ཚོར་སྣང་ཕྱོགས་མེད་མདའ།
མི་ཡུལ་གྱི་སྐད་ཆའི་ཁྲོད་ནས། །
དྲང་བདེན་གྱི་ཐིགས་པ་ཟགས་ན། །
རྒྱུ་འབྲས་ཀྱི་འཛུམ་ཆུང་བཞད་དེ། །
ཡུལ་ལུང་ལ་འོད་སྣང་ཤར་ཡོང་། །
རྒྱ་གྲོང་གི་ཁྲོམ་གཞུང་དཀྱིལ་ནས། །
བསམ་ཤེས་ཀྱི་སྟོན་ཆར་བབས་ན། །
ལས་དབང་གི་གླུ་ཆུང་བླངས་ཏེ། །
ཡུལ་ཁམས་ལ་བརྩེ་བ་འཁྲུངས་ཡོང་། །
ཕ་ཡུལ་གྱི་རྩྭ་ཐང་གྲུ་བཞིར། །
དཀྱེལ་ཡངས་ཀྱི་གཞུང་དྲང་ལྡན་ན། །
མེ་ཏོག་གི་སྐྲ་ལོའི་གསེབ་ནས། །
བདེ་སྐྱིད་ཀྱི་འཛུམ་མདངས་མཐོང་ཡོང་། །
འགྲན་རྩོད་ཀྱི་ཁོར་ཡུག་ཀློང་དུ། །
བརྩོན་འགྲུས་ཀྱི་བྱང་རླུང་ལྡང་ན། །
བདེ་སྡུག་གི་རྣམ་གཞག་བར་ནས། །
གཞིས་ཁྱིམ་ལ་གཡང་ནོར་འཁོར་ཡོང་། །
འདས་སོང་ལ་ཕྱིར་དྲན་བྱེད་ཞོར། །
ད་ལྟ་ཡི་ལམ་བུར་འབད་ན། །
འབྱུང་འགྱུར་གྱི་མི་ཚེའི་ལམ་བུར། །
འཇའ་འོད་ཀྱིས་བསུ་མ་ལོས་བྱེད། །