ཆུ་གསུམ་རྫོང་གིས།
མངོན་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པར་དཔྱད་ཞིབ་བྱས་པ།
ཉེ་ཆར། ཆུ་གསུམ་རྫོང་རིག་གནས་ཅུས་ཀྱིས་ཤང（གྲོང་རྡལ）ཁག་གི་རིག་གནས་ཕྱོགས་བསྡུས་ཞབས་ཞུའི་ལྟེ་གནས་དང་མཉམ་དུ་མངོན་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པའི་དཔྱད་ཞིབ་དཔྱད་དཔོག་ཚོགས་ཆུང་བཙུགས་ནས་ཆུ་མདོ་རྒྱང་ཤང་དང་། སྟོད་གཟིགས་ཤང་། ཆུ་གསུམ་གྲོང་རྡལ་སོགས་ཤང（གྲོང་རྡལ）དུ་མངོན་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པའི་དཔྱད་ཞིབ་དང་དཔྱད་དཔོག་གི་ལས་དོན་སྤེལ་བ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་དཔྱད་ཞིབ་དང་དཔྱད་དཔོག་དེ་སོ་སོས་དཔྱད་བསྡུར་དང་། དཔྱད་ཡིག་ལ་བལྟ་བ། ས་ཆ་དངོས་སུ་ལྟ་ཞིབ་སོགས་ཀྱི་བྱེད་ཐབས་སྤྱད་དེ་མངོན་མིན་རིག་གནས་ཤུལ་བཞག་རྣམ་གྲངས་ཁག་གི་རྒྱུན་འཛིན་པས་2023ལོའི་རྒྱུན་འཛིན་བྱེད་སྒོ་སྤེལ་བར་རང་ངོས་ནས་དཔྱད་བསྡུར་དང་ཕྱོགས་སྡོམ་བྱས་པ་རེད། དཔྱད་ཞིབ་ཚོགས་ཆུང་གིས《ལྷོ་ཁ་གྲོང་ཁྱེར་གྱི་མངོན་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པའི་དཔྱད་ཞིབ་སྐར་གྲངས་རེའུ་མིག》གི་དཔྱད་ཞིབ་ཀྱི་ནང་དོན་དང་དཔྱད་ཞིབ་ཀྱི་ཚད་གཞིར་ཞིབ་བསྡུར་བྱས་ཏེ། “ཕྱོགས་ཡོངས་ནས་ཞིབ་བཤེར་དང་། ས་གནས་ས་ཐོག་ཏུ་ཚོད་སྐོར། ཆད་ལུས་མེད་པ”བཅས་ཀྱི་རྩ་དོན་ལ་བརྩི་སྲུང་ནན་པོ་ཞུས་ནས་ལག་རྩལ་ཁོང་དུ་ཆུད་པ་དང་། སློབ་མ་ཁྲིད་ནས་ལག་རྩལ་སློབ་པ། དཔྱད་ཡིག་ལེགས་སྒྲིག་དང་ཉར་ཚགས། རྒྱུན་འཛིན་བརྒྱུད་བསྒྲགས་དང་ཁྱབ་གདལ་བཅས་དང་། དེ་བཞིན་འབྲེལ་ཡོད་སྡེ་ཚན་དང་གཞོགས་འདེགས་བྱས་ནས་སྤེལ་བའི་ལས་དོན་སོགས་ལ་རྫོང་དེའི་ཆུས་དང་། གྲོང་ཁྱེར། རྫོང་བཅས་རིམ་གསུམ་རྒྱུན་འཛིན་པ་15ལ་དཔྱད་ཞིབ་དང་དཔྱད་དཔོག་བྱས་ནས་དཔྱད་ཞིབ་ཀྱི་རིམ་པ་གཏན་འཁེལ་བྱས་པ་རེད།
ངོ་སྤྲོད་བྱས་པར་གཞིགས་ན། ད་ཐེངས་ཀྱི་དཔྱད་དཔོག་རིང་ཆུ་གསུམ་རྫོང་གི་མངོན་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པས་འོས་འགན་སྒྲུབ་སྟངས་སྔར་བས་ཚད་ལྡན་དུ་བཏང་བ་དང་། དཔྱད་ཞིབ་ཀྱི་གྲུབ་འབྲས་ཀྱང་ཆུ་གསུམ་རྫོང་གི་ལོ་འཁོར་འདིའི་རྒྱུན་འཛིན་པའི་ཁ་གསབ་འགྲོ་གྲོན་དང་དེ་བཞིན་འབྲེལ་ཡོད་མི་སྣས་མུ་མཐུད་རྒྱུན་འཛིན་པའི་འགན་འཁུར་མིན་གྱི་གཞི་འཛིན་སར་བརྩི་རྒྱུ་ཡིན་པ་རེད།