“ཟླ་9ཚེས་4ཉིན་ངའི་སློབ་མ་བསོད་ནམས་དབང་འདུས་ཀྱིས་ང་ལ་སྐད་འཕྲིན་ཞིག་བསྐུར་བྱུང་། ཁོ་པས་ད་ཆ་ཐག་མཆོང་ཧ་ཅང་མགྱོགས་པོ་རྒྱག་ཐུབ་པ་མ་ཟད། ད་དུང་ཐག་མཆོང་རྒྱག་སྟངས་གསར་པ་ཡང་མང་པོ་ཤེས་ནས་རྩལ་ཁྲིད་པ་ཚོ་ཧ་ཅང་དགའ་པོ་བྱུང་སོང”ཞེས་ཤོད་ཀྱི་འདུག

གོང་གི་སྐད་ཆ་འདི་ནི་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་དགེ་རྒན་ཐུབ་བསྟན་སྐལ་བཟང་གི་ཟིན་བྲིས་ལས་བཤུས་པ་ཞིག་རེད། ཟིན་བྲིས་དེབ་དེ་འདྲ་བ་ཐུབ་བསྟན་སྐལ་བཟང་ལ་མང་པོ་ཡོད་པ་དང་དེའི་ཐོག་ཁོང་གིས་ཕྲུ་གུ་ཚོའི་སློབ་སྦྱོང་དང་རྒྱུན་གཏན་གྱི་འཚོ་བའི་སྐོར་བཀོད་ཡོད།

2014ལོར་བོད་ལྗོངས་མི་རིགས་སློབ་ཆེན་ནས་ཐོན་རྗེས་ཐུབ་བསྟན་སྐལ་བཟང་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་དགེ་རྒན་ཞིག་ཏུ་གྱུར་ཞིང་། སློབ་གྲྭ་དེའི་སློབ་མ་དག་ནི་མིག་ཤེས་ཉམས་པ་དང་། རྣ་ཤེས་ཉམས་པ། སྐད་ཆ་གསལ་པོ་ཤོད་མི་ཐུབ་པ། རིག་སྟོབས་ཉམས་པ་སོགས་དབང་པོར་སྐྱོན་ཡོད་པ་ཤ་སྟག་རེད།

སློབ་ཕྲུག་ནས་དགེ་རྒན་དུ་གྱུར་པའི་ཐུབ་བསྟན་སྐལ་བཟང་སློབ་ཁང་དུ་ཐེངས་དང་པོ་སྐྱོད་སྐབས་སེམས་ལ་དངངས་འཚབ་ཆེན་པོ་ལངས། འཆད་སྟེགས་ནས་གཤམ་གྱི་སློབ་མ་རྣམས་མཐོང་སྐབས་ཁོང་ཚོའི་ཡ་ང་བའི་སྣང་ཚུལ་ལ་སེམས་གཏིང་ནས་སྙིང་རྗེ་ཆེན་པོ་སྐྱེས་པ་དང་། སློབ་ཚན་གྲོལ་རྗེས་སློབ་ཁང་གི་དཀྱིལ་དུ་བསྐྱོད་ནས་སེམས་རྩ་འཁོལ་པོས་ཕྲུ་གུ་ཚོ་དང་ཅི་འཕྲོས་མོལ་འཕྲོས་བཤད། སྐབས་དེ་དུས་ཁོང་གིས་བརྩེ་བ་ཡོད་རྒུ་བཅངས་ནས“གཤོག་པ་རྨས་པའི”ཕྲུ་གུ་དེ་དག་ལ་གཅེས་སྐྱོང་བྱེད་པར་ཐག་བཅད།

སློབ་གྲྭ་གཞན་དང་བསྡུར་ཚེ་དམིགས་བསལ་སློབ་གསོའི་སློབ་གྲྭའི་ཕྲུ་གུ་ཚོ་དམིགས་བསལ་ཡིན་སྟབས་དམིགས་བསལ་སློབ་གྲྭའི་དགེ་རྒན་གྱིས་འགན་མང་པོ་ཁུར་དགོས་ཀྱི་ཡོད། ཁོང་ཚོས་རིག་ཚན་སློབ་ཁྲིད་བྱེད་པའི་ཞོར་དུ་བདེ་ཐང་སླར་གསོའི་ཆེད་ལས་ཤེས་བྱ་ངེས་ཅན་ཞིག་ཁོང་དུ་ཆུད་པར་བྱེད་དགོས་པ་མ་ཟད། ད་དུང་དུས་དང་རྣམ་པ་ཀུན་ཏུ་ཕྲུ་གུ་ཚོའི་དགོས་མཁོར་བསྟུན་ནས། ཁོང་ཚོའི“བུ་རྫི”བྱེད་དགོས་ལ་ཕྲུ་གུ་ཚོར་འཚོ་བའི་རྨང་གཞིའི་རྩལ་ནུས་ཀྱང་སློབ་དགོས་ཀྱི་ཡོད།

ཕྲུ་གུའི་བདེ་ཐང་སླར་གསོའི་གྲུབ་འབྲས་མཐོང་སྐབས་ཁྱིམ་བདག་ཚོའི་གདོང་ལས་དགའ་བའི་འཛུམ་མདངས་འཕྱུར་བའི་མོད་ལ་ཕྲུ་གུའི་གཤིས་ཀ་ཡང་ཇེ་ཡག་ཏུ་འགྲོ་བཞིན་ཡོད།

ཕྲུ་གུ་ཚོ་དེ་བས་སྤྲོ་སྣང་ལྡན་པའི་ངང་འཚར་ལོངས་ཡོང་ཆེད། ཐུབ་བསྟན་སྐལ་བཟང་གིས་ལུས་རྩལ་དེ་སློབ་ཁྲིད་ཀྱི་བརྒྱུད་རིམ་ཧྲིལ་པོར་ཁྱབ་པར་བྱས་ཏེ། ཉིན་ལྟར་སྤྱི་ལེ་1.5ཡི་རྒྱུག་ཤར་གློད་རྗེས་ཁོང་དང་ལས་རོགས་ཚོས་ཕྲུ་གུ་ཚོར་ཆེད་དོན་སྦྱོང་བརྡར་སྤྲོས་པ་དང་། ཐའེ་ཆིའུ་སྤོ་ལོ་དང་ཕིང་ཕང་སྤོ་ལོ་རྒྱག་ཏུ་འཇུག་པ། རྒྱུག་ཤར་གློད་པ་སོགས་ཀྱི་ལུས་རྩལ་རྣམ་གྲངས་ཀྱང་གཉེར་བཞིན་ཡོད།

བརྩོན་འགྲུས་ལྡན་ན་མི་འགྲུབ་བྱ་བ་ཅི་ཡང་མེད་ཅེས་པ་ལྟར། 2015ལོར་ཐུབ་བསྟན་སྐལ་བཟང་གིས་རྩལ་ཁྲིད་པའི་མིང་ཐོག་ནས་སློབ་མ་ཚོའི་སྣེ་ཁྲིད་དེ་རྒྱལ་ཡོངས་དབང་སྐྱོན་ལུས་རྩལ་འགྲན་ཚོགས་སྐབས་དགུ་པ་དང་དམིགས་བསལ་ཨོ་ལིམ་ཕིག་ལུས་རྩལ་འགྲན་ཚོགས་སྐབས་དྲུག་པར་ཞུགས་པར། གསེར་གྱི་རྟགས་མ་དང་ཟངས་ཀྱི་རྟགས་མ་གཅིག་གི་གྲུབ་འབྲས་བཟང་པོ་ཐོབ་པ་དང་། 2021ལོར་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་ལུས་རྩལ་པ་ཚོས་རང་ལྗོངས་ཀྱི་ཚབ་བྱས་ནས་རྒྱལ་ཡོངས་དབང་སྐྱོན་ལུས་རྩལ་འགྲན་ཚོགས་སྐབས་བཅུ་གཅིག་པ་དང་དམིགས་བསལ་ཨོ་ལིམ་ཕིག་ལུས་རྩལ་འགྲན་ཚོགས་སྐབས་བརྒྱད་པར་ཞུགས་པར། གསེར་གྱི་རྟགས་མ་3དང་། དངུལ་གྱི་རྟགས་མ་6 ཟངས་ཀྱི་རྟགས་མ་4བཅས་བསྡོམས་གཟེངས་བསྟོད་རྟགས་མ་13ཐོབ་ཡོད་པ་རེད། ཐུབ་བསྟན་སྐལ་བཟང་གིས། ལུས་རྩལ་གྱིས་ཕྲུ་གུ་ཚོའི་མཐོང་རྒྱ་བསྐྱེད་པ་མ་ཟད། འབྱུང་འགྱུར་ལ་ཕྱོགས་པའི་ཁོང་ཚོའི་རེ་བ་དང་སྙིང་སྟོབས་ཀྱང་ཇེ་ཆེར་འཕེལ་ཡོད་ཅེས་བརྗོད།

ལུས་རྩལ་ཐང་དུ་དགའ་དགའ་སྤྲོ་སྤྲོའི་ངང་ནས་རྩེད་འཇོར་རོལ་བའི་ཕྲུ་གུ་ཚོར་ལྟ་བཞིན་པའི་ཐུབ་བསྟན་སྐལ་བཟང་གིས། ངའི་འཚོ་བ་ནི་སྤྲོ་སྣང་ལྡན་པ་ཞིག་དང་ངའི་མི་ཚེ་ནི་དོན་སྙིང་ལྡན་པ་ཞིག་ཡིན་ཞེས་བརྗོད་ཅིང་། ཁོང་གི་སྐད་ཆའི་ཤུགས་ནས་ཁོང་གིས་རང་འཁྲིའི་ལས་ཀར་དགའ་ཞེན་ཆེ་བ་དང་ལྷག་བསམ་རྣམ་དག་ཡིན་པ་ངང་གིས་ཚོར་འོང་།