ལྡོང་སྨིན་དྲུག

ཉིན་ཐོ་འབྲི་བ་ནི་ངའི་འཚོ་བའི་གོམས་གཤིས་ཤིག་ཏུ་གྱུར་ཡོད། ཉིན་ཐོར་ཆུང་ས་ནས་ཉིན་རེའི་འགྲོ་འདུག་སྤྱོད་གསུམ་དང་མཐོང་ཐོས་མྱོང་གསུམ་གང་རུང་ཞིག་མཚོན་ཆོག་པ་དང་། ཆེ་ས་ནས་དུས་རབས་ཤིག་གི་ཆགས་འཇིག་དང་མི་རབས་ཤིག་གི་དར་རྒུད་སོགས་མི་མཚོན་པའི་ངེས་པའང་མེད།

—— ཁ་བྱང་གི་འགྲེལ།

2022ལོའི་ཟླ་8པའི་ཚེས་5ཉིན། གཟའ་པ་སངས། གནམ་དྭངས།

དེ་རིང་ལས་ཁུངས་སུ་སོང་ནས་དགོངས་ཞུའི་འགྲོ་ལུགས་ཡོངས་སུ་གྲུབ་རྗེས། དྲ་ཐོག་ནས་གནམ་གྲུའི་སྤ་སེ་ཉོས་པ་དང་ཞོར་དུ་སང་ཉིན་ཞོགས་པར་ཡུལ་ཤུལ་ལ་འགྲོ་བའི་རླངས་འཁོར་ཞིག་འཚོལ་དུ་སོང་། ཚ་བ་ཤིན་ཏུ་ཆེ་ཞིང་ཉིན་གང་ཡར་རྒྱུག་མར་རྒྱུག་བྱས་རྐྱེན་ངལ་དུབ་ཀྱིས་རབ་ཏུ་མནར། ཁྱིམ་ལ་སླེབས་རྗེས་ཉལ་ཁྲིའི་སྟེང་དུགན་རྐྱལ་ལོག་མ་ཐག་གཉིད་དུ་ཡུར། དུས་ཡུན་ཅི་ཙམ་ཞིག་འགོར་བའང་མ་ཤེས་པར་ཁ་པར་གྱི་སྒྲ་གྲགས་བྱུང་། ཆུང་མས་ང་ཚོ་ཇ་ཁང་ག་གེ་མོ་ཞིག་ཏུ་ངལ་གསོས་ནས་བསྡད་ཡོད། ཁྱོད་འདིར་ཤོག་ཟེར། དེ་ནས་སང་ཉིན་གྱི་རྡོག་ཆས་ཚགས་ཆུད་བརྒྱབ་རྗེས། གོམ་པའི་འདེགས་འཇོག་ཇ་ཁང་གི་ཕྱོགས་སུ་སྒྱུར།

ཚ་བ་ཤིན་ཏུ་ཆེ། བསིལ་གཡབ་འོག་གི་རྒན་པོ་དང་། ཉི་གདུགས་ཐོགས་པའི་རྒན་མོ། འཁྱགས་པ་བྱི་རིལ་ཟ་བཞིན་པའི་ན་ཆུང་སོགས་ཀྱིས་ཉིན་གཅིག་གི་ཚ་གདུང་གིས་བྱིན་པའི་སྡུག་བསྔལ་མཐའ་དག་བཟོད་བསྲན་བྱེད་ཀྱིན་ཉི་མར་ལེ་འདའ་དང་འཁང་ར་བྱེད་པར་བྲེལ། ལམ་འགྲམ་གྱི་ལྕང་མའི་ལོ་མ་དག་ས་རུ་ལྷུངས་ཤིང་མཛེས་ཤིང་ལྟ་ན་སྡུག་པའི་མེ་ཏོག་གི་འདབ་མ་དུས་ལ་མ་སླེབས་གོང་ནས་རྙིད་པར་གྱུར་ཏེ་མགོ་བོ་ཐུར་དུ་དཔྱངས་འདུག མི་རྣམས་ཀྱིས་ཡང་ནས་ཡང་དུ་ནམ་མཁའ་ལ་ལྟ་ཞིང་། ནམ་མཁའི་མཐོངས་སུ་སྤྲིན་པ་བྱེའུ་མགོ་ཙམ་ཞིག་ཀྱང་མཐོང་རྒྱུ་མི་འདུག ཚ་བ་ཆེ། ཚ་བ་ཤིན་ཏུ་ཆེ། ཚ་བས་སེམས་ཅན་ཚོའི་ལུས་ལ་ཟུག་རྔུ་ཚད་མེད་སྟེར་ཞིང་སྡུག་བསྔལ་བཟོད་བླགས་མེད་པ་སྦྱིན་གྱིན་པས་ན། ཁོ་ཚོས་ད་ནི་ཆར་པ་ཞིག་འབབ་པར་ཉིན་མཚན་ལྟོས་མེད་དུ་རེ་སྒུག་བྱེད་མོད། ཆར་པ་ཞིག་འབབ་རྒྱུ་ཕར་ཞོག་བསིལ་རླུང་ལྡང་བའི་གོ་སྐབས་ཀྱང་ཤིན་ཏུ་ཉག་ཕྲ། ལྕང་མའི་བསིལ་གྲིབ་འོག་ན་རྒན་རྒོན་ཚོ་སྐོར་དང་སྐོར་བྱས་ཏེ་ཁ་བརྡ་སྣ་ཚོགས་གློད་གྱིན་འདུག “ད་ལོའི་ཚ་བ་འདི་འདྲ་ཆབ་མདོའི་ལོ་རྒྱུས་སུ་འབྱུང་མ་མྱོང” “འབྱུང་བ་ལྔ་དོ་སྙོམས་ཡོང་གི་མི་འདུག” “རྩྭ་ས་ཐམས་ཅད་བསྐམས་ནས་མེ་སྐྱོན་འབྱུང་ཉེན་ཆེ” “ཆར་པ་མ་བབས་པས་དབྱར་རྩྭ་སྐྱེ་ཉུང་ཉུང་ཡིན་ངེས་རེད” རྒན་རྒོན་ཚོས་རང་རང་གི་བསམ་ཚུལ་རེ་བཤད་རྗེས་གདོང་ལ་སྐྱོ་ཉམས་ཀྱི་མདངས་ཤིག་མངོན། རྒན་རྒོན་ཚོའི་ཁ་བརྡ་དེ་དག་ལས་ང་ལ་བསམ་གཞིག་གི་དྲི་བ་སྣ་ཚོགས་ཤིག་ཡིད་ལ་འཁོར་དུ་བཅུག་པ་དང་ཞོར་དུ་དྲི་བ་དེ་དག་ལ་མནོ་བསམ་གཏོང་བཞིན་གཏོང་བཞིན་གོམ་ཁ་མུ་མཐུད་ཇ་ཁང་གི་ཕྱོགས་སུ་བསྒྱུར།

2022ལོའི་ཟླ་8པའི་ཚེས་6ཉིན། གཟའ་སྤེན་པ། གནམ་འཐིབས།

ཞོགས་པའི་ཆུ་ཚོད་དྲུག་པ་ཡས་མས་སུ་ང་ཚོ་རླངས་འཁོར་ཆུང་ཆུང་ཞིག་ལ་བསྡད་དེ་ཁམས་ཡུལ་ཤུལ་ཕྱོགས་སུ་སོང་། རླངས་འཁོར་དུ་ཁ་ལོ་བ་ཕུད་ད་དུང་མི་དྲུག་ཡོད་ཅིང་། ངའི་འགྲམ་དུ་བུ་མོ་ཆུང་ཆུང་གཉིས་བསྡད་འདུག ཁོ་གཉིས་པོའི་ཕ་ཡུལ་ཡུལ་ཤུལ་ནང་ཆེན་ནས་ཡིན་ཞིང་། ད་ལྟ་ཆབ་མདོའི་མཐོ་འབྲིང་ག་གེ་མོ་ཞིག་ཏུ་སློབ་གྲྭ་འགྲིམ་བཞིན་ཡོད་ཟེར། བུ་མོ་གཉིས་ཀྱི་ལུས་ལ་ཆང་རག་དང་ཐ་མག་གི་དྲི་མས་ཁྱབ་འདུག་པར་བལྟས་ན། མདང་དགོང་མཚན་གང་ནང་མ་ཁང་དང་ཨར་ཁང་ག་གེ་མོ་ཞིག་ཏུ་བསྡད་པ་མིན་ནམ་སྙམ། སྐབས་དེར། ངའི་སེམས་ལ་ཉེ་ལམ་ཁྱིམ་བདག་གི་ཚོགས་འདུ་ཞིག་ལ་དགེ་རྒན་ཞིག་གིས“དེང་སྐབས་དྲིན་ཆེ་བའི་ཕ་མ་ཚོས་བུ་ཕྲུག་ཚོ་སློབ་གྲྭར་མངགས་ན་ཡང་། ཕ་སེམས་བུ་ཐོགས་དང་བུ་སེམས་རྡོ་ཐོགས་ལྟ་བུའི་བུ་ཕྲུག་གང་མང་ཞིག་གིས་སློབ་སྦྱོང་ལ་བརྩོན་སེམས་མེད་པར་ཕ་མའི་དངུལ་ལོར་དེ་དག་གིས་དྲ་ཐོག་ནས་བེད་མེད་ཀྱི་དངོས་རྫས་ཙག་ཙིག་ཉོ་བ་དང་། ཁ་ཤས་ཀྱིས་ངལ་གསོའི་དུས་ཡུན་བེད་སྤྱད་དེ་ཕྱི་ལ་སོང་ནས་ཨར་ཁང་དང་ནང་མ་ཁང་དུ་འཛུལ་ནས་ཆང་འཐུང་མཁན་ཡང་མི་ཉུང་བ་ཞིག་ཡོད་འདུག”པའི་སྐད་ཆ་འདི་དྲན་པ་དང་མཉམ་དུ་མིག་ཟུང་གིས་བུ་མོ་དེ་གཉིས་ལ་ལྟ་སྐབས། ཁོ་མོ་གཉིས་སྔར་བཞིན་རྨི་ལམ་གྱི་ཞིང་ཁམས་ན་སྔུར་བ་ཡང་མོ་ཞིག་གི་རོལ་དབྱངས་ལ་འཁྲེང་འདུག

རླངས་འཁོར་གྱིས་ཐང་ཆེན་པོ་ཤོག་སྐྱ་ལྟེབ་ལྟེབ་བྱེད་བཞིན་མདུན་ཕྱོགས་སུ་རྒྱུགས། རླངས་འཁོར་ནང་གི་འགྲུལ་པ་ཚོ་གཡས་ཉལ་གཡོན་ཉལ་བྱས་ཏེ་ཐམས་ཅད་གཉིད་དུ་ཡུར་ཡོད་པ་འདྲ། སོང་སོང་མཐར་ཞིབ་བཤེར་ས་ཚིགས་ཤིག་ཏུ་སླེབས་སོང་། ས་ཚིགས་དེ་ནི་ཡུལ་ཤུལ་དང་ཆབ་མདོའི་བར་གྱི་ས་ཚིགས་ཐོག་མ་དེ་རེད། ན་ནིང་ད་ལོར་རྒྱལ་ཡོངས་སུ་རིམས་ནད་མཆེད་པས་ནང་མི་ཕྱི་རུ་འགྲོ་བ་དང་ཕྱི་མི་ནང་དུ་འཛུལ་བར་བཀག་སྡོམ་ནན་པོ་བྱེད་ཀྱིན་ཡོད་ལ། ཕར་ཚུར་འགྲོ་བར་ཉིང་སྐྱུར་བརྟག་དཔྱད་བྱས་ཡོད་མེད་སོགས་ལ་བརྟག་དཔྱད་བྱེད་ཀྱིན་ཡོད་པ་རེད། སྐབས་དེར་ཁ་ལོ་བས“ཚང་མས་ཐོབ་ཐང་ལག་ཁྱེར་དོན་རོགས”ཞེས་བཤད། “ངའི་ཐོབ་ཐང་ལག་ཁྱེར་འཁྱེར་མི་འདུག སྐྱོན་ཡོད་དམ”ཞེས་ལོ་ཆུང་ཞིག་གིས་ཁ་ལོ་བར་དེ་ལྟར་བཤད། ཁ་ལོ་བས་ཀྱང“སྐྱོན་མི་འདུག ས་འདིའི་ཉེན་རྟོག་པ་ངའི་ངོ་ཤེས་ཡིན”ཞེས་བཤད་པ་དང་། ཉེན་རྟོག་བློ་མཐུན་གཉིས་ཡོང་ནས་ཁ་ལོ་བར་ལག་བརྡ་རེ་བྱས་ནས་འགྲོ་རུ་འཇུག་སོང་། དུས་དེར་ངའི་སེམས་ལ་ཐེ་ཚོམ་གྱི་དྲི་བ་གང་མང་ཞིག་གིས་འཚང་ཁ་རྒྱག་ཞོར་མུ་མཐུད་ཡུལ་ཤུལ་ཕྱོགས་སུ་སོང་།

ཆབ་མདོ་ནས་ཡུལ་ཤུལ་བར་གྱི་གཞུང་ལམ་དེ་སྔོན་དང་མི་འདྲ་བར་བདེ་ཞིང་ཁོད་སྙོམས་ལ། གནད་སྨིན་དབུལ་སྐྱོར་དང་གྲོང་གསེབ་དར་རྒྱས་ཀྱི་སྲིད་ཇུས་བཟང་པོའི་ཐུགས་རྗེ་ལས། ད་ཆ་ཕར་ཚུར་འགྲོ་བར་སྟབས་བདེར་སོང་ནས་མང་ཚོགས་ཀྱི་ཐོབ་ཚོར་དང་། སྐྱིད་ཚོར། བདེ་ཚོར་བཅས་སྔར་བས་གོང་མཐོར་སོང་འདུག འགྲིམ་འགྲུལ་སོགས་ཀྱི་སྒྲིག་ཆས་འཐུས་སྒོ་ཇེ་ཚང་དང་ཆ་རྐྱེན་ལེགས་སུ་སོང་བ་དང་བསྟུན་ནས། དེ་སྔོན་ཆུ་ཚོད་དགུ་ཡས་མས་རིང་གི་ལམ་ཐག་དེ་ད་ལྟ་ཆུ་ཚོད་དྲུག་ཙམ་ལ་བདེ་བླག་ཏུ་སླེབས་པར་བསམས་ན། “གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར”ཞེས་པའང་ཁ་བཤད་ཙམ་མིན་པར་དོན་དངོས་ཤིག་ཡིན་པ་ར་སྤྲོད་བྱེད་ཐུབ། ཉིན་དེའི་ཆུ་ཚོད་བཅུ་གཉིས་དང་ཕྱེད་ཀར་ཡུལ་ཤུལ་དུ་འབྱོར་བ་དང་། ཆུ་ཚོད་གསུམ་དང་སྐར་མ་ཉི་ཤུར་གནམ་གྲུར་བསྡད་དེ་ཕ་ཡུལ་ཙོང་ཁ་བདེ་ཁམས་ཕྱོགས་སུ་འཕུར།

2022ལོའི་ཟླ་8པའི་ཚེས་7ཉིན། གཟའ་ཉི་མ། གནམ་འཐིབས།

ཕ་ཡུལ་ལ་ལོག་ཐེངས་རེར། གཉེན་ཉེ་དང་གྲོགས་པོ་ཚོར་ལྟ་བར་འགྲོ་བ་ནི་ཡུལ་ལ་ཐེངས་ཤིག་ལོག་པའི་དོན་དག་གཙོ་ཆེ་ཤོས་དེ་རེད། དེ་བས་ཁ་སང་ལམ་བར་ནས་ཉོས་པའི་ཤིང་ཏོག་དང་། སྔོ་ཚལ་སོགས་ནུ་བོའི་རླངས་འཁོར་གྱི་ནང་དུ་བཞག་ནས་ཞོགས་ཟས་སྟབས་བདེ་ཞིག་བཟས་ཏེ་དབྱར་སར་ཡོད་པའི་ཨ་ཅེ་ཐུག་པར་ཐོན།

མཐོན་པོའི་གངས་རི་དང་། དམའ་མོའི་སྤང་ཐང་། དྭངས་གཙང་ཆུ་མོ་སོགས་རང་བྱུང་ཁམས་ཆེན་པོས་མིའི་རིགས་ལ་གནང་བའི་མཛེས་སྡུག་གི་རྣམ་པ་དག་ཕྲ་ཆུང་མིག་ལམ་ལ་མངོན་པ་དང་། མེ་ཏོག་སྣ་ཚོགས་ཀྱིས་ཕྲ་བཏབ་པའི་ཡངས་པའི་རྩྭ་ཐང་ཆེན་པོར་ཟས་སུ་སྨན་རྩྭ་དང་། བཏུང་བ་གཏེར་ཆུ་ལོངས་སུ་སྤྱོད་བཞིན་པའི་རྟ་ནོར་ལུག་གསུམ་མཐོང་ཚེ། ལྟ་ན་སྡུག་པའི་ཞིང་ཁམས་འདིར་ཡུན་དུ་འཚོ་རྒྱུ་བྱུང་ན་དགའ་བ་ལ་ཨང་སྙམ་པའི་ཚོར་བ་ཞིག་འགོག་མེད་དུ་སྐྱེས་བྱུང་།

རྔམ་བརྗིད་ཀྱི་རི་བོ་དང་། མུ་མེད་ཀྱི་སྤང་ཐང་། ཁོད་སྙོམས་པའི་གཞུང་ལམ་བཅས་ལ་བདེ་མོ་འཇོག་གྱིན་མུ་མཐུད་ལམ་ལ་ཆས། མཐར་བ་གམ་མང་པོས་བརྒྱན་པའི་ཐང་ཆེན་ཞིག་ཏུ་སླེབས་བྱུང་། ནུ་བོས་བཤད་ན་ས་དེ་ནི་ཀླུ་ཆུ་ཐང་རེད་ཟེར། ལོ་དྲུག་གི་ཡར་སྔོན་དུ་ང་རང་ས་འདིར་ཐེངས་ཁ་ཤས་སླེབས་མྱོང་། དེ་དུས་མཚམས་མཚམས་སུ་ཁང་པ་ལེབ་མོ་ཁ་ཤས་དང་རི་བོའི་ངོས་སུ་ལུག་ཁྱུ་སྐོར་རེ་མ་གཏོགས་གཞན་གང་ཡང་མཐོང་རྒྱུ་མི་འདུག ད་ལྟ་གཞུང་ལམ་གཡས་གཡོན་དུ་བ་གམ་མང་པོ་བསྐྲུན་ནས་ཚོང་ཁང་དང་ཟ་ཁང་གྲངས་ལས་འདས་པ་འདུག ད་ཆ་འབྲོག་པ་ཚོས་འབྲོག་ལས་ཀྱི་ཞོར་དུ་ཚོང་ལས་ཙག་ཙིག་གཉེར་བ་དང་། ད་དུང་ཡངས་པའི་རྩྭ་ཐང་དུ་དེང་རབས་ཅན་གྱི་སྦྲ་གུར་ཆུང་ཆུང་ཡང་གང་མང་ཕུབ་ནས་ཡུལ་སྐོར་ལས་རིགས་ཀྱང་གཉེར་གྱིན་འདུག

སྦྲ་གུར་དེ་ཚོ་མཐོང་དུས་ངའི་སེམས་ལ་ལོ་ངོ་གཉིས་ལྷག་ལ་འཕྲད་མ་མྱོང་བའི་ཨ་ཅེ་ལགས་དྲན་ཞིང་། ཨ་ཅེ་ཡིས་སྦྲ་གུར་ཞིག་གི་སྒོ་ཁ་ན་ལག་གཡོན་པར་བཞོ་ཟེའུ་ཐོགས་ཤིང་ལག་གཡས་པ་ཐོད་ལ་ཀེར་ཏེ་ང་ལ་སྒུག་བསྡད་ཡོད་སྙམ་པ་དང་། རླངས་འཁོར་གྱི་ཟིལ་ཤུགས་ཀྱང་ཇེ་མྱུར་དུ་བཏང་སྟེ་ཨ་ཅེ་ཡོད་སའི་རུ་བའི་ཕྱོགས་སུ་བཞུད།

ཨ་ཅེ་ཚང་གི་དུ་བ་སྔོ་ལྷོག་ལྷོག་ཏུ་འཕྱུར་བཞིན་པ་དང་ངེད་གཉིས་ཡོང་བ་མཐོང་འཕྲལ་སྔུན་ལ་ཡོང་ནས་དངོས་ཟོག་འཁྱེར་རོགས་བྱས་ཏེ་ཁྱིམ་དུ་སོང་། དགོང་མོ་དེར་ང་ཚོས་ཁ་བརྡ་དང་ལབ་གླེང་སྣ་ཚོགས་བྱས། མོས་བཤད་པ་ལྟར་ན། ན་ནིང་དབྱར་རྩྭའི་སྤུས་ཀ་ལེགས་པ་དང་ཐོན་འབོར་མང་ཞིང་རིན་གོང་མཐོ་བས་དུད་ཁྱིམ་མང་པོས་སྒོ་ཟོག་བཙོངས་ཏེ། གྲོང་ཁྱེར་དུ་ཁང་པ་ཉོས་ནས་འཚོ་བར་རོལ་འགོ་བརྩམས་ཟེར། ད་ལོར་དབྱར་རྩྭ་དགུན་འབུ་ཧ་ཅང་དཀོན་ལ་རིན་གོང་ཡང་དམའ་བས། རེ་འགས་ནོར་ལུག་ཉོས་ཏེ་འབྲོག་ལས་གཉེར་འགོ་ཚུགས་ཟེར།

སྐབས་དེར་ངའི་སེམས་ལ་འཁྱག་འདར་ཐེངས་ཤིག་བརྒྱབ་བྱུང་། ནམ་ཞིག་ནོར་ལུག་དང་སྒོར་མོ་གཉིས་ཀ་ཟད་ནས་འཚོ་བ་རོལ་མི་ཐུབ་པའི་འབྲོག་པ་མི་ཐོན་པའི་ཆེད། གོང་གི་ཞོར་དུ་ཟ་ཁང་ཚོང་ཁང་དང་། ཡུལ་སྐོར་ལས་རིགས་གཉེར་མཁན་གྱི་འབྲོག་པ་གསར་པ་ཚོ་ནི་ཅི་འདྲའི་ལས་ལ་བརྩོན་པ་ཞིག་མ་རེད་དམ།

2022ལོའི་ཟླ་8པའི་ཚེས་8ཉིན། གཟའ་ཟླ་བ། གནམ་དྭངས།

དེ་རིང་ནམ་མཁའ་སྔོ་ཞིང་དྭངས་ལ་སྤྲིན་པ་བྱེའུ་མགོ་ཙམ་ཞིག་ཀྱང་མཐོང་རྒྱུ་མི་འདུག ལུག་གི་འབའ་སྒྲ་དང་། འབྲི་མོའི་ངུར་སྒྲ། རྟ་ཕོའི་འཚེར་སྒྲ། ད་དུང་སྒོ་ཁྱིའི་ཟུག་སྐད་བཅས་ཀྱིས་ཁུ་སིམ་པའི་རི་གྲོང་འདིའི་ལྷིང་འཇགས་ཡོངས་སུ་དཀྲོགས་ལ། མི་ཚོའི་ཉིན་གཅིག་གི་འཚོ་བའི་དབུ་ཁྱུད་འབྲི་མགོ་བརྩམས། ཁྱིམ་འཛིན་མ་ཚོ་ཡར་ལངས་ནས་མེ་ཁ་གསོས་ཏེ་ནངས་ཇ་བསྐོལ་ཅིང་། སྐྱེས་པ་ཚོས་འདོན་རྟ་དབྱངས་སུ་གྱེར་ཏེ་ལྷ་བསང་སྔོན་མོ་དགུང་དུ་བཏང་། སྦྲ་འདབས་ནས་ལང་ལོང་དུ་འཕྱུར་བའི་དུ་བས་རྩྭ་ཐང་འདི་ལ་དར་དཀར་ཡུག་གཅིག་འཐེན་པ་དང་ཨ་ན་མ་ན་རེད།

ངའི་སྲིང་ཆུང་མ་ནི་རང་ལོ་བཅུ་དྲུག་སླེབས་མ་ཐག་ཨ་ཕས་ད་ལྟའི་གནས་ཡུལ་གྱི་ཕ་མ་དང་གྲོས་ཁ་བསྡུར་ནས་བཙན་གྱིས་གནས་ལ་བརྫངས། ཁ་སང་མོས་ང་རང་ཕ་ཡུལ་དུ་སླེབས་པ་ཤེས་འཕྲལ་ཁ་པར་བརྒྱབ་ནས་ཡིན་གཅིག་མིན་གཉིས་མོའི་ཁྱིམ་ལ་ཡོང་དགོས་ཚུལ་བཤད་པས་དོན་དེར་ངས་ཀྱང་ཁས་བླངས་རྐྱེན། ད་ནངས་ཞོགས་པ་སྔ་མོ་ནས་ཡར་ལངས་ཏེ་ཨ་ཅེའི་དབྱར་ས་ནས་ནུ་བོའི་རླངས་འཁོར་ལ་བསྡད་དེ་མོར་ལྟ་རུ་ཐོན།

སྲིང་ཆུང་མར་ལག་ལས་ཀ་དང་སེམས་གཤིས་རྒྱུད་གཉིས་ཀ་འཛོམས་པས་སྡེ་མི་རྒན་གཞོན་ཡོངས་ནས་བསྟོད་པའི་མཐེ་བོང་ཀེར་ས་དང་རྗེས་སུ་ཡིད་རངས་བྱེད་ས་ཉག་གཅིག་ལ་གྱུར་ཡོད། མོར་ཕྲུ་གུ་གཉིས་ཡོད་པ་ལས་ཆེ་བ་ན་ནིང་སློབ་ཆེན་ནས་ཐོན་པ་དང་། ཆུང་བ་ཆུང་དུས་སློབ་གྲྭར་མངགས་ཀྱང་རིག་པ་ཡག་པོ་མེད་རྐྱེན་སློབ་གྲྭ་ནས་ཕྱིར་འཐེན་པ་རེད། ཐེངས་འདིར་སྲིང་ཆུང་མར་སྐོར་རྒྱག་ཞོར་ཕྲུ་གུ་ཆེ་བར་གཞུང་གི་ལས་ཀ་རག་ཡོད་དམ་སོགས་བསམ་གཞིག་གི་དྲི་བ་གང་མང་ཞིག་དྲན་འཛིན་གྱི་བུ་གར་བསྣམས་ཏེ་སོང་བ་ཡིན།

ཁྱིམ་མི་གང་བོས་ང་རང་ཡོང་བ་ཤེས་རྗེས་སྔ་མོ་ནས་བསྒུགས་འདུག སྒྲོག་ཙེའི་ཐོག་ཏུ་ཚལ་སྣ་མང་པོ་ཞིག་བསྒྲིགས་ཡོད་ཅིང་། ང་ཚོས་སྒྲོག་ཙེའི་མཐའ་བསྐོར་ནས་ཟ་མ་ཟ་འགོ་བརྩམས། སྐབས་དེར་སྲིང་ཆུང་མས་ཁྱོད་ཚོས་ཚལ་ཟོ། ང་རྩམ་པ་ཟ་ཡི་ཡིན་ཞེས་བཤད། ང་རང་ལས་ཁུངས་སུ་ཡོད་དུས་ཞོགས་ཟས་རྟག་པར་རྩམ་པ་ཟ་གྱི་ཡོད་ལ། ཕ་ཡུལ་དུ་ཐོན་པ་ནས་བཟུང་ཉིན་འདི་དག་རིང་རང་ཁྱིམ་དང་གཉེན་ཉེ་ཚོའི་ཁྱིམ་དུ་སོང་ནས་ཚལ་རིགས་གང་མང་གིས་སྣེ་ལེན་གཟབ་རྒྱས་ལ་རོལ་རོལ་བས། དེ་རིང་སྲིང་ཆུང་མ་དང་ལྷན་དུ་རྩམ་པ་ཟ་འདོད་ཆེ་བས། ངས་སྲིང་ཆུང་མར་ང་ཡང་རྩམ་པ་ཟ་འདོད་ཅེས་བཤད་པ་དང་མོས་མཚར་སྣང་དང་བཅས་ངས་ཁྱོད་ཚོ་རྩམ་པ་ཟ་བར་དགའ་པོ་ཡོད་ཀྱི་མ་རེད་བསམས་བྱུང་། དེང་སང་ལས་བྱེད་པ་དང་ནང་ས་འགྲིམས་པའི་སློབ་གྲྭ་བ་དེ་ཚོའི་ནང་རྩམ་པ་ཟ་མཁན་ཧ་ཅང་ཉུང་ཉུང་རེད་ཅེས་བཤད།

ཕྱི་དྲོར་ང་ཚོས་ཁ་བརྡ་ལབ་གླེང་སྣ་ཚོགས་ཤིག་བྱས་ལ། ཞོར་དུ་ཕྲུ་གུ་གཉིས་ཀྱི་དོན་དག་གླེང་། མོས་བུ་ཆེ་བ་སློབ་ཆེན་མཐར་རྗེས་ད་ལྟ་ད་དུང་ལས་ཀ་འཚོལ་བཞིན་ཡོད་པ་དང་། བུ་ཆུང་བ་ཡང་ཞོར་ལས་ཙག་ཙིག་རེ་འཚོལ་བར་འགྲོ་བ་དང་དུས་ཚོད་ཕལ་ཆེ་བ་ཁྱིམ་དུ་འབྲོག་ལས་གཉེར་ནས་སྡོད་གྱི་ཡོད་ཟེར། ད་ལྟ་ལོ་གཅིག་གི་ཡོང་འབབ་གཙོ་བོ་དབྱར་རྩྭ་དགུན་འབུ་རེད་ཟེར།

དུས་དེར་ངའི་སེམས་ལ་འཚུབ་ཤ་ཞིག་ལངས་བྱུང་། སྐད་ཅིག་ལ་ཉི་མ་ཡང་ནུབ་རིར་ཡོལ་འགྲོ་ལ། ད་ནི་སང་ཉིན་གྱི་གནམ་གཤིས་དེ་རིང་ལས་ལེགས་པ་ཡོང་ངེས་རེད་སྙམ་བྱུང་།