ཁྱེད་ཚོས་གཟིགས་ཨེ་བྱུང་།

ཡ་གིའི་སྦྲ་ནག་སྨུག་པོ་དེ།

ཟླ་བ་སྒྲོལ་མའི་གཞིས་ཁྱིམ་རེད།

མ་གིའི་ཁང་ཁྱིམ་གྲུ་བཞི་དེ།

ཟླ་བ་སྒྲོལ་མའི་ཆང་ཁང་རེད།

ནས་ཆང་གི་བཟི་ཁ་བཙན་པས་ཁྱམ་མེ་ཁྱོམ་མེ།

སྒྲོལ་མ་ཡི་ལང་ཚོ་མཛེས་པས་ཟུར་མིག་ལིང་ལིང་།

ཟླ་བ་སྒྲོལ་མ།

དུས་རབས་ཤིག་གི་ཆང་མ་ཡིན་ནམ་གླུ་མ་ཡིན།

ཀ་ར་ལས་ཀྱང་ཞིམ་པའི་ནས་ཆང་འཐུང་ཐེངས་རེར།

ངས་ཁྱེད་ཉིད་ཆང་མ་ཞིག་ཏུ་འཁྲུལ་ནས་ཞབས་དག་བརྒྱབ།

པི་ཝང་ལས་ཀྱང་སྙན་པའི་གསུང་སྐད་ཐོས་ཐེངས་རེར།

ངས་ཁྱེད་ཉིད་གླུ་མ་ཞིག་ཏུ་འཁྲུལ་ནས་འཛུམ་མདངས་བསྟན།

གནའ་སྒྲུང་ལས་འཁྲུངས་པའི་གཏམ་རྒྱུད་རེའི་ཁྲོད་དུ།

ཁྱེད་ནི་དུས་རབས་ཤིག་གི་ཆང་མ་ཞིག

མགུར་གླུ་ནས་ཐོས་པའི་སྙན་ངག་གི་དབུས་ནས།

ཁྱེད་ནི་མི་རབས་ཤིག་གི་གླུ་མ་ཞིག

ཟླ་བ་སྒྲོལ་མ།

མེ་ལོང་ནང་གི་གཟུགས་བརྙན་ཁྱད་མཚར་ཞིག

ལྷ་སྒྲུང་ནང་གི་བུ་མོ་མཛངས་མ་ཞིག

ཟླ་བ་སྒྲོལ་མ།

ཞབས་རྗེས་ཁ་བར་བཞག་རུང་།

ཁ་བ་རླུང་གིས་དེད་པས་རྐང་རྗེས་འཚོལ་ཐབས་མ་བྱུང་།