བདག་གི་ཨ་མ།
ནམ་རྒྱུན་འཛུམ་དམུལ་དམུལ་གྱི་ངོ་གདོང་དེ་ལོ་ཟླའི་འཁོར་སྐྱོད་ཀྱི་འགྲོས་དང་འགྲོགས་ནས་འདས་སོང་གི་ལོ་ཟླའི་དན་རྟགས་སུ་བཞག་སྟེ། བསྐྱར་ཟློས་ཀྱི་འཚོ་བའི་ཀློང་དུ་ཙག་ཙིག་ལས་ཀ་དོན་དུ་གཉེར་ནས་རང་གི་ཁྱིམ་ཚང་དང་བུ་ཕྲུག་གི་ཆེད་དུ་དཀའ་ངལ་མཐའ་དག་ལ་གདོང་གཏུག་ཕོད་པ་དེ་ནི་ཁྱེད་ཀྱི་སྙིང་སྟོབས་དང་རང་གཤིས་ལགས།
ཁྱེད་ནི་བས་མཐའི་དབེན་འཇགས་ཀྱི་ཡུལ་ནས་ཇི་ལྟར་ནར་སོན་པ་མ་ཤེས་ལ། ཇི་ལྟར་རྒས་པའང་མ་ཚོར་བའི་འབྲོག་མོ་དཀྱུས་མ་ཞིག་ཡིན་པས། ཆུང་དུས་ནས་ནོར་ལུག་གི་ངུར་སྒྲ་དང་འབའ་སྒྲའི་ཁྲོད་རྩྭ་ཐང་གི་པང་དུ་མི་ཚེ་བསྐྱལ་བ་ཞིག་ཡིན་པས། ཨ་མའི་གཏམ་རྒྱུད་ནི་ནོར་གནག་གི་སུག་རྗེས་ན་ཡོད་ལ། ཨ་མའི་དགའ་སྐྱོ་ཆགས་སྡང་གི་ཚོར་འདུ་མཐའ་དག་ཀྱང་ཆེས་དྭངས་གཙང་གི་རི་སྒང་དེ་རུ་ཡོད། ནམ་རྒྱུན་ཁྱེད་ལ་ཁོམ་དུས་ཤིག་མེད་པས། སློབ་གྲྭ་འགྲིམས་པའི་གོ་སྐབས་དང་རིག་གནས་སློབ་པའི་སྐལ་བ་ནི་ཡེ་ནས་མ་ལྡན། དེ་བས། ཁྱེད་ལ་གཞན་གྱིས་ཡིག་རྨོངས་བ་ཞེས་མིང་བཏགས་ཡོད། ཡིན་ནའང་། ངའི་སེམས་ཁོང་དུ་ཁྱེད་ནི་ཅི་ཡང་ཡོད་མཁན་ཞིག་དང་གང་ཡང་རྟོགས་མཁན་ཞིག་ཏུ་འདོད། དེ་མིན་ཚེ། མེད་པ་ཐམས་ཅད་ཁྱེད་ལས་སློང་ཞིང་། མ་ཤེས་པ་ཐམས་ཅད་ཀྱང་ཁྱེད་ལ་འདྲི་ག་ལ་སྲིད། ད་དུང་། ནམ་རྒྱུན་ཁྱེད་ཀྱིས་ངའི་གདོང་ལ་གཅེས་སྐྱོང་གི་ཚུལ་དུ་བྱིལ་བྱིལ་བྱེད་སྐབས། ངའི་བློ་ངོར་ཁོ་བོའི་ངོ་གདོང་ནི་ཁྱེད་ཀྱི་མཛུབ་མོའི་ཆ་ཤས་སུ་སྣང་། ཁྱེད་ཀྱི་ཕྱག་ཟུང་གི་སྙིམ་པ་དེས་མཁའ་ཡི་སྤྲིན་དཀར་གྱི་ཕུང་པོ་འགེབས་ཐུབ་ལ། ས་ཡི་མེ་ཏོག་གི་ཚོམ་བུ་ཡང་སྐྱོང་ཐུབ་པར་འདོད།
ཨ་མས་དུས་རྒྱུན་ཞོགས་པའི་སྐྱ་རེངས་དང་འགྲོགས་ནས་མལ་ལས་ལངས་ཏེ། ལྷས་འདབས་ཀྱི་ལྕི་བ་རྐང་རེ་རེ་བྱས་ནས་སྒྲུག་ཚར་རྗེས། ཕྱིར་རང་ཁྱིམ་ལ་ལོག་ནས་མེ་ཁ་གསོས་ཏེ་རང་གི་བུ་དང་བུ་མོ་ནངས་ཇ་འཐུང་བར་སྒུག་ཞོར། བྱ་བ་ལམ་འགྲོ་དང་ནད་མེད་ཚེ་རིང་ཡོང་བའི་སྨོན་ལམ་རྩེ་གཅིག་ཏུ་འདེབས་སྐབས། ངས་ད་གཟོད་ཁྱེད་ཀྱི་ལང་ཚོ་དེ་ལོ་ཟླའི་རླུང་བུས་གཙེས་ནས་རིམ་གྱིས་དབུ་ལ་དུང་ལྟར་དཀར་བའི་སྐྲ་ལོའི་ཉག་མ་རེ་རེ་ཐོན་པ་དང་། མདའ་ལྟར་འདྲོང་བའི་སྐུ་གཟུགས་དེ་ཡང་གཞུ་ལྟར་འཁྱོག་པར་ཤེས།
ཞོགས་པ་སྔ་པོ་ནས་སྐད་ངག་འཇམ་པོས་ངའི་བུ་ལོ་ཞེས་ཐེངས་དང་པོར་འབོད་མཁན་དེ་ཨ་མ་ཡིན་ལ། དགོང་མོ་ཉལ་ཁར་སྙིང་ཉེ་ཉེའི་ངང་ངའི་བུ་ཕྲུག་འཁྱགས་འགྲོ་ཟེར་བཞིན་མལ་ཐུལ་དང་ལྭ་བ་གང་མཐུག་གཡོག་མཁན་དེ་ཨ་མ་ཡིན་ལ། སློབ་གྲྭ་ནས་ཕྱིར་ལོག་དུས། ཐོག་མར་ངའི་གམ་དུ་མྱུར་མོར་འོངས་ནས་ངའི་གཅེས་ཕྲུག་དཀའ་བྱུང་ངམ་ཞེས་ཐུགས་ནན་ནན་ངང་འདྲི་མཁན་དེ་ཡང་ཨ་མ་ཡིན་ལ། ཕར་རྒྱང་རིང་ལ་འགྲོ་དགོས་བྱུང་ཚེ། ངའི་གཅེས་ཕྲུག་བྱ་བ་ལམ་འགྲོ་འོང་བར་ཤོག་ཅེས་ཡིད་སེམས་རྩེ་གཅིག་ཏུ་སྨོན་ལམ་འདེབས་མཁན་དེ་ཡང་ཨ་མ་ཡིན། རྒྱལ་ཁའི་དུས་སུ་ཨ་མའི་དགའ་བ་སེམས་ཀྱིས་གནོན་མི་ཐུབ་ལ། ཕམ་པའི་སྐབས་སུ་ཨ་མའི་སེམས་ཁུར་ཡིད་ལ་སྨན། སྐྱིད་པའི་ཉིན་མོར་ཨ་མའི་འཛུམ་མདངས་ལ་ཡལ་དུས་མེད་པར། དུས་དང་རྣམ་པ་ཀུན་ཏུ་རང་གི་བུ་དང་བུ་མོ་བདེ་བ་དང་ལྡན་ཞིང་། སྡུག་བསྔལ་དང་བྲལ་ན་ཅི་མ་རུང་སྙམ་པའི་བྱང་ཆུབ་སེམས་པ་ཅན་དེ་ཨ་མ་ཡིན་ལ། བྱ་བ་གང་ལའང་ལན་དུ་ཅུང་ཙམ་ཡང་མི་རེ་ཞིང་། རང་གི་བུ་དང་བུ་མོའི་ཆེད་དུ་ཚེ་སྲོག་ཀྱང་ཇི་མི་སྙམ་པར་འབུལ་བར་སོམ་ཉི་ཙམ་ཡང་མེད་པའི་དཔའ་མོ་ངོ་མ་དེ་ཨ་མ་ཡིན་པས། མ་གྱུར་ཞེས་འཇིག་རྟེན་ཆེན་པོ་འདིར་བཀའ་དྲིན་ཆེ་བའི་དཔེ་ལ་ཨ་མ་ཁོ་ན་འཇོག་ཅིང་། ཨ་མ་ཁོ་ན་ད་གཟོད་ཚུལ་འཆོས་དང་། གཡོ་སྒྱུ། ངན་སེམས། ཕྲག་དོག་ལ་སོགས་ཀྱི་སེམས་བྱུང་ངན་པའི་དྲི་མས་མ་འགོས་པར་རང་ལ་ཤ་ཚ་ཚ་དང་ཐུགས་མཉེས་མཉེས་གནང་མཁན་གྱི་གང་ཟག་གཅིག་པུ་དེ་ཡིན་པར་འདོད།
ནམ་རྒྱུན་ང་རང་སློབ་གྲྭ་ནས་ཕྱིར་རང་ཁྱིམ་ལ་ལོག་སྐབས། རྩམ་དྲི་འཐུལ་བའི་གཞིས་ཁྱིམ་གྲུ་བཞི་དེའི་ནང་དུ་ཞིམ་མངར་གྱི་འོ་ཇ་ཞིག་བསྐོལ་ནས་སྒུག་པའི་ཨ་མས། ཁྱེད་སློབ་གྲྭའི་ནང་དཀའ་ལས་ཁག་མ་བྱུང་ངམ། ལུས་ཀྱི་ཤ་རིད་དུ་སོང་འདུག་ཅེས་ཤ་ཚ་ཚ་དང་སྙིང་ཉེ་ཉེ་བྱས་ནས་ང་ལ་འདྲི་སྐབས། ང་རང་གནོང་འགྱོད་ཀྱི་ཀློང་དུ་ཚུད། དུས་རྒྱུན་སློབ་གྲྭར་རང་གིས་ཟ་ཐུབ་ཚོད་དང་འཐུང་ཐུབ་ཚོད་ཀྱིས་སྐྱིད་ལ་རོལ་རྗེས། ཀ་བ་གདུང་ལྕམ་མེད་པའི་སློབ་ཁང་ནང་དུ་གཉིད་དང་ལེ་ལོ། སྒྱིད་ལུག་སོགས་ཀྱི་དབང་དུ་སོང་ནས་ལོ་ཟླ་མང་པོ་ཆུད་གཟོད་དུ་བཏང་བ་ཨ་མས་མ་ཚོར་བར། ད་དུང་དངུལ་དང་ལྭ་བ་གང་དགོས་ཀྱང་ང་ལ་ཁ་པར་ཐོངས། ཨ་མས་ཁྱེད་ལ་སྐུར་ཆོག སློབ་གྲྭའི་ནང་ནས་རང་གི་ལུས་ཕུང་ལ་བདག་པོ་བྱོས། འཁྱགས་ལ་མ་འཇུག ལྟོགས་ལ་མ་སྡོད་ཅེས་ཟེར་སྐབས། ངའི་སེམས་སུ་ཨ་མ་ནི་དགོས་མེད་ཀྱི་གཏམ་ཤོད་རྒྱུར་དེ་འདྲའི་དགའ་བ་ལ་ཨང་སྙམ་པ་ལས། ཨ་མའི་དངུལ་ནི་དཀའ་སྡུག་གི་ལོ་ཟླའི་ཁྲོད་ནས་སེན་མགོ་ཁྲག་དང་སེན་རྟིང་རྣག་བྱས་ནས་བཙལ་བ་ཞིག་ཡིན་པ་ཅིས་ཀྱང་མ་རྟོགས། ད་ལྟ་ཕྱིར་འདང་རེ་བརྒྱབ་ན་ཨ་མའི་ལྷད་མེད་ཀྱི་བརྩེ་བ་ནི་ཅི་འདྲའི་རླབས་ཆེ་བ་ཞིག་མ་རེད་དམ།
ངའི་བསམ་མེད་ཀྱི་དྲན་སྣང་ཞིག་ལ། ནམ་ཡང་བརྗེད་དཀའ་བའི་འདས་དོན་ཞིག་ཡོད་པ་དེ་ནི་ཕལ་ཆེར་ལོ་ངོ་བཅུ་ཡི་གོང་དུ་བྱུང་བ་ཞིག་རེད། འདས་ཟིན་པའི་ཕྱིར་དྲན་མང་པོ་ལོ་ཟླའི་རླུང་འཚུབ་བར་ནས་གར་སོང་མི་ཤེས་མོད། དོན་དེས་ངའི་བྱིས་དུས་ཀྱི་འཚོ་བར་སྨྲ་བརྗོད་ལས་འདས་པའི་སྣང་བརྙན་གསོན་པོ་ཞིག་བཞག དེ་དུས། བུ་ཆུང་འགྲོ་ས་སྒར་དང་། བུ་མོ་འགྲོ་ས་གནས་ཞེས་པ་ལྟར། ང་རང་ལོ་བརྒྱད་ལ་སླེབས་སྐབས། ཨ་མའི་མིག་ཆུའི་སྐྱེལ་མའི་ཁྲོད་དུ་རིག་པའི་གནས་མལ་དུ་ཀ་ཁའི་གདངས་དབྱངས་སྙན་མོ་དེ་འཚོལ་བར་ཆས། དེ་ནི་ང་ཚེ་འདིར་ཨ་མ་དང་ཁ་བྲལ་ཐེངས་དང་པོ་ཡིན། ང་རང་ཆུང་བྱིས་པའི་དུས་ནས་བཟུང་དྲིན་ཆེན་མ་ལོའི་གམ་དུ་བསྡད་པ་ལས། ཡུལ་གཞན་དུ་འགྲོ་མྱོང་མེད། དེས་ན། གློ་བུར་དུ་གཞན་ཡུལ་འགྲིམ་དགོས་བྱུང་བས་ཨ་མ་དྲན་དྲགས་ནས་མིག་ཆུ་ཤོར་ཏེ་མལ་ཐུལ་རློན་པར་བཏང་བའང་བགྲང་གིས་མ་ལངས། དེ་དུས་ཉིན་གཅིག་གི་དུས་ཡུན་ཡང་ལོ་འགའི་དུས་ཡུན་དང་འདྲ་བར་ཤིན་ཏུ་རིང་བའི་སྣང་བ་འཆར། སྐབས་དེ་དུས་མཚན་མོ་ཨ་མ་དྲན་པའི་ངུ་འབོད་ཀྱི་ཀློང་དུ་བསྐྱལ་བ་དང་། ཉིན་མོ་སློབ་གྲྭའི་འཚོ་བ་གསར་པར་གོམས་ཐབས་བྱེད་རྒྱུ་ལས་མ་འདས།
དེ་ལྟ་དེ་ལྟའི་ངང་ནས་སློབ་དུས་མཇུག་འགྲིལ་ནས་གུང་གསེང་བཞག ངས་འཚབ་འཚུབ་ཀྱིས་ཡིག་ཆས་དང་ཅ་དངོས་ཙག་ཙིག་རྣམས་བསྡོགས་ནས་ཡུལ་དུ་ལོག སྐབས་དེར་ང་ལ་རང་གིས་རྒྱབ་ཁུར་ལྕི་པོ་ཞིག་ཕབ་པ་ལྟར་གྱི་བདེ་སྣང་ཞིག་བྱུང་། ང་རང་ཁྱིམ་དུ་སླེབས་པ་ན། ཨ་མའི་མིག་ཟུང་མཆི་མས་བཀང་ཞིང་ངག་ནས་སྐད་མ་ཐོན་པར་ངའི་སྐེ་ལ་འཐམས། དེ་དུས་ཨ་མའི་མིག་ཆུ་རྡོག་པོ་ཞིག་ངའི་གདོང་ལ་ལྷུངས་པས། ང་ཡང་སྡུག་རུས་མ་ཐུབ་པར་མིག་ཆུ་དབང་མེད་དུ་ཤོར་བྱུང་། དེ་ལྟར་ངུ་ངག་གི་ཁྲོད་དུ་འཐམ་འཁྱུད་གང་ཙམ་བྱས་རྗེས། ཨ་མས་རྩམ་པར་མར་ལུག་མགོ་འདྲ་བ་ཞིག་བརྒྱབ་སྟེ་འོ་ཇ་མངར་མོ་ཞིག་ལྡུད་ནས་ང་ལ་བྱིན་རྗེས། སྒམ་ཆུང་རྙིང་པ་ཞིག་གི་ནང་ནས་སྣུམ་གྱིས་འཚོས་པའི་ཇ་ཤོག་ཅིག་བླངས་ནས་ཁ་ཕྱེ་བས། དེའི་ནང་དུ་བ་ཚྭ་འགོས་པའི་བུ་རམ་ཞིག་ཡོད་པ་རེད། ཨ་མས་འདི་ནི་འུ་ཚང་གི་ཁྱིམ་མཚེས་ཚང་ལྷ་ས་ནས་ལོག་སླེབས་དུས་ང་ལ་བྱིན་བྱུང་། ལྷ་སའི་དངོས་པོ་རེད། ཟོ་དང་། ཞིམ་ནི་རེད་ཅེས་ཟེར། ངས་ཨ་མ་ལ་འདི་རུལ་པ་རེད་འདུག ངས་ཇི་ལྟར་ཟ། ང་ལ་མི་དགོས་ཞེས་བཤད་ནས་ས་ལ་གཡུགས་པས། སླར་ཡང་ཨ་མའི་མིག་ཀོང་ལས་ཕྱུང་པའི་མིག་ཆུ་རྡོག་པོ་ཞིག་བུ་རམ་འགྲིལ་བྱེད་ཀྱི་ཇ་ཤོག་སྟེང་དུ་ལྷུངས། གང་ཙམ་སོང་རྗེས། ཨ་མས་ང་ལ། ཟ་མ་འཕྲོ་བརླག་གཏོང་མི་རུང་། འདི་ནི་མི་མང་པོའི་དཀའ་སྤྱད་ཀྱི་འབྲས་བུ་རེད། ཁྱོད་ཀྱིས་མི་བཟས་ན་ངས་ཟ་ཟེར་ནས་ཨ་མ་རང་གིས་བཟས་སོང་། དེ་ནས་ང་རང་ཁ་ཕྱིར་བསློགས་ནས་ཕྱི་ལོགས་སུ་རྩེད་མོ་རྩེ་བར་ཆས། ལོ་ངོ་མང་པོའི་རྗེས་སུ། ངས་བུ་རམ་དེ་ནི་ཨ་མས་རང་གིས་ཟ་མ་ཕོད་པར་ང་ལ་ཉར་བ་ཡིན་པ་གཞི་ནས་ཤེས།
ཕྱིར་དྲན་གྱི་མཚོ་མོར་ཉ་མོའི་གཤོག་རྩལ་ངོམ་ཚེ། དུས་ད་ལྟའང་། ང་རང་དོན་དེ་ལ་འགྱོད་གདུང་དྲག་པོ་སྐྱེས་ཤིང་རང་གིས་རང་ལ་ལེ་བདའ་ཐེངས་མང་བྱེད་དགོས་པར་གྱུར། དེ་དུས། ངས་ཨ་མས་ཨ་མ་ཞེས་པའི་རླབས་ཆེན་གྱི་མིང་དེ་ཁུར་ནས་རླབས་ཆེན་གྱི་འགན་འཁྲི་དེ་འདྲ་སྒྲུབ་པ་རྩ་བ་ནས་མ་རྟོགས། ད་ལྟ་ང་རང་རྨོངས་གཉིད་ལས་སད་དུས། ཁྱེད་རང་རྒ་བཞིན་འདུག གལ་སྲིད་ཁྱེད་ཀྱི་ལང་ཚོར་ལོ་ཟླའི་གས་སྐྱོན་མ་ཕོག་ཚེ། “མགོ་ནག་སྐྱིད་སྡུག་གནམ་གྱི་ལག གོ་ཁ་དྲོན་མོ་རང་གི་ལག”ཅེས་པ་ལྟར། ངས་ཁྱེད་ཀྱི་ཚེ་མཇུག་གི་མི་ཚེའི་ལམ་བུར་བདེ་སྐྱིད་ལྡན་པའི་འཚོ་བའི་མངར་ཁ་མྱོང་དུ་འཇུག་སྲིད། ཡིན་ན་ཡང་། ད་ནི་ལོ་ཟླའི་བགྲོད་ཀྱིས་སྒུག་མི་སྲིད་ཅིང་། དེ་བས། ཁྱེད་ཀྱི་སྐུ་དྲིན་ནི་ཇི་ལྟར་གཞལ་ནུས།
མི་ཡུལ་གྱི་དཀའ་སྡུག་མཐའ་དག་གདོང་གིས་བསུས་པའི་ལམ་བུ་དྲན་ཚེ། ཁྱེད་ནི་གནམ་འོག་གི་བརྩེ་བ་མ་ལུས་རང་གི་ཁོག་ཏུ་རུམ་པའི་བྱམས་བརྩེའི་བདག་ཉིད་ཅན་དེ་ཡིན་པར་རྟོགས།།