བཀྲ་ཤིས་ལོ་གསར་དགའ་བ་འབུམ་གྱིས་བསུ།
སྟོན་གྱི་ལོ་འདབ།
བཀྲ་ཤིས་ལྗོན་ཤིང་ལོ་འདབ་སྟུག་པོར་རྒྱས།།
བཀྲ་ཤིས་འབྲུག་སྒྲ་ལྡིར་ནས་གྲུ་ཆར་བསྙིལ།།
བཀྲ་ཤིས་ཤིང་འབྲུག་གནམ་ལོ་གསར་ཚེས་ལ།།
བཀྲ་ཤིས་འགྲོ་དྲུག་བདེ་ཞིང་སྐྱིད་པར་སྨོན།།
བཀྲ་ཤིས་མཁའ་ལ་འཁོར་ལོ་རྩིབས་བརྒྱད་མཚར།།
བཀྲ་ཤིས་ས་ལ་པད་མ་འདབ་བརྒྱད་མཛེས།།
བཀྲ་ཤིས་བར་ན་ཞི་བདེའི་འཇའ་ཚོན་བཀྲ།།
བཀྲ་ཤིས་ལོ་མོ་ཕྱྭ་དང་གཡང་གིས་བརྒྱན།།
བཀྲ་ཤིས་ལོ་གསར་དར་དང་ཕྱེ་མས་བསུ།།
བཀྲ་ཤིས་མི་ཕྱུགས་དགའ་བདེའི་དཔལ་ལ་རོལ།།
བཀྲ་ཤིས་གཞས་དང་ཞབས་བྲོས་གནམ་ས་གཡོ།།
བཀྲ་ཤིས་ལོ་གསར་དགའ་བ་འབུམ་གྱིས་བསུ།།
བཀྲ་ཤིས་ཧི་མ་ལ་ཡས་འཛུམ་མདངས་ཕྱུང་།།
བཀྲ་ཤིས་ཡར་ཀླུང་གཙང་པོས་གླུ་དབྱངས་ལེན།།
བཀྲ་ཤིས་ཡུལ་ལ་ལོ་ཡག་འབྲུ་དྲུག་སྨིན།།
བཀྲ་ཤིས་ལོ་ལ་མངའ་ཐང་རྒྱས་པར་ཤོག །
བཀྲ་ཤིས་འཆམ་མཐུན་སེ་འབྲུའི་རྡོག་པོ་ལ།།
བཀྲ་ཤིས་གཡུར་ཟའི་འབྲས་བཟང་སྨིན་གྱུར་ནས།།
བཀྲ་ཤིས་མི་རིགས་ང་དྲུག་བདེ་ཞིང་སྐྱིད།།
བཀྲ་ཤིས་ལོ་གསར་དགའ་བ་འབུམ་གྱིས་བསུ།།
བཀྲ་ཤིས་ཚེ་རིང་རྣམ་དྲུག་གཡས་སུ་འཁྱིལ།།
བཀྲ་ཤིས་མཐུན་པ་སྤུན་བཞི་གཡོན་དུ་འཁོར།།
བཀྲ་ཤིས་མངའ་ཐང་ལོངས་སྤྱོད་དབུས་སུ་རྫོགས།།
བཀྲ་ཤིས་ལོ་གསར་དགའ་བ་འབུམ་གྱིས་བསུ།།
བཀྲ་ཤིས་ལོ་ལ་གེགས་བར་ཀུན་ཞི་ཞིང་།།
བཀྲ་ཤིས་འཕྲིན་ལས་དབྱར་གྱི་ཆུ་གཏེར་བཞིན།།
བཀྲ་ཤིས་སྔར་བས་གོང་དུ་འཕེལ་གྱུར་ནས།།
བཀྲ་ཤིས་འཕྲིན་བཟང་ཕྱོགས་བཅུར་ཁྱབ་པར་ཤོག །
བཀྲ་ཤིས་བགྲེས་སོང་ཚེ་རིང་ལོ་བརྒྱ་དང་།།
བཀྲ་ཤིས་ན་གཞོན་ཚེ་བསོད་དབང་ཐང་འཕེལ།།
བཀྲ་ཤིས་ལོ་ཆུང་ཤེས་རིག་རྒྱས་པར་ཤོག།
བཀྲ་ཤིས་བསམ་དོན་ལྷུན་གྱིས་གྲུབ་པར་ཤོག །
བཀྲ་ཤིས་མེས་རྒྱལ་གསེར་གྱི་བུམ་པ་ལ།།
བཀྲ་ཤིས་མི་རིགས་འཁོར་ལོ་བཞིན་དུ་འཁོར།།
བཀྲ་ཤིས་འཆམ་མཐུན་པད་མ་རབ་བཞད་པའི།།
བཀྲ་ཤིས་དུང་སྒྲ་ཀུན་ལ་ཁྱབ་པར་ཤོག །