ང་ཡི་ཕ་ཡུལ།
ཐོག་མའི་ལྟེ་ཁྲག་འཕོ་སའི་གནས་ཀྱི་མཆོག །
ངུ་ངག་དབྱངས་རྟ་ས་ཆེན་འདི་རུ་གཏོར། །
ནར་སོན་ལོ་ཟླ་རུམ་པའི་བྱིས་དུས་ཀྱི། །
དགའ་སྡུག་རི་མོའི་མེ་ཏོག་ས་རུ་བྲིས།།
སེམས་ཀྱི་རྟེན་ས་སྐྱིད་སྡུག་འཚོ་ས་ཡིན། །
ང་ཡི་ཕ་ཡུལ་དག་པའི་ཞིང་དེ་རྨད། །
གཡང་གི་རུ་སྡེ་གཅིག་པའི་ཕུ་ནུའི་སྟོབས། །
ལས་ཀྱི་སྐྱིད་སྡུག་དཔུང་པ་མཉམ་གཤིབ་ཡིན།
རྒན་གཞོན་ཚེ་ཐག་རིང་བའི་བསོད་ནམས་དགེ །
ལས་སྨོན་བཟང་པོས་ཕན་ཚུན་གཅིག་ཏུ་འདུས། །
མིག་གི་འབྲས་དང་སེམས་ཀྱི་སྙི་ས་ཡིན། །
ང་ཡི་ཕ་ཡུལ་འཛིན་མའི་མཆོག་གྱུར་ཡིན། །
ཆུང་སྐྱེས་ན་མཉམ་གྲོགས་ཀྱི་བརྩེ་འདང་བརྟན། །
ཕན་ཚུན་རྡོག་རྩ་འགྲིལ་བའི་མཐུན་སྒྲིལ་ཟབ། །
རྒན་བཀུར་གཞོན་གཅེས་སྲོལ་བཟང་རྒྱུད་དུ་མངའ།
ལྷད་མེད་དྭངས་གཙང་རང་གཤིས་ཀུན་གྱི་རྒྱན། །
གཞོན་དུས་འཚོ་ས་རྒས་དུས་རྒུད་ས་ཡིན། །
ང་ཡི་ཕ་ཡུལ་ཉི་ཟླའི་ཞིང་ཁམས་ཡིན། །
རྣ་བའི་བུ་རམ་འདྲ་བའི་ལོ་རྒྱུས་མཆིས། །
ཡིད་ཀྱི་གསོས་སྨན་འདྲ་བའི་གཏམ་རྒྱུད་སྙན། །
སུམ་རྩེན་ཡུལ་ལ་འགྲན་པའི་དག་ཞིང་མཆོག །
ཕ་ས་ཕ་ཡུལ་སྐྱིད་ཀྱི་ལུང་པ་ཡིན། །
སྡུག་དུས་འཁེན་ས་སྐྱིད་དུས་འཛུམ་ས་ཡིན། །
ང་ཡི་ཕ་ཡུལ་གཡང་གི་སྡེ་ལ་བསྟོད། །