འདི་ནི་སྒྲོལ་མས་ཁྱད་ལྡན་ཐོན་རྫས་ཚོང་བཞིན་པ།

མཚོ་སྣ་རྫོང་ནས་ཐོན་ཏེ་རི་ལམ་ཀྱག་ཀྱོག་བརྒྱུད་ཆུ་ཚོད་གཅིག་ལྷག་ཙམ་བསྐྱོད་རྗེས། མཐའ་བཞི་མུ་ལ་མུ་ཁྱུད་ཀྱི་གངས་རིས་བསྐོར་ཅིང་། རི་སྐེད་དང་རི་གཤམ་སྔོ་ལྗང་གོས་ཀྱིས་བརྒྱན་པའི་མག་མང་མོན་པ་མི་རིགས་ཤང་དུ་འབྱོར།

ཡུལ་ཕྱོགས་གཅིག་གི་ཐོན་ཁུངས་ཀྱིས་ཡུལ་ཕྱོགས་དེ་གའི་མི་སྣའི་འཚོ་བ་དང་ཡུལ་ཕྱོགས་དེ་གའི་སྲོལ་རྒྱུན་རིག་གནས་ཀྱི་སྒྱུ་རྩལ་སྐྱེད་སྲིང་བྱེད་བཞིན་ཡོད། མོན་པ་མི་རིགས་འདུས་སྡོད་ཁུལ་དུ་ཚང་ཚིང་ནགས་ཚལ་རྒྱ་ཆེ་ཞིང་སྨྱུག་མའི་ཐོན་ཁུངས་བཟང་བས་གནའ་སྔ་མོ་ནས་བཟུང་སྨྱུག་བཟོའི་ལག་ཤེས་བྱང་ཆུབ་ཅིང་། སྨྱུག་མའི་སྣོད་ཆས་མང་པོ་བཟོ་གི་ཡོད། དེ་གར་སྨྱུག་མའི་ཐོན་ཁུངས་འབེལ་པོ་ཡོད་པས“སྨྱུག་མའི་ཕ་ཡུལ”ཞེས་སུ་གྲགས།

འདི་ནི་མག་མང་མོན་པ་མི་རིགས་ཤང་གི་མཛེས་ལྗོངས་ཡིན་པ།

སྒྲོལ་མ་ནི་ས་སྐྱེས་རྡོ་སྐྱེས་ཀྱི་མོན་པའི་བུད་མེད་ཅིག་ཡིན་ཞིང་། 2000ལོར་སློབ་འབྲིང་ཐོན་རྗེས་ཨ་མའི་ས་ནས་སྨྱུག་བཟོའི་ལག་ཤེས་སྦྱངས། སྐབས་དེ་དུས་འཚོ་བའི་ཆ་རྐྱེན་ཞན་པ་དང་འགྲིམ་འགྲུལ་སྟབས་བདེ་པོ་མེད་པས་ཕྱིར་གླ་པར་འགྲོ་མཁན་ཉུང་། དེར་བརྟེན་སྨྱུག་བཟོའི་ལག་རྩལ་ལ་རྩེ་གཅིག་ཏུ་གཞོལ་ནས་ཡོང་འབབ་གསོག་པའི་བསམ་བློ་འཁོར། ཆུང་དུས་ནས་སྨྱུག་མའི་ཐོན་རྫས་བཟོ་སྟངས་ལ་རྒྱུས་མངའ་ཡོད་པའི་སྒྲོལ་མའི་ངོས་ནས་བརྗོད་ན་གཞན་ལས་ཤེས་སླ་བ་ཡོད། ང་ཚོ་དེར་སླེབས་སྐབས་སྒྲོལ་མ་སྨྱུག་མ་འདེམས་བཞིན་པའི་སྒང་ཡིན་པ་དང་ཉམས་མྱོང་ལྡན་པའི་སྒྲོལ་མས་སྨྱུག་མ་ཡག་ཉེས་ལ་ལྟ་ཙམ་ལས་བྱེད་དགོས་ཀྱི་མེད། ཁོང་གིས་སྨྱུག་མ་གཅིག་བདམས་ནས་དེ་ཆེ་ཆུང་དང་རིང་ཐུང་འདྲ་མཚུངས་སུ་གཤགས་པ་དང་། དེ་རྗེས་བརྡར་ནས་འཇམ་དུ་བཏང་། མཇུག་ཏུ་སྨྱུག་མ་དེ་དག་ས་ཆ་ཡངས་ས་ཞིག་ཏུ་ཁྱེར་ནས་རོགས་པ་དང་མཉམ་དུ་ཐོན་རྫས་བསླ་འགོ་ཚུགས། བརྒྱུད་རིམ་ཧྲིལ་པོར་ཞིབ་ཚགས་པོ་དང་ངང་རྒྱུད་རིང་པོ་དགོས་པ་ལས་ཧ་རེ་ཧུ་རེ་བྱ་མི་རུང་། ཡུན་རིང་མ་སོང་བར་སློ་མ་ཆུང་ཆུང་ཞིག་བསླས་ཚར་འདུག

 འདི་ནི་མཛེས་པའི་མོན་པའི་བུ་མོ་ཡིན་པ།

སྒྲོལ་མས“ཐོག་མར་སྦྱོང་སྐབས་དཀའ་ངལ་མང་པོ་འཕྲད་བྱུང་། སྐབས་འགར་གཡུག་འཇོག་དགོས་མིན་འགྲོ་བསམ་གྱི་འདུག ཡིན་ནའང་ཨ་མས་ཁ་ཏ་བསླབ་བྱ་ཐེངས་མང་བྱས་པ་བརྒྱུད། ཞོགས་སྔ་ལངས་དང་དགོང་ཕྱི་ཉལ་གྱིས་སྦྱངས་པ་ལྷོད་མེད་བྱས་པས་རིམ་བཞིན་ལས་ཀ་འདིར་དགའ་རུ་ཕྱིན་སོང་། 2016ལོར་ང་རང་མོན་པ་མི་རིགས་ཤང་གི་སྨྱུག་བཟོའི་རྒྱུན་འཛིན་པར་བདམས་བྱུང་། འདི་ནི་གཟི་བརྗིད་རེད་ལ་འགན་འཁྲི་ཡང་རེད། དེ་ནས་བཟུང་ལག་རྩལ་དེ་ལ་སྔར་བས་འབད་པ་བྱས་ནས་མ་ཉམས་གོང་འཕེལ་དང་ཉམས་པ་སོར་ཆུད་བྱ་རྒྱུའི་སེམས་ཐག་བཅད་པ་ཡིན”ཞེས་བརྗོད།

 འདི་ནི་སྨུག་སྤྲིན་ཁྲོད་ཀྱི་མག་མང་མོན་པ་མི་རིགས་ཤང་ཡིན་པ།

ཉེ་བའི་ལོ་ཤས་རིང་། སྨྱུག་མའི་ཐོན་རྫས་ལ་དགའ་པོ་བྱེད་མཁན་ཇེ་མང་དུ་སོང་བ་དང་ཁུལ་དེའི་སྨྱུག་བསླས་ཐོན་རྫས་ཉེ་རིང་གང་སར་སྐད་གྲགས་ཆོད་ནས་རྫོང་དང་གྲོང་ཁྱེར་ཙམ་མ་ཟད། ཐ་ན་རྒྱལ་ནང་དུའང་བྲིན་ཁ་རྒྱུག་པོ་ཡོད་པ་རེད། འཛད་སྤྱོད་པའི་དགོས་མཁོ་བསྐང་ཆེད་སྒྲོལ་མས་སློ་མ་དང་ལག་གཟེབ་སོགས་བཟོ་དབྱིབས་དང་ཆེ་ཆུང་མི་འདྲ་བའི་སྨྱུག་བསླས་ཐོན་རྫས་མང་པོ་བཟོས་ཡོད། སྒྲོལ་མས“རི་གྲོང་ཆུང་ཆུང་གི་སྨྱུག་མའི་ཐོན་རྫས་སྐད་གྲགས་ཆོད་པ་མཐོང་སྐབས་སྨྱུག་བཟོའི་རྒྱུན་འཛིན་པ་ཞིག་གི་ངོས་ནས་དགའ་ཚོར་ཆེན་པོ་སྐྱེས་བྱུང་། མང་ཚོགས་ཀྱི་སྣེ་ཁྲིད་དེ་སྤུས་ཀ་དག་ཅིང་བཟོ་བཀོད་ལེགས་པའི་སྨྱུག་མའི་ཐོན་རྫས་མང་ཙམ་ཚོད་ལྟ་བྱས་ནས་བཟོས་ཏེ་མངོན་མིན་རིག་གནས་ཤུལ་བཞག་སྔར་བས་རྒྱུན་འཛིན་དང་དར་སྤེལ་གཏོང་གི་ཡིན”ཞེས་གདེང་ཚོད་ཀྱིས་ཁེངས་བཞིན་བརྗོད།

འདི་ནི་ལེགས་པོ་རོང་གི་ཤིང་ཕོར་ཡིན་པ།

འདི་ལྟར་འཕྲེད་ལ་འཐེན་དགོས་ཅེས་སྒྲོལ་མས་ངང་རྒྱུད་རིང་པོས་རོགས་པར་སྨྱུག་བཟོའི་ལག་རྩལ་སློབ་བཞིན་འདུག འགྲམ་དུ་ཁོང་གིས་བསླས་པའི་སློ་མ་གཅིག་བཞག་འདུག དེ་ནི་བཟོ་ལྟ་སྙིང་རྗེ་ལ་ཆེ་ཆུང་འཚམ་ཞིང་བལྟས་པ་ཙམ་གྱིས་བློ་ལ་འགྲོ་བ་ཞིག་འདུག མོན་པའི་སྨྱུག་མའི་ཐོན་རྫས་སྣ་ཚོགས་ཁྲོམ་རར་དར་བཟོ་ཆེ་བ་དང་སྒྲོལ་མས་ཚོང་ལམ་ཡག་པོ་དེར་དམ་འཛིན་བྱས་ནས་ཤང་དུ་ཚོང་ཁང་ཞིག་བཙུགས་ཏེ་ཆེད་མངགས་སྨྱུག་མའི་ཐོན་རྫས་བཙོངས་པས་ཡོང་འབབ་མང་པོ་རག དེ་ལས་སྨྱུག་བཟོའི་རྒྱུན་འཛིན་པ་སྒྲོལ་མར་འཚོ་ཐབས་གསར་པ་ཞིག་རྙེད། སྒྲོལ་མས“དེ་སྔོན་འདི་གར་འགྲིམ་འགྲུལ་སྟབས་བདེ་པོ་མེད་པས་རང་བྱུང་ཐོན་ཁུངས་ལ་བརྟེན་ནས་འཚོ་བ་སྐྱེལ་དགོས་ཀྱི་ཡོད། སྨྱུག་མ་འབེལ་པོ་ཡོད་པས་རྒན་རབས་ཚོས་ཐོན་ཁུངས་དེ་སྤྱད་དེ་མཁོ་ཆས་སྣ་ཚོགས་བཟོ་ཡི་ཡོད། སྔོན་མ་ལག་རྩལ་འདི་སྦྱོང་བ་ནི་འཚོ་ཐབས་འཚོལ་བ་ཁོ་ན་ཙམ་རེད། ད་ཆ་སྨྱུག་བཟོའི་རྒྱུན་འཛིན་པ་ནི་འདོར་ཐབས་མེད་པའི་འགན་འཁྲི་ཞིག་རེད། དེར་བརྟེན་ཁོམ་པ་བྱུང་དུས་ཡུལ་མི་ཚོ་དང་མཉམ་དུ་སྨྱུག་བཟོའི་སྐོར་གླེང་གི་ཡོད། སྨྱུག་བཟོ་ནི་ང་ཚོའི་གྲོང་ཚོར་ཞིང་ལས་ཕུད་པའི་འབབ་ཁུངས་ཡག་ཤོས་ཀྱི་གྲས་ཤིག་རེད”ཅེས་བརྗོད།

 འདི་ནི་ཐོག་བརྩེགས་ཅན་གྱི་བོད་བཟོའི་སྡོད་ཁང་ཡིན་པ།

སྨྱུག་བཟོ་ནི་མོན་པ་རིགས་ཀྱི་མཚོན་བྱེད་རང་བཞིན་གྱི་ལག་ཤེས་བཟོ་རྩལ་ཞིག་ཡིན་པ་དང་དེས་མོན་པ་མི་རིགས་ཀྱི་བློ་གྲོས་མཚོན་པ་མ་ཟད། ས་གནས་དེ་གའི་རིག་གནས་ཀྱི་མཚོན་རྟགས་ཤིག་ཀྱང་རེད། སྒྲོལ་མས་སྤྱི་ཚོགས་ཀྱི་འཕོ་འགྱུར་དང་བསྟུན་ནས་གསར་གཏོད་རང་བཞིན་ལྡན་པའི་སྒོ་ནས་སྨྱུག་བཟོའི་རྒྱུན་འཛིན་དང་དར་སྤེལ་གྱི་ལས་ལ་གཞོལ་ཞིང་། 2020ལོར་མོན་པའི་སྨྱུག་བཟོ་གྲོང་ཁྱེར་རིམ་པའི་མངོན་མིན་རིག་གནས་ཤུལ་བཞག་ལ་བདམས། སྨྱུག་མའི་ཐོན་རྫས་འཕེལ་རྒྱས་ཀྱི་མདུན་ལམ་ཡངས་པ་དང་དཔལ་འབྱོར་གྱི་རིན་ཐང་ཆེན་པོ་ལྡན་པ་ཤེས་སྐབས། ཁོང་ལ་དགའ་བ་དང་སྤོབས་སེམས་དཔག་མེད་སྐྱེས།

འདི་ནི་མག་མང་མོན་པ་མི་རིགས་ཤང་གི་བཤམས་སྟོན་ཁང་གི་ཟུར་ཞིག་ཡིན་པ།

2015ལོར་ཁོ་མོའི་ནང་མི་བཞི་རི་ལྡེབས་ནས་མག་མང་སྐྱེ་ཁམས་ཤེས་དཔལ་འབྱོར་འབྲིང་དཔེ་སྟོན་གྲོང་ཚོར་སྤོས། སྒྲོལ་མའི་ཁྱིམ་གྱི་འཚོ་བ་ཡག་ཏུ་ཕྱིན་ནས་གཙང་ཞིང་དཀར་ཆ་དོད་པའི་ཐོག་སོ་ཉིས་ལྡན་གྱི་བོད་བཟོའི་སྡོད་ཁང་ཞིག་ཏུ་སྤོས། ཐོག་སོ་དང་པོར་ཚོང་ཁང་དང་ཐོག་སོ་གཉིས་པར་ཁྱིམ་ཚང་མགྲོན་ཁང་བཙུགས་ནས་ད་ཆ་ཁོང་འབབ་འཕར་ཕྱུག་འགྱུར་གྱི་སྣེ་ཁྲིད་པར་གྱུར་ཡོད། ཁོང་ནི་སྨྱུག་བཟོའི་རྒྱུན་འཛིན་པ་ཡིན་པ་མ་ཟད། ད་དུང་ཁོང་གིས་གྲོང་ཚོའི་བུད་མེད་ཀྲུའུ་རེན་གྱི་འགན་འཁུར་བཞིན་ཡོད། སྒྲོལ་མས“སྲོལ་རྒྱུན་རིག་གནས་གོང་འཕེལ་གཏོང་འདོད་པ་ནི་ངའི་ཕུགས་བསམ་ཡིན། མང་ཚོགས་ཀྱི་སྣེ་ཁྲིད་དེ་ཕྱུག་འགྱུར་གྱི་ལམ་བུར་སྐྱོད་དགོས་པ་ནི་ངའི་འགན་འཁྲི་རེད”ཅེས་ཡིད་ཆེས་དང་སེམས་ཤུགས་ཀྱིས་ཁེངས་བཞིན་དུ་བརྗོད།