བློ་བསྟན་གྱིས་ཞབས་བྲོའི་དངོས་གཞིའི་ཚན་ཁག་གི་སློབ་མར་འཁྲབ་རྩལ་སློབ་བཞིན་པ།

བློ་བསྟན་གྱིས་དངོས་གཞིའི་ཚན་ཁག་གི་སློབ་མར་ཞབས་བྲོ་སློབ་བཞིན་པ།

བློ་བསྟན་གྱི་ངོ་གདོང་ལས་དགའ་བའི་འཛུམ་མདངས་འཕྱུར་བ།

བློ་བསྟན་གྱིས་སློབ་མ་དང་མཉམ་དུ་དྲན་རྟེན་པར་རྒྱག་བཞིན་པ།

བློ་བསྟན་གྱིས་པེ་ཅིང་ཞབས་བྲོའི་སློབ་གླིང་གི་ཟློས་གར《གླུ་ཞིག་བླངས་ནས་ཏང་ལ་འབུལ》ཞེས་པའི་སྒྱུ་རྩལ་བློ་འདྲིའི་འགན་འཁུར་ཅིང་། འདི་ནི《གླུ་ཞིག་བླངས་ནས་ཏང་ལ་འབུལ》ཞེས་པ་འཁྲབ་སྟོན་བྱེད་པ།

བློ་བསྟན་གྱིས་ཞིབ་འཇུག་སློབ་མར་བོད་ཀྱི་ཞབས་བྲོའི་སྐོར་ཁྲིད་བཞིན་པ།

བློ་བསྟན་གྱིས《གླུ་ཞིག་བླངས་ནས་ཏང་ལ་འབུལ》ཞེས་པའི་འཁྲབ་མིར་མཛུབ་ཁྲིད་བྱེད་བཞིན་པ།

བློ་བསྟན་གྱིས་བརྩམས་པའི《བོད་ཀྱི་མི་རིགས་ཀྱི་དམངས་ཁྲོད་ཞབས་བྲོའི་རིག་གནས》ཞེས་པའི་དེབ་ཡིན་པ།

བོད་མི་རིགས་ཀྱི་དམངས་ཁྲོད་གླུ་གར་གྱི་ཁྱད་ཆོས་དམིགས་བསལ་ཆེ་བ་དང་སྣ་ཁ་ཤིན་ཏུ་མང་བས། གླུ་གར་གྱི་རྒྱ་མཚོ་དང་ཞབས་བྲོའི་འཇིག་རྟེན་ཞེས་བརྗོད། ད་ཆ་བོད་ལྗོངས་སློབ་ཆེན་སྒྱུ་རྩལ་སློབ་གླིང་གི་དགེ་རྒན་ཆེ་མོ་བ་དང་། རབ་འབྱམས་སློབ་མའི་སློབ་དཔོན། སློབ་གསོ་པུའི་མཐོ་རིམ་སློབ་གྲྭའི་རོལ་དབྱངས་དང་ཞབས་བྲོ་རིག་པའི་ཆེད་ལས་སློབ་ཁྲིད་མཛུབ་ཁྲིད་ཨུ་ལྷན་གྱི་ཨུ་ཡོན་བཅས་ཡིན་པའི་བློ་བསྟན་གྱིས་བགྲང་བྱ་38རིང་ཞབས་བྲོ་གསར་རྩོམ་དང་། ཞབས་བྲོའི་སློབ་གསོ། རིགས་པའི་གཞུང་ལུགས་ཞིབ་འཇུག་བཅས་ལ་བརྩོན་པ་ཆུ་མོའི་རྒྱུན་བཞིན་བསྐྱངས་པས། ད་ཆ་མིང་དོན་མཚུངས་པའི་བོད་ཀྱི་ཞབས་བྲོའི་དགེ་རྒན་ཆེ་མོ་བ་དང་པོར་གྱུར།

1966ལོར་བློ་བསྟན་བོད་ལྗོངས་འབྲི་རུ་རྫོང་གི་འབྲོག་ཁྱིམ་ཞིག་ཏུ་སྐྱེས། བོད་མི་རིགས་ལ་དམིགས་བསལ་དུ་ཡོད་པའི་ཞབས་བྲོའི་ལྷན་སྐྱེས་ཀྱི་ཤེས་རབ་དང་ཞབས་བྲོར་དགའ་ཞེན་ཆེ་བའི་དབང་གིས། ལོ་10ལ་སླེབས་སྐབས་ཁོང་འབྲི་རུ་རྫོང་རིག་རྩལ་དྲིལ་བསྒྲགས་རུ་ཁག་གིས་བདམས་པ་དང་། རྗེས་སུ་འབྲི་རུ་རྫོང་སློབ་འབྲིང་གི་རིག་རྩལ་འཛིན་གྲྭར་ཞུགས་ནས་འཁྲབ་སྟོན་དང་སློབ་སྦྱོང་ཟུང་འབྲེལ་གྱི་ལས་ལ་ཞུགས་འགོ་ཚུགས།

1980ལོར་བློ་བསྟན་བོད་རང་སྐྱོང་ལྗོངས་སྒྱུ་རྩལ་སློབ་གྲྭའི་སློབ་མ་ཁག་དང་པོར་གྱུར་པ་དང་། 1985ལོར་བློ་བསྟན་སློབ་གྲྭར་ཉར་ནས་དགེ་རྒན་བྱས་ཏེ་ཞབས་བྲོ་དང་འགྲོགས་པའི་སྒྱུ་རྩལ་གྱི་ལམ་བུར་ཞུགས།

བོད་ཀྱི་དམངས་ཁྲོད་ཞབས་བྲོའི་རིགས་ཧ་ཅང་ཕུན་སུམ་ཚོགས་པ་མ་ཟད། ཆར་རྗེས་ཀྱི་མྱུ་གུ་ཇི་བཞིན་ཡུལ་ལུང་གང་སར་དར་ཁྱབ་བྱུང་ནས་གྲོང་ཚོ་ཚང་མར་རང་ཉིད་ཀྱི་ཁྱད་ཆོས་ལྡན་པའི་ཞབས་བྲོའི་རིགས་ཡོད་པ་དཔེར་ན། རལ་པ་དང་། སྐོར་བྲོ སྒོར་གཞས་སོགས་ཡོད། བློ་བསྟན་གྱིས་སྲོལ་རྒྱུན་སྟོད་གཞས་སློབ་གསོའི་དཔེ་དྲངས་ནས་གསར་འགོད་པར་སློབ་གསོའི་ཐབས་ལམ་མི་འདྲ་བ་བརྗོད།

ཞབས་བྲོའི་སྒྱུ་རྩལ་སློབ་གསོར་གཞོལ་ནས་ལོ་38སོང་རིང་། བློ་བསྟན་གྱིས་སྔ་རྗེས་སུ་མི་རིགས་ཀྱི་དམངས་ཁྲོད་ཞབས་བྲོ་དང་། འཁྲབ་རྩལ། འཁྲབ་ཚན། བོད་ཀྱི་དམངས་ཁྲོད་ཞབས་བྲོའི་རིག་གཞུང་སོགས་ཀྱི་སློབ་ཚན་ཁྲིད་ཅིང་། སྔ་རྗེས་སུ་ཞབས་བྲོ་དང་། ཞབས་བྲོའི་འཁྲབ་ཁྲིད། འཁྲབ་སྟོན་སོགས་ལྗོངས་ཕྱི་ནང་དུ་ཤུགས་རྐྱེན་ངེས་ཅན་ལྡན་པའི་ཕུལ་བྱུང་གི་མི་རིགས་ཞབས་བྲོའི་སྒྱུ་རྩལ་ལས་དོན་པ་ཁག་གཅིག་བསྐྱངས་ཡོད་ལ། ཁོང་མི་སྒེར་ལ་2009ལོར“པའོ་ཧྲན་ལྕགས་དང་ངར་ལྕགས་ཚོགས་པའི་ཕུལ་བྱུང་དགེ་རྒན་གྱི་བྱ་དགའ”སོགས་ཀྱི་གཟི་བརྗིད་མཚན་སྙན་ཡང་ཐོབ་ཡོད། ལོ་38རིང་། བློ་བསྟན་གྱིས་གསར་རྩོམ་བྱས་པའི་སྒྱུ་རྩལ་གྱི་ལེ་ཚན་ལ་རྒྱལ་ཡོངས་ཀྱི་རིགས་ཁག་གི་ཞབས་བྲོའི་འགྲན་བསྡུར་ཆེ་མོའི་བྱ་དགའ་མང་པོ་ཐོབ་པ་མ་ཟད། 1988ལོར་བོད་ཀྱི་སྒྱུ་རྩལ་མཁས་པའི་ཚབ་བྱས་ནས་ཤང་ཀང་གི་རྒྱལ་སྤྱིའི་ཞབས་བྲོའི་སློབ་གླིང་གི་དུས་ཆེན་སྐབས་གསུམ་པར་ཞུགས་པ་དང་། 1992ལོར་བོད་ཀྱི་སྒྱུ་རྩལ་མཁས་པའི་ཚབ་བྱས་ནས་ཨ་རི་དང་ཁ་ན་ཏར་སྐོར་སྐྱོད་འཁྲབ་སྟོན་བྱས་པ། 2002ལོར་བོད་ཀྱི་སྒྱུ་རྩལ་པའི་ཚབ་བྱས་ནས“ཨའོ་མོན་དམིགས་བསལ་སྲིད་འཛིན་ཁུལ་གྱི་གཞི་རྩའི་བཅའ་ཁྲིམས་ཁྱབ་བསྒྲགས་བྱས་ནས་ལོ་གཅིག་འཁོར་བའི”རྟེན་འབྲེལ་བྱེད་སྒོར་ཞུགས།

“ང་རང་ཏང་གིས་གསོ་སྐྱོང་གནང་བ་མ་ཟད། སློབ་སྦྱོང་དང་འཚར་ལོངས་ཀྱི་གོ་སྐབས་ཀྱང་གནང་བྱུང་། རྒན་ལགས་ཚོས་ང་ལ་ཞབས་བྲོར་བརྟེན་ནས་བོད་རིགས་དང་གྲངས་ཉུང་མི་རིགས་གཞན་དག་གི་དུས་ཡུན་རིང་བའི་ལོ་རྒྱུས་དང་རིག་གནས་ཟབ་མོ་མཚོན་པར་བྱེད་དགོས་པའི་བཀའ་སློབ་ཡང་ཡང་གནང་མྱོང་། ངས་ཀྱང་ཁོང་ཚོས་བསླབ་གནང་བའི་ཆེད་ལས་ཀྱི་ཤེས་བྱ་དང་། ལས་བརྩོན་གྱི་སྙིང་སྟོབས། མི་རིགས་མཐུན་སྒྲིལ་བཅས་ཀྱི་བརྩེ་སེམས་སློབ་མ་ཚོར་བརྒྱུད་སྤྲོད་བྱས་ཏེ་མི་རབས་ནས་མི་རབས་བར་རྒྱུན་འཁྱོངས་ལྷོད་མེད་བྱེད་ཀྱི་ཡིན”ཞེས་བློ་བསྟན་གྱིས་བཤད།