ཚེས་15ཉིན་བོད་ལྗོངས་མཛེས་རྩལ་བཤམས་མཛོད་ཁང་དངོས་སུ་སྒོ་ཕྱེ་བ་རེད། འགྲེམས་ཁང་དེ་ནི་བོད་ཀྱི་རང་སྐྱོང་ལྗོངས་རིམ་པའི་མཛེས་རྩལ་བཤམས་མཛོད་ཁང་ཐོག་མ་དེ་རེད།

ཤེས་རྟོགས་བྱུང་བར་གཞིགས་ན། བོད་ལྗོངས་མཛེས་རྩལ་བཤམས་མཛོད་ཁང་གི་ས་ཁྱོན་སྤྱི་ཆིང་4.7ཟིན་པར་མ་དངུལ་སྒོར་དུང་ཕྱུར་5.5ཙམ་བཏང་བ་དང་། འཛུགས་སྐྲུན་གྱི་རྒྱ་ཁྱོན་བསྡོམས་འབོར་སྨི་ངོས་གྲུ་ཁྲི་3.28ལྷག་ཙམ་ཟིན་པ། “ཧི་མ་ལ་ཡའི་ལྡེ་མིག”ཇུས་འགོད་ཀྱི་འདུ་ཤེས་སུ་བྱས་པ། འགྲེམས་ཁང་ནང་འགྲེམས་ཁང་གཙོ་བོ་དང་། སྒྱུ་རྩལ་མཉམ་འགུལ་ཉམས་ལེན་ཁུལ། སྒྱུ་རྩལ་མཁས་ཅན་བཅའ་སྡོད་གསར་རྩོམ་རྟེན་གཞི། སྒྱུ་རྩལ་ཚོང་འདུས་བཅས་བྱེད་ནུས་ཁུལ་བཞི་ལ་ཕྱེ་ཡོད། སྒོ་འབྱེད་འགྲེམས་སྟོན་ཐོག“མཐོ་སྒང་གི་མཛེས་རྩལ”ཞེས་པ་བརྗོད་དོན་གཙོ་བོར་བྱས་ནས“བོད་ལྗོངས་བརྗོད་གཞིར་བྱས་པའི་དེང་རབས་མཛེས་རྩལ་གྱི་གྲུབ་འབྲས་འགྲེམས་སྟོན”དང་། “རྒྱུན་འཛིན་དང་གསར་གཏོད། ཕུལ་བྱུང་ཐང་གའི་འགྲེམས་སྟོན” “ཁོར་ཡུག་གི་ཡིད་འོང་བརྐོས་བརྙན་འགྲེམས་སྟོན” “གྲངས་གཞིའི་སྒྱུ་རྩལ་འགྲེམས་སྟོན”བཅས་ཡན་ལག་འགྲེམས་ཁུལ་བཞི་བཙུགས་ཏེ། རྒྱལ་ཁབ་ཕྱི་ནང་གི་གྲགས་ཅན་རི་མོ་མཁས་ཅན་གྱིས་གསར་རྩོམ་བྱས་པའི་བརྩམས་ཆོས་300ཙམ་འགྲེམས་སྟོན་བྱས་པ་རེད།

བོད་ལྗོངས་མཛེས་རྩལ་བཤམས་མཛོད་ཁང་བསྐྲུན་པ་དེས་ས་གནས་དེ་གའི་མང་ཚོགས་ལ་འགྲེམས་སྟོན་དང་། སློབ་གསོ། སྤྲོ་གསེང་བཅས་གཞི་གཅིག་ཏུ་འདུས་པའི་སྤྱི་པའི་རིག་གནས་བྱེད་སྒོ་སྤེལ་ཡུལ་ཞིག་མཁོ་འདོན་བྱས་པ་དང་། བོད་ཀྱི་སྒྱུ་རྩལ་འཕེལ་རྒྱས་ལ་ལས་སྟེགས་བརྟན་པོ་ཞིག་མཁོ་འདོན་བྱས་པ། ས་གནས་དེ་གའི་སྒྱུ་རྩལ་པར་འཇོན་ཐང་ངོམས་སའི་ལས་སྟེགས་ཤིག་མཁོ་འདོན་བྱས་པ་དང་དུས་མཚུངས་ཡུལ་སྐོར་བ་དེ་བས་མང་བ་ལྟ་སྐོར་དུ་ཡོང་བའི་ཡིད་དབང་བཀུག་ནས་བོད་ཀྱི་དམིགས་བསལ་རིག་གནས་ཀྱི་ཡིད་དབང་འཕྲོག་ཤུགས་མྱོང་རོལ་ཐུབ་པར་བྱས་པ་མ་ཟད། བོད་ཀྱི་རིག་གནས་ཀྱི་འཇམ་ཤུགས་ཀྱང་སྔར་བས་ཆེ་རུ་བཏང་ཡོད།