ཉིན་ཤས་བསྟུད་མར། རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་སུ་ཕེབས་ནས་རྒྱུན་གཏན་གྱི་གཞུང་ལས་གནང་བ་དང་སྦྲགས་ལྷ་སར་སྤྱི་ཚོགས་དང་ཆོས་ཕྱོགས་ཀྱི་མཛད་སྒོའང་བསྐྱངས་གནང་བ་རེད།

ཟླ་6ཚེས་27ཉིན། པཎ་ཆེན་རིན་པོ་ཆེ་དང་ལྷ་ས་གྲོང་ཁྱེར་བོད་བརྒྱུད་ནང་བསྟན་ལས་རིགས་ཀྱིས“ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་། ‘འདུ་ཤེས་གསུམ’ལག་བསྟར། ཕུགས་འདུན་མཉམ་དུ་གཏོད་དེ་ཏང་གི་རྗེས་སུ་འབྲང་བའི”བརྗོད་དོན་གཙོ་བོར་དམིགས་ནས་བཞུགས་མོལ་གཏིང་ཟབ་གནང་ཞིང་། པཎ་ཆེན་རིན་པོ་ཆེས་ལྷ་ས་གྲོང་ཁྱེར་བོད་བརྒྱུད་ནང་བསྟན་ལས་རིགས་ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་དང“འདུ་ཤེས་གསུམ”གྱི་སློབ་གསོ་ཏན་ཏིག་སྤེལ་ནས་བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་།

(པར་ངོས་བཞི་པར་གཟིགས)(པར་ངོས་དང་པོར་མཐུད) ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་ལས་ཀའི་ཕན་འབྲས་ལ་ཁས་ལེན་གནང་བ་མ་ཟད། ལྷ་ས་གྲོང་ཁྱེར་གྱི་རྒྱ་ཆེའི་གྲྭ་བཙུན་རྣམས་ལ་ཆབ་སྲིད་ཀྱི་ལངས་ཕྱོགས་བརྟན་པོ་སྲུང་བ་དང་། རྒྱལ་གཅེས་ཆོས་གཅེས་ཀྱི་དར་ཆ་མཐོན་པོར་སྒྲེང་བ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྲོག་ཤིང་གནས་བབ་ལ་བློ་བརྟན་འགྱུར་མེད་ངང་བརྩི་བཀུར་དང་སྲུང་སྐྱོང་བྱས་ཏེ། ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་བསམ་པའི་རང་རྟོགས་དང་། ཆབ་སྲིད་ཀྱི་རང་རྟོགས། བྱ་སྤྱོད་ཀྱི་རང་རྟོགས་བཅས་ཆེ་རུ་ཏན་ཏིག་གཏོང་དགོས་པ་དང་། ནང་ཆོས་ཀྱི་བསྟན་དོན་ལ་ཞིབ་འཇུག་དང་བོད་བརྒྱུད་ནང་བསྟན་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས་བྱས་ཏེ་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དུས་རབས་གསར་པ་དང་འཚམ་མཐུན་ཡོང་བར་སྐུལ་འདེད་གཏོང་དགོས། ནུས་པ་ཧུར་ཐག་བཏོན་ཏེ“དོན་ཆེན་བཞིར”དམིགས་པ་དང་། “འཛུགས་གཏོད་བཞིར”ཤུགས་སྣོན། “འདུ་ཤེས་གསུམ”བརྟན་པོར་འཛུགས་པ་བཅས་བྱས་ནས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རང་ནུས་སྐྱེས་སུ་འབུལ་དགོས་ཞེས་ལྕག་སྐུལ་གནང་བ་རེད།

ཟླ་6ཚེས་28ཉིན་པཎ་ཆེན་རིན་པོ་ཆེས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་བྱེད་པའི་ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་བཞུགས་མོལ་ཚོགས་འདུ་གཙོ་སྐྱོང་གནང་སྐབས་རྒྱ་ཆེའི་གྲྭ་བཙུན་རྣམས་ཀྱིས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ཏེ་བྱ་སྤྱོད་ངོ་མར་བརྟེན་ནས་ཏང་ལ་བློ་དཀར་སེམས་དཀར་བྱས་ཏེ་སྔར་བས་རང་རྟོགས་ཀྱི་སྒོ་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྲོག་ཤིང་གི་གནས་བབ་ལ་བརྩི་བཀུར་དང་སྲུང་སྐྱོང་བྱེད་དགོས་པའི་ནན་བཤད་གནང་བ་རེད།

ཟླ་7ཚེས་6ཉིན་པཎ་ཆེན་རིན་པོ་ཆེས་ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོའི་གཞུང་ལས་ཚོགས་འདུ་ཐེངས་གསུམ་པ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནང་སོག་ཏུ་གཟིགས་ཞིབ་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་དང་། ཧྲུའུ་ཅི་ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་ཀྱི་འདུ་ཤེས་འཛིན་སྟངས་ལས་དོན་འགོ་ཁྲིད་ཚོགས་ཆུང་གི་ཚོགས་འདུའི་ཐོག་གནང་བའི་གསུང་བཤད་ཀྱི་དགོངས་དོན་སློབ་སྦྱོང་དང་བརྒྱུད་བསྒྲགས་གནང་བ་རེད། ཚོགས་འདུས་ཀྲུང་གོ་ནང་བསྟན་མཐུན་ཚོགས་སྐབས་བཅུ་གཅིག་པའི་ལས་འཛིན་ལྷན་ཚོགས་ཀྱི་ཚོགས་འདུའི་ཐོག་གི་ལས་དོན་སྙན་སྒྲོན་དང་། བོད་བརྒྱུད་ནང་བསྟན་གྱི་དཔེ་ཁྲིད་དགོངས་འགྲེལ་སྤེལ་རེས་ཚོགས་འདུ་སྐབས་བརྒྱད་པའི་འཆད་འགྲེལ་བའི་གྲོས་འགོའི་མིང་ཐོ། བོད་བརྒྱུད་ནང་བསྟན་གྱི་རྒྱལ་གཅེས་གཏམ་རྒྱུད་བཞུགས་མོལ་ཚོགས་འདུའི་སྒྲོག་འགྲེལ་བའི་གྲོས་འགོའི་མིང་ཐོ། བོད་བརྒྱུད་ནང་བསྟན་གྱི་དཔེ་ཁྲིད་དགོངས་འགྲེལ་སྤེལ་རེས་ཚོགས་འདུ་སྐབས་བརྒྱད་པའི་ནང་བསྟན་གྱི་དཔེ་ཁྲིད་དགོངས་འགྲེལ་གྱི་ཕུལ་བྱུང་དཔྱད་རྩོམ་དང་སྔོན་ཐོན་ལས་བྱེད་པར་གཟེངས་བསྟོད་བྱ་རྒྱུའི་གཏན་འབེབས་བཅས་ལ་ཞིབ་འཇུག་བྱས་ནས་གྲོས་འཆམ་བྱུང་བ་རེད།

དེའི་རིང་། པཎ་ཆེན་རིན་པོ་ཆེས་བོད་ལྗོངས་ནང་བསྟན་སློབ་གླིང་ལ་དཔལ་རྡོ་རྗེ་འཇིགས་བྱེད་ཀྱི་དབང་བསྐུར་གནང་བ་རེད།