བོད་ལྗོངས་སུ་ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་3དང་ལོ་རྒྱུས་རིག་གནས་ཀྱི་གྲོང་ཚོ་གྲགས་ཅན་7མང་དུ་ཕྱིན་པ།
ཉིན་ཤས་གོང་། བོད་རང་སྐྱོང་ལྗོངས་མི་དམངས་སྲིད་གཞུང་གིས་གཞིས་རྩེ་གྲོང་ཁྱེར་ལྷ་རྩེ་རྫོང་གི་ལྷ་རྩེ་གྲོང་རྡལ་སོགས་གྲོང་རྡལ་3བོད་རང་སྐྱོང་ལྗོངས་ཀྱི་ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་དང་། ཆབ་མདོ་གྲོང་ཁྱེར་བྲག་གཡབ་རྫོང་བྱམས་མདུན་གྲོང་རྡལ་གྱི་ར་ཟད་གྲོང་ཚོ་སོགས་གྲོང་ཚོ་7བོད་རང་སྐྱོང་ལྗོངས་ཀྱི་ལོ་རྒྱུས་རིག་གནས་ཀྱི་གྲོང་ཚོ་གྲགས་ཅན་ལ་ཆོག་མཆན་སྤྲོད་རྒྱུའི་ཐག་གཅད་པ་རེད།
ད་ཐེངས་དཔྱད་འདེམས་བྱས་པའི་བོད་རང་སྐྱོང་ལྗོངས་ཀྱི་ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་ནི་གཞིས་རྩེ་གྲོང་ཁྱེར་ལྷ་རྩེ་རྫོང་གི་ལྷ་རྩེ་གྲོང་རྡལ་དང་། ལྷོ་ཁ་གྲོང་ཁྱེར་སྣ་དཀར་རྩེ་རྫོང་གི་སྟག་ལུང་གྲོང་རྡལ། ཆབ་མདོ་གྲོང་ཁྱེར་བྲག་གཡབ་རྫོང་བྱམས་མདུན་གྲོང་རྡལ་བཅས་ཡིན་པ་དང་། བོད་རང་སྐྱོང་ལྗོངས་ཀྱི་ལོ་རྒྱུས་རིག་གནས་ཀྱི་གྲོང་ཚོ་གྲགས་ཅན་ནི་ཆབ་མདོ་གྲོང་ཁྱེར་བྲག་གཡབ་རྫོང་བྱམས་མདུན་གྲོང་རྡལ་ར་ཟད་གྲོང་ཚོ་དང་། མཁར་སྒང་ཤང་མཁར་སྒང་གྲོང་ཚོ། འཁོར་རྭ་ཤང་འགམ་ཚེས་གྲོང་ཚོ། རང་གྲུབ་ཤང་རང་གྲུབ་གྲོང་ཚོ། དཀྱིལ་ཐང་གྲོང་རྡལ་ཡར་ཤོད་གྲོང་ཚོ། སྨར་ཁམས་རྫོང་འཇང་མི་རིགས་ཤང་ཡར་ཀ་སྟེང་གྲོང་ཚོ། རི་བོ་ཆེ་རྫོང་རི་བོ་ཆེ་གྲོང་རྡལ་ལྟག་སྒོ་གྲོང་ཚོ་བཅས་རེད།
“སྡོད་ཁང་འཛུགས་སྐྲུན་པུའི་བླང་བྱ་ལྟར། ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་དང་གྲོང་ཚོ་གྲགས་ཅན་གནས་སའི་གྲོང་ཁྱེར་དང་རྫོང་མི་དམངས་སྲིད་གཞུང་གིས། ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་དང་གྲོང་ཚོ་གྲགས་ཅན་གྱི་སྲུང་སྐྱོང་དང་། འཆར་འགོད། འཛུགས་སྐྲུན། དོ་དམ་བཅས་ཀྱི་ལས་དོན་ལ་ཚད་མཐོའི་མཐོང་ཆེན་བྱས་ཏེ། ‘སྲུང་སྐྱོང་གཙོ་བོར་འཛིན་པ་དང་། ཤེས་རིག་གི་འཕེལ་རྒྱུན་རྒྱུན་མཐུད། ཚན་རིག་དང་མཐུན་པའི་སྒྲིག་འཛུགས’བཅས་ཀྱི་རྩ་དོན་མཐའ་འཁྱོངས་དང་། ཕུལ་བྱུང་མི་སྣ་དང་ཆེད་ལས་མཁས་ཅན་དང་མཁས་དབང་གི་སྟོབས་ཤུགས་སྒྲིག་འཛུགས་བྱས་ནས་ལོ་རྒྱུས་རིག་གནས་ཀྱི་གྲོང་རྡལ་གྲགས་ཅན་དང་གྲོང་ཚོ་གྲགས་ཅན་གྱི་སྲུང་སྐྱོང་དང་འཕེལ་རྒྱས་ཀྱི་འཆར་འགོད་ནན་ཏན་བཟོ་བ་དང་ལག་བསྟར་བྱེད་པ། ནུས་ལྡན་གྱི་སྲུང་སྐྱོང་བྱེད་ཐབས་ལག་བསྟར་ནན་པོ་བྱེད་པ། གང་བྱུང་བཤིག་པ་དང་། གང་བྱུང་འཛུགས་སྐྲུན། རྨོངས་ཚོད་ཀྱིས་གསར་སྤེལ་བཅས་གཏན་འགོག་བྱེད་པ། སྲུང་སྐྱོང་གི་འཆར་འགོད་ལས་འགལ་བའི་བྱེད་སྤྱོད་གཏན་འགོག་བྱེད་པ། རིག་གནས་ཤུལ་བཞག་གི་དངོས་ཡོད་ལོ་རྒྱུས་ཆ་འཕྲིན་དང་ཐུན་མོང་མ་ཡིན་པའི་རིན་ཐང་ནུས་ལྡན་ངང་གཅེས་ཉར་དང་རྒྱུན་མཐུད་བཅས་བྱས་ནས་བསྐྱར་སྐྱེ་མི་ཐུབ་པའི་ལོ་རྒྱུས་རིག་གནས་ཐོན་ཁུངས་ཏན་ཏིག་ངང་སྲུང་སྐྱོང་ཡག་པོ་བྱེད་དགོས”ཞེས་བོད་རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གི་འབྲེལ་ཡོད་འགན་འཁུར་བས་བརྗོད་པ་རེད།