ཐོག་མར་འགྲོ་བ་ལྷག་བསམ་སྟེ། །
བྱམས་དང་བརྩེ་བའི་ས་བོན་གྱིས། །
སློབ་མའི་སེམས་ཀྱི་ཞིང་བརླན་ན། །
ཤེས་རིག་མྱུ་གུ་སྐྱེ་བར་གྱུར། །
སྒོ་གསུམ་སྤྱོད་ལམ་ཚུལ་ལྡན་འདི། །
འཇིག་རྟེན་མི་ཆོས་ཀུན་གྱི་གཞི། །
སློབ་མ་སྐྱོང་བའི་གཞུང་ཤིང་སྟེ། །
རིག་པ་ཐམས་ཅད་འཇུག་པའི་སྒོ །
ལེགས་པར་བརྩེ་ཞིང་ཞན་པར་སྡང་། །
ཡིད་འོང་འཛིན་ཅིང་མི་སྡུག་དོར། །
འབྱོར་བ་ལེན་ཅིང་རྒུད་པ་བཏང་། །
ཕྱོགས་ཞེན་སེམས་འདི་ཀུན་ནས་སྤོངས། །
ཐབས་ལ་མཁས་པའི་བཤེས་གཉེན་དེས། །
སློབ་མའི་གཤིས་སྤྱོད་རབ་བསལ་ནས། །
གང་ལ་མཁོ་བ་དེ་སྦྱིན་པ། །
སློབ་མ་སྐྱོང་བའི་རྩལ་གྱི་མཆོག །
བྱེ་བྲག་སོ་སོར་སྐྱོང་ཚུལ་ནི། །
ཤེས་རབ་ལྡན་པའི་སློབ་མ་དེ། །
ལེ་ལོའི་དབང་དུ་ཤོར་ཉེན་ཡོད། །
བརྩོན་འགྲུས་སློབ་པ་ཀུན་ཏུ་གཅེས། །
བརྩོན་འགྲུས་ཆེ་བའི་སློབ་མ་དེར། །
ཤེས་རབ་ཞན་པའི་རྟགས་ཤིག་ཡོད། །
དངོས་པོའི་གནས་ལུགས་ཆོས་ཉིད་སོགས། །
ཇི་ལྟར་ཡིན་ཚུལ་བསམ་པ་གནད། །
རྩེ་རྒོད་དགའ་བའི་སློབ་མ་དེ། །
རྣམ་གཡེང་དགྲ་ཡིས་འཇིག་ཉེན་ཡོད། །
རིག་པའི་གནས་གང་བསླབ་ཀྱང་རུང་། །
སེམས་ཀྱི་གནས་ཆ་འཛིན་སྟངས་གལ། །
བརྗེད་ངད་མྱུར་བའི་སློབ་མ་དེ། །
དྲན་པ་ཞན་པའི་ཤས་ཤིག་ཡོད། །
སྦྱངས་ཟིན་ཤེས་བྱ་བསམ་པ་ཡིས། །
ཡང་ཡང་སྐྱོང་བར་སྐུལ་མ་གཙོ། །
གཉིད་རྨུགས་དགའ་བའི་སློབ་མ་དེ། །
བྱིངས་བའི་མུན་པས་ཐིབས་ཉེན་ཡོད། །
སེམས་ཀྱི་གསལ་ཆའི་ངར་བསླང་སྟེ། །
སེམས་ཁམས་བསྟོད་པ་གནད་དུ་ཆེ། །
དགའ་དད་མེད་པའི་སློབ་མ་དེ། །
རིག་པ་དོར་བའི་ཉེན་ཅིག་ཡོད། །
ཤེས་བྱས་རྒྱུ་ནོར་ལོངས་སྤྱོད་སོགས། །
བསྐྲུན་ནུས་ཕན་པ་སྒྲོག་པ་གཅེས། །
སྦྱངས་འབྲས་ལེགས་པའི་སློབ་མ་དེ། །
ང་རྒྱལ་གྲོགས་ཀྱིས་བསླུ་ཉེན་ཡོད། །
བསྟོད་པའི་ཚིག་གིས་བསྐུལ་དང་ལྷན། །
སྐྱོན་ཡང་ཅུང་ཟད་གླེང་ན་དུལ། །
ཡར་སྐྱེད་གོལ་བའི་སློབ་མ་དེ། །
མདུན་སྐྱོད་གོམ་པ་འཇོག་ཉེན་ཡོད། །
གཅིག་པུར་སེམས་གཏམ་གླེང་བ་དང་། །
ཚོགས་དུས་ཡང་ཡང་བསྟོད་ན་ཕན། །
བྱ་བྱེད་མང་བའི་སློབ་མ་དེ། །
འབྲས་བུ་ཚབ་ཚུབ་འཁྱེར་དོགས་ཡོད། །
ཤེས་བྱའི་རྣམ་གྲངས་གཅིག་བཟུང་ནས། །
ཡང་ཡང་བརྣན་ཏེ་སྦྱོང་བར་སྐུལ། །
ངོ་བསྟོད་ཞེན་པའི་སློབ་མ་དེ། །
སྙན་གྲགས་སྟོང་པས་སྐམ་ཉེན་ཡོད། །
ཕྱི་ཚུལ་མཛེས་པས་མི་ཕན་པའི། །
སྙིང་པོ་འཛིན་སྟངས་སློབ་པ་གལ། །
ཡང་ཡང་བསྒོ་ཡང་མི་ཉན་ཅིང་། །
འཇམ་པོའི་ཚིག་གིས་མ་ཆུན་པའི། །
བག་མེད་འགའ་ཞིག་ཁྲིད་རྒྱུག་གིས། །
ཅུང་ཟད་ཉེས་པའང་ཕན་པར་འདོད། །
འདི་ལྟར་སློབ་མའི་དགའ་དད་དང་། །
རང་གཤིས་སེམས་ཁམས་མི་འདྲ་བ། །
ཇི་བཞིན་ཤེས་ནས་ཁྱད་པར་གྱི། །
ཐབས་ཀྱིས་སྐྱོང་བའི་བཤེས་གཉེན་བསྔགས། །