གྱེས་གདུང་།
གཅིག
ཆུ་ཚོད་ཀྱི་དཀྱིལ་འཁོར་ལས་མདའ་ཁབ་ཀྱི་གོམ་སྒྲ་བར་མེད་དུ་གྲགས། ང་རང་མལ་ལས་ལངས་རྗེས་དང་ཐོག་ཇ་ཁང་དུ་བསྐྱོད་པ་དང་། དེ་ནས་གྲོགས་པོ་ཚོ་དང་མཉམ་དུ་དཔེ་ཁང་དུ་མྱུལ་བ་སོགས་ལ་མགོ་འཁོར་ནས། མཐར་ཁྱིམ་དུ་སླེབས་དུས་ཉིན་དགུང་གི་ཆུ་ཚོད་བཅུ་གཉིས་ཟིན་འདུག
བུས་འཛུམ་དང་བཅས“པཱ་ལགས། ད་ཞལ་ལག་མཆོད། ཡང་ཕེབས་རན་གྲབས་འདུག”ཅེས་ཧ་ཅང་བྲལ་མི་ཕོད་པའི་སྐད་གདངས་ཤིག་གིས་བདག་ལ་དགུང་ཟས་ཟ་རྒྱུར་སྐུལ་མ་བྱས། དེ་ལ་ངས་ཀྱང་ཧ་ཅང་སྟབས་བདེའི་ལན་ཞིག་བཏབ་སྟེ། སྣང་འཇོག་དེ་ཙམ་མེད་པར་མུ་མཐུད་སྔ་དྲོ་དཔེ་ཁང་ནས་ཉོས་པའི་རྔོག་ལོའི་ཞིབ་འཇུག་སྐོར་གྱི་དེབ་དེར་ལྟ་གིན་བསྡད།
སྤྱིར་དུས་ཚོད་ནི་བཏང་སྙོམས་ཀྱི་རྒྱ་མ་ཞིག་དང་འདྲ་སྟེ། ཁ་ཕོ་དབང་ཤེད་ཅན་དང་། རྒྱུ་དཔལ་འབྱོར་ཅན། ཉམ་ཐག་དབུལ་ཕོངས་ཅན་སོགས་སུ་དང་གང་ལའང་ཕྱོགས་རིས་དང་ཆགས་སྡང་མེད་པར་ཚག་སྒྲ་དང་བཅས་མདུན་ནས་མདུན་དུ་བསྐྱོད་ནས། རང་རང་གི་ལས་རྒྱུའི་བྱ་བའམ། འགྲོ་རྒྱུའི་དམིགས་བྱ་གང་དེ་དང་ཐག་ཉེ་ནས་ཉེ་རུ་གཏོང་གིན་འདུག ཕལ་ཆེར་རྔོག་ལོའི་དཔེ་ཆ་དེའི་ཤོག་ངོས་བཅུ་གྲངས་ཤིག་བལྟས་མ་ཚར་གོང་། ཆུ་ཚོད་ཀྱི་འགྲམ་པར་འཁེན་པའི་མདའ་ཁབ་དེ་སླར་ཡང་སྐོར་བ་གཅིག་བརྒྱབ་ཟིན་ནས། ཉིན་དགུང་གི་ཆུ་ཚོད་དང་པོར་སླེབས་འདུག བུས་སླར་ཡང“པཱ་ལགས། པཱ་ལགས། ད་ཞལ་ལག་མཆོད་པར་ཕེབས། འགྲོ་རན་འདུག”ཅེས་ཧ་ཅང་གོམས་གཤིས་ཅན་གྱི་ཚིག་འགའ་བདག་གི་རྣ་བའི་ལམ་དུ་བཙུད།
བུའི་སྐད་ཆ་དེས་ང་རང་གཡེང་བའི་རྒྱ་ལས་གྲོལ་ཞིང་། སེམས་ལ་ཅུང་ཟད་ངོ་གནོང་པའི་སྣང་བ་ཞིག་སྐྱེས་མུར་གདོང་ཡང་ཚ་ལམ་ལམ་བྱས། ཚུལ་དེ་འཁྲིས་ཀྱི་བཟའ་ཟླས་མཐོང་བས་འཛུམ་ཙམ་བྱས་པ་དང་སྦྲགས་དགུང་ཟས་ཟ་དགོས་པའི་མིག་བརྡ་ཞིག་འཕངས།
གཉིས།
དགུང་ཟས་ལ་རོལ་ཟིན་རྗེས། འཆར་ཅན་བཞིན་གློག་ཀླད་སོགས་བསྡུ་གསོག་རོབ་ཙམ་བརྒྱབ་སྟེ། རྡོག་ཐོན་གྱི་གྲབས་བྱས། དེ་ལྟའི་མུར་བུས་མཆི་ཞག་གིས་གང་པའི་འདྲེན་བྱེད་ཟུང་བདག་ལ་ཕྱོགས་ཤིང་། ཧ་ཅང་སྐད་གདངས་དམའ་པོའི་སྒོ་ནས“པཱ་ལགས། ཆུ་འཁོལ་མཆོད་དང”ཞེས་ཆུ་འཁོལ་བླུགས་པའི་ཕོར་བ་ཞིག་བདག་ལ་བསྲིངས། ངས་ཀྱང་བུའི་བསམ་དོན་རྟོགས་པས། དེ་མུར་ཆུ་འཁོལ་གཙང་མར་བཏུངས།
བཟའ་ཟླས་དགུང་ཟས་སུ་ང་དང་བུས་དགའ་ཤོས་བྱེད་པའི་ཚལ་ཁག་གཅིག་བཟོས་འདུག ནམ་རྒྱུན་བཞིན་དང་ག་ཆེ་མདོག་གིས་དགུང་ཟས་ལ་རོལ་བར་རྩོམ་མོད། བུས་ནི་དེ་ཙམ་ཟ་མ་འདོད་པའི་རྣམ་པ་ཞིག་སྟོན་ཅིང་། ཐུར་མ་གསུམ་བཞི་ཙམ་བཟས་རྗེས། ཐད་ཀར་སྒྲིག་ཤིང་བསྒྲིག་པར་ཁ་གཡར་ཏེ། རང་གི་ཉལ་ཁང་ཕྱོགས་སུ་རྒྱུགས་ཕྱིན། ངའི་བསམ་པར་དེ་རིང་གི་ཟས་བུའི་བློ་ལ་མ་བབས་པ་འདྲ་སྙམ་ནས། དེ་ཙམ་སྣང་འཇོག་མ་བྱས།
ཡུད་ཙམ་ནས་བཟའ་ཟླས་ང་ལ་བུ་ཁང་པའི་སྦུག་ཏུ་མིག་ཆུ་གཏོང་གིན་ཡོད་ལུགས་བརྗོད། ང་རང་བུའི་སར་བསྐྱོད་དེ“དེ་རིང་གི་ཁ་ལག་ཞིམ་པོ་མི་འདུག་ན་དྲ་ཐོག་ནས་བུ་རང་ཟ་སྙིང་འདོད་པ་ཞིག་ཉོས་ཆོག”ཅེས་སེམས་གསོ་གཏོང་ཁུལ་བྱས་ཀྱང་། བུའི་སེམས་པ་གསོ་བའི་སྨན་དུ་མ་གྱུར།
དགུང་ཟས་བཟས་རྗེས། རྡོག་ཐོན་བྱེད་རྩིས་བྱས་མོད། བུས་སྐད་གདངས་ཧ་ཅང་དམའ་བའི་སྒོ་ནས“འགྲོ་རན་སོང་ངམ། པཱ་ལགས”ཟེར་ཏེ། གདོང་ནས་ད་དུང་འཁྱུག་ཙམ་བསྡད་ན་སྙམ་པའི་རྣམ་འགྱུར་ཞིག་སྟོན་འོངས་ལ། འདྲེན་བྱེད་ཀྱི་ལྟེང་ཀ་ལས་སྐྱོ་གདུང་གི་མཆི་མའི་རྡོག་ཕྲེང་འཕྲོ་རིམ་འཕྲོར་བཞུར་འོང་། ཚུལ་དེས་བདག་གི་སྙིང་ཁ་བཟོད་བླགས་བྲལ་བའི་ན་ཟུག་གིས་གཏུམས་ལ། རེ་ཞིག་ཅི་བྱ་གཏོལ་བྲལ་དུ་ལུས་པས། དེ་མུར་བཟའ་ཟླས“ཁྱེད་རང་གཉིས་ངག་བསྡམ་རྒྱུར་འགྲན་བསྡུར་བྱེད་པ་མིན་ནམ”ཞེས་ཀུ་རེ་དང་བཅས་ཏེ་སྨྲས།
བུས་གཉེན་ལྕུག་ལྡན་པའི་ལག་ཆུང་དེས་རང་གི་འདྲེན་བྱེད་ལས་བཞུར་བའི་མིག་ཆུ་དག་འབྱིད་ཀྱིན་འཛུམ་ཙམ་བྱས་ཏེ། རང་གི་ཨ་མར་ཕྱོགས་ནས“ང་དང་པཱ་ལགས་གཉིས་ངག་སྡོམ་པའི་འགྲན་བསྡུར་བྱེད་ཀྱི་ཡོད། ཧ་ཧ། ད་པཱ་ལགས་ལ་རྒྱལ་ཁ་ཐོབ་སོང་། བྱ་དགར་ཆུ་འཁོལ་ཕོར་པ་གང་བཏུང་རོགས་གནང”ཞེས་ཧ་ཅང་གྲུང་ཤ་དོད་པའི་མིག་གིས་བདག་ལ་བལྟས་ནས་བཤད་མོད། ཡིན་ནའང་། བུའི་སེམས་གཏིང་གི་བསམ་ཚུལ་དང་རེ་ལྟོས་ངོ་མ་དེ་ཁོའི་རྒྱགས་ཤིང་དཀར་བའི་གདོང་ལས་གསལ་ལྷང་ངེར་མངོན་འོངས།
རེད་ཡཱ། “བྱིས་པའི་ལྟོགས་སླ་མིག་དང་། རྒན་པའི་ལྟོགས་སླ་སེམས”ཟེར་བ་ལྟར། མི་རྒན་པའི་ངོས་ནས་བཤད་ན། རང་ཉིད་ལ་ཅི་ཞིག་མཁོ་བ་དེ་སེམས་ལ་འཆར་ཡང་གདོང་ནས་མངོན་དཀའ་མོད། ལྷད་མེད་སེམས་གཤིས་མངའ་བའི་བྱིས་པར་མཚོན་ན། རང་ལ་ཅི་ཞིག་མཁོ་བ་དེ་ཁ་མ་གསངས་ཀྱང་མིག་ཟུང་ལས་གསལ་པོར་རྟོགས་སྲིད།
“ང་རང་ཐོན་རན་སོང”
སྒོ་ཐོད་དུ་བཀལ་བའི་ཏིར་ལྡན་ཆུ་ཚོད་ཀྱི་ཚག་སྒྲ་ནི་བདག་གི་སྙིང་གི་འཕར་སྒྲ་དང་འགྲན་པར་བྱེད་ཅིང་། ཧ་ཅང་བྲལ་མི་ཕོད་པའི་གདུང་བ་ཞིག་གིས་བདག་གི་སྙིང་ཁམས་ཀྱི་རྒྱ་མཚོ་ཡང་ཡང་སྐྱོམས།
“པཱ་ལགས། ངས་པཱ་ལགས་ཁྱེད་རང་ལ་མོ་ཊ་བཀག་རོགས་བྱེད་པར་ཡོང་ཆོག”
གློ་བུར་བའི་སྐད་ཆ་དེས་བདག་གི་ཡིད་གདུང་གི་རྦ་རླབས་དྲག་ཏུ་གཡོས་ཏེ་བྲལ་གདུང་གི་མིག་ཆུ་བཞུར་ནས། འདྲེན་བྱེད་གཉིས་པོ་ཀེམ་ཀེམ་དུ་གཡོ་བ་དང་། སྙིང་ཉེ་བའི་སྐད་ངག་དེས་བདག་གི་མགྲིན་པ་བརྣངས་ནས། མགོ་བོ་ལྕོག་ཙམ་ལྕོག་ཙམ་བྱེད་པ་ལས་ཁ་ནས་ལན་བཏབ་མ་ཐུབ་པར་ལུས། མཇུག་མཐར་བཟའ་ཟླས“པཱ་ལགས་མི་རྒན་པ་ཡིན་པས། རོགས་པ་བྱེད་དགོས་མེད”ཅེས་བཤད་དེ། བུའི་སྐྱོ་ངག་དང་བདག་གི་གདུང་བ་གཉིས……
གསུམ།
སྙིང་གི་འཕར་སྒྲ་བཞིན་མྱུར་བའི་རླངས་འཁོར་ལྷ་སའི་མེ་འཁོར་འབབ་ཚུགས་སུ་སླེབས་ན་ཡང་། བདག་གི་འདྲེན་བྱེད་ཀྱི་ངོས་སུ་འཆར་བ་ནི་རྒྱགས་ཤིང་དཀར་བའི་ངོ་གདོང་དང་འཛུམ་ཞིང་དམུལ་བའི་འདྲེན་བྱེད་གཉིས་པོ་རེད།
གཟའ་འཁོར་རེའི་མཉམ་འཛོམས་ཀྱི་དུས་སྐབས་ནི་ཅི་འདྲའི་བདེ་ཞིང་སྐྱིད་མོད། གྱེས་བྲལ་གྱི་གནས་སྐབས་ནི་ཅི་འདྲའི་བཟོད་དཀའ་བ་ཞིག་རེད་ཨང་།
མེ་འཁོར་གྱི་འཁོར་སྒྲོམ་དུ་མི་ཚོགས་ཀྱི་ཧ་ཧ་ཧུ་ཧུའི་གཏམ་གླེང་དང་དགོད་སྒྲས་ཁེངས་ཤིང་། བྱིས་པ་མང་པོའི་དགོད་སྒྲ་དང་ངུ་སྒྲ། རྔུར་སྒྲ་སོགས་ཐོས་འཛིན་ལམ་དུ་གྲགས་ཀྱང་། བདག་གི་ཡིད་ཡུལ་དུ་འཆར་བ་ནི་བུའི་ལྷད་མེད་ཀྱི་རྣམ་པ་དེ་ཡིན་ལ། ཐོས་འཛིན་གྱི་བུ་གར་གྲགས་པའང་བུའི་སྐྱོ་གདུང་གི་སྐད་ངག་དེ་རང་ངོ་།།