ཞིང་པ་ཞིག་གིས་བོང་བུ་ཞིག་དེད་ནས་གྲོང་ཁྱེར་དུ་འགྲོ་བའི་ལམ་བར་དུ་ཁྲམ་པ་ཞིག་དང་འཕྲད་པ་རེད། ཁྲམ་པ་དེས། ལྟོ་བཟས་སམ་ཞེས་དྲིས་པར། ཞིང་པ་ན་རེ། བཟས་པ་ཡིན་ཞེས་ལན་བཏབ། དེ་འཕྲལ་ཁྲམ་པ་དེས། ངས་བོང་བུར་སྐད་ཆ་འདྲི་གི་ཡོད་ཅེས་སྨྲས་པ་ན། ཞིང་པ་དེས་བོང་བུར། ཁྱོད་རང་ལ་གྲོང་ཁྱེར་དུ་སྤུན་མཆེད་འདི་འདྲ་ཡོད་ནའང་ང་ལ་བཤད་ཙམ་ཡང་མི་བྱེད་པ་ཅི་ཡིན་ཞེས་བཤད།
སྨྲ་ལྕེ་བདེ་བའི་ནེ་ཙོ།
མགྲོན་ཁང་ཞིག་གིས་ནེ་ཙོ་ཞིག་གསོས་ཏེ་རླུང་ཙིའི་ནང་དུ་བཅུག་ནས་མགྲོན་ཁང་གི་སྒོ་ཐོད་དུ་བཀལ་ཡོད། ནེ་ཙོ་དེ་སྨྲ་ལྕེ་ཤིན་ཏུ་བདེ་བ་སྟེ། མགྲོན་པོས་རྐང་པ་གཡས་པ་སྔོན་ལ་སྒོ་ནང་དུ་སྤོ་སྐབས། ཐག་རིང་གི་མགྲོན་པོ་སྐུ་ཁམས་བཟང་ཞེས་ཤོད་པ་དང་། མགྲོན་པོས་རྐང་པ་གཡོན་མ་སྔོན་ལ་སྒོ་ནང་དུ་སྤོ་སྐབས། སྐུ་ཉིད་ཕེབས་པར་དགའ་བསུ་ཞུ་ཞེས་ཤོད་ཀྱི་ཡོད། ཉིན་ཞིག་མགྲོན་པོ་དྲན་རྒྱུ་རྒོད་པོ་ཞིག་གིས་རྐང་བཙུགས་ནས་ནེ་ཙོ་དེར་ངན་བྱས་ཏེ་རྐང་པ་གཉིས་ཀ་དུས་གཅིག་ཏུ་སྒོ་ནང་དུ་སྤོས་ནས་ནེ་ཙོས་ཅི་ཞིག་ཟེར་མིན་བལྟས་པ་ན། ནེ་ཙོ་དེས། ངུས་ཤིག ང་ནི་རོ་ལངས་ཤིག་ཡོང་གི་འདུག་སྙམ་ནས་མི་ཞེད་དགུ་ཞེད་ཞེད་བྱུང་ཞེས་བཤད།
དོགས་པ་ཟ་བ།
བུད་མེད་ཅིག་རང་གི་ཁྱོ་ག་དང་ཁ་བྲལ་ཕྱིར་ཁྲིམས་ཁང་དུ་བསྐྱོད། ཁྲིམས་ཁང་དུ་སླེབས་རྗེས།
བུད་མེད་ན་རེ། ང་ཁོ་དང་ཁ་བྲལ་གྱི་ཡིན།
ཁྲིམས་དཔོན་ན་རེ། རྒྱུ་མཚན་ག་རེ་ཡིན་ནམ།
བུད་མེད་ན་རེ། ཁོས་ང་ལ་ལྷག་བསམ་རྣམ་དག་བྱེད་ཀྱི་མི་འདུག
ཁྲིམས་དཔོན་ན་རེ། ཁྱེད་ལ་དཔང་རྟགས་ག་རེ་ཡོད་དམ།
བུད་མེད་ན་རེ། དཔང་རྟགས་ཡོད། ཁོ་ངའི་ཕྲུ་གུའི་ཨ་ཕ་ངོ་མ་ཡིན་མིན་ལ་དོགས་པ་ཟ་གི་འདུག
ལས་འཕྲོ་ཡོད་པ།
ཆུང་མས་བརྙན་འཕྲིན་ལ་ལྟ་བཞིན་ཁྱོ་གར། ང་གཉིས་སློབ་ཆེན་ནས་ཐོན་ཉེར་ཡོད་སྐབས་ཁྱེད་རང་གིས་ང་ལ་བརྩེ་འཕྲིན་མང་པོ་བྲིས་ནས་ཁ་སངས་རོགས་ཟེར་བྱུང་། ཤོད་དང་། ཁྱེད་རང་ང་དང་མཉམ་དུ་སྡོད་འདོད་འདི་འདྲ་ཡོད་དོན་ག་རེ་ཡིན་ནམ་ཞེས་དྲིས་པས། ཁྱོ་ག་ན་རེ། དེ་ནི་ང་གཉིས་བར་ལ་ལས་འཕྲོ་ཡོད་པས་རེད་ཅེས་ལན་བཏབ། ཆུང་མས་ཧ་ཅང་མོས་པའི་ངང་ནས། ལས་འཕྲོ་གང་འདྲ་བྱས་ནས་བྱུང་བ་རེད་དམ་ཞེས་དྲིས་པ་ན། ཁྱོ་ག་ན་རེ། དེ་དུས་ངས་འཛིན་གྲྭའི་བུ་མོ་ཚང་མར་བརྩེ་འཕྲིན་བྲིས་པ་ཡིན། ཡིན་ནའང་ཁྱེད་རང་གཅིག་པུས་མ་གཏོགས་ཡིག་ལན་སློག་མཁན་མ་བྱུང་སྟབས། ང་གཉིས་བར་ལ་ལས་འཕྲོའི་མདུད་པ་ཐེབས་པ་རེད་ཅེས་བཤད།