འདི་ནི་གསར་འགོད་པས་ཚེ་རིང་ཆོས་སྒྲོན་ལ་བཅར་འདྲི་བྱེད་བཞིན་པ།

ཡངས་ཤིང་རྒྱ་ཆེ་བའི་གྲི་གུ་རྩྭ་ཐང་དང་གཡུ་ཡི་གཞོང་པ་ལྟར་གྱི་གྲི་གུ་མཚོའི་ལྟ་བས་མི་ངོམ་པའི་མཛེས་ལྗོངས་ལ་མྱོང་བཞིན་བཅར་འདྲི་ཚོགས་ཆུང་མཚོ་སྨད་རྫོང་དུ་འབྱོར། ལས་དོན་མི་སྣའི་སྣེ་ཁྲིད་འོག་ང་ཚོ་རླངས་འཁོར་ལ་བསྡད་དེ་ཉི་ཟེར་དྲོན་མོ་དང་འགྲོགས་ནས་སྤོས་དགའ་གྲོང་ཚོའི་ཕྱོགས་སུ་བསྐྱོད་དེ་ད་ཐེངས་ཀྱི་བཅར་འདྲི་བྱེད་འགོ་བརྩམས།

“ཨ་ཅག ཚོང་ཤག་གིས་མངགས་པའི་ཕོར་གདན་གྱི་ཚོས་གཞི་མ་ནོར་བ་གྱིས་ཨང་། ཨ་ཅག་བལ་འདི་ད་དུང་ཏོག་ཙམ་གསེད་དགོས་འདུག”ཅེས་ལས་མི་ཚོར་དོ་དོ་ནན་ནན་ངང་མངགས་བྱ་བྱེད་བཞིན་པའི་ངང་ཚུལ་མཐོང་བ་ཙམ་གྱིས་ཚེ་རིང་ཆོས་སྒྲོན་ནི་ལས་ཀར་དོ་དོ་ནན་ནན་བྱེད་མཁན་ཞིག་ཡིན་པ་གསལ་པོར་རྟོགས་ཐུབ། དེ་སྔ་ཁྱིམ་འཛིན་མ་དཀྱུས་མ་ཞིག་ནས་ལྷོ་ཁ་ཡིད་འོང་ཚོང་དོན་ཚད་ཡོད་ཀུང་སིའི་འགན་འཁུར་བའི་བར་ཚེ་རིང་ཆོས་སྒྲོན་གྱིས་དཀའ་བ་དང་དུ་བླངས་ནས་བུད་མེད་ཚོར་མིག་དཔེ་བཟང་པོ་བསྟན་ཡོད།

འདི་ནི་ཚེ་རིང་ཆོས་སྒྲོན་གྱིས་བརྩམས་ཆོས་ངོ་སྤྲོད་བྱེད་བཞིན་པ།

ལོ་དེ་དག་རིང་གྲོང་གསེབ་ལ་འཕོ་འགྱུར་ཆེན་པོ་བྱུང་ནས་ཡུལ་མི་མང་པོས་དྲ་ཐོག་ནས་ཅ་ལག་ཉོ་བར་དགའ་པོ་བྱེད་ཀྱི་ཡོད་ཀྱང་ཡུལ་མི་མང་པོ་ཞིག་གིས་དྲ་བ་སྤྱོད་མི་ཤེས་པས་དྲ་ཐོག་ནས་ཅ་དངོས་ཉོ་བར་དགའ་བའི་ཚེ་རིང་ཆོས་སྒྲོན་བཙལ་ནས་རོགས་པ་བྱེད་རོགས་ཟེར་གྱི་ཡོད། དེ་ལས་ཁོང་ལ་དྲ་ཐོག་ཚོང་ཁང་འཛུགས་པའི་བསམ་བློ་འཁོར། ཁོང་གིས་ཐའོ་པའོ་རུ་ཚོང་ཁང་ཐོ་འགོད་བྱས་ཏེ་ཕ་ཡུལ་གྱི་ཁྱད་ལྡན་ཐོན་རྫས་བཙོངས་པར་བྲིན་ཁ་རྒྱུག་པོ་བྱུང་ཡོད། ཡིན་ནའང་ཚང་མ་བསམ་ཡུལ་ལས་འདས་པ་ཞིག་ལ་ཁོང་གིས་སྒེར་གྱི་ཁེ་ཕན་ཁོ་ན་དོན་དུ་གཉེར་ནས་མ་བསྡད་པར་སྐྱེ་ས་འཚར་སའི་ཕ་ཡུལ་དུ་གཡང་དཀར་ལུག་མང་བ་དང་ཆུང་དུས་ནས་བལ་ལས་ལ་རྒྱུས་མངའ་ངེས་ཅན་ཡོད་པས། རི་མོའི་སྒྱུ་རྩལ་འདི་དག་འཐག་ལས་སྒྱུ་རྩལ་གྱི་སྟེང་ནས་མཚོན་པར་བྱེད་པའི་ཕུགས་བསམ་གྱི་མྱུ་གུ་འབུས།

འདི་ནི་ལས་མིས་ཐགས་འཐག་བཞིན་པ།

རྟ་ཕོར་རྒྱུག་ཤེད་ཡོད་ན། བྱང་ཐང་སྟོང་པ་རེད་ཅེས་པའི་དཔེ་ལྟར། 2018ལོར་ཁོང་གིས་ལུག་ཆུང་ཚོང་རྟགས་ཐོ་འགོད་བྱས་ཏེ་ལས་གཏོད་ཀྱི་ལམ་བུར་ཞུགས། གཞན་ལ་རོགས་རམ་བྱེད་པར་དགའ་བ་དང་འཐག་ལས་ལའང་རྒྱུས་མངའ་ཡོད་པའི་ཚེ་རིང་ཆོས་སྒྲོན་གྱིས་ཕ་ཡུལ་གྱི་ཐོན་ལས་འཕེལ་རྒྱས་གཏོང་ཞོར་དུ་ཕྱིར་གླ་པར་འགྲོ་མ་ཐུབ་པའི་བུད་མེད་ངལ་རྩོལ་པར་ཞིང་ཞོར་གྱི་ཡོང་འབབ་ཕྲན་ཙམ་རག་ཐུབ་ན་ཅི་མ་རུང་སྙམ་པའི་སྐུལ་སློང་འོག ཀུང་སི་ཞིག་འཛུགས་པའི་འདུན་པ་དྲག་པོ་སྐྱེས། ཚེ་རིང་ཆོས་སྒྲོན་ནི་བསམ་ཕོད་པ་དང་། སྒྲུབ་ཕོད་པའི་བུད་མེད་འཇོན་ཐང་ཅན་ཞིག་ཡིན་པས། ཟླ་ཤས་འཆར་འགོད་ཀྱི་གྲ་སྒྲིག་ལས་ཀ་བྱས་མཐར། 2021ལོར་ལྷོ་ཁ་ཡིད་འོང་ཚོང་དོན་ཚད་ཡོད་ཀུང་སི་བཙུགས། ཀུང་སི་བཙུགས་པའི་དུས་འགོར་ཁོང་གིས་ཁྱིམ་ཚང་རེ་རེ་བཞིན་ལ་བསྐྱོད་དེ་རང་གི་བསམ་ཚུལ་བརྗོད་ནས་ཡུལ་མི་ཚོར་དེའི་ནང་ཞུགས་པའི་དགེ་མཚན་ཞིབ་པར་བརྗོད་མོད། འོན་ཀྱང་དང་ལེན་བྱེད་མཁན་ཉུང་ཤས་ལས་བྱུང་མེད་ལ་རྒྱབ་སྐྱོར་བྱེད་མཁན་དེ་བས་ཀྱང་བྱུང་མེད། “སྐབས་དེ་དུས་ལས་མི་བཞི་ལས་མེད། ང་རང་གཅིག་པུས་ཀུང་སི་གཉེར་སྐྱོང་གི་འགན་ཆ་ཚང་འཁུར་དགོས་པས་དཀའ་ལས་ཆེན་པོ་བྱུང”ཞེས་ཚེ་རིང་ཆོས་སྒྲོན་གྱིས་སྔར་སོང་གི་ལོ་ཟླར་ཕྱིར་དྲན་བྱེད་བཞིན་བརྗོད།

འདི་ནི་ལས་མིས་བལ་གསེད་བཞིན་པ།

ཕུགས་འདུན་དོན་དུ་གཉེར་བའི་ལམ་དུ་སེམས་ཁྲལ་དང་། བློ་ཕམ། ཐ་ན་ཡི་ཆད་སོགས་ཡོང་སྲིད་མོད། ཕུགས་འདུན་དང་ཐག་ཇེ་ཉེར་འགྲོ་བའི་དགའ་བ་དེ་ཐམས་ཅད་ལས་ལྷག་པ་ཡོད། ཁོང་གི་སྙིང་རུས་དང་འབད་བརྩོན་འོག་དེ་སྔ་ལས་མི་4ལས་མེད་པའི་ཀུང་སི་དེ་ད་ཆ་འཕེལ་རྒྱས་གང་འཚམ་ཕྱིན་ནས་ལས་མི་15ཙམ་ཡོད་པ་དང་ཐོན་རྫས་རྒྱལ་ནང་གི་ས་ཆ་གང་སར་བྲིན་ཁ་རྒྱུག་པོ་བྱུང་ནས་ལོ་རེར་ཡོང་འབབ་སྒོར་ཁྲི་30ཙམ་ཟིན་གྱི་ཡོད། ཀུང་སིར་སྔ་རྗེས་སུ“སའི་གོ་ལའི་སྣེ་གསུམ་པའི་བོད་ཀྱི་ཕྱག་རྟགས”ཀྱི་ཡུལ་སྐོར་རིག་གནས་གསར་གཏོད་ཀྱི་སྟོབས་ཤུགས་ལྡན་ཤོས་ཀྱི་བྱ་དགའ་དང་། སྣེ་གདོང་ཆུས་ཀྱི་ལས་གཏོད་འགྲན་བསྡུར་གྱི་བྱ་དགའ་ཨང་གསུམ་པ་སོགས་ཐོབ་མྱོང་ཡོད། བསམ་ཕོད་པ་དང་སྒྲུབ་ཕོད་པའི་བུད་མེད་ཁོང་གིས་མིག་མདུན་གྱི་གྲུབ་འབྲས་ལ་ཡིད་ཚིམ་ནས་མ་བསྡད་པར་སྐོམ་པ་ཆུ་འདོད་བཞིན་ཆིང་ཧྭ་སློབ་ཆེན་གྱི་མཛེས་རྩལ་སློབ་གླིང་དུ་རི་མོའི་སྒྱུ་རྩལ་གྱི་ཉིང་བཅུད་ལེན་པར་བསྐྱོད། ད་དུང་རང་སྒེར་གྱིས་སློབ་ཡོན་སྤྲད་ནས་གསོ་སྦྱོང་སྣ་ཚོགས་ལ་ཐེངས་མང་ཞུགས་མྱོང་བ་མ་ཟད་ཉམས་མྱོང་ཡང་མང་པོ་ཐོབ་ཡོད།

འདི་ནི་སྣ་མང་ཕུན་ཚོགས་ཀྱི་བལ་གྱི་ཐོན་རྫས་ཡིན་པ།

བཅར་འདྲི་ཚོགས་ཆུང་བཟོ་ཁང་དུ་སྐྱོད་སྐབས། ཐགས་ཁྲིའི་སྒྲ“ཙིར་ཙིར”དུ་གྲགས། བལ་གསེད་པ་དང་། ཚོས་རྒྱག་པ། སྐེམ་པ། འཁེལ་བ་སོགས་ལས་མི་རྣམས་ལས་བྲེལ་ཆེ་བའི་རྣམ་པ་མཐོང་རྒྱུ་ཡོད། ལོ་ངོ་བརྒྱ་ཕྲག་ཁ་ཤས་ཀྱི་ལོ་རྒྱུས་ལྡན་པའི་ཕྱིང་པའི་ལག་རྩལ་དེ་སྣམ་བུའི་ལག་རྩལ་སོགས་ལས་བེད་སྤྱོད་དང་ཁྱབ་གདལ་གཏོང་སྔ་བ་དང་དེ་ལ་འཇམ་པོ་དང་། བསིལ་བ། ཡང་བ། བདེ་བ་སོགས་ཀྱི་ཁྱད་ཆོས་ལྡན་པ་མ་ཟད། ད་དུང་རྒྱུ་སྤུས་དག་ལ་ལག་རྩལ་ཁྱད་དུ་འཕགས་པས་མི་རྣམས་ཀྱིས་ཧ་ཅང་དགའ་པོ་བྱེད་ཀྱི་ཡོད། “རྩི་ཤིང་གི་ཚོས་རྒྱུ་བརྒྱབ་པའི་སྐེ་དཀྲིས་ལ་མཚོན་ན་གཟུགས་པོར་མི་གནོད་པ་དང་སྤུས་དག་ལ་དུས་ཚོད་ཇི་ཙམ་རིང་བ་སོང་ན་དེ་ཙམ་གྱིས་ཚོས་གཞི་སྣུམ་དུ་འགྲོ་བ་དང་ལྟ་སྣང་ཡང་དོད་དུ་འགྲོ་བའི་ཁྱད་ཆོས་ལྡན་ཡོད”ཅེས་ཚེ་རིང་ཆོས་སྒྲོན་གྱིས་ངོ་སྤྲོད་བྱས།

མ་འོངས་པའི་སྐོར་གླེང་སྐབས་ཚེ་རིང་ཆོས་སྒྲོན་གྱིས“དཀའ་བའི་ལས་ཤིག་མ་བྱས་ན། ཞིམ་པའི་ཟས་ཤིག་ག་ནས་རག ཡུལ་མི་དེ་བས་མང་བ་ཐག་ཉེ་ས་དང་སྟབས་བདེ་སར་ལས་ཞུགས་ཐུབ་པ་མཐོང་སྐབས་དགའ་ཚོར་ཆེན་པོ་སྐྱེ་གི་འདུག་ལ། ང་རང་གིས་དཀའ་ལས་རྒྱག་རིན་ཆོག་འདུག་བསམ་གྱི་འདུག ངས་མུ་མཐུད་ཀུང་སི་རྒྱ་སྟོབས་ཆེ་རུ་བཏང་ནས་ཡུལ་མིར་ཕན་པ་དེ་བས་མང་བ་འདོགས་ཐུབ་པའི་སེམས་ཤུགས་ཡོད”ཅེས་གདེང་ཚོད་ཀྱིས་ཁེངས་བཞིན་བརྗོད།