ལས་ཡུས་ཚོགས་པ།
ཀ་པས་སློབ་ཁྲིད་བྱེད་པ་ཚོགས་པར་བསྐུར། །
ཁ་པས་ཡིག་ཆ་བཟོ་བ་ཚོགས་པར་བསྐུར། །
ག་པས་གད་སྙིགས་སྒྲུག་པ་ཚོགས་པར་བསྐུར། །
ང་ཚོའི་ཚོགས་པ་ལས་ཡུས་ཤོད་སར་གྱུར། །
ཅ་ཅོ་སྒྲོག་ལ་མི་དགའ་ཁྱེད་རང་ཡང་། །
ཆ་ལུགས་གཞན་དང་གང་ཐུབ་བསྟུན་ཁུལ་གྱིས། །
ཇ་རོ་ཟས་ལྷག་གཡུགས་པའི་ངང་ཚུལ་ཡང་། །
ཉ་ག་ལྟ་བུའི་ཚོགས་པ་འདི་ནང་བསྐུར། །
ཏ་ལེར་གསལ་བའི་ཁ་པར་ཕྱི་ངོས་ནས། །
ཐ་མལ་རྣམས་ཀྱང་ཡ་རབས་ཅན་དུ་འགྱུར། །
ད་ནི་མགྲིན་བཟང་གཟིག་ལྤགས་གྱོན་དགའ་བ། །
ན་ནིང་དོ་ཚིགས་ཇེ་མང་ཇེ་མང་རེད། །
པ་ལོ་རྒྱབ་དང་སྐད་ཆ་མདུན་ཟེར་ཡང་། །
ཕ་བོང་བསྐོར་ནས་འགྲམ་པར་གཞུ་མཁས་ཤིང་། །
བ་ཤ་གླང་འགེལ་བྱེད་པར་མངའ་འབྱོར་བའི། །
མ་གྲོས་རང་མཐུན་ཅན་ཡང་འདི་ན་འདུག །
རྩ་དོན་མི་བོར་རང་འགན་ལེགས་གྲུབ་ཀྱིས། །
ཚ་གྲང་དཀའ་སྡུག་སྤྱོད་མཁན་མི་དར་བར། །
ཛ་ཛོར་པར་མིག་ནང་དུ་ཚུད་ཐབས་ཀྱིས། །
ཝ་མོའི་རྗེས་འགྲོ་འཕེལ་འདི་ཨ་རེ་མཚར། །
ཞ་བོ་དག་གིས་མགྱོགས་འགྲོའི་རྣམ་པ་བཞིན། །
ཟ་མ་མེད་པར་ལས་ཀ་འཕར་མ་སོགས། །
འ་འུར་དམངས་ཕན་ཁོ་ནར་གཞོལ་ཚུལ་ལས། །
ཡ་ཡོའི་བསམ་སྤྱོད་གཏན་ནས་མེད་ཚུལ་བྱེད། །
ར་ཡི་རིལ་མར་ལུག་གི་ངོམ་སོ་ནི། །
ལ་ལ་ཙམ་མིན་རྟག་པར་བཏང་དྲགས་ན། །
ཤ་ཚ་ཅན་ཡང་ཁྲེལ་བའི་གཞིར་འགྱུར་བས། །
ས་འོག་དར་འཐག①མ་གནང་ཤ་ཉེ་ཚོ། །
ཧ་རེ་ཧུ་རེར་བྲིས་པའི་ཀ་ཕྲེང་འདི། །
ཨ་ཙི་ཐམས་ཅད་བདེན་པ་མིན་སྲིད་པས། །
ཧ་ཅང་ལེགས་ཉེས་འབྱེད་པའི་རྣམ་དཔྱོད་ཀྱིས། །
ཨ་ཡག་ལེན་ལ་ཨ་སྡུག་སྤོང་བར་མཛོད། །
① ལྐོག་ཏུ་སྦྱོར་བ་ངན་པ་སྤེལ་བའི་དཔེ།