འཇོ་མདའ་པད་མའི་སྙན་རྩོམ་ཁག་བཞི།
ལྷིང་འཇགས་ཀྱི་འཚོ་བ།
འདས་སོང་བྱ་གཞག་སྨུག་པའི་དཔེ་རུ་འཇོག །
མ་འོངས་འཚོ་བ་ཆ་མེད་རླུང་ལྟར་སྒོམ། །
རྙོག་འཛིང་བྱ་བ་སེམས་ཀྱི་ཁུར་པོར་འཛིན། །
སྟོང་འདང་འདྲ་མིན་རྒྱང་ནས་རྒྱང་དུ་གཡུག །
སྐྱོ་ངལ་སེམས་ཁྲལ་མར་འབབ་གཙང་བོར་སྐུར། །
རེ་དོགས་སྤྲོས་འཛིན་ལྷ་ལམ་དབྱིངས་སུ་སྤུར། །
དྭངས་གཙང་བློ་ཡིས་མཛེས་པའི་འཇིག་རྟེན་སྐྲུན། །
རྣམ་དག་སེམས་ཀྱིས་ཞི་བའི་དབེན་ས་ཉུལ། །
ཚེ་སྔོན་བསགས་སྦྱངས་མཐུ་ལས་བྱུང་བ་ཡི། །
མིག་སྔུན་ལྷིང་འཇགས་འཚོ་བ་ལོངས་སུ་སྤྱོད། །
ཉི་འོད་འཇམ་པོའི་འོག་ནས་སོས་དལ་ངང་། །
སྙན་པའི་དབྱངས་རྟ་གནམ་སའི་བར་དུ་འཐེན། །
མི་ཚེའི་སྐྱིད་ཀྱི་རྒུན་ཆང་རྔུབས་བཞིན་འཚོ། །
མཚར་སྡུག་ཉམས་ཀྱིས་ཕྱུག་པའི་སྨན་ཆུང་།
དཀྱེལ་ཡངས་ཡིད་ཀྱི་ནམ་མཁའ་གཡའ་དག་ཅིང་། །
དམ་ཚིག་ཤེལ་གྱི་བུམ་པ་དཀར་ཞིང་གཙང་། །
མིག་ཟུང་འཛུམ་པའི་ནང་དུ་འོད་ཐིགས་འབབ། །
བཅོས་མིན་མིག་མདངས་རེ་རེས་མི་སེམས་འཕྲོག །
གནག་སྣུམ་སྐྲ་ལོར་དྲི་བཞོན་རླུང་བུ་འཁོར། །
ཐོད་ཆིངས་སྐྲ་ལོའི་མེ་ཏོག་མཛེས་སྡུག་ངོམས། །
འཇམ་མཉེན་ཕྱག་གིས་རྒྱུད་གསུམ་པི་ཝང་དཀྲོལ། །
སྙན་པའི་ངག་གིས་ཐོས་འཛིན་བུ་ག་མྱོས། །
རྡུལ་བྲལ་མེ་ལོང་ཕྱིས་འདྲའི་བཞིན་རས་མཛེས། །
མཁུར་ཚོས་ཨུག་ཆོས་མེ་ཏོག་རབ་ཏུ་དམར། །
སྲབ་འཇམ་མཆུ་སྒྲོས་བུམ་པའི་ཚུགས་ཀ་ཡག །
བྲང་གཞུང་འོ་འཛིན་ཤེལ་དཀར་ཐད་དུ་འབུར། །
ལྡེམ་མྱུར་ལུས་ཀྱི་འཁྱུག་འགྲོས་གློག་ལ་འགྲན། །
མཆོར་སྒེག་གར་གྱི་སྟངས་སྟབས་ཡོངས་སུ་རྫོགས། །
འབྲོག་མོ།
མིག་ཟུང་འཛུམ་པའི་མདའ་མོ་སྤྲིན་ལ་ཕྱོགས། །
མཁའ་མཐའི་སྤྲིན་ལ་སྙིང་གཏམ་ཤབ་ཤུབ་སྨྲ། །
གོམ་གསུམ་གོམ་པའི་རྡོག་སྣེ་སྤང་ལ་བཞག །
སྤང་ལྗོངས་གཡུ་ཡི་གཞུང་ནས་རྫི་གླུ་ལེན། །
འཛུམ་ཆུང་པདྨའི་འདབ་མ་ལྷུག་ལྷུག་གྲོལ། །
དེ་ལ་ཉི་མའི་འོད་ཀྱིས་བྱིལ་བྱིལ་གནང་། །
ཞེ་གཙང་སྐུད་པ་གནམ་སའི་བར་དུ་སྦྲེལ། །
དེ་རུ་འདབ་ཆགས་བྱ་ཡང་འཁོར་བ་བྱེད། །
བསིལ་འཇམ་རླུང་གིས་ཡང་ཡང་སྒུལ་བ་ཡི། །
སྐྲ་ལོའི་རྩེ་རུ་མེ་ཏོག་སྙིམ་གང་བཏགས། །
མེ་ཏོག་དཀར་དམར་ནང་སེམས་འཁྲིལ་ས་བྱེད། །
བརྩེ་བའི་ཕྲ་རྒྱན་ཟེར་ནས་རང་གིས་བསྙད། །
ལྷས་ཀྱི་གཡས་ནས་འཇག་མ་རྩྭ་སྐྱ་སྒྲུག །
ལྷས་ཀྱི་གཡོན་ནས་ནོར་ཁྱུའི་ལྕི་བ་རྒུམ། །
དགོང་ཞོགས་རེ་ལ་རུ་སྡེའི་ལྷིང་འཇགས་འཚོ། །
མཚན་ཐུན་རེ་ལ་འབྲོག་ཐང་ལྷས་ར་སྲུང་། །
འཇམ་མཉེན་ཕྱག་གི་སོར་མོ་སྙིང་ཁར་སྦྱར། །
འཚེ་མེད་བདེ་བའི་སྨོན་ལམ་ཡང་ཡང་བཏབ། །
ནང་སེམས་རྒྱ་མཚོ་ཆེན་པོའི་གཏིང་མཐའ་རུ། །
མ་བཅོས་བརྩེ་བའི་འོད་ཀྱི་དྲོད་ཁོལ་འཁྱིལ། །
ཐུལ་དཀར་འབྲི་མོའི་འོག་ནས་བགོ་བགོ་ཡི། །
བཞོ་དབྱངས་སྙན་མོ་རི་ལུང་བར་དུ་འཐེན། །
བཟང་དྲུག་སྔོ་ལྡུམ་སྨན་སྣ་ལས་བྱུང་བའི། །
འོ་ཞོ་མངར་མོའི་ཁ་རླངས་དགུང་དུ་མཆོད། །
སྙན་ངག་པ།
ཆོ་འཕྲུལ་གྱི་ཚིག་གི་ལམ་ནས།
སྨིག་རྒྱུའི་འཇིག་རྟེན་རྗེན་པར་ཕུད།
འཁོར་བའི་རི་ལུང་གསལ་བར་བསྟན།
བཟློག་ཏུ་མེད་པའི་རྒྱུ་འབྲས་ངོ་སྤྲོད་གནང་།
གྲོག་མ་ལྟ་བུའི་མི་ཚོགས་ཀྱི་དགའ་སྐྱོ་མོལ།
ཐོ་ཡོར་ལྟ་བུའི་རང་ཉིད་ཀྱི་མཐོང་སྣང་གླེང་།
རབ་རིབ་མག་མོག་གི་འདས་དོན་དང་དྲན་གདུང་འཆད།
མཚར་མཚར་ཡིད་འོང་གི་འབྱུང་འགྱུར་དང་རྨི་ལམ་སྒྲོག
སྐབས་སྐབས་སུ་སྙན་ཚིག་གི་བརྡ་ཡིག་སྣ་ཚོགས་སྤེལ།
མཚམས་མཚམས་སུ་ཆོ་མེད་ཀྱི་ཚིག་ཉོག་འདྲ་མིན་སྤུངས།
རྒྱུན་མི་ཆད་པར་ཐ་སྙད་བརྒྱ་སྟོང་གི་མགོ་གཞུག་སྦྲེལ།
སྡོད་མི་ཚུགས་པར་དབྱངས་གསལ་གྱི་མུ་ཏིག་སྟར་ལ་བརྒྱུས།
ཉིན་མཚན་མེད་པར་རྟོག་བཏགས་ཀྱི་ཞིང་ཁམས་ཡང་ཡང་འགྲིམ།