ཚོར་བ་ཐན་ཐུན།
ཞེ་འདི་མནན་ན་མ་རེད། །
སླར་ཡང་སེམས་ལ་འཁོར་འོང་། །
ཆར་རླུང་འཚུབ་མ་ཟེར་བ། །
ཡིད་ཀྱིས་མྱོང་བྱེད་མ་རེད། །
ཚོར་བའི་འཁྲིས་སུ་ཡོད་པ། །
ལས་ཀྱི་ལན་ཆགས་ཡིན་འདྲ། །
ལས་འཕྲོ་གར་སྡོད་གར་བཞུད། །
ཚོར་བའི་ཆུ་ལྟར་རྒྱུག་འགྲོ། །
མིག་གིས་ཟིན་རྒྱུ་མི་འདུག །
རྣ་བས་ཐོས་རྒྱུ་མི་འདུག །
དགུང་གི་རྟ་བདུན་དབང་པོ། །
དྲོད་ལ་ཉེ་རིང་མ་གཏོང་། །
ངག་འདི་འཇམ་ཞིང་འཇམ་པ། །
འཇམ་པོའི་བལ་དང་འདྲ་བྱུང་། །
མཐོངས་ཀྱི་སྤྲིན་དཀར་ལུག་ཁྱུ། །
ཡང་ཡང་འཚོ་སྙིང་འདོད་བྱུང་། །
ཚོར་བའི་ལ་གཞུང་ཟེར་བ། །
དབྱར་ཟླ་འབྲིང་པོའི་ནང་རེད། །
ཉིན་ལ་ལྗང་མདོག་མཛེས་པ། །
མཚན་ལ་ཆར་སྒྲ་སྙན་པ། །
རྨི་ལམ་མཁར་གྲོང་དེ་རུ། །
ལན་གཅིག་འཛོམས་པས་དགའ་བྱུང་། །
འཛོམས་པའི་ཆང་གཞས་རེ་རེ། །
ད་དུང་རྣ་བར་འཁོར་བྱུང་།
ཡིད་ཀྱི་ཟླ་འོད་ངོགས་དང་། །
ཚོར་བའི་སྤང་ལྗོངས་དེ་རུ། །
གོམ་བགྲོད་ལས་ཀྱི་རི་མོ། །
ཅི་འདྲའི་མིག་ལ་མཚར་བ། །
སྣང་བ་གཟུགས་སུ་ཕབ་ན། །
དཔེ་འཇོག་གང་ཞིག་མཛའ་བ། །
མྱོང་བའི་འཇིག་རྟེན་འདི་ནས། །
རྙེད་པའི་ཚོད་ཅིག་མི་འདུག །
ཡིད་གཞུང་བརླན་པའི་ཟིལ་པ། །
ཆུ་རིས་བཞིན་དུ་འཛུམ་བྱུང་། །
གྲིབ་མའི་ཞེ་ཡི་མཁར་རྫོང་། །
ཅི་འདྲའི་བརྟན་ཞིང་བརྗིད་པ། །