སྐྱོར་མོ་ལུང་ལྷ་མོ་ནི་འབག་སྔོན་པོའི་ལྷ་མོའི་ཡ་གྱལ་གལ་ཆེན་ཞིག་ཡིན་ཞིང་། དེ་ནི་ད་ཡོད་ལྷ་མོ་ཚོགས་པའི་ཁྲོད་སྒྱུ་རྩལ་གྱི་སྐོར་ལ་ཆེས་འཐུས་སྒོ་ཚང་ལ་གྲ་རྒྱས་ཤོས་དང་། ཤུགས་རྐྱེན་ཆེ་ཤོས་ལྡན་པ། ཁྱབ་གདལ་ཆེ་ཤོས་བྱུང་བ་ཞིག་བཅས་རེད། སྐྱོར་མོ་ལུང་ལྷ་མོ་ཚོགས་པ་ནི་བོད་རྙིང་པའི་སྐབས་སུ་ཆེད་ལས་རང་བཞིན་ལྡན་པའི་ལྷ་མོ་ཚོགས་པ་གཅིག་པུ་དེ་ཡིན་ཞིང་། དེ་ཉིད་བོད་ས་གནས་སྲིད་གཞུང་གི་རྩིས་ཕྱག་ལས་ཁུངས་དང་ཀུན་བདེ་གླིང་དགོན་པ་གཉིས་ནས་མཉམ་དུ་དོ་དམ་བྱེད་ཀྱི་ཡོད། འོན་ཀྱང་ཟླ་ཕོགས་སྤྲོད་སྲོལ་མེད་པ་རེད། ཞོ་སྟོན་ལ་ཞུགས་ནས་འཁྲབ་སྟོན་བྱེད་པར་གསོལ་རས་ཀྱི་དངུལ་དང་བཟའ་བཅའ་ཞུ་བ་ཕུད། དུས་ཚོད་གཞན་དག་སྐབས་བོད་ཀྱི་ས་ཕྱོགས་གང་སར་བསྐྱོད་དེ་ལྷ་མོ་འཁྲབ་པར་བརྟེན་ནས་འཚོ་ཐབས་བྱེད་ཀྱི་ཡོད་པ་རེད། ཁོང་ཚོའི་དབང་ཆ་གཅིག་པུ་ནི་གང་འདོད་དུ་འཁྲབ་སྟོན་པ་འདེམས་སྒྲུག་བྱེད་ཆོག་པ་དེ་ཡིན་པ་རེད། དེར་བརྟེན་ཁོང་ཚོས་བོད་ས་གནས་སྲིད་གཞུང་ནས་སྤྲད་པའི་ཡིག་ཆ་ཤོག་ལྷེབ་གཅིག་ཡོད་པ་གསལ་བསྒྲགས་བྱས་ཏེ་ལས་ཞོར་ལྷ་མོ་ཚོགས་པའི་ཁྲོད་ཀྱི་ཕུལ་བྱུང་འཁྲབ་སྟོན་པ་རང་དགར་ཉར་གྱི་ཡོད། ལྷ་མོ་ཚོགས་པ་ནི་དང་ཐོག་སྟོད་ལུང་བདེ་ཆེན་རྫོང་སྐྱོར་མོ་ལུང་གྲོང་ཚོའི་དམངས་ཁྲོད་ཀྱི་ལྷ་མོ་ཚོགས་པ་ཡིན་པས་ན་སྐྱོར་མོ་ལུང་ལྷ་མོ་ཚོགས་པ་ཞེས་འབོད་ཀྱི་ཡོད།

སྐྱོར་མོ་ལུང་ལྷ་མོ་ཁྱབ་སྤེལ་དང་དར་ཁྱབ་བྱུང་བའི་ས་ཆ་ཤིན་ཏུ་རྒྱ་ཆེ་བའི་སྟབས་ཀྱིས། རྒྱལ་མཁར་ཟློས་གར་ཚོགས་པས《སྣང་ས་འོད་འབུམ》དང《འུན་ཤིང་ཀོང་ཇོ》བཅས་འཁྲབ་སྟོན་བྱེད་སྐབས་གཞས་གདངས་ཕལ་མོ་ཆེ་སྐྱོར་མོ་ལུང་ནས་ཐད་ཀར་སློབ་སྦྱོང་དང་བསྡུ་ལེན་བྱས་ཤིང་། གཞན་ཡང་འབག་ཁེར་རྐྱང་གི་རྣམ་པའི་ལྷ་མོ་ཚོགས་པར་ཡང་གནས་ཚུལ་དེ་རིགས་ཐོན་ཡོད་དེ། ལྷ་ས་དང་ལྷོ་ཁ་སོགས་ས་ཁུལ་མང་ཆེ་བར་ལྷ་མོ་ཚོགས་པ་མང་དུ་མཆིས་ཀྱང་། མང་ཆེ་བ་ནི་སྐྱོར་མོ་ལུང་གི་ཁོངས་སུ་གཏོགས་པ་ཡིན་ལ། མཐའ་མཚམས་ཀྱི་གྲོ་མོ་རྫོང་དང་བཅས་པའི་ལྷ་མོ་རུ་ཁག་བཞི་ལྔ་ཙམ་ཡོད་པ་དག་ཀྱང་སྐྱོར་མོ་ལུང་གི་ལུགས་སུ་གཏོགས་པ་ཡིན་ནོ།