བུ་མོ་ང་ཡི་ཕ་ཡུལ།
གཡང་དཀར་ལུ་གུའི་འབའ་སྒྲ། །
མཐོ་སྒང་ས་གཞིའི་འགྱུར་ཁུག །
རྣ་བར་ཐོས་པ་ཙམ་གྱིས། །
ལུས་སེམས་བདེ་ལ་འཁོད་སོང་། །
ཡར་འབྲོག་གཡུ་ཡི་གཞོང་པ། །
བུ་མོ་ང་ཡི་ཕ་ཡུལ། །
དཀར་མ་གླིང་གི་སྤང་ལྗོངས། །
གཡང་དཀར་ལུ་གུའི་གདན་ས། །
སྤང་ལྗོངས་སྐྱིད་པའི་སྒང་ལ། །
སྤང་རྒྱན་མེ་ཏོག་མཚར་བ། །
འབྲི་ལུང་ཡར་འབྲོག་བུ་མོ། །
མེ་ཏོག་ལས་ཀྱང་མཚར་བ། །
ཆུ་མོ་ཡན་ལག་བརྒྱད་ལྡན། །
ཡར་འབྲོག་གཡུ་མཚོའི་ཆུ་འགོ །
གཡུ་མཚོའི་འགྲམ་གྱི་ཕོ་གཞོན། །
ངང་རྒྱུད་ཆུ་ལས་རིང་བ། །
རི་མགོ་ཁ་བས་བཏུམས་པ། །
ཁ་རག་ཇོ་མོ་གངས་དཀར། །
གངས་རིའི་འདབས་གྱི་བགྲེས་སོང་། །
ལྷག་བསམ་གངས་ལས་དཀར་བ། །
མཚོ་མོ་དྭངས་ཤིང་གཙང་བ། །
ཉ་མོ་གནས་བཟོད་བདེ་བ། །
མཚོ་མོའི་གཞུང་གི་གཞོན་ནུ། །
རྐང་བྲོ་གླུ་གཞས་མཁས་པ། །
ང་ནི་ཡར་འབྲོག་གཞུང་གི།
མེ་ཏོག་ཡིན་པས་དགའ་བྱུང་། །
མེ་ཏོག་དེ་ལ་འཁོར་བའི། །
གཡུ་སྦྲང་སེམས་པ་སྐྱིད་སོང་། །
དཀར་མ་གླིང་གི་རྩྭ་ཐང་། །
གཡང་དཀར་ལུ་གུའི་གདན་ས། །
ང་རང་སྤང་གཤོངས་ཡར་གིའི། །
ལུ་གུ་དེ་ལ་སྨོན་བྱུང་། །