གནམ་ལོ་གསར་པར་སྙིང་སྟོབས་གསར་པ་སྐྱེད་དགོས།
གནམ་ལོ་གསར་པ་ཤར་སོང་། ལོ་གསར་ནི་འཚོ་བའི་ཤོག་དཀར་ལ་ཕབ་པའི་དུས་ཀྱི་རྟགས་དམ་ཞིག་དང་། དུས་ཀྱིས་ངོ་གདོང་ལ་འཐེན་པའི་ལོ་ཟླའི་གཉེར་རིས་གསར་པ་ཞིག་རེད།
གནམ་ལོ་གསར་སོང་། བྱིས་པའི་དུས་སུ་ལོ་གསར་ནི། མཛུབ་རྩེར་བགྲངས་ནས་སྒུག་ཡུན་རིང་བའི་སེམས་ཀྱི་རེ་སྒུག་ཅིག་དང་། གཞོན་ནུའི་དུས་ཀྱི་ལོ་གསར་ནི། གཞན་ཡུལ་འགྲིམས་ནས་ཨ་ཐང་ཆད་པའི་ལུས་སེམས་གཉིས་ལ་ངལ་གསོ་དང་། བྲལ་ཡུན་རིང་བའི་ཕ་མ་སྤུན་མཆེད་དང་མཉམ་འཛོམས་ཀྱི་སེམས་ཀྱི་རེ་སྨོན་ཞིག་རེད། རྒས་དུས་སུ་ལོ་གསར་ནི། འདས་སོང་འཚོ་བར་དྲན་གསོ་བཞིན་ཐག་རིང་བུ་ཕྲུག་ལ་འཆང་བའི་དྲན་སེམས་ཤིག་རེད།
གནམ་ལོ་གསར་དུ་ཤར་སོང་། ལོ་གསར་མ་རེད་ལས་གསར་རེད་ཅེས་པའི་དཔེ་བཞིན། ང་ཚོས་གནམ་ལོ་གསར་པའི་ལས་གསར་མང་པོའི་ཁྲོད་ནས། འཚོ་བ་གསར་པར་རྒྱང་ལྟ་དང་རེ་སྨོན་བྱེད། དོན་དུ་ལོ་གསར་ནི་འདས་དང་མ་འོངས་བར་གྱི་མཚམས་རྡོ་ཙམ་ལས། སེམས་དང་ལུས་པོ་བརྗེས་པའི་སྐྱེ་བ་གསར་པའི་ལམ་སྣེ་མ་རེད། གནམ་ལོ་གསར་དུ་ཤར་ཡང་། ཤ་རུས་ལས་གྲུབ་པའི་ལུས་རྙིང་སྔར་བཞིན་རང་སེམས་དང་འགྲོགས་ནས། འཚོ་བའི་ལམ་དུ་འཁང་ར་དང་སྨྲེ་སྔགས་མེད་པར། མིག་ཆུ་དང་རྔུལ་ཆུ་བཞུར་གྱིན། དཀའ་བ་དང་སྡུག་བསྔལ་ཁྱད་དུ་བསད་ནས། སྒྱིད་པ་དང་རིག་པ་བསྒྲིམས་ཏེ་མུ་མཐུད་མདུན་དུ་སྐྱོད་དགོས།
གནམ་ལོ་གསར་པ་འཇིག་རྟེན་འདིའི་ངོ་རིས་གསར་པ་ཞིག་ཡིན་མི་སྲིད་ལ། འཚོ་བའི་ལམ་བུའི་གྱེན་ཐུར་དང་ཀྱག་ཀྱོག་རང་བཞིན་དུ་ཡལ་ཏེ། བདེ་ཞིང་སྙོམས་ལ་ཡངས་ཤིང་རྒྱ་ཆེ་བའི་ལམ་བུ་གསར་པ་ཞིག་ཨ་སྔོན་ནམ་མཁའི་མཐོངས་ནས་ང་ཚོའི་མདུན་དུ་རང་བཞིན་དུ་ལྷུང་མི་སྲིད་པར། ལམ་གྱི་འབར་འབུར་སྔར་བཞིན་འགྲིམ་དགོས་ལ། ཟབ་མོའི་ཆུ་བོ་དང་མཐོན་པོའི་ལ་མོ། དོག་མོའི་འཕྲང་ལམ་དང་མཚན་མོའི་སྨག་མུན་སྔར་མུས་བཞིན་འགྲོལ་དགོས། དེས་ན། ལོ་གསར་ནི་མི་ཚེའི་ལམ་གྱི་སེམས་ངལ་ལུས་ངལ་ཙམ་ལས། འབད་མེད་སྟོང་བསམ་མངོན་དུ་གྱུར་བའི་ནོར་བུ་དགོས་འདོད་ཀུན་འབྱུང་དེ་ག་ལ་ཡིན་སྲིད།
གནམ་ལོ་གསར་པར་རྟེན་འབྲེལ་སྒྲིག་འོས་ལ་གནམ་ལོ་གསར་པར་རེ་བ་གསར་པ་ཡང་འཆང་ཆོག་མོད། གནམ་ལོ་གསར་པ་ཨ་སྔོན་མཐོངས་ནས་ལྷུང་བའི་དངོས་གྲུབ་ཏུ་བསམས་ནས། འབྲས་བུ་ཐམས་ཅད་སྐྱིད་པོའི་གཉིད་ཀྱི་ངོ་མཚར་རྨི་ལམ་བཞིན་དུ་བསྒུགས་ཚེ། གསར་དུ་ཤར་བའི་གནམ་ལོ་དེ་སྔར་བཞིན་མི་ཚེ་རྙིང་པ་དེ་ཡིན་སྲིད། འཇིག་རྟེན་འཚོ་བའི་ལམ་བུ་ནི་མ་གཞི་ནས་ཀྱག་ཀྱོག་འབར་འབུར་ཅན་ཞིག་ཡིན་ན། དཀའ་བའི་བྲག་ལ་མ་འཛེགས་ན། བདེ་མོའི་ཐང་ལ་མི་སླེབས་པའི་དཔེ་བཞིན། དཀའ་སྡུག་གི་རྔུལ་ཆུ་བཞུར་བའི་འབད་འཐབ་ཀྱི་སྙིང་སྟོབས་ཤིག་མེད་ཚེ་བདེ་མོའི་ལམ་ཇི་ལྟར་རྙེད་སྲིད།
གནམ་ལོ་གསར་པར་སྨོན་འདུན་ཞུ་དགོས་ལ། གནམ་ལོ་གསར་པར་རྒྱན་གོས་ལེགས་པར་བཀླུབས་ནས་དགའ་གཏོང་ཡང་བྱེད་ཆོག་མོད། གནམ་ལོ་གསར་པར་སྔར་མེད་ཀྱི་འབྲས་བུ་གསར་པ་ཞིག་སྨིན་དགོས་ཚེ། ཆེས་ལེགས་པའི་རྟེན་འབྲེལ་ནི་སྙིང་རུས་དང་འབད་འཐབ་ཀྱི་གོ་ཆ་གསར་པ་བཀླུབས་རྒྱུ་དེ་ལོས་ཡིན། “ཚེ་སྲོག་ནི་བྲག་རི་མཐོན་པོར་འཛེགས་པ་དང་མཚུངས་ཏེ། གོམ་པ་རེ་རེ་བརྟན་པོས་མདུན་དུ་སྤོས་ཚེ། གཞི་ནས་དཀའ་དུབ་ཀྱི་གནས་ལས་གྲོལ་མཐར་ལེགས་གྲུབ་ཀྱི་ཕ་མཐར་གསོན་ཐུབ” ཕམ་ཉེས་ཀྱི་སྨག་མུན་དང་ལེགས་གྲུབ་ཀྱི་འོད་སྣང་བར་དུ་དམིགས་བསལ་གྱི་འགྲོ་ལམ་ཞིག་མེད་དུས། འབད་འཐབ་ཀྱི་ཁ་ཕྱོགས་ལ་འགྱུར་བ་མེད་པར། ཕམ་ཉེས་ཁྲོད་དུ་ཡིད་ཐང་མ་ཆད་པར། འགྱེལ་སའི་གནས་དེ་རང་ནས་ཡར་ལ་ལངས་ཏེ་མུ་མཐུད་འབད་འབུངས་མདུན་སྐྱོད་བྱས་ཕྱིན། ནམ་ཞིག་ལེགས་གྲུབ་ཀྱི་འོད་སྣང་དེས་ཁྱེད་ཀྱི་མདུན་ལམ་ཡངས་མོ་གསལ་བར་གྱུར་སྲིད།
གནམ་ལོ་གསར་པ་ནི་ཚད་ཐིག་དང་ཁ་ཕྱོགས་གསར་པ་ཞིག་ཡིན་ཆོག་སྟེ། ཚད་ཐིག་དེ་ནས་འགྲོ་ལམ་གསར་པ་ཞིག་ལ་རྒྱང་ལྟ་ཡང་བྱེད་ཆོག རྒྱང་ལྟ་ནི་བག་ཕེབས་སྐྱིད་འདོད་ཁྲོད་ཀྱི་ལོངས་སྤྱོད་ཅིག་མིན་ལ། རྒྱང་ལྟ་ནི་འགན་མེད་བརྩོན་མེད་ཀྱི་སྐྱིད་པོའི་རྨི་ལམ་ཞིག་དེ་བས་མ་ཡིན། གནམ་ལོ་གསར་སོང་། མི་ཚེའི་དུས་མཚམས་གསར་པ་འདི་ནས་མ་འོངས་འཚོ་བར་རྒྱང་ལྟ་བྱེད་ཆོག་ཅིང་། འཚོ་བ་གསར་པའི་ལམ་བུར་བཀྲ་ཤིས་ཁ་གཡང་ཡང་སྒྲོན་ཆོག གནམ་ལོ་གསར་སོང་། གནམ་ལོ་གསར་པར་རྣམ་པ་གསར་པ་ཞིག་དང་སྙིང་སྟོབས་གསར་པའི་ངང་ནས་མདུན་སྐྱོད་བྱེད་དགོས་ལ། འབད་པ་དང་བརྩོན་པའི་ངང་ནས་འབྲས་བུ་གསར་པར་བརྩོན་ལེན་བྱེད་དགོས།