མི་ཞིག་མཐུན་སྒྲིལ་རྡོ་རྗེའི་བྲག
—— མི་རིགས་མཐུན་སྒྲིལ་ཟླ་བའི་གཏམ་བཤད་འགྲན་བསྡུར་གྱི་གཏམ་བཤད་རྩོམ་ཡིག
ལྷོ་འཛམ་བུ་གླིང་གི་ཤར་གྱི་ཕྱོགས་ན། རྒྱ་ཁྱོན་ལ་སྤྱི་ལེ་ངོས་སྙོམས་གྲུ་བཞི་མ་960ཟིན་པའི་མེ་ཏོག་ལྡུམ་ར་ཆེན་པོ་ཞིག་ཆགས་ཡོད། དེང་གི་ཆར། འཛམ་གླིང་སྐྱེ་རྒུའི་མིག་ཟུང་མེ་ཏོག་ལྡུམ་ར་ཆེན་པོ་འདིར་དགའ་སྟོན་ལ་ཆས་སྐབས། ཡིད་ཀྱི་བརྟན་པ་ཅིག་ཅར་དུ་མི་འཕྲོག་མཁན་གཅིག་ཀྱང་མེད། ལྡུམ་ར་ཆེན་པོ་འདིའི་ནང་དུ་མཚར་སྡུག་རྣམ་པར་བཀྲ་བའི་མེ་ཏོག་ལྔ་བཅུ་ང་དྲུག་བཞད་ཡོད་ཅིང་། མེ་ཏོག་དེ་དག་ཕན་ཚུན་གཅིག་ལ་གཅིག་རྟེན་ཚུལ་དུ་བཞད་པའི་ངང་ཚུལ་ནི་ཁྱིམ་ཚང་གཅིག་གི་གཅེན་གཅུང་མིང་སྲིང་དང་གཉིས་སུ་མེད་ཅིང་། མེ་ཏོག་མི་རེ་ངོ་རེས་རང་རང་གི་ལང་ཚོའི་འཇོ་སྒེག་ཅི་དགར་ངོམས་ནས་ལྡུམ་ར་ཆེན་པོ་འདིར་བཀྲག་མདངས་སྣོན་པའི་ཉམས་སྣང་ནི་དྲི་མེད་སྔོ་བསངས་ཀྱི་མཁའ་ལ་རྒྱུ་སྐར་ཆེམ་ཆེམ་དུ་བཀྲ་བ་དང་ཀུན་ནས་མཚུངས།
ཉམས་དགའ་བའི་མེ་ཏོག་འདི་དག་ལ་བདག་སྐྱོང་ཚགས་སུ་ཚུད་པ་གནང་མཁན་གྱི་སྐྱེད་མ་ཞིག་ཡོད། སྐྱེད་མ་དེས་དུས་དང་རྣམ་པ་ཀུན་ཏུ་མ་ཡུམ་ཞིག་ལ་མངའ་བའི་བྱམས་དང་བརྩེ་བ་མ་ལུས་སྙིང་ཁོང་དུ་རུམ་ནས་མེ་ཏོག་ང་དྲུག་སྐྱོང་བཞིན་ཡོད། འདས་པའི་ལོ་རྒྱུས་ལ་ཕྱིར་མིག་ལྟ་སྐབས། ལྡུམ་ར་ཆེན་པོ་འདིའི་ནང་གི་མེ་ཏོག་ལྔ་བཅུ་ང་དྲུག་གིས། སྐབས་རེ་སད་དང་སེར་བའི་ཕོག་ཐུག་དང་། མཚམས་རེ་དྲག་ཆར་རླུང་འཚུབ་ཀྱི་རྡུང་རྡེག ལན་རེར་ཤ་འོད་འདམ་རུད་ཀྱི་བརྙས་བཅོས་སོགས་མྱངས་ཡོད། གལ་སྲིད་དཔའ་མཛངས་རྟུལ་ཕོད་ཅན་གྱི་སྐྱེད་མ་འདི་འདྲ་ཞིག་མེད་ཚེ། གཅིག་རྗེས་གཉིས་མཐུད་དུ་བྱུང་བའི་གེགས་དང་བར་ཆད་ཀྱི་མདུན་དུ་ང་ཚོས་མེ་ཏོག་འདི་དག་གི་ལས་དབང་ལ་བསམ་ཚོད་བྱེད་ཐབས་བྲལ།
ཁ་རྒྱུན་དུ། མ་ནི་ཀུན་གྱི་རྩ་བ་ཡིན་ཞེས་གྲགས་པ་ལྟར། བྱམས་པའི་སེམས་ལ་ཉེ་རིང་མེད་ཅིང་། བརྩེ་བའི་ཐུགས་ལ་གཡོ་ལྷད་མེད་པའི་མ་དྲིན་ཆེན་གྱི་ཐུགས་སྐྱེད་ལས། ད་གཟོད་ཉམ་ཆུང་གི་བུ་ཕྲུག་རང་མགོ་ཐོན་པ་ལྟར། ལྡུམ་ར་གཅིག་ཏུ་འཚར་བའི་མེ་ཏོག་ལྔ་བཅུ་ང་དྲུག་ལ་ངོ་མཚར་གྱི་དཔལ་ཡོན་ཕྱོགས་བཅུར་བཞད་པ་དང་། མཛེས་སྡུག་གཅིག་ལ་གཅིག་འགྲན་དུ་བཞད་པའི་མེ་ཏོག་ལྔ་བཅུ་ང་དྲུག་གི་ངོ་མཚར་ཡོད་རྒུ་གཅིག་ཏུ་འདུས་པ་ལྟར། མ་དྲིན་ཆེན་གྱི་མངའ་ཐང་ལོངས་སྤྱོད་ཡར་ངོའི་ཟླ་བཞིན་འཕེལ།
ཨེ་མ། མེ་ཏོག་ལྡུམ་ར་སྐྱོང་མཁན་གྱི་སྐྱེད་མ་འདི་ནི་གཞན་སུ་ཡང་མ་ཡིན་པར། ཀྲུང་གོ་ཞེས་སྙན་གྲགས་ཀྱི་བ་དན་ལྷབ་ལྷུབ་ཏུ་གཡོ་བའི་མ་ཡུམ་འདི་ཉིད་ཡིན་ཞིང་། མེ་ཏོག་ལྔ་བཅུ་ང་དྲུག་དེ་དག་ཀྱང་གཞན་སུ་ཡང་མ་ཡིན་པར། མཐུན་སྒྲིལ་གྱི་རྡོག་རྩ་གཅིག་ཏུ་བསྒྲིལ་བའི་མི་རིགས་ལྔ་བཅུ་ང་དྲུག་ལགས།
ང་ཚོ་ཡོང་དུས་གང་ནས་ཡོང་ཞེ་ན། ལོ་ངོ་སྟོང་གི་ཕུག་ནས་ཡོང་བ་་ཡིན།
ང་ཚོ་ཡོང་དུས་ཇི་ལྟར་ཡོང་ཞེ་ན། མཐུན་སྒྲིལ་དམ་ཚིག་བསྲུངས་ནས་ཡོང་བ་ཡིན།
གལ་སྲིད་ཁྱེད་ཀྱིས་བདག་ལ་སྐྱེད་མ་གཅིག་དང་བུ་ཕྲུག་ལྔ་བཅུ་ང་དྲུག་གི་ལོ་རྒྱུས་ཞིབ་པར་དྲིས་ཚེ། ངས་ཁྱེད་ལ་སྲིད་པའི་མགུར་གླུ་ཞིག་ལེན་བཞིན་དུ། དུས་ལ་སྔ་བ་ཐང་རྒྱལ་རབས་ཀྱི་དུས་སུ་རྒྱ་བཟའ་འུན་ཤིང་ཀོང་ཇོ་དང་། གྱིམ་ཤིང་ཀོང་ཇོ་གཉིས་སྔ་རྗེས་སུ་བོད་དུ་བཙུན་མོར་ཕེབས་ནས་རྒྱ་བོད་མི་རིགས་གཉིས་དབར་མཛའ་མཐུན་གྱི་རྡོ་རིང་བཞེངས་ཏེ་ཆོས་དང་སྲིད་དང་རིག་གནས་སྤེལ་རེས་ཀྱི་སྒོ་མོ་ཕྱེ་བ་དང་། དུས་རབས་བཅུ་གསུམ་པའི་དུས་སུ་པནྜི་ཏའི་མཚན་སྙན་ཐོག་མར་བཞེས་པའི་ས་པན་ཀུན་དགའ་རྒྱལ་མཚན་དང་། གང་དེའི་དབོན་པོ་འགྲོ་མགོན་ཆོས་རྒྱལ་འཕགས་པས་སྔ་རྗེས་སུ་ཡོན་རྒྱལ་རབས་དང་མཆོད་ཡོན་གྱི་འབྲེལ་བ་བཙུགས་ནས་མི་རིགས་དབར་གྱི་འགྲོ་འོང་དང་སྤེལ་རེས་སྔར་བས་ཟབ་ཏུ་བཏང་བའི་ལོ་རྒྱུས་དཔེ་རུ་དྲངས་ནས་བརྗོད་སྲིད།
གལ་སྲིད་ཁྱེད་ཀྱིས་བདག་ལ་སྐྱེད་མ་གཅིག་དང་བུ་ཕྲུག་ལྔ་བཅུ་ང་དྲུག་གི་མཐུན་ལམ་མཛའ་བརྩེའི་སྐོར་དྲིས་ཚེ། ངས་ཁྱེད་ལ་བསྟོད་གླུ་ཐུང་ཐུང་ཞིག་ལེན་བཞིན་དུ། མི་རིང་བའི་གོང་དུ་འཛམ་བུ་གླིང་ལ་ཏོག་གསར་རིམས་ནད་མཆེད་སྐབས་མཐོང་ཐོས་མྱོང་གསུམ་བྱུང་བའི་སྐོར་ནས་གླེང་སྲིད། དེ་ཡང་། རིམས་ནད་ཐོན་པའི་སྔ་ཕྱི་བཞིན། ཐོག་མར་བོད་མི་རིགས་ཀྱིས་རང་ས་རང་ཡུལ་གྱི་ཡུལ་ཟོག་གཙོས་པའི་དངོས་ཟོག་འབོར་ཆེན་ཞིག་རིམས་ནད་ཚབས་ཆེ་བའི་ནང་སའི་ས་ཁུལ་ཁག་ལ་ཞལ་འདེབས་སུ་ཕུལ་བ་དང་། ཕྱིས་སུ་རིམས་ནད་ཀྱི་གདོན་འདྲེ་དེ་རི་བོ་ཐང་ལྷ་བརྒལ་ནས་བོད་དུ་ལྷགས་དུས་ནང་སའི་ཞིང་ཆེན་དང་གྲོང་ཁྱེར་ཁག་གིས་མི་རྒྱུ་དངོས་གསུམ་ལ་བརྟེན་ནས་བོད་ལ་རོགས་སྐྱོར་བྱས་པའི་རྣམ་པ་ནི་དུས་ད་ལྟ་ཡང་ཁོ་བོའི་མིག་ལམ་དུ་གསལ་ལྷང་ངེར་འཆར་འོངས། སྐབས་དེ་དུས་ང་རང་འཁོར་ཞག་དུས་དང་སྐབས་འཁེལ་ཏེ་བཟའ་ཟླའི་ལས་ཁུངས་སུ་བསྡད་ཡོད། རིམས་ནད་ཐོན་མ་ཐག་སློབ་གྲྭའི་བཀོད་སྒྲིག་བཞིན་དང་བླངས་པའི་ལས་ལ་ཞུགས་པ་ཡིན། ཉིན་ཞིག་གི་ཕྱི་དྲོ་སློབ་གྲྭའི་མ་བྱན་གྱིས་དང་བླངས་པ་རྣམས་དངོས་ཟོག་འབེབ་པར་ཕེབས་ཤོག་ཟེར། ང་དང་བཟའ་ཟླ་གཉིས་ཚམ་ཚོམ་མེད་པར་ཚལ་རིགས་སྣ་ཚོགས་རྡག་རྡག་བླུགས་པའི་ཟོག་སྐྱེལ་རླངས་འཁོར་རིང་པོ་རིང་པོ་དེའི་གམ་དུ་བསྐྱོད་ནས་ཚལ་འབེབ་པའི་ལས་ལ་ཞུགས། བར་གླགས་ཤིག་ཏུ་ངས་ཚལ་རྡོག་པོ་རེ་རེ་གྲ་དག་པར་བཏུམས་པའི་འགྱིག་རས་ངོས་ཀྱི་ཡི་གེར་ལྟ་སྐབས། དེ་ནི་ཀན་སུའུ་ཞིང་ཆེན་ནས་ཆེད་མངགས་བོད་ལ་རོགས་སྐྱོར་བྱས་པ་ཞིག་རེད་འདུག དཀའ་སྡུག་གི་གནས་སུ་ལྷུངས་པའི་གནས་སྐབས་དེར། རི་ཆུ་སྟོང་གིས་ཆོད་པའི་ཡུལ་ལུང་ཞིག་ནས་རོགས་སྐྱོར་གྱི་དངོས་ཟོག་འདི་འདྲ་མང་པོ་དངོས་སུ་འབྱོར་དུས། ངལ་དུབ་ཀྱི་མནར་བའི་ངའི་ལུས་སེམས་གཉིས་ཀ་དགའ་སྣང་གིས་ཁེངས། སློབ་གྲྭའི་སློབ་ཁྲིད་ཐོག་ཁང་གི་ཐོག་སོ་དང་པོའི་བར་ཁྱམས་ཡོངས་བྱུར་བུར་ཁེངས་པའི་ཚལ་རིགས་དེ་དག་གིས་སྤྱིར་ན་བཀག་སྡོམ་མཇུག་མ་འགྲིལ་བར་དུ་འདང་པ་རེད།
གལ་སྲིད་ཁྱེད་ཀྱིས་བདག་ལ་སྐྱེད་མ་གཅིག་དང་བུ་ཕྲུག་ལྔ་བཅུ་ང་དྲུག་གི་མ་འོངས་ཀྱི་མདུན་ལྗོངས་དྲིས་ཚེ། ངས་ཁྱེད་ལ་མཐུན་པ་སྤུན་བཞིའི་གཏམ་རྒྱུད་ནས་འགོ་བཙུགས་ཏེ་གླེང་སྲིད། དེ་ཡང་། སྔོན་ནགས་གསེབ་ཅིག་ཏུ་རིགས་མི་འདྲ་བའི་སྲོག་ཆགས་བཞི་གནས་ཤིང་། དེ་དག་ཕན་ཚུན་རྒན་གཞོན་གྱི་བསླབ་ཁྲིམས་བཅས་ནས་ཕན་ཚུན་གཅིག་གིས་གཅིག་ལ་བརྙས་བཅོས་དང་འཚེ་བ་མེད་པར་གུས་ཞབས་དང་བཀུར་བསྟིའི་ངང་ནས་ཡ་རབས་དམ་པའི་ཚུལ་ཁྲིམས་གཙང་མར་བསྲུངས་ནས་མཉམ་དུ་འཚོ་བར་རོལ་ཚ་ན། ཡུལ་དེར་ཚང་ཚིང་ནགས་ཚལ་སྟུག་པོར་སྐྱེས་ཤིང་། ཆར་ཆུ་དུས་སུ་འབབ་པ་དང་། ལོ་ཏོག་རྟག་ཏུ་ལེགས་པའི་དགེ་བའི་མཚན་མ་མངོན་སུམ་བསྟན་ནོ། གཏམ་རྒྱུད་འདི་ལས་ང་ཚོས་མཛའ་མཐུན་ནི་བདེ་སྐྱིད་ཀྱི་རྩ་བ་དང་། མཛའ་མཐུན་ནི་རང་གཞན་དོན་ཀུན་ལྷུན་གྱིས་གྲུབ་པའི་གཞི་མ་ཡིན་པར་ཤེས་ཐུབ། ད་ལྟ་ང་ཚོས་ལག་ཐོགས་ཁ་པར་ལས་འཛམ་གླིང་ཡུལ་གྲུ་ཁག་ལ་རྒྱང་གཟིགས་ཤིག་གྱིས་དང་། མི་མཐུན་རྐྱེན་ངན་ལས་འབྱུང་བའི་དམག་འཁྲུག་གི་མུ་གེ་མང་དུ་མཐོང་སྲིད། དེ་ནི་བོད་ཀྱི་གཏམ་དཔེར། ནང་བཀྲ་མ་ཤིས་ན་ཕྱི་དོན་མི་འགྲུབ་ཅེས་པ་ཁོ་ནའོ། བདག་ཅག་གི་དེད་དཔོན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། མི་རིགས་ཁག་གི་མི་དམངས་རྣམས་སེ་འབྲུའི་རྡོག་པོ་ལྟར་གོང་བུ་གཅིག་ཏུ་སྒྲིལ་དགོས་པ་ནན་གྱིས་གསུངས་དགོས་པའི་དོན་གྱི་རྡོག་པོའང་འདི་ལ་ཐུག་ཡོད།
ལྷོ་འཛམ་བུ་གླིང་གི་ཤར་གྱི་ཕྱོགས་ན། རྒྱ་ཁྱོན་ལ་སྤྱི་ལེ་ངོས་སྙོམས་གྲུ་བཞི་མ་960ཟིན་པའི་མེ་ཏོག་ལྡུམ་ར་ཆེན་པོ་ཞིག་ཡོད། མེ་ཏོག་ལྡུམ་ར་ཆེན་པོ་འདི་སྐྱོང་མཁན་གྱི་སྐྱེད་མའི་མཚན་ལ་ཀྲུང་གོ་ཟེར། ཀྲུང་གོའི་ཕུགས་འདུན་རླབས་པ་ཆེ་མངོན་འགྱུར་ཡོང་དགོས་ན། མེ་ཏོག་ལྔ་བཅུ་ང་དྲུག་དང་འདྲ་བའི་མི་རིགས་ལྔ་བཅུ་ང་དྲུག་ཕན་ཚུན་གཅིག་སེམས་གཅིག་ལ་གཏད་ནས་མི་ཞིག་མཐུན་སྒྲིལ་རྡོ་རྗེའི་བྲག་བཞིན་བརྟན་དགོས་སོ།