དཔལ་གྱི་ལེགས་ཚོགས་རྒྱས་གྱུར། །
ནོར་བདག་ཛམ་ལྷ་འཁོར་གྱུར། །
རྒྱུ་འབྲས་རྣམ་གཞག་རྟོགས་གྱུར། །
ཚེ་བསོད་རླུང་རྟ་འཕེལ་གྱུར། །
གངས་ཀྱི་ཟེ་བར་འགྱིངས་པའི། །
འབྲོང་རྒོད་རྭ་ཁ་སྨུག་སྨུག །
ཚང་ཚིང་རྒྱ་རྫོང་ནགས་ལ། །
དམར་ཡག་སྟག་མོ་འགྱིངས་འགྱིངས། །
གླིང་བཞི་གླིང་ཕྲན་བསྐོར་མཁན། །
འགྲོ་བའི་རྐང་གྲངས་མང་བ། །
འཚོ་ཚིས་རང་མདངས་གང་བའི། །
རྒྱལ་ཁམས་བག་རེ་བྲོ་བ། །
རིགས་པའི་གཏན་ཚིགས་ཟབ་ཅིང་། །
དཔྱོད་པའི་ཏིང་འཛིན་བརྟན་པ། །
རྣམ་རིག་གློག་ཞགས་འཚེར་བའི། །
ཤེས་ལྡན་བྱེ་བ་ཕྲག་བརྒྱ། །
ཚན་རྩལ་མགྲོན་དུ་འབོད་པའི། །
གཞོན་པའི་གོམ་སྟབས་མགྱོགས་པ། །
འཛམ་གླིང་རྒྱས་པར་བཤད་པའི། །
གསུང་རྩོམ་དྲི་ངད་ལྡང་བ། །
ཆ་འཕྲིན་ཟེའུ་འབྲུ་ཞིམ་པའི། །
དེང་རབས་ལྗོན་པ་ལེགས་པ། །
ལག་རྩལ་ཨ་ཡིག་རང་བྱོན། །
མ་བྲིས་ལྷུན་གྱིས་གྲུབ་པ། །
འཛུམ་ལ་དྭངས་ཤ་ཆོད་པའི། །
ལོ་ཟླའི་བག་མ་རླབས་ཆེན། །
གཤིས་ལ་ལྷོད་ཤ་འཛོམས་པའི། །
དུས་ཀྱི་མགྲོན་པོ་གཙིགས་ཆེན། །
སྐྱིད་པའི་གླུ་དབྱངས་ལེན་བཞིན། །
རྐང་གཉིས་དགའ་བས་བཟི་སོང་། །
ཕུན་ཚོགས་དེང་འདིར་རྒྱས་པས། །
ལོ་ཟླར་གསོན་ཤུགས་ལྡན་པ། །
གནས་ལྔ་རིག་པར་འབད་པའི། །
སོ་སྐྱེས་སྐད་སྒྲ་སྙན་པ། །
སྙན་པའི་དབྱངས་ལ་བརྒྱུས་པའི། །
དེང་གི་སྙིང་པོ་ཟབ་པ། །
གསར་སྐྱེས་བྱིས་པའི་ངག་ལས། །
ངུ་སྐད་ཐན་ཐུན་འཇོ་ཡང་། །
ཞི་མཐུན་གཞལ་ཡས་ཁང་བཟང་། །
དུང་བའི་འོད་མདངས་བཀྲ་བ། །
མཐོན་པོ་དགུང་ལ་བལྟས་ན། །
ཐང་དཀར་འཕུར་ཡུལ་བདེ་བ། །
ཡངས་མོ་སྤང་དུ་བསྡད་ན། །
རྩི་ཏོག་མིག་ལ་མཛེས་པ། །
གྲོང་དང་གྲོང་ཁྱེར་ཉུལ་དུས། །
གློག་འོད་ལམ་ལམ་འཁྱུག་པ། །
ནང་སེམས་སོས་དལ་ཀློང་ནས། །
འཇིག་རྟེན་གཞན་ཞིག་འགྲིམ་ཆོག །
མཐོན་པོ་མཐོ་སར་བཞག་ན། །
མཐོན་པོའི་ཁྲི་ལ་འོས་པ། །
དམའ་མོ་དམའ་སར་བསྡད་ན། །
འདུག་སྟངས་ངོ་མཚར་ཆེ་བ། །
ལག་པ་ལག་པར་སྦྲེལ་ན། །
སྦྲེལ་ལུགས་གཡུང་དྲུང་བྲིས་འདྲ། །
སེམས་པ་སེམས་པར་གླན་ན། །
རྟོག་པའི་དམིགས་པ་བརྟན་པ། །
མིག་རྒྱང་དཔག་ཚད་གྲངས་མེད། །
སེམས་རྒྱ་མཁའ་དང་མཉམ་པ། །
ཀུན་ལ་ལྷག་བསམ་དཀར་བའི། །
རང་གཤིས་དུང་དཀར་འདྲ་ལེ། །
དུས་བཞིའི་འགྱུར་བག་རྒོད་ཀྱང་། །
དཀའ་ཐུབ་སྤྱད་པ་མཚར་བ། །
ལང་ཚོའི་དཔལ་གྱི་དྭངས་མ། །
དེང་འདིར་བཀོལ་སྤྱོད་མཁས་པ། །
རྐང་ལམ་ཀྱག་ཀྱོག་མང་དུས། །
རྐང་རྗེན་འཁུན་སྒྲ་མང་བ། །
དེང་འདིར་གཞུང་ལམ་སྙོམ་དུས། །
དགའ་སྤྲོའི་གླུ་དབྱངས་སྙན་པ། །
འཛོམས་གསུམ་འཛོམས་པའི་ལོ་ཟླ། །
འཛོམས་པོ་གཡང་ལ་ཆགས་འདུག །
གཡང་གི་མཚོ་མོ་བསྲུབས་པའི། །
ཡང་སྙིང་ང་ཡིས་བླངས་ཡོད། །
དུས་རབས་གསར་པ་རླབས་ཆེ། །
བདག་སོགས་བསྐྱངས་པར་དྲིན་ཆེ། །
གང་ཟག་ལུས་བདེ་སེམས་སྐྱིད། །
དེང་གི་ངོ་སོ་བསྟོད་དོ། །