གྲོང་ཁྱེར་གྱི་སྒོ་བྱང་ཚད་ལྡན་ཅན་དུ་གཏོང་ཐབས་སྐོར་རགས་ཙམ་གླེང་བ།
ལྷ་ས་གྲོང་ཁྱེར་གྱིས་གཙོས་པའི་བོད་ལྗོངས་ཀྱི་གྲོང་ཁྱེར་ཆེ་གྲས་ཁག་གིས་ཆབ་སྲིད་དང་། རིག་གནས། དཔལ་འབྱོར། ཚོང་ལས་བཅས་ཀྱི་གནས་བབ་གལ་ཆེན་བཟུང་ཡོད་ལ། སྤུན་ཟླའི་མི་རིགས་ཁག་དང་རིག་གནས་སྤེལ་རེས་དང་ཚོང་གཉེར་སོགས་བྱེད་པའི་སྟེགས་བུ་གལ་ཆེན་ཤ་སྟག་ཡིན་མོད། བོད་ལྗོངས་ཀྱི་གྲོང་ཁྱེར་གྱི་ཁྲོམ་ལམ་དང་ཚོང་ཁང་སོགས་ཀྱི་སྒོ་བྱང་ཁག་གཅིག་གི་ཡིག་གཟུགས་དང་། ཡིག་སྒྱུར། ཐ་སྙད་བཀོལ་སྤྱོད། དག་ཆ་བཅས་ལ་ནོར་འཁྲུལ་མི་ཉུང་བ་ཡོད་པ་མཐོང་བྱུང་། དེས་ན། འདིར་སྒོ་བྱང་གི་སྤྱི་བཤད་དང་། སྒོ་བྱང་ཚད་ལྡན་མེད་པའི་རྒྱུ་རྐྱེན། དེ་བཞིན་ཚད་ལྡན་ཅན་དུ་འགྱུར་ཐབས་དང་དེའི་གལ་ཆེའི་རང་བཞིན་བཅས་དོན་ཚན་ཁག་གསུམ་ནས་སྒོ་བྱང་ཚད་ལྡན་དུ་གཏོང་ཐབས་སྐོར་རགས་ཙམ་གླེང་བར་བྱ།
དང་པོ། སྒོ་བྱང་གི་སྤྱི་བཤད།
སྤྱིར་སྒོ་བྱང་ནི་རི་མོ་དང་ཡི་གེ་གཉིས་ནས་གྲུབ་པ་ཞིག་ཡིན་ཏེ། རི་མོར་མཚོན་ན། རི་ར་བ་ཁང་ཁྱིམ་ལ་སོགས་པའི་ཡུལ་གྱི་ལྗོངས་ཡོད་དོ་ཅོག་དང་། འགྲོ་བ་མིའི་རིགས་དང་གཅན་གཟན་རི་དྭགས་སྒོ་ཕྱུགས་ལ་སོགས་པའི་སྲོག་ཆགས། དེ་བཞིན་མཚོན་རྟགས་སྣ་ཚོགས་པ་སོགས་རི་མོར་འབྲི་སྲོལ་ཡོད། ཡི་གེར་མཚོན་ན། སྐད་ཡིག་སྣ་ཚོགས་བཀོལ་སྤྱོད་བྱེད་སྲོལ་ཡོད། ཡིག་རིགས་དེ་དག་ལ་ཡི་གེའི་དག་ཆ་དང་ཚིག་གི་སྦྱོར་བ། ཡིག་སྒྱུར་སྤུས་དག བརྡ་སྤྲོད་ཀྱི་གཞུང་དང་མཐུན་པ། སྒྲིག་གཞི་ཚད་ལྡན་དང་པར་རིས་ཡང་དག་པ་དགོས། དེ་དག་ནི་སྒོ་བྱང་ཞིག་ལ་ངེས་པར་དུ་ཚང་དགོས་པའི་རྨང་གཞིའི་ཆ་རྐྱེན་ཡིན། དེ་བཞིན་སྒོ་བྱང་ལས་མི་རིགས་གང་དེའི་ཐུན་མོང་མ་ཡིན་པའི་ཁྱད་ཆོས་མཚོན་ཐུབ་ལ། འཛད་སྤྱོད་པ་དང་ཚོང་གཉེར་བའི་དགོས་མཁོའང་མཚོན་ཐུབ།
གཉིས་པ། སྒོ་བྱང་ཚད་ལྡན་མིན་པའི་གནས་བབ་དང་དེའི་འབྱུང་རྐྱེན།
སྐད་ཡིག་ལ་བཀོལ་སྤྱོད་མེད་ཚེ་བེམ་པོ་ལྟར་སྣང་ལ། བཀོལ་སྤྱོད་ལ་སྤུས་ཚད་མེད་ཚེ་ནད་པ་དང་མཚུངས། དཔལ་འབྱོར་འཕེལ་རྒྱས་ཀྱི་མཐོ་རླབས་འཕྱུར་བཞིན་པའི་དུས་རབས་འདི་ནི་སྤུན་ཟླའི་མི་རིགས་ཁག་འབྲེལ་འདྲིས་དང་། རིག་གནས་སྤེལ་རེས། ཕན་ཚུན་འགྲོ་འོང་བཅས་བྱེད་པའི་དུས་སྐབས་བཟང་པོ་ཞིག་ཡིན་པས། དུས་སྐབས་འདི་ལྟ་བུའི་འོག་ཚོང་ཁྲོམ་གྱི་སྒོ་བྱང་ནི་ཡུལ་ལུང་གང་དེའི་མིག་ལྟ་བུ་མ་ལགས་སམ། འོན་ཏེ་ང་ཚོའི་ཁོར་ཡུག་ཁྲོད་དུ་སྐད་ཡིག་གི་བེད་སྤྱོད་ཚུལ་དང་མི་མཐུན་པའི་སྣང་ཚུལ་ཁག་གཅིག་མཐོང་ཆོས་སུ་སྣང་སྟེ། ཡིག་ནོར་མང་ཞིང་དག་ཆ་དག་ཡིག་དང་མི་མཐུན་པ། དུས་གསུམ་གོ་ལྡོག་ནས་འདས་ཚིག་མ་འོངས་ལ་སྤྱད་པ། ཡིག་སྒྱུར་གཞུང་དང་འགལ་ནས་ཤར་ཕྱོགས་ནུབ་ཏུ་བསྒྱུར་བ། ཡིག་སྲོལ་རང་སྣང་གང་ཤར་དུ་སྤྱོད་པའི་སྣང་ཚུལ་མང་པོ་མཆིས། རིག་གནས་དང་ཆ་འཕྲིན་དང་དེ་བཞིན་མིའི་རིགས་ཀྱི་འཚོ་བའི་གོམས་འགྲོས་ཤིན་ཏུ་མགྱོགས་པའི་དུས་འདིར། སྒོ་བྱང་གི་ཡི་གེ་ཚུལ་དང་མི་མཐུན་པའི་སྣང་ཚུལ་ཐོན་པའི་རྒྱུ་རྐྱེན་གཙོ་བོ་གཅིག་ནི་ཁེ་ལས་དང་འཛད་སྤྱོད་པའི་རིག་གནས་ཀྱི་འདུ་ཤེས་དམན་པ། གཉིས་ནི་རང་བྱུང་ཚན་རིག་གི་ཐ་སྙད་དཀོན་པ། གསུམ་ནི་འཚོ་བ་དངོས་ལ་དོ་སྣང་དང་ཐ་སྙད་ཀྱི་དཔྱད་བརྗོད་ཉག་ཕྲ་བ་བཅས་ཡིན་པར་སེམས།
གསུམ་པ། སྒོ་བྱང་ཚད་ལྡན་ཅན་དུ་བཅོས་ཐབས་དང་དེའི་གལ་ཆེའི་རང་བཞིན།
སྒོ་བྱང་ཚད་ལྡན་དུ་བཅོས་ཐབས་གསུམ་ཡོད་དེ། སྲིད་གཞུང་གི་ཐུགས་ཁུར་འོག་ཁེ་ལས་དང་འཛད་སྤྱོད་པས་དོན་དེར་གཙིགས་ཆེན་བྱས་ནས་ནོར་འཁྲུལ་ཡོ་བསྲང་བྱེད་དགོས་པ་དང་གཅིག ཤེས་ཡོན་པའི་སྡེས་གཙོས་པའི་སྤྱི་ཚོགས་ཀྱི་མི་སྣ་ཁག་གིས་ཡིག་ནོར་འཚོལ་ཞིབ་དང་དག་བཅོས་བྱེད་དགོས་པ་དང་གཉིས། གང་དེའི་འབྲེལ་ཡོད་ཚན་པ་དང་མི་སྒེར་ནས་ཐུགས་ཁུར་ཟབ་བཞེས་ཀྱིས་མ་བྱུང་སྔོན་འགོག་བྱེད་དགོས་པ་བཅས་གསུམ་བཅས་རེད།
གཞན་ཡང་། སྒོ་བྱང་ཚད་ལྡན་དུ་གཏོང་དགོས་པའི་གལ་ཆེའི་རང་བཞིན་ཁག་གསུམ་ནས་བརྗོད་ན་འདི་ལྟ་སྟེ། མིང་དུ་གདགས་པར་མ་མཛད་ན།། འཇིག་རྟེན་ཐམས་ཅད་རྨོངས་པར་གྱུར།། དེ་ཕྱིར་རྨོངས་པ་སེལ་བའི་ཕྱིར།། མགོན་པོས་མིང་དུ་གདགས་པར་མཛད་ཅེས་གསུངས་པ་ལྟར། སྣོད་བཅུད་འཇིག་རྟེན་ནི་ཐ་སྙད་ལ་བརྟེན་ནས་རྟོགས་དགོས་པས་འཇིག་རྟེན་གྲགས་ཚོད་དང་རིགས་པའི་གཞུང་ལུགས་ལས་འགལ་བའི་མིང་གིས་འཇིག་རྟེན་གྱི་རྨོངས་པ་སེལ་རྒྱུ་ལྟ་ཅི། ཐ་ན་རང་གཞན་ལོག་ལམ་དུ་ཁྲིད་པའི་རྒྱུར་འགྱུར་ཉེན་ཆེ་བ་དང་གཅིག ཐ་སྙད་ལ་ནི་མ་བརྟེན་པར།། དམ་པའི་དོན་ནི་རྟོགས་མི་འགྱུར།། དམ་པའི་དོན་ནི་མ་རྟོགས་པར།། མྱ་ངན་འདས་པ་ཐོབ་མི་གྱུར་ཞེས་གསུངས་པ་ལྟར། ཐ་སྙད་ནི་མིག་གི་དབང་པོ་དང་འདྲ་ལ་དོན་གསལ་བར་བྱེད་པའི་རྒྱུ་གལ་ཆེན་ཡིན་པས། མངོན་སུམ་མིག་ཤེས་ཀྱི་སྤྱོད་ཡུལ་དུ་གྱུར་བའི་སྒོ་བྱང་ལྟ་བུ་ནི་ང་ཚོའི་འགྲོ་འདུག་སྤྱོད་གསུམ་དང་ཐད་ཀར་འབྲེལ་བ་ཡོད་པ་དང་གཉིས། སྒོ་བྱང་ནི་གྲོང་ཁྱེར་ཞིག་གི་ངོ་གདོང་ལྟ་བུ་ཡིན་ལ། དེ་ལ་ས་གནས་ཀྱི་ངོས་འཛིན་དང་དབྱེ་འབྱེད་ཀྱི་ནུས་པ་ལྡན་པ་མ་ཟད། ད་དུང་གྲོང་ཁྱེར་ཞིག་གིས་ཕྱི་ཕྱོགས་སུ་གཟུགས་བརྙན་མངོན་པའི་མེ་ལོང་ལྟ་བུ་ཞིག་ཡིན་པ་དང་གསུམ་བཅས་རེད།
ཆུ་མ་ཤོར་གོང་གི་རགས་དང་རྐྱེན་མ་བྱུང་གོང་གི་བཟློག་པ་ཞེས་པ་ལྟར། ང་ཚོས་རང་ཉིད་དང་ཐད་ཀར་འབྲེལ་བའི་ཚོང་ཁང་དང་། ཇ་ཁང་། ནང་མ་ཁང་། སློབ་གྲྭ་སོགས་ཀྱི་སྒོ་བྱང་ལ་སྣང་འཇོག་བྱེད་རྒྱུ་གལ་ཆེ་སྟེ། གལ་སྲིད་གླུད་ཤར་དང་གཏོར་མ་ནུབ་ཅེས་པའི་དཔེ་ལྟར་རིག་གཞུང་སྦྱོང་ཁུལ་བྱས་ནས་རིག་གནས་སྲུང་སྐྱོང་གི་བྱ་གཞག་གཉེར་ཁུལ་མཛད་ཀྱང་གཞུང་ལུགས་དང་ལག་ལེན་ཡ་གྱར་བའི་སྣང་ཚུལ་ཐོན་སྲིད། དེར་བརྟེན། ང་ཚོས་རང་ཉིད་ནས་འགོ་བཙུགས་ཏེ་ང་ཚོའི་མིག་ངོར་རྒྱུན་དུ་འཆར་བའི་སྒོ་བྱང་གི་ནོར་འཁྲུལ་ཡོ་བསྲང་བྱས་ནས་སྒོ་བྱང་ལས་ལོ་ཙཱའི་སྤུས་ཚད་དང་སྐད་ཡིག་གི་བྱང་ཚད་མངོན་དགོས་ཤིང་། ལྷག་པར་དུ་རིག་གཞུང་ལ་ཞིབ་འཇུག་གནང་མཁན་གྱི་ཤེས་ཡོན་པའི་ཚོགས་དང་སྐད་གཉིས་སྨྲ་བའི་ལོ་ཙཱ་བ་ཚོས་དོན་འདིར་ཅིས་ནས་ཀྱང་ཐུགས་བསམ་བཞེས་དགོས།
མདོར་ན། སྒོ་བྱང་ནི་ཕྱོགས་ཀྱི་སྐུ་མགྲོན་ནང་དུ་བསུ་བའི་དྲི་མེད་མཇལ་དར་ཞིག་ཡིན་པའི་ཆ་ནས་ནོར་དང་འཁྲུལ་བའི་དབང་དུ་ཤོར་ན་ག་ལ་འགྲིག དེར་བརྟེན། གྲོང་ཁྱེར་གྱི་སྒོ་བྱང་རྣམས་ཚད་ལྡན་ཅན་དུ་བཅོས་དགོས་པ་ནི་གལ་འགངས་ཤིན་ཏུ་ཆེ་སྙམ།
（བོད་ལྗོངས་སློབ་ཆེན་སློབ་མའི་གསར་གཏོད་རྣམ་གྲངས་ཀྱི་དུས་མཚམས་རང་བཞིན་གྱི་དཔྱད་འབྲས་ཡིན། ཆོག་མཆན་ཨང་རྟགས་S202310694001 བོད་ལྗོངས་སློབ་ཆེན་རིག་གཞུང་སློབ་གླིང་2021ལོའི་ཡིག་སྒྱུར་འཛིན་གྲྭ པད་མ་གཡང་མཚོ）