འདི་ནི་བསྟན་འཛིན་ཟླ་བ་2023ལོའི་ལྷོ་ནུབ་མི་རིགས་སློབ་ཆེན་གྱི་ཕུལ་བྱུང་སློབ་གྲྭ་ཆེ་མོ་བའི་འཚར་ལོངས་གཏམ་རྒྱུད་མཉམ་སྤྱོད་ཀྱི་ཚོགས་འདུར་ཞུགས་བཞིན་པ།

འདི་ནི་ནག་ཆུ་གྲོང་ཁྱེར་ཨ་མདོ་རྫོང་གི་དཀའ་ངལ་ཡོད་པའི་སློབ་མས་སྟོད་གོས་གསར་པ་ལེན་བཞིན་པ།

འདི་ནི་བོད་ལྗོངས་དྲོ་སྐྱིད་སྤྱི་ཕན་ཚོགས་པའི་སློབ་གྲྭ་ཆེ་མོ་བའི་དང་བླངས་པས་ལྷ་སར་རིམས་ནད་ཐོན་རིང་སྡེ་ཁུལ་གྱི་སྨན་དོན་མི་སྣར་གཞོགས་འདེགས་བྱས་ནས་ཉིང་སྐྱུར་བརྟག་དཔྱད་བྱེད་བཞིན་པ།

འདི་ནི་སྐབས་བཞི་པའི་དྲོ་སྐྱིད་སྤྱི་ཕན་ཚོགས་པའི་མྱོང་བ་མཉམ་སྤྱོད་ཀྱི་བྱེད་སྒོ་སྤེལ་བཞིན་པ།

“ང་རང་ལྷ་སར་ཡོད་ཀྱང་ཁྲེང་ཏུའུ་ནས་བྱ་དགའ་སྤྲད་བྱུང་། ཁྲེང་ཏུའུ་དང་མི་རིགས་སློབ་ཆེན་གྱི་དགེ་རྒན་རྣམས་ལ་ཐུགས་རྗེ་ཆེ་ཞུ་རྒྱུ་ཡིན” ལྷ་སའི་ཕོ་གཞོན་བསྟན་འཛིན་ཟླ་བ་ནི་ལྷོ་ནུབ་མི་རིགས་སློབ་ཆེན་ཀྲུང་གོའི་སྐད་ཡིག་རྩོམ་རིག་སློབ་གླིང་གི་2023ལོའི་དངོས་གཞིའི་སློབ་ཐོན་སློབ་མ་ཞིག་རེད། ད་ལོར་སློབ་མཐར་ཕྱིན་ནས་ལྷ་སར་ལོག་རྗེས་གཏམ་བཟང་ཞིག་འབྱོར་བ་སྟེ། མི་བཟང་ལས་བཟང་བསྒྲུབས་པའི་དབང་གིས་ཁོང་ཉིད་2023ལོའི་དུས་ཚིགས་གསུམ་པའི“ཁྲེང་ཏུའི་མི་བཟང་གི་མིང་གྲལ”དུ་ཚུད་པ་རེད།

ཐོག་མར་བསྟན་འཛིན་ཟླ་བ་ངོ་ཤེས་དུས་ནི་ལོ་བཞིའི་གོང་གི་དབྱར་གསེང་ལ་ཡིན། སྐབས་དེར་ཁོང་དང་སློབ་གྲོགས་ཚོས་བོད་རང་སྐྱོང་ལྗོངས་མི་དམངས་སྨན་ཁང་དུ་དང་བླངས་པ་བྱེད་བཞིན་འདུག ཁོང་ཚོས་བོད་ལྗོངས་དྲོ་སྐྱིད་སྤྱི་ཕན་ཚོགས་པ་ཞེས་འཁོད་པའི་ཁན་སྦྱར་སྔོན་པོ་ཞིག་གྱོན་ནས་སྨན་ཁང་དུ་ཡོང་བའི་ནད་པར་ཨང་ཀི་བཀག་རོགས་དང་སྨན་པ་བསྟེན་རོགས་། ཡང་ན་ཞིང་འབྲོག་ཁུལ་གྱི་ནད་པར་སྐད་སྒྱུར་བྱེད་རོགས་སོགས་ཀྱི་དམངས་ཕན་དང་བླངས་ཞབས་འདེགས་ཞུས་པ་རེད།

སི་ཁྲོན་ཁྲེང་ཏུའུ་ནི་ལྷོ་ནུབ་ས་ཁུལ་གྱི་ལྟེ་བའི་གྲོང་ཁྱེར་ཡིན་པ་དང་། སྨན་བཅོས་ཆ་རྐྱེན་བལྟོས་བཅས་ཀྱིས་གཅིག་སྡུད་ཆེ་བ་མ་ཟད། ལོ་ལྟར་བོད་ནས་ཁྲེང་ཏུར་སྨན་པ་བསྟེན་པར་ཡོང་མཁན་གྱི་ནད་པ་མང་པོ་ཡོད། བོད་ཀྱི་ནད་པ་ཁག་གཅིག་གིས་རྒྱ་སྐད་ཡག་པོ་ཤོད་མི་ཤེས་པས་སྨན་པར་ནད་རྟགས་གསལ་པོར་བཤད་མ་ཐུབ། དེའི་རྐྱེན་གྱིས་སྐབས་རེ་སྨན་བཅོས་ལ་འགོག་རྐྱེན་ཆེན་པོ་ཐེབས་པའང་ཡོད།

2019ལོར་བསྟན་འཛིན་ཟླ་བའི་གྲོགས་པོའི་གཉེན་ཉེ་ནག་ཆུ་ནས་ཧྭ་ཤིས་སྨན་ཁང་དུ་སྨན་པ་བསྟེན་པར་འགྲོ་སྐབས་བསྟན་འཛིན་ཟླ་བར་རོགས་པ་བྱེད་རོགས་ཞུས། ཟླ་བ་གཅིག་རིང་སྨན་བཅོས་བྱས་པ་བརྒྱུད་ཨ་ཅག་ལགས་ཀྱི་ན་ཚ་ཅུང་དྲག་སྐྱེད་བྱུང་བས་སྨན་པས་ཁྱིམ་དུ་ལོག་ནས་སྨན་བཟས་ན་འགྲིག་ཅེས་བཤད། མི་འགྱངས་པར་བསྟན་འཛིན་ཟླ་བས་རོགས་པའི་གཉེན་ཉེར་སྨན་པ་བསྟེན་རོགས་བྱས་པའི་མི་བཟང་ལས་བཟང་གི་གནས་ཚུལ་ནད་རོགས་ཚོས་གོ་ཐོས་བྱུང་ལ། ཁོང་གིས་སློབ་གྲོགས་རྣམས་སྐུལ་སློང་བྱས་ནས་གྲུབ་པའི་སྐད་སྒྱུར་དང་བླངས་དཔུང་ཁག་དེ་ནད་པ་དང་སྨན་བཅོས་ཚོགས་པའི་དབར་གྱི་སྦྲེལ་ཟམ་ལྟ་བུར་གྱུར་ཏེ། ནད་པར་སྨན་བཅོས་བདེ་བླག་ཐུབ་པར་འགན་ལེན་བྱས་པ་རེད། ད་ཆ་ལྷོ་ནུབ་མི་རིགས་སློབ་ཆེན་དུ་གཅེས་པར་འོས་པའི་བོད་རིགས་ཀྱི་སློབ་མ་ཁྱུ་གཅིག་གིས་རིན་པ་མེད་པར་སྐད་སྒྱུར་བྱེད་རོགས་བྱེད་ཀྱི་ཡོད་པ་ཀུན་གྱིས་རྟོགས།

“ཁྱེད་ལ་རྒྱུ་འབྱོར་པ་མེད་ཀྱང་ཡིན་གཅིག་སེམས་བཟང་ཅན་ཞིག་བྱེད་དགོས”ཞེས་པ་ནི་བསྟན་འཛིན་ཟླ་བ་ཁྱིམ་དང་བྲལ་ནས་སློབ་གྲྭར་འགྲོ་རིམ་བཞིན་ཨ་མ་ལགས་ཀྱིས་གསུངས་པའི་བཀའ་མོལ་རེད། དྲིན་ཆེན་ཕ་མའི་བྱམས་སེམས་དང་སློབ་སྟོན་ཡང་ཡང་གནང་བ་ལས་ཁོང་ལ་ཆུང་དུས་ནས་གཞན་ཕན་གྱི་སེམས་པ་བཟང་པོ་ཞིག་རྒྱུད་ལ་འཇགས།

ཕུགས་འདུན་མངོན་དུ་འགྱུར་བར་བསྟན་འཛིན་ཟླ་བས་ལོ་4ཙམ་དཀའ་ལས་བརྒྱབ་ཅིང་། སློབ་ཆེན་དུ་འཚོ་བ་སྐྱེལ་བའི་ལོ་4རིང་བསྟན་འཛིན་ཟླ་བས་ཕ་ཡུལ་གྱི་ཡུལ་མི་སྤུན་མཆེད་ཚོར་རོགས་རམ་གང་འདྲ་བྱེད་པའི་ཐད་བསམ་གཞིག་བྱས་ལ། མཐར་ཁོང་ལ་སྤྱི་ཕན་གྱི་ལས་ལ་གཞོལ་རྒྱུའི་བློ་སྒོ་འཆར་བ་དང་། 2019ལོའི་ཟླ་5པར་ལྷོ་ནུབ་མི་རིགས་སློབ་ཆེན་གྱི་ཉལ་ཁང་ཆུང་ཆུང་ཞིག་ཏུ“བོད་ལྗོངས་དྲོ་སྐྱིད་སྤྱི་ཕན་ཚོགས་པ”བཙུགས་པ་རེད། ཚོགས་པ་དེར་དང་ཐོག་མི་གཅིག་ལས་མེད་པ་ནས་ད་ཆ་དང་བླངས་པ་400ལྷག་ཙམ་ལ་འཕེལ་རྒྱས་ཕྱིན་ཏེ། ལྷ་ས་དང་། ལྷོ་ཁ། གཞིས་རྩེ་སོགས་སུ་ཁྱབ་ཡོད། བསྟན་འཛིན་ཟླ་བས་ཚོགས་པའི་སྣེ་ཁྲིད་ནས་སྤྱི་ཕན་བྱེད་སྒོ་ཁག་བརྒྱ་ཕྲག་ལྷག་ཙམ་སྤེལ་ཞིང་། ཁོར་ཡུག་སྲུང་སྐྱོང་ནས་རིམས་འགོག་གི་འཐབ་ས་དང་པོ་སོགས་ཚང་མར་ཁོང་ཚོའི་གཟུགས་བརྙན་མཐོང་རྒྱུ་ཡོད། 2020ལོའི་དབྱར་ཁར་བསྟན་འཛིན་ཟླ་བས་སྤྱི་ཕན་ཚོགས་པ་གཞན་4དང་མཉམ་འབྲེལ་གྱིས་ཀུང་སི་6གིས་རོགས་སྐྱོར་བྱས་པའི་སྒོར་ཁྲི་30རི་བའི་དངོས་ཟོག་ཁྱེར་ནས་ནག་ཆུ་ཨ་མདོ་རྫོང་དུ་བསྐྱོད་དེ། དམིགས་བསལ་དཀའ་ངལ་ཡོད་པའི་མི་ཚོགས་དང་སློབ་ཆུང་གསུམ། དེ་བཞིན་ཉེ་འགྲམ་གྱི་ཤང་ཁ་ཤས་སུ་ཞལ་འདེབས་འབུལ་བའི་བྱེད་སྒོ་སྤེལ།

སློབ་ཆེན་ལོ་རིམ་དང་པོའི་སྐབས་སུ་སློབ་གྲྭའི་གཏམ་བཤད་འགྲན་བསྡུར་ནང་བསྟན་འཛིན་ཟླ་བར་བྱ་དགའ་རིམ་པ་གཉིས་པ་ཐོབ་པ་རེད། རང་ཉིད་ཀྱི་སྐྲག་སྣང་ཁྱད་དུ་བསད་ཅིང་བློ་ཁོག་ཆེན་པོས་གཏམ་བཤད་བྱེད་ཐེངས་དང་པོར་བྱ་དགའ་ཐོབ་པར་ཁོང་ལ་དགའ་ཚོར་དཔག་མེད་སྐྱེས། ཁོང་གི་བསམ་པར་གཟི་བརྗིད་མཚན་སྙན་ཆུང་ཆུང་ཞིག་ལས་ཀྱང་རང་ཉིད་ལ་ལྕག་སྐུལ་འདི་འདྲའི་ཆེན་པོ་ཐེབས་བྱུང་། རི་གྲོང་གི་བུ་ཕྲུག་ཕལ་ཆེ་བ་རང་ཉིད་ལྟར་ངོ་ཚ་སྨིན་པོ་ཡོད་པས། ལྷ་སར་ཡང་ཕྲུ་གུ་ཚོར་རང་ཉིད་ངོམ་སྟོན་བྱེད་སའི་ལས་སྟེགས་ཤིག་སྐྲུན་དགོས་སྙམ། དེ་ནས“ལྷུག་གླེང་བར་མཐོངས་སྤྱི་ཕན་རང་བཞིན་གྱི་གཏམ་བཤད་རྣམ་གྲངས”ཞེས་པ་གཉེར་འགོ་ཚུགས་ལ། བསྟན་འཛིན་ཟླ་བས་འབད་བརྩོན་བྱས་པ་བརྒྱུད“ལྷུག་གླེང་བར་མཐོངས”འཐུས་སྒོ་ཚང་བའི་སྤྱི་ཕན་རང་བཞིན་གྱི་སྤེལ་རེས་ལས་སྟེགས་ཤིག་ཏུ་གྱུར་ནས་གཏམ་བཤད་དང་། གྱེར་འདོན། རྩོད་གླེང་། མཉམ་སྤྱོད་ཚོགས་འདུ་བཅས་དང་དེ་བཞིན་མི་སྣའི་ཆེད་དོན་བཅར་འདྲི་སོགས་ཀྱི་ནང་དོན་ཚུད་ཡོད།

“ལྷུག་གླེང་བར་མཐོངས”སྤྱི་ཕན་རང་བཞིན་གྱི་སྤེལ་རེས་ལས་སྟེགས་ཀྱི་གཏམ་བཤད་བྱེད་ཐེངས་གཅིག་གིས་བསྟན་འཛིན་ཟླ་བར་བག་ཆགས་ཤིན་ཏུ་ཟབ་མོ་ཞིག་བཞག་ཡོད། སྐབས་དེ་དུས་བསྟན་འཛིན་ཟླ་བས་སྐད་འཕྲིན་སྤྱི་རྟགས་སུ་གཏམ་བཤད་བསྡུ་ལེན་གྱི་བརྡ་ཐོ་བཀྲམ་པ་དང་། ཨ་ཅག་གཅིག་གིས་བརྡ་ཐོ་མཐོང་འཕྲལ་ཁོང་དང་སྐད་འཕྲིན་འབྲེལ་མཐུད་བྱས་ཏེ། བསྟན་འཛིན་ཟླ་བར་ངའི་མཐོ་རིམ་སློབ་འབྲིང་འགྲིམ་བཞིན་པའི་བུ་མོར་སེམས་སྦུག་དོག་ནད་ཕྲན་བུ་ཡོད་པས་གཞན་དང་སྐད་ཆ་མི་ཤོད་ལ་སྒོ་ཕྱིར་ཡང་མི་འགྲོ། ངས་བུ་མོ་གཏམ་བཤད་ལ་ཞུགས་བཅུག་སྟེ་མི་གཞན་དང་འབྲེལ་བ་མང་ཙམ་བྱེད་དུ་འཇུག་འདོད་ཅེས་བཤད། བསྟན་འཛིན་ཟླ་བས་གནས་ཚུལ་ཤེས་རྗེས་རང་འགུལ་ངང་ཨ་ཅག་དེའི་བུ་མོ་དང་འབྲེལ་གཏུག་བྱས་པ་མ་ཟད། བྱེད་སྒོ་དེར་ཞུགས་རྒྱུའི་ལྕག་སྐུལ་ཡང་བྱས། ཐོག་མར་བུ་མོ་དེས་སུན་སྣང་བྱེད་པའི་ཁར་ལན་ཡང་སློག་འདོད་བྱེད་ཀྱི་མེད། བུ་མོའི་བསམ་པ་གུ་ཡངས་སུ་གཏོང་ཆེད་བསྟན་འཛིན་ཟླ་བས་རང་ཉིད་ཀྱི་འདས་སོང་གི་མྱོང་བརྒྱུད་ལྷུག་པོར་གླེང་བས། མཐར་བུ་མོ་དེར་སེམས་འགུལ་ཆེན་པོ་ཐེབས་ཤིང་། སེམས་ནད་ཁྱད་དུ་བསད་དེ་དཔའ་ངར་ཆེན་པོས་གཏམ་བཤད་འགྲན་བསྡུར་ལ་ཞུགས་རྒྱུའི་ཁས་བླངས། མ་ཟིན་ལ་ཞིབ་བཤེར་དང་། ཐོག་མའི་འགྲན་བསྡུར། མཐའ་བསྡུར་བཅས་བྱས་རྗེས་མཐར་ཁོ་མོས་གར་སྟེགས་སུ་ལངས་ནས་གཏམ་བཤད་བྱས། ལྟད་མོ་བ་80ལྷག་ཙམ་ལ་རང་ཉིད་ཀྱི་བརྩམས་སྒྲུང་བྲིས་པའི་འཚོ་བ་ལྷུག་པོར་གླེང་བར་བྱ་དགའ་རིམ་པ་གསུམ་པའང་ཐོབ། མ་གཞི་བུ་མོའི་གཏམ་བཤད་མཚམས་རེར་འགག་ནའང་རང་ཉིད་ཀྱི་བསམ་པའི་འཆིང་རྒྱ་ལས་གྲོལ་ཐུབ་པས། བསྟན་འཛིན་ཟླ་བར་སེམས་གཏིང་ནས་དགའ་ཚོར་ཆེན་པོ་སྐྱེས། དེ་རྗེས་བསྟན་འཛིན་ཟླ་བས་སླར་ཡང་བུ་མོ་དེར་དྲ་ཐོག་ནས་ཁ་བརྡ་བྱེད་སྐབས་ཁོ་མོ་སློབ་གྲྭ་ཆེ་མོར་རྒྱུགས་འཕྲོད་པ་མ་ཟད། ད་དུང་སྤྱི་ཚོགས་མཉམ་སྡེབ་ཀྱི་འགན་འཁུར་བ་བྱས་ནས་སེམས་ཁམས་ཀྱི་སྐྲག་སྣང་དང་འཚེར་སྣང་ལས་རྣམ་པར་རྒྱལ་ཐུབ་པ་རྟོགས།

མིག་སྔའི་བར“ལྷུག་གླེང་བར་མཐོངས”རྣམ་གྲངས་གཉེར་ནས་ལོ་གསུམ་སོང་རིང་བྱེད་སྒོ་ཐེངས་བདུན་སྤེལ་བ་དང་། མི་གྲངས་400ལྷག་ཙམ་ཞུགས་པ་དང་འབྲེལ། ལྷ་ས་གྲོང་ཁྱེར་གྱི་གཞོན་ནུའི་དང་བླངས་རྣམ་གྲངས་ཀྱི་འགྲན་བསྡུར་ཆེན་པོའི་བྱ་དགའ་རིམ་པ་གཉིས་པའང་ཐོབ་པ་རེད།

སྤྱི་ཕན་བྱེད་སྒོ་སྤེལ་བ་ནས་བཟུང་། བསྟན་འཛིན་ཟླ་བ་དང་ཁོང་གི་དཔུང་ཁག་སྔ་རྗེས་སུ་2023ལོའི་དུས་ཚིགས་གསུམ་པའི“ཁྲེང་ཏུའི་མི་བཟང་གི་མིང་གྲལ”དང་། 2022ལོའི་སི་ཁྲོན་ཞིང་ཆེན་གྱི“སློབ་གྲྭ་ཆེ་མོ་བའི་ལོ་འཁོར་གྱི་མི་སྣ” ནག་ཆུ་ཨ་མདོ་རྫོང་གི་དང་བླངས་པའི་ཕུལ་བྱུང་དཔུང་ཁག ལྷ་ས་གྲོང་ཁྱེར་ལྷུན་གྲུབ་རྫོང་གི་དང་བླངས་པའི་ཕུལ་བྱུང་དཔུང་ཁག དབུལ་སྐྱོར་གྱི་ཕུལ་བྱུང་དང་བླངས་པ། རིམས་འགོག་གི་ཕུལ་བྱུང་དང་བླངས་པ་སོགས་སུ་བདམས་ཞིང་། ལྷ་ས་གྲོང་ཁྱེར་གྱི་དང་བླངས་རྣམ་གྲངས་འགྲན་བསྡུར་ཆེན་པོའི་བྱ་དགའ་རིམ་པ་གཉིས་པ་དང་། ཇོ་མོ་གླང་མའི་སྐད་རིགས་གསུམ་གྱི་གཏམ་བཤད་འགྲན་བསྡུར་གྱི་བྱ་དགའ་རིམ་པ་གཉིས་པ་སོགས་ཐོབ་པ་རེད།