བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་འཛུགས་མཁན་ཀོན་ཀྲང་བཀྲ་ཤིས་ཕུན་ཚོགས།

བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་གི་ཕྱིའི་བཀོད་པ།

བོད་ས་གནས་ཀྱི་དངུལ་ཊམ་གྱི་པར་གཞི།

བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་གི་ནང་ངོས་བཀོད་པ།

བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་གི་བོད་ས་གནས་ཀྱི་དངུལ་ཊམ་དབྱིབས་ཀྱི་མཛེས་ཆས།

དབྱར་དུས་སུ་ལྷ་ས་གྲོང་ཁྱེར་དོག་སྡེ་རོང་དངུལ་དཔར་གྲོང་ཚོའི་གང་སར་སྐྱེ་སྟོབས་ཀྱི་དཔལ་འབར་བཞིན་མཆིས། ཟླ་5ཚེས་18ཉིན་རྒྱལ་སྤྱིའི་རྟེན་མཛོད་ཁང་གི་ཉིན་མོ་ཐེངས་47པར་བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་དངོས་སུ་སྒོ་ཕྱེ་བ་རེད།

བོད་ལྗོངས་དོག་སྡེ་དངུལ་ལོར་བཤམས་སྟོན་ཁང་གནས་སའི་དངུལ་དཔར་གྲོང་ཚོ་ནི་ལོ་ངོ་བརྒྱའི་གོང་གི“དོག་སྡེ་དངུལ་ལོར་བཟོ་གྲྭ”དེ་གར་ཆགས་པ་ལས་མིང་དེ་ལྟར་ཐོགས་པ་རེད། དམངས་གཉེར་རྟེན་མཛོད་ཁང་དེར་བཀྲ་ཤིས་ཕུན་ཚོགས་ཀྱིས་ལོ་མང་རིང་ཉར་ཚགས་བྱས་པའི་དངུལ་ཊམ་དང་མི་སྒེར་གྱི་ཉར་ཚགས་དངོས་པོ་སྣ་ཚོགས་འགྲེམས་སྟོན་བྱས་པ་ལས་ཁོང་གི་ལས་གཏོད་ཀྱི་ཧུར་སེམས་ཆེན་པོ་གང་ལེགས་མཚོན་ཐུབ།

ཀ ཁྱིམ་བརྒྱུད་ཀྱི་དངུལ་ཊམ་རྒྱུན་འཛིན་བྱས་ནས་ཉར་ཚཌ་པ་ཞིག་ལ་གྱུར།

བཀྲ་ཤིས་ཕུན་ཚོགས་ལོ་60ཙམ་ལ་སླེབས་ཀྱི་ཡོད་ཀྱང་། ཁོང་རིག་པ་གསལ་བ་དང་། ལས་ཀ་བྱེད་སེམས་ཆེ་བ། གྲུང་ཤ་དོད་པ་ཞིག་ཡོད།

བཀྲ་ཤིས་ཕུན་ཚོགས་ཆུང་བྱིས་པའི་དུས་སུ་ལྷོ་ཁ་གྲོང་ཁྱེར་གོང་དཀར་རྫོང་ཁྲ་ཁོག་ཤང་དུ་འཚོ་བ་སྐྱེལ་མྱོང་ཞིང་། ཁོང་གི་པཱ་ལགས་ནི་བོད་རྙིང་པའི་སྐབས་སུ་ས་གནས་དེ་གའི་ཁྱིམ་ཚང་ཆེན་པོ་ཞིག་གི་མི་ཡིན་པས་ཁྱིམ་དུ་ཅ་དངོས་རྙིང་པ་མང་པོ་ཡོད། ད་ཆ་བང་ཁྲིའི་ནང་དུ་བསྒྲིགས་པའི་ཁྲ་ཆེམ་ཆེམ་གྱི་དངུལ་ཊམ་ལ་ལྟ་བཞིན་དུ་བཀྲ་ཤིས་ཕུན་ཚོགས་ཀྱིས“བྱིས་པའི་དུས་སུ་དངོས་ཟོག་དཀོན་པོ་ཡོད། སྤྱོད་གོ་དེ་ཙམ་མེད་པའི་དངོས་པོ་འདི་དག་ཕ་ཡུལ་གྱི་ཁང་པ་རྙིང་པར་རྩྭ་རས་ཀྱི་ནང་དུ་བླུགས་ནས་དོ་སྣང་བྱེད་མཁན་དེ་ཙམ་བྱུང་མེད”ཅེས་བསམ་བློ་གཏོང་བཞིན་དུ་བཤད། “ལོ་18ལ་སླེབས་སྐབས་དམག་མིར་ཞུགས་པ་དང་དེ་ནས་ལྷ་སར་ལས་ཀར་ཞུགས་རྗེས། ཁྱིམ་གྱི་རྒན་རབས་ཚོས་གཞི་ནས་ཅ་དངོས་རྙིང་པ་འདི་དག་ཁྱིམ་བརྒྱུད་ནོར་བུར་བརྩིས་ནས་ཕྲུ་གུ་ཚོར་བགོ་བཤ་བརྒྱབ་པ་རེད”ཅེས་ཁོང་གིས་ཕྱིར་དྲན་བྱས་ནས་བཤད།

ཕ་མ་གཉིས་པོས་ཁྱིམ་བརྒྱུད་ནོར་བུ་འདི་དག་བགོ་བཤའ་རྒྱག་སྐབས། ཕྲུ་གུ་ཚོའི་བསམ་འཆར་ཉན་ཡོད། སྐབས་དེ་དུས་དམག་དཔུང་ལ་ཞུགས་པའི་བཀྲ་ཤིས་ཕུན་ཚོགས་ཀྱི་འཚོ་བའི་ཆ་རྐྱེན་ཅུང་ཡག་པོ་ཡོད་སྟབས། “སྤྱོད་གོ་དེ་ཙམ་ཆེན་པོ་མེད་པའི”དངུལ་ཊམ་རྙིང་པ་དག་ཁོང་ལ་བཞག་པ་རེད། “ཕ་མས་བཞག་པའི་དངུལ་ཊམ་ཆིག་སྟོང་ལྷག་ཙམ་ལག་ཏུ་རག་སྐབས། རང་ཉིད་ལ་དངུལ་ལག་ཐོགས་ཀྱང་། དེ་དག་བཙོངས་ནས་དངུལ་སྨར་ལ་བརྗེ་བའི་བསམ་བློ་གཏོང་མྱོང་མེད། མི་གཞན་གྱིས་དངུལ་ཊམ་དེ་དག་འཚོང་བའི་གྲོས་འགོ་ཡང་ཡང་བཏོན་ཀྱང་། བཀྲ་ཤིས་ཕུན་ཚོགས་ཀྱིས་དངུལ་ཊམ་དེ་དག་ཉར་ཚགས་བྱེད་པའི་ཆོད་སེམས་ལ་འགྱུར་བ་སྤུ་ཙམ་ཡང་གཏོང་མྱོང་མེད།

བཀྲ་ཤིས་ཕུན་ཚོགས་ཀྱིས་ཁོམ་པ་ཡོད་རིམ་བཞིན་དངུལ་ཊམ་དེ་དག་ལ་ཞིབ་འཇུག་བྱས་ནས་རིམ་གྱིས་རིག་གནས་སྒྱུ་རྩལ་གྱི་བརྩམས་ཆོས་ཉར་ཚགས་བྱེད་པའི་སྤྲོ་སྣང་འཕེལ་ཡོད།

ཁྱིམ་བརྒྱུད་དངུལ་ཊམ་རྒྱུན་འཛིན་དང་ཉར་ཚགས་བྱས་པ་ཕུད། བཀྲ་ཤིས་ཕུན་ཚོགས་ཁྱིམ་གྱི་ཁང་པ་དང་བར་ཁྱམས་བཅས་ས་ཆ་སྟོང་པར་བཞུ་མར་དང་ཤིང་ཕོར་སོགས་ཀྱི་ཅ་དངོས་ཆུང་ཙག་དང་། ཀོ་སྒམ་དང་ཤིང་སྒམ་སོགས་ལོ་རབས་མི་འདྲ་བའི་དངོས་པོ་རྙིང་པ་བཞག་ནས་ཁོང་གི་སྡོད་ཁང་བཤམས་སྟོན་ཁང་ཆུང་གྲས་ཤིག་དང་གཉིས་སུ་མ་མཆིས། ཁོང་གིས་ང་ས་ཆ་གཞན་དུ་འགྲོ་རིམ་བཞིན་དངོས་པོ་རྙིང་པ་ཉོ་གི་ཡོད། དེ་དག་ཕྱེད་ཀ་ངོ་མ་དང་ཕྱེད་ཀ་རྫུན་མ་ཡིན་སྲིད། འོན་ཀྱང་བློ་ལ་བབས་ཚེ་ཉོ་རྐྱང་བྱེད་ཀྱི་ཡོད་ཅེས་སྦ་གསང་མེད་པར་བཤད།

ཕ་མེས་ཀྱིས་བཞག་པའི་དངུལ་ཊམ་རྩྭ་རས་གང་ནས་ད་ཆ་ཁང་མིག་ཚང་མར་ཅ་དངོས་རྙིང་པས་ཁེངས་པའི་བར། བཀྲ་ཤིས་ཕུན་ཚོགས་ད་ཆ་རྒྱལ་ཁབ་དང་རང་སྐྱོང་ལྗོངས་རིམ་པ་གཉིས་ཀྱི་ཉར་ཚགས་མཐུན་ཚོགས་ཀྱི་ཚོགས་མིར་གྱུར། ཅ་དངོས་རྙིང་པའི་རིན་ཐང་ཡག་པོ་ཇི་ལྟར་མངོན་པའི་ཐད་བཀྲ་ཤིས་ཕུན་ཚོགས་རང་ཉིད་ལ་བསམ་ཚུལ་མང་པོ་ཡོད།

“བོད་ཀྱི་དངུལ་ཊམ་རིག་གནས་ལ་ཐུན་མོང་མ་ཡིན་པའི་ལོ་རྒྱུས་ཀྱི་རིན་ཐང་ལྡན་ཡོད། དེས་དུས་མཚམས་ཤིག་གི་ལོ་རྒྱུས་འབྱུང་རབས་དང་དུས་རབས་ཀྱི་འཕེལ་རྒྱས་དང་འགྱུར་ལྡོག་མཚོན་པ་མ་ཟད། ལོ་རྒྱུས་ཐོག་ཀྲུང་དབྱང་སྲིད་གཞུང་དང་བོད་ས་གནས་དབར་གྱི་སྡོམ་ཐག་ལྟ་བུའི་འབྲེལ་བ་དང་ཁ་འབྲལ་ཐབས་མེད་པའི་འབྲེལ་བ་དེ་བས་ཀྱང་ར་སྤྲོད་བྱེད་ཐུབ། དངུམ་ཊམ་གྱི་བརྗོད་དོན་གཙོ་བོའི་བཤམས་སྟོན་ཁང་ཐོག་མར་འཛུགས་པའི་བསམ་བློའང་དེ་ནས་འཁོར་བྱུང”ཞེས་བཀྲ་ཤིས་ཕུན་ཚོགས་ཀྱིས་བཤད།

ཁ ཡང་བསྐྱར་ལས་གཏོད་ལམ་དུ་ཞུགས། རྒན་ཡོལ་ཞུས་རྗེས་ཀོན་ཀྲང་བྱས།

“མི་ཞིག་འཇིག་རྟེན་འདིར་འཚོ་རིང་ཁང་པ་དང་རླངས་འཁོར་ཁོ་ནའི་ཆེད་དུ་མ་ཡིན་པར་དོན་སྙིང་ལྡན་པའི་བྱ་གཞག་ཅིག་སྒྲུབ་དགོས། དེ་ལྟར་བྱས་ཚེ་གཞི་ནས་མི་རབས་རྗེས་མར་རྒྱུ་ནོར་ངོ་མ་འཇོག་ཐུབ” བཀྲ་ཤིས་ཕུན་ཚོགས་ཀྱིས་ལོ་རྒྱུས་སྔོག་འདོན་དང་། དཔྱད་ཡིག་ལེགས་སྒྲིག ཆོག་འཐུས་རེ་འདུན། ས་ཆ་འདེམས་པ། ཁང་པའི་ཇུས་འགོད། ཨར་པོ་བཅས་ལ་ཧུར་ཐག་གཞོལ་ཞིང་། 2016ལོར་བརྗོད་དོན་གཙོ་བོའི་རྟེན་མཛོད་ཁང་སྐྲུན་པའི་འཆར་གཞི་དངོས་སུ་ལག་བསྟར་བྱེད་འགོ་ཚུགས།

དུས་འགོར་བཀྲ་ཤིས་ཕུན་ཚོགས་ཀྱིས་འབྲེལ་ཡོད་རིགས་གཅིག་མཁས་ཅན་དང་མཁས་དབང་མང་པོ་ཞིག་ལ་འདྲི་རྩད་བྱས་པ་དང་། ལྷ་ས་དང་ལྷོ་ཁ་སོགས་ཀྱི་དངུལ་ཊམ་བཟོ་གྲྭར་བཅར་འདྲིར་བསྐྱོད་པ་རེད། ཕྱོགས་བསྡུས་འགྲེམས་ཁང་སྐྲུན་པའི་ཆ་རྐྱེན་དང་ཕུགས་ཀྱི་འཆར་འགོད་སོགས་ལ་བསམ་གཞིག་བྱས་ནས་དངུལ་ཊམ་གྱི་བརྗོད་དོན་གཙོ་བོའི་བཤམས་སྟོན་ཁང་ཞིག་ལྷ་ས་གྲོང་ཁྱེར་དོག་སྡེ་ཁྲོམ་གཞུང་དངུལ་དཔར་གྲོང་ཚོར་འཛུགས་པའི་གཏན་འཁེལ་བྱུང་བ་རེད།

དངུལ་ཊམ་བཟོ་གྲྭའི་གནས་ཡུལ་རྙིང་པ་ངོས་འཛིན་བྱེད་པ་དེ་ལས་སླ་པོ་ཞིག་མིན་ཞིང་། དངུལ་ཊམ་བཟོ་གྲྭའི་གནས་ཡུལ་རྙིང་པ་མི་འཛོལ་བར་རྙེད་ཆེད། བཀྲ་ཤིས་ཕུན་ཚོགས་ཀྱིས་དངུལ་ཊམ་བཟོ་གྲྭའི་གནས་ཡུལ་ཉེ་འཁོར་གྱི་རྒན་རྒོན་ཚང་མར་བཅར་འདྲི་བྱས་པ་མ་ཟད། དངུལ་ཊམ་བཟོ་གྲྭ་བཤིག་པ་དངོས་སུ་མཐོང་མྱོང་ཡོད་ཅིང་། དེར་དངོས་སུ་ཞུགས་མྱོང་བའི་རྒན་རྒོན་ཚོ་ས་ཆ་དངོས་སུ་གདན་དྲངས་ནས་ངོས་འཛིན་བྱེད་དུ་བཅུག དེ་རྗེས་པར་རིས་དཔྱད་ཡིག་དང་ཟུང་འབྲེལ་བྱས་ཁར། རིགས་གཅིག་མཁས་ཅན་ལ་ས་ཆ་དངོས་སུ་ཞིབ་དཔྱད་བྱེད་དུ་བཅུག མཐར་དངུལ་ཊམ་བཟོ་གྲྭའི་གྱང་རོར་བརྟེན་ནས་གནས་ཡུལ་རྙིང་པ་གཞི་ནས་ངོས་འཛིན་ཐུབ་ཡོད།

བརྗོད་དོན་གཙོ་བོའི་བཤམས་སྟོན་ཁང་གི་རྣམ་གྲངས་ཀྱི་ས་ཆའི་རྒྱ་ཁྱོན་ལ་སྨི་ངོས་གྲུ་7445．60ཟིན་པ་དང་ཇུས་འགོད་ཀྱི་རེ་བ་ལྟར་དུས་འགོར་མ་དངུལ་སྒོར་ཁྲི་6000གཏོང་དགོས་ཀྱི་ཡོད། མ་དངུལ་གྲབས་གསོག་བྱ་ཆེད། བཀྲ་ཤིས་ཕུན་ཚོགས་ཀྱིས་གྲོང་ཁྱེར་གྱི་དཀྱིལ་དུ་ཡོད་པའི་ཐོག་ཁང་དང་བུ་ཕྲུག་ལ་སྤྲོད་རྩིས་ཡོད་པའི་ཁང་པ་བཙོངས་པའི་ཁར། ལོ་མང་བསགས་པའི་དངུལ་ཚང་མ་བཏོན་པས་བཤམས་སྟོན་ཁང་དེ་གཞི་ནས་ཨར་ལས་འགོ་འཛུགས་ཐུབ་ཙམ་བྱུང་ཡོད།

ཨར་པོ་རྒྱག་རིང་། བཀྲ་ཤིས་ཕུན་ཚོགས་ནི་ཇུས་འགོད་པ་ཞིག་ཡིན་ལ་སྤྱི་ཁྱབ་ལས་དཔོན་ཞིག་ཀྱང་རེད། ལོ་ནས་ལོ་བར་ཨར་ལས་ལ་ལྟ་སྐུལ་བྱེད་པ་ལས། དེ་སྔ་རྣམ་པར་དང་དོད་ཆེ་བའི་བཀྲ་ཤིས་ཕུན་ཚོགས་ད་ཆ་སྐྲའི་བཟོ་ལྟ་ཡང་བཟོ་ཁོམ་མེད་པར་གྱུར། ཉེ་འཁོར་གྱི་མི་ཚོས་ཁོང་དཀའ་ལས་དེ་འདྲ་རྒྱག་དགོས་དོན་ཅི་ཡིན་སྙམ་གྱི་ཡོད།

མི་ལ་བརྩོན་འགྲུས་ལྡན་གྱུར་ན། མི་འགྲུབ་བྱ་བ་ཅི་ཡང་མེད། བཤམས་སྟོན་ཁང་སྐྲུན་པའི་རྣམ་གྲངས་རིམ་བཞིན་ལེགས་གྲུབ་བྱུང་བ་དང་བསྟུན་ནས། 2022ལོའི་ཟླ་དང་པོར། རང་སྐྱོང་ལྗོངས་རིག་དངོས་ཅུས་ཀྱིས་བོད་ལྗོངས་དོག་སྡེའི་དངུལ་ལོར་བཤམས་སྟོན་ཁང་འཛུགས་པའི་མོས་མཐུན་བྱས་པའི་མཆན་བཀོད་བཀའ་ལན་གྱི་ཡིག་ཆ་བཀྲམ་པ་དང་། 2023ལོའི་ཟླ་5པར། རང་སྐྱོང་ལྗོངས་དམངས་སྲིད་ཐིང་གིས་བཤམས་སྟོན་ཁང་ལ་དམངས་གཉེར་ཁེ་ལས་མིན་པའི་ཚན་པའི་ཐོ་འགོད་ལག་ཁྱེར་སྤྲད་པ། དེའི་རིང་བཀྲ་ཤིས་ཕུན་ཚོགས་ཀྱང་རྒྱལ་ཁབ་རིག་དངོས་ཅུས་ཀྱིས་གཉེར་བའི་རྒྱལ་ཡོངས་ཀྱི་གཞུང་ཁོངས་མིན་པའི་བཤམས་སྟོན་ཁང་གི་ཀོན་ཀྲང་གསོ་སྦྱོང་ལ་ཞུགས་ནས་རང་ལྗོངས་ཀྱི་གསོ་སྦྱོང་ཐེབས་པའི་དམངས་གཉེར་བཤམས་སྟོན་ཁང་གི་ཀོན་ཀྲང་ཁག་དང་པོར་གྱུར་པ་རེད།

ག དངུལ་ཊམ་གྱི་ལོ་རྒྱུས་རྒྱལ་གཅེས་སྙིང་སྟོབས“རྟེན་གཙོར”གྱུར།

བཤམས་སྟོན་ཁང་གི་ཕྱིའི་བཟོ་དབྱིབས་ནི་སྐས་དབྱིབས་ཐོག་ཁང་ཡིན་པ་དང་ཁྱོན་ཐོག་སོ་ལྔ་ཡོད། ཕྱིའི་རྣམ་པ་ནི་བོད་ལུགས་ཕོ་བྲང་གི་དབྱིབས་ཡིན་ཁར། རྒྱ་ལུགས་རྫ་ལྷེབ་གཡུ་རྩི་མ་སྦྱར་ཡོད་པས། ཀྲུང་ཧྭ་མི་རིགས་དབར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་མཚོན་པ་མ་ཟད། བརྗིད་ཆགས་ཉམས་དགའི་ཚོར་སྣང་ཞིག་ཀྱང་སྦྱིན་གྱི་ཡོད།

བོད་ས་གནས་ཀྱི་དངུལ་ཊམ་རེ་རེར་ཡིག་ཐོག་ནས་འགྲེལ་བཤད་བརྒྱབ་སྟེ་ཁུངས་བཙན་པའི་ལོ་རྒྱུས་ཀྱི་རྒྱབ་ལྗོངས་གཞི་རྟེན་དུ་བྱས་ཡོད། དུས་སྐབས་ཁག་གི་དངུལ་ཊམ་གྱི་ཡོང་ཁུངས་དང་། བཟོ་ལྟ། པར་གཞི། འཁོར་རྒྱུག་སོགས་ལོ་རྒྱུས་ཀྱི་དཔྱད་གཞིར་བརྟེན་ནས་ཀྲུང་དབྱང་སྲིད་གཞུང་གིས་བོད་ལ་དོ་དམ་ནུས་ལྡན་བྱེད་མྱོང་བ་ར་སྤྲོད་བྱས་ཡོད་ལ། བོད་གནའ་སྔ་མོ་ནས་བཟུང་རླབས་ཆེན་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་ཁྱབ་བསྒྲགས་ཀྱང་བྱས་ཡོད།

བོད་རྒྱ་ཟུང་འབྲེལ་གྱི་བཟོ་སྐྲུན་ཡིན་ནའང་འདྲ། ཡང་ན་ཉར་ཚགས་བྱས་པའི་དངུལ་ཊམ་གྱི་དོན་དངོས་གསལ་འགྲེལ་ཡིན་ཀྱང་རུང་། “མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་སྲུང་བའི”བརྗོད་དོན་གཙོ་བོ་དེས་མི་རྣམས་ལ་མྱོང་ཚོར་ཟབ་ཤོས་སྦྱིན་ཡོད། དེའང་བཤམས་སྟོན་ཁང་གི་ནང་དོན་གཙོ་བོ་ཡིན་པ་མ་ཟད། བཀྲ་ཤིས་ཕུན་ཚོགས་ཀྱིས“རྩ་ཆེའི་དངུལ་ཊམ་ལས་ལྷག་པར་ངོས་འཛིན་པའི‘རྟེན་གཙོ’ཡང་རེད”

བཀྲ་ཤིས་ཕུན་ཚོགས་ཀྱིས་བཤམས་སྟོན་ཁང་དེ་ཇུས་བཀོད་བྱེད་པ་ནས་དངོས་སུ་བསྐྲུན་ཐུབ་པའི་བར། རྒྱལ་ནང་གི་ཉར་ཚགས་ལས་རིགས་ཀྱི་རིགས་གཅིག་མཁས་ཅན་དང་རྒན་རབས་པ་མང་པོ་ཞིག་གིས་སེམས་ཁུར་དང་རོགས་རམ་བྱས་པ་མ་ཟད། བོད་དུ་ཐེངས་མང་ཡོང་ནས་མཛུབ་ཁྲིད་བྱས་པ་དང་ཆབས་ཅིག་ཉར་ཚགས་དངོས་པོ་འབོར་ཆེན་ཞིག་ཞལ་འདེབས་ཕུལ་ཡོད། བཤམས་སྟོན་ཁང་བཙུགས་པ་དེ་ནི་མི་རིགས་ཁག་དབར་ཕན་ཚུན་རོགས་རམ་བྱེད་པའི་དཔེ་མཚོན་ཞིག་རེད་ཅེས་བཤད།

དངུལ་ཊམ་དེ་ཚོ་ཆུང་ཆུང་ཡིན་ཡང་། དེས་སྤྱི་ཚོགས་འཕེལ་རྒྱས་ཀྱི་འཕེལ་རིམ་མཚོན་པ་དང་། ཟིན་ཐོར་བཀོད་པ། ནང་དུ་འདུས་པ་བཅས་བྱས་ཡོད། བཀྲ་ཤིས་ཕུན་ཚོགས་ཀྱིས་དེའི་ལོ་རྒྱུས་རིག་གནས་རྒྱུན་འཛིན་བྱས་པ་དེ་ནི་མི་སྒེར་གྱིས་རྒན་རབས་ཚོའི་མཛད་རྗེས་ལ་གུས་བཀུར་ཞུས་པ་ཞིག་ཡིན་ལ། ཁོང་གི་སྙིང་རུས་དང་བྱ་སྤྱོད་ལས་མི་དེ་བས་མང་བར་དངུལ་ཊམ་གྱི་རིག་གནས་ནས་དུས་རབས་ཀྱི་ཡར་རྒྱས་དང་རིག་གནས་ཀྱི་འཚོ་བཅུད་མྱོང་ཚོར་ཐུབ་ཡོད།