྨོན་འདུན》འགྲེམས་སྤེལ་བྱས་པ་དང་། ཆེད་བསྒྲིགས་དེའི་ནང《གནའ་བོའི་ཉམས་འགྱུར་གྱི་དགའ་གླུ》དང་། 《ཚེ་གྲོགས་ལས་དབང》 《ཕ་ཡུལ་བོད་ལྗོངས》སོགས་མངའ་རིས་ཀྱི་ཁྱད་ཆོས་ཟབ་མོ་ལྡན་པའི་དམངས་གཞས་12བསྡུས་ཡོད་པ་འདིས་ཀྱང་བོད་ཀྱི་མི་རིགས་རོལ་དབྱངས་ཐག་རིང་ས་ཁུལ་གྱི་ཞིང་འབྲོག་མང་ཚོགས་ཚོས་ཉན་ཐུབ་པའི་ཁོང་གི་བསམ་འདུན་མངོན་འགྱུར་བྱུང་ཡོད།

རོལ་དབྱངས་ཀྱི་ལམ་དུ་ཞུགས་ཚུན། རྡོ་རྗེ་དོན་གྲུབ་ལ་སྔ་རྗེས་སུ“ཀྲུང་དབྱང་མི་རིགས་སློབ་ཆེན་གྱི་མི་རིགས་སྐར་མའི་བུམ་པའི་གླུ་དབྱངས་འགྲན་བསྡུར”གྱི་བྱ་དགའ་ཨང་གཉིས་པ་དང་། “བོད་རང་སྐྱོང་ལྗོངས་གླུ་དབྱངས་འགྲན་བསྡུར”གྱི་དམིགས་བསལ་བྱ་དགའ། ལྷ་ས་གྲོང་ཨུད་དྲིལ་བསྒྲགས་པུའི“གཅིག་རེ་ལྔའི་འདུ་འགོད”བྱ་དགའ་སོགས་མང་པོ་ཐོབ་ཡོད། 2019ལོར་ལྷ་ས་གྲོང་ཁྱེར་གླུ་གར་ཚོགས་པའི་མི་རིགས་མཐུན་སྒྲིལ་མཚན་ཚོགས་ཀྱི་རོལ་དབྱངས་ཟློས་གར“ང་ཚོ་མཉམ་དུ་གནས”ཞེས་པའི་ནང་ཁོང་གིས་སྐྱེས་པའི་འཁྲབ་སྟོན་པ་དང་པོ་སྤོ་བོ་བཀྲ་ཤིས་ལགས་འཁྲབ་པར་ལས་རིགས་ནང་ཁོངས་ཀྱི་མི་སྣ་དང་རིགས་གཅིག་མཁས་ཅན་གྱི་ཚད་མཐོའི་གདེང་འཇོག་ཐོབ་ཡོད།

བྱས་པ་ཆུད་མི་ཟ་བའི་དཔེ་ལྟར་ལོ་དང་ཟླ་བ་བསྟུད་མར་དཀའ་སྤྱད་འབད་བརྩོན་བྱས་མཐར། ད་ཆ་ཁོང་ལ་གྲུབ་འབྲས་དང་བདེ་སྐྱིད་ཀྱིས་ཕྱུག་པའི་ཚོར་སྣང་སྐྱེ་བཞིན་མཆིས། འབྱུང་འགྱུར་རྡོ་རྗེ་དོན་གྲུབ་ཀྱི་འཚོ་བ་ད་དུང་གླུ་དབྱངས་དང་དམ་པོར་འབྲེལ་ངེས་རེད་ལ་ཁོང་གིས་ཀྱང་མུ་མཐུད་དཔའ་ངར་ཆེན་པོས་ཕུགས་འདུན་དོན་གཉེར་བྱེད་པ་དང་སེམས་གཏིང་ནས་གླུ་དབྱངས་ལེན་ངེས་རེད།