བཀྲ་ཤིས་ལོ་གསར་ལ་ཕུལ་བའི་སྨོན་ཚིག
མེ་ཆར།
ཉིས་སྟོང་ཉེར་བཞིའི་གནམ་ལོ་གསར་ཚེས་ལ།།
ངག་སྙན་སེམས་ཀྱི་དབྱངས་རྟ་གྱེར་དང་ལྷན།།
སྨོན་ཚིག་ཁ་གཡང་བཟང་པོ་འདི་ནས་སྒྲོག །
རྟེན་འབྲེལ་ཚིག་གི་མེ་ཏོག་འདི་ནས་གཏོར།།
དུས་རབས་གསར་པའི་བཀྲ་ཤིས་དུས་བཟང་ཉིན།།
ཕ་དང་ཨ་ཁུས་སྐྱིད་པའི་དགོད་སྒྲ་སྒྲོག །
མ་དང་སྲུ་མོས་ལྡེམ་མྱུར་ཞབས་བྲོ་འཁྲབ།།
བུ་དང་ཚ་བོས་དགའ་བའི་གླུ་དབྱངས་ལེན། །
ཤར་གྱི་སྐྱ་རེངས་འཛུམ་ཆུང་གྲོལ་དང་ལྷན།།
དང་པོ་བཀྲ་ཤིས་ཁ་གཡང་འདི་ནས་སྒྲོག །
བར་དུ་རེ་སྨོན་གསེར་གྱི་འབྲེལ་ཟམ་བཞེངས།།
གནམ་ལོ་གསར་པའི་རྟེན་འབྲེལ་དེ་ནས་འགྲིག །
བཀྲ་ཤིས་གནམ་ལོ་གསར་པའི་དུས་བཟང་ལ།།
བགྲེས་སོང་རྒན་རབས་ཚེ་ཐག་རིང་དུ་བསྲིངས། །
ན་གཞོན་ལང་ཚོའི་འདབ་མ་རབ་ཏུ་རྒྱས།།
འཚོ་བ་གསར་པའི་འཛུམ་མདངས་གང་སར་བསྐྱིལ། །
དར་ཟབ་རྒྱན་གོས་གསར་པ་ལུས་ལ་སྤྲས།།
མངར་གསུམ་ཟས་ཀྱི་སྡེར་ཁ་མཐའ་ནས་སྒྲིག །
དཀར་གསུམ་འོ་མའི་མཆོད་པ་མཁའ་ལ་འཕངས།།
ལོ་མོ་གསར་པའི་དགའ་སྟོན་སྐྱིད་ལ་རོལ།།
ལོ་མོ་གསར་པའི་དུས་བཟང་ཉིན་མོ་ལ།།
རེ་བ་གསར་པ་ཞིག་གི་དབུ་ཁྱུད་བྲིས།།
ཕུགས་འདུན་གསར་པ་ཞིག་གི་སྟ་གོན་བྱས།།
འོད་སྣང་གསར་པ་ཞིག་གི་དྲོ་སྐྱིད་བསུས།།
རྫོགས་ལྡན་གསར་པའི་བཀྲ་ཤིས་དུས་བཟང་ལ།།
སྙན་ཚིག་ངག་རིག་པདྨོ་དབྱངས་སུ་དྲངས།།
ཤིས་ཚིག་བུང་བའི་ཞུ་འཕྲིན་ངག་ལ་གྱེར།།
བདེ་ལེཌ་སྐྱ་རེངས་གསར་པའི་འོད་སྣང་འཕྲོ།།
ལོ་མོ་གསར་དུ་འཛུམ་པའི་ནམ་ཟླའི་ཁྲོད།།
གང་བསམ་ལྷུན་གྱིས་འགྲུབ་པའི་སྨོན་འདུན་ཞུ།།
ཚེ་རིང་ནད་མེད་བདེ་དགའི་དཔལ་ཤར་ཞིང་།།
མངའ་ཐང་ལོངས་སྤྱོད་གཏན་དུ་རྒྱས་པར་ཤོག །