དབུ་ཤོག>བོད་ཀྱི་རིག་གནས།>བོད་ཀྱི་རྩོམ་རིག
  • དུས་བཞིར་བསྔགས་པ།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།   |     རྩོམ་པ་པོ།  བཀྲ་ཤིས།   |     སྤེལ་དུས།  2023-11-05

    དཔྱིད།

    གཞན་གསོས་བུ་མོའི་གྲེ་འགྱུར་སྙན་དབྱངས་སྤྲོ། །

    ཕྱེ་ལེབ་བུང་བ་འཕུར་ལྡིང་གར་ལ་རྩེན། །

    གཡུ་འབྲུག་སྔོན་མོས་རྫ་རྔ་དབྱིངས་ནས་བརྡུངས། །

    མེ་ཏོག་འཛུམ་ཁ་གྲོལ་བཞིན་མགོ་ལྕོག་ལྡེམ། །

    དབྱར།

    གསེར་ལྡན་དགའ་མས་གཡུ་ཡི་མལ་སྟན་བཏིང་། །

    ཀུན་གསལ་བུ་མོར་ཆུ་འཛིན་དར་གྱིས་གཡོགས། །

    ཡན་ལག་བརྒྱད་ལྡན་ཁྲོས་པའི་ངོ་མདོག་འགྱུར། །

    རླུང་གི་རྒྱལ་མཚན་མཛེས་པའི་རྒྱན་དུ་བཀྲ། །

    སྟོན།

    འབྲུ་ལྔ་སྨིན་པའི་སྟ་གོན་བྲེལ་ཞིང་འཚུབ། །

    སོ་ནམ་རྒད་པོ་དུང་གི་སོ་སྒོ་འཛུམ། །

    རྐང་འཐུང་ཁྱུ་ཚོགས་གསེར་གྱི་ཨ་ལོང་བརྒྱན། །

    ཁྱུང་དཀར་མཛོ་ཕོས་ས་ནག་རྒྱུན་བུ་དྲས། །

    དགུན།

    རི་རྒྱལ་ལྷུན་པོར་ག་བུར་རྡུལ་གྱིས་བརྒྱན། །

    དལ་འགྲོའི་རླབས་སྒྲ་ཆུ་ཤེལ་ཅན་གྱིས་བསྡམས། །

    ཚང་ཚིང་སྟུག་པོའི་མགྲོན་པོ་གཉིད་དུ་ཡུར། །

    སྨན་ཆུང་བུ་མོའི་མཁུར་ཚོས་རུམ་ནང་བརླན། །

    འགན་འཁུར་རྩོམ་སྒྲིག་པ། ཉི་མ་ཚེ་རིང་།

མཉམ་སྤྱོད།

འབྲེལ་ཡོད་གསར་འགྱུར།