༄༅།།སྨོན་ཚིག་སེམས་ཀྱི་རང་སྒྲ།
ལོ་ཡི་བགྲང་བྱ་དྲུག་ལ། །
ཤེས་རིག་མེ་ཏོག་བཏུས་ཡོད། །
གཡུར་ཟའི་གྲུབ་འབྲས་ཐོབ་པའི། །
བཀྲ་ཤིས་སྨོན་ལམ་བཏབ་ཡོད། །
ལོ་ཆུང་བྱིས་པའི་འཛུམ་མདངས། །
དགའ་བའི་གདོང་ལ་བསུས་ནས། །
གཏམ་བཟང་འབྲུག་སྒྲ་སྙན་པོ། །
རེ་ཞིང་བསྒུགས་ནས་བསྡད་ཡོད། །
དྲིན་ཅན་ཕ་མ་བཟང་པོས། །
རེ་བ་སྟོང་ཕྲག་བཅོལ་ཡོད། །
ཨ་མའི་སྙིང་གི་ནོར་བུ། །
གཏམ་བཟང་ཁྱེར་ནས་ལོག་ཤོག །
དུང་བའི་གྲོགས་པོ་གྲོགས་མོས། །
སྨོན་ལམ་སྟོང་ཕྲག་བཏབ་ཡོད། །
བརྒྱ་འདུས་སྟོང་འཛོམས་ཁྲོད་ནས། །
དཔའ་རྩལ་ངོམས་ནས་འཕུར་ཤོག །
གངས་ལྗོངས་ཤེས་རིག་བདག་པོ། །
ན་ཆུང་ཁྱེད་ཚོ་ལོས་ཡིན། །
གངས་ལྗོངས་འཕེལ་རྒྱས་ཆེད་དུ། །
ནམ་ཡང་ཤེས་བྱར་འབུངས་རོགས། །
ཡིག་རྒྱུགས་ཛ་དྲག་ཆེ་ཡང་། །
སེམས་འཚབ་ཡེ་ནས་མ་བྱེད། །
བརྩོན་པས་དཀའ་བ་སྤྱད་ན། །
གཡུར་ཟའི་འབྲས་བུ་ལོས་ལེན། །
ཞོགས་པའི་ཉི་གཞོན་འདྲ་བའི། །
ལོ་ཆུང་བྱིས་པའི་ཚོགས་རྣམས། །
ཤེས་རིག་སྦྲང་རྩི་འཐུང་བཞིན། །
ལང་ཚོའི་ཁོ་ལག་རྒྱས་ཤོག །
ཡིག་རྒྱུགས་ཡིག་རྒྱུགས་ཟེར་ཡང་། །
སྦྱངས་འབྲས་གཅིག་པུ་མ་རེད། །
ཕ་མའི་རེ་འདོད་ཡོད་ཚད། །
འགྲུབ་པའི་ཤུགས་ཤིག་རྒྱག་རོགས། །
ཕ་མ་དགའ་པོ་བྱུང་ན། །
ཕ་མའི་དྲིན་ལན་འདི་རེད། །
ཕ་མའི་གཅེས་ཕྲུག་རྣམ་པས། །
དྲིན་བྱས་དྲིན་དུ་སོམས་ཤིག །
མཆོད་ཆང་སྦྲང་རྩིའི་ཉིང་ཁུ། །
ཁྱེད་ཚོར་བཏེགས་ནས་སྒུག་ཡོད། །
མ་འོངས་ལོ་ཟླའི་ནང་ལ། །
ཡ་རབས་སྤྱོད་བཟང་མ་འདོར། །
ང་རང་དགེ་རྒན་ཞིག་གི །
མིང་བྱང་འཁུར་བ་ཡིན་ཙང་། །
སེམས་པའི་བར་སྣང་དབྱིངས་ནས། །
སེམས་ཁྲལ་མང་པོ་ལོས་ཡོད། །
སྨོན་ཚིག་སེམས་ཀྱི་རི་མོ། །
མ་བྲིས་ལག་ནས་ཐལ་སོང་། །
ཅི་བསམ་ལྷུན་གྱིས་གྲུབ་ན། །
བུ་ངའི་བསམ་དོན་འདི་ཡིན། །