ཚེ་རིང་དབང་རྒྱལ་གྱིས་དགེ་ཕྲུག་ལ་ཐང་གའི་སྒྱུ་རྩལ་གསོ་སྦྱོང་བྱེད་བཞིན་པ།

ཚེ་རིང་དབང་རྒྱལ་གྱིས་རང་ཁྱིམ་དུ་ཐང་ག་བཞེངས་བཞིན་པ།

ཚེ་རིང་དབང་རྒྱལ་ཚང་གི་ཚ་ཚ་རུབ་རུབ་ཀྱི་ནང་མི་ལྷན་འཛོམས་ཀྱི་པར་ཡིན་པ།

ཚེ་རིང་དབང་རྒྱལ་ནི་གཞིས་རྩེ་གྲོང་ཁྱེར་ས་སྐྱ་གྲོང་རྡལ་ཤར་པ་གྲོང་ཚོའི་ཞབས་ཤར་ཚང་དུ་འཚར་ལོངས་བྱུང་བ་ཞིག་ཡིན་ཞིང་། ཁྱིམ་དུ་ནང་མི་8ཡོད། ཁོང་ཡུལ་མིར་རོགས་རམ་བྱེད་པར་དགའ་བ་དང་ནང་མི་ཚང་མ་འཆམ་ཞིང་ཚ་ཚ་རུབ་རུབ་ཡོད་སྟབས་སྤྱི་ཚོགས་དང་ཡུལ་མི་ཁྱིམ་མཚེས་ཚོའི་གདེང་འཇོག་བཟང་པོ་འཐོབ་བཞིན་ཡོད་ཅིང་། རྒྱུན་གཏན་གྱི་ལས་ཀ་དང་འཚོ་བར་ཁོང་གིས་རྟག་ཏུ་གཞན་ལ་མིག་དཔེ་དང་གང་སར་དཔེ་བཟང་སྣེ་ཁྲིད་ཀྱི་ནུས་པ་འདོན་བཞིན་མཆིས། དེ་ལྟར་ཁྱིམ་ཚང་དྲོ་སྐྱིད་ལྡན་ལ་རྒན་པར་བཀུར་ཞིང་གཞོན་པར་གཅེས་པ་མ་ཟད། ཁྱིམ་མཚེས་དབར་མཐུན་ཞིང་བརྩེ་བས། ཁོང་གི་ཁྱིམ་ཚང་ལ་ལྗོངས་རིམ་པའི་སྔོན་ཐོན“གཉིས་ལྡན་དུད་སྦྲེལ”གྱི་མཚན་སྙན་ཐོབ་པ་རེད།

ཕྱུག་འགྱུར་གྱི་སྣེ་ཁྲིད་པ་ཡིན་པའི་ཚེ་རིང་དབང་རྒྱལ་གྱི་ནང་མི་ཚང་མས་སེམས་རྩ་འཁོལ་པོས་ཡུལ་མི་ཁྱིམ་མཚེས་ཀྱི་སེམས་ཁྲལ་དང་དཀའ་ངལ་སེལ་རོགས་བྱེད་པ་དང་། སྔ་ཕྱི་བར་གསུམ་དུ་སྤུན་ཟླ་ལྟར་བརྩེ་བ་ཟབ་མོས་སྐྱོང་བཞིན་ཡོད་ཅིང་། ཡང་སྒོས་ཡ་རབས་སེམས་བཟང་ཅན་གྱི་ཚེ་རིང་དབང་རྒྱལ་ནི་བོད་ཀྱི་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་གཏོང་མཁན་གྱི་ཁྱིམ་རྒྱུད་དུ་སྐྱེས་པ་ཞིག་ཡིན་སྟབས། ཁོ་པ་ཚོས་གྲོང་ཚོའི་དུད་ཚང་དབུལ་པོ་མ་བརྗེད་པར་དགེ་ཕྲུག་28བསྡུས་ནས་སློབ་ཡོན་མེད་པར་གསོ་སྐྱོང་གང་ལེགས་བྱས་པར་སྤྱི་ཚོགས་ཐོག་ཕན་འབྲས་བཟང་པོ་ཐོན་ཡོད། ད་ཆ་ཁོང་ལ་དགེ་ཕྲུག་12ཡོད་པར་དགེ་ཕྲུག་4བོད་ལྗོངས་མཛེས་རྩལ་མཁས་ཅན་མཐུན་ཚོགས་ཀྱི་ཚོགས་མི་ཡིན་པ་རེད། 2016ལོ་ནས་2018ལོ་བར་ཚེ་རིང་དབང་རྒྱལ་གྱིས་བསྐྱངས་པའི་སློབ་མ་30ནས་10ནི་དུད་ཚང་དབུལ་པོའི་བུ་ཕྲུག་ཡིན་ཞིང་། ཁོ་པ་ཚོས་ཐང་གའི་སྒྱུ་རྩལ་སྦྱངས་པ་བརྒྱུད། ལས་ཞུགས་ཀྱི་གནད་དོན་ཐག་གཅོད་ཐུབ་པ་མ་ཟད་དཔལ་འབྱོར་གྱི་ཕན་འབྲས་ཀྱང་ངེས་ཅན་ཐོན་ཡོད། ཚེ་རིང་དབང་རྒྱལ་གྱིས་རང་ཉིད་ཀྱི་བུ་ཕྲུག་ཚོར་རྒན་བཀུར་གཞོན་གཅེས་དང་། ཡ་རབས་ཀྱི་སྤྱོད་ཚུལ་འཛིན་པ། ཧུར་བརྩོན་གྲོན་ཆུང་བཅས་བྱས་ནས་རྒྱལ་གཅེས་དང་། ལས་བཀུར། ཡིད་རྟོན། མཛའ་གྲོགས་བཅས་ཀྱི་སྤྱི་དམངས་ཡག་པོ་ཞིག་བྱེད་དགོས་པའི་སློབ་གསོ་རྒྱག་བཞིན་ཡོད་ལ། དགེ་ཕྲུག་ཚོར་ཡང་ཡ་རབས་ཚུལ་ལྡན་གྱི་སྐྱེ་བོ་ཞིག་ཏུ་གྱུར་བར་འབད་བརྩོན་བྱེད་དགོས་པའི་སྐུལ་མ་ཡང་ཡང་གཏོང་བ་དང་། ཁོང་རང་ཉིད་ཀྱིས་ཀྱང་བྱ་སྤྱོད་དངོས་ལ་བརྟེན་ནས་ཉེ་འགྲམ་གྱི་མིར་དྲང་ནུས་བརྒྱུད་སྤེལ་བྱེད་བཞིན་ཡོད།

བཟའ་མི་བུ་ཕྲུག་དབར་བརྩེ་བ་ཆེ་ཞིང་ཁྱིམ་ཚང་ཚུལ་བཞིན་སྐྱོང་མཁས་ལ་ཡུལ་མིར་མཛའ་གཅུགས་ཟབ་པའི་ཁོང་གིས་ལོ་16ནས་བཟུང་རི་མོ་སྦྱོང་འགོ་བརྩམས་པ་དང་། ཐོག་མར་སྲོལ་རྒྱུན་གྱི་བོད་བཟོའི་འཛིན་ཆས་དང་འབག་བཟོ་བ་སོགས་ཀྱི་ལས་ལ་གཞོལ། ལོ་24ལ་སླེབས་སྐབས་ཐང་ག་བཞེངས་པར་དགའ་པོ་ཡོད་པའི་ཁོང་གིས་གཞི་ནས་དགེ་རྒན་བསྟེན་ནས་ཐང་ག་བཞེངས་རྩལ་སྦྱངས། ཁོང་ཁྱིམ་ཚང་བཟུང་ནས་སོ་ནམ་བྱེད་ཞོར་དུ་ཐང་ག་སྦྱོང་འགོ་བརྩམས་པ་ཡིན་པས། སྒྱུ་རྩལ་གྱི་ལས་དེར་འཇུག་ཕྱི་པོ་རེད། སྐབས་དེ་དུས་ཁོང་ལ་དཀའ་བ་དུ་མ་འཕྲད་མོད། ཁོང་ལ་བློས་གཏོང་གི་བསམ་བློ་གཏན་ནས་འཁོར་མྱོང་མེད།

2003ལོར་ས་སྐྱ་རྫོང་མི་དམངས་སྲིད་གཞུང་གིས་འོས་སྦྱོར་བརྒྱུད། ཚེ་རིང་དབང་རྒྱལ་གྱི་བརྩམས་ཆོས《མཁའ་སྤྱོད་ཞིང་བཀོད》ཅེས་པར་ལྗོངས་ཡོངས་ཀྱི་ཡུལ་སྐོར་ཐོན་རྫས་འགྲེམས་ཚོགས་སྐབས་གཉིས་པར་བྱ་དགའ་ཐོབ། དེ་རྗེས་ཚེ་རིང་དབང་རྒྱལ་གྱིས་ཐང་ག་སྤུས་དག་མང་པོ་གཅིག་རྗེས་གཉིས་མཐུད་ཀྱིས་གསར་བཞེངས་བྱས། 2013ལོར་སྐྱེ་ཁུངས་ཞིང་པ་ཡིན་པའི་ཚེ་རིང་དབང་རྒྱལ་རང་སྐྱོང་ལྗོངས་མཛེས་རྩལ་མཁས་ཅན་མཐུན་ཚོགས་ཀྱི་ཀྲུའུ་ཞི་གཞོན་པར་བདམས་པ་དེ་ནི་ཁོང་གི་སྒྱུ་རྩལ་གྱི་གྲུབ་འབྲས་ལ་ཁས་ལེན་གང་ལེགས་བྱས་པ་ཞིག་ཡིན་པས། དེས་ཁོང་གི་སྤྱི་ཚོགས་ཀྱི་གནས་བབ་དང་ཡོང་འབབ་གང་ཐད་ལ་འགྱུར་ལྡོག་ཆེན་པོ་བྱུང་། ཁོང་གིས་དུས་དང་རྣམ་པ་ཀུན་ཏུ། ཐང་གའི་སྒྱུ་རྩལ་དུས་ཆེན་ལ་བྱ་དགའ་ཐོབ་པ་དེ་ནི་གལ་ཆེ་ཤོས་མིན་པར། བོད་མི་རིགས་ཀྱི་ཐང་གའི་རིག་གནས་འཕེལ་རྒྱས་གཏོང་ཕྱིར་མི་སྣ་གསོ་སྐྱོང་དང་ཐང་གའི་སྒྱུ་རྩལ་རྒྱལ་ཁབ་ཕྱི་ནང་དུ་དྲིལ་བསྒྲགས་བྱེད་རྒྱུ་ནི་ད་གཟོད་གལ་འགངས་ཧ་ཅང་ཆེ་བ་ཞིག་ཡིན་ཚུལ་གསུང་བཞིན་ཡོད། འབྱུང་འགྱུར་གྱི་འཆར་གཞིའི་སྐོར་གླེང་སྐབས། ཁོང་གིས། ངས་མུ་མཐུད་འབད་བརྩོན་ལྷོད་མེད་བྱས་ནས་ཐང་གའི་བརྩམས་ཆོས་དེ་བས་མང་བ་དང་དེ་བས་ཡག་པ་གསར་བཞེངས་ཐུབ་པ་དང་། དགེ་ཕྲུག་དེ་བས་མང་བ་བསྐྱངས་ཏེ་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་གཏོང་བར་འབད་པ་ལྷུར་ལེན་བྱེད་ཀྱི་ཡིན་ཞེས་བརྗོད།

ཞིང་པ་དཀྱུས་མ་ཞིག་ནས་བོད་ལྗོངས་མཛེས་རྩལ་མཁས་ཅན་མཐུན་ཚོགས་ཀྱི་ཀྲུའུ་ཞི་གཞོན་པར་གྱུར་བའི་ཚེ་རིང་དབང་རྒྱལ་གྱིས་རི་མོའི་འབྲི་རྩལ་བྱང་ཆུབ་པར་སྦྱངས་པ་མ་ཟད། བོད་ཀྱི་ཐང་གའི་ཤེས་ལྡན་པའི་དཔུང་ཁག་འཛུགས་སྐྱོང་ཐད་མི་སྣ་མང་པོ་གསོ་སྐྱོང་བྱས་ཤིང་། ཁོང་གི་ལུས་ཐོག་ནས་བོད་ཀྱི་སྲོལ་རྒྱུན་སྒྱུ་རྩལ་པའི་ཚད་མཐོའི་རིག་གནས་རང་རྟོགས་དང་རིག་གནས་ཀྱི་གདེང་ཚོད་ངང་ངམ་ཤུགས་ཀྱིས་མངོན་ཡོང་། ཕུལ་བྱུང་གི་སྲོལ་རྒྱུན་རིག་གནས་ནི་རྩ་ཆེའི་རིག་གནས་ཀྱི་གཏེར་མཛོད་ཅིག་ཡིན་པས། ལོ་ངོ་སྟོང་གི་ལོ་རྒྱུས་ལྡན་པའི་བོད་རིགས་ཀྱི་སྲོལ་རྒྱུན་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་གཏོང་བར་ཚེ་རིང་དབང་རྒྱལ་དང་འདྲ་བའི་སྲོལ་རྒྱུན་སྒྱུ་རྩལ་བ་དེ་བས་མང་བ་མཁོ་བ་སྨོས་མི་དགོས། རྩེར་སོན་གྱི་བཟོ་རྩལ་ཕུད། རིག་གནས་ཀྱི་རང་རྟོགས་དང་འགན་འཁྲིའི་སྙིང་སྟོབས་ཆེན་པོ་ལྡན་ཚེ། མི་རིགས་ཀྱི་རིག་གནས་བརྒྱུད་སྤེལ་དང་འཕེལ་རྒྱས་གཏོང་བ་ནི་སྟོང་བསམ་ཞིག་གཏན་ནས་མིན།

སྤྱི་ཚོགས་བྱ་འཕུར་བ་ལྟར་འཕེལ་རྒྱས་འགྲོ་བ་དང་བསྟུན་ནས་མི་རྣམས་ཀྱི་འཚོ་བ་སྐྱེལ་སྟངས་དང་། ལས་ཀ་བྱེད་སྟངས། ཐ་ན་ཁྱིམ་ཚང་གི་ཁོངས་མིའི་དབར་གྱི་འབྲེལ་བ་དང་བུ་ཕྲུག་ལ་སློབ་གསོ་རྒྱག་སྟངས་སོགས་ཀྱི་འདུ་ཤེས་ལའང་དེ་མཚུངས་ཀྱི་འགྱུར་ལྡོག་ཆེན་པོ་འགྲོ་བཞིན་ཡོད། དེས་ན་སྤྱི་ཚོགས་ཀྱི་རྣམ་པ་ཇི་ཙམ་འགྱུར་རུང་དུས་དང་རྣམ་པ་ཀུན་ཏུ་རང་ཉིད་ནས་འགོ་བཙུགས་ཏེ་ཡ་རབས་སྤྱོད་བཟང་གི་ལས་ལ་གཞོལ་བ་དང་། ཀུན་སྤྱོད་བཟང་པོ་དར་སྤེལ་གཏོང་བ་ནི་སྤྱི་དམངས་ཡོངས་ཀྱིས་རང་འགུལ་ངང་སྒྲུབ་དགོས་པའི་འོས་འགན་ཞིག་རེད་སྙམ།