སྨྱུག་སོན་ནོར་སངས་ཀྱི་སྙན་ངག་ཁག་གསུམ།
༄༅།།ལྷ་གསོན་པོ།
ཕ་མ་ལ་མཇལ་ཁ་ཞུས་དང་།
ལྷ་གསོན་པོ་རེད།
ཕ་མ་ལ་ཞལ་ཟས་ཕུལ་དང་།
ལྷ་གསོན་པོ་རེད།
ཕ་མ་ལ་ན་བཟའ་སྒྲོན་ཅིག
ལྷ་གསོན་པོ་རེད།
ཕ་མ་ལ་སྙིང་གཏམ་གསུངས་ཤིག
ལྷ་གསོན་པོ་རེད།
ཕ་མ་ལ་དད་ཞེན་གནང་དང་།
ལྷ་གསོན་པོ་རེད།
ཕ་མ་ཡི་བཀའ་སློབ་ཉོན་དང་།
བདུད་རྩི་རེད།
ཕ་མ་ཡི་ཞལ་རས་ལ་གཟིགས་དང་།
བསོད་ནམས་རེད།
ཕ་མ།
དུས་གསུམ་གྱི་ལྷ་གསོན་པོ།
ཕ་མ།
དུས་གསུམ་གྱི་སྐར་མ་འོད་ཆེན།
ཕ་མ།
དུས་གསུམ་གྱི་མར་མེ་ཚེ་འབར།
༄༅།།འབབ་ཚུགས་འདིར་འབྱོར་དུས།
འབབ་ཚུགས་འདིར་འབྱོར་དུས།
དཀར་པོ་གངས་ཀྱི་རང་མདངས་མཐོང་བྱུང་།
མེས་པོ་དམ་པའི་ཞལ་གདམས་སྙན་བྱུང་།
འབབ་ཚུགས་འདིར་འབྱོར་དུས།
ལ་རྒྱ་ཅན་གྱི་མི་བུ་དྲན་བྱུང་།
གཡོ་བ་མེད་པའི་དམ་ཚིག་དྲན་བྱུང་།
འབབ་ཚུགས་འདིར་འབྱོར་དུས།
ལམ་གྱི་ཁ་ཆར་སེམས་ནས་དྲན་བྱུང་།
ཁ་ཆར་ཁྲོད་ཀྱི་བུ་ཡུག་དྲན་བྱུང་།
འབབ་ཚུགས་འདིར་འབྱོར་དུས།
སྙན་ངག་ཅིག་གི་མཚོན་དོན་དྲན་བྱུང་།
མཚོན་དོན་གསེབ་ཀྱི་རྒྱབ་ལྗོངས་དྲན་བྱུང་།
འབབ་ཚུགས་འདིར་འབྱོར་དུས།
མི་རྟག་སྒྱུ་མའི་རང་ཞལ་མཐོང་བྱུང་།
རང་ཞལ་གང་དེའི་མཛེས་སྡུག་མཐོང་བྱུང་།
འབབ་ཚུགས་འདིར་འབྱོར་དུས།
སེམས་ཀྱི་ངོ་བོ་སེམས་ཀྱིས་རིག་བྱུང་།
ངོ་བོར་ཐིམ་པའི་ཁ་དོག་རིག་བྱུང་།
འབབ་ཚུགས་འདིར་འབྱོར་དུས།
ལམ་གྱི་རིང་ཐུང་སེམས་ཀྱིས་འཇལ་ཡོད།
ལམ་གྱི་རིང་ཐུང་གོམ་པས་འཇལ་ཡོད།
༄༅།།གྲི་གུ་མཚོ། ཡང་ན་དྭངས་ར་གཡུ་མཚོ།
སྤྲིན་དཀར་གྱི་དར་ཤམ་འོག་ན།
སྔོ་ལྟེམ་མེར་འཁྱིལ་བའི་གྲི་གུ་མཚོ།
ཡང་ན་དྭངས་ར་གཡུ་མཚོ།
ངའི་བློ་ཁ་ཁྱེད་ཕྱོགས་ལ་བསྲིངས་ཡོད།
དྭངས་གཙང་། མཛེས་སྡུག ལྷིང་འཇགས།
ཁྱེད་ཀྱིས་ང་ལ་གནང་བའི་ལེགས་སྐྱེས་
རྩ་ཆེན་ཞིག
ངས་ཁྱེད་ཀྱི་དྭངས་གཙང་ལ་བློ་ཁ་གཏད།
ངས་ཁྱེད་ཀྱི་མཛེས་སྡུག་ལ་མྱོང་རོལ་བྱས།
ངས་ཁྱེད་ཀྱི་ལྷིང་འཇགས་ལ་རྣ་བ་བླགས།
ཚོར་བ་དེ་ཅི་འདྲའི་སྐྱིད་པ་ལ་ཨང་།
ངས་ཁྱེད་ཀྱི་མིང་ནས་ཡང་ཡང་འབོད།
ངས་ཁྱེད་ཀྱི་ད་ལྟ་ལ་བསམ་བློ་བཏང་།
ངས་ཁྱེད་ཀྱི་མ་འོངས་ལ་འཆར་གཞི་བཟོས།
ཚོར་བ་འདི་ཅི་འདྲའི་སྐྱིད་པ་ལ་ཨང་།
ཨ་སྔོན་གྱི་གུར་ཁང་འོག་ན།
སྔོ་ལྟེམ་མེར་འཁྱིལ་བའི་གྲི་གུ་མཚོ།
ཡང་ན་དྭངས་ར་གཡུ་མཚོ།
ངའི་གླུ་ཆུང་ཁྱེད་ཕྱོགས་ལ་བླངས་ཡོད།
གུ་ཡངས། བློ་གཤོག དམ་ཚིག
ཁྱེད་ཀྱིས་ང་ལ་གནང་བའི་ལེགས་སྐྱེས་
རྩ་ཆེན་ཞིག
ངས་ཁྱེད་ཀྱི་གུ་ཡངས་ལ་སྨོན་ཚིག་གཏོར།
ངས་ཁྱེད་ཀྱི་བློ་གཤོག་ལ་གོང་བཀུར་ཞུས།
ངས་ཁྱེད་ཀྱི་དམ་ཚིག་ལ་ལྕགས་ཕུར་བཏབ།
ཚོར་བ་འདི་ཅི་འདྲའི་སྐྱིད་པ་ལ་ཨང་།
ངས་ཁྱེད་ཀྱི་རང་དབང་ལ་གད་རྒྱངས་སྒྲོག
ངས་ཁྱེད་ཀྱི་ཟབ་ཚད་ལ་བློས་བསླངས་བྱས།
ངས་ཁྱེད་ཀྱི་འབྱུང་འགྱུར་ལ་རི་མོ་བྲིས།
ཚོར་བ་འདི་ཅི་འདྲའི་སྐྱིད་པ་ལ་ཨང་།