དང་པོ། སློབ་སྦྱོང་ལ་དམ་འཛིན་བྱས་ནས་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དང་ཧྲུའུ་ཅི་ཝང་ཅུན་ཀྲེང་གི་ཐུགས་རེ་ཟབ་མོར་གོ་བ་གཏིང་ཟབ་བླངས་པ། ང་ཚོས“གཏན་འཁེལ་གཉིས”ལ་བརྩི་བཀུར་དང“སྲུང་སྐྱོང་གཉིས”ཐུབ་པའི་ཆབ་སྲིད་ཀྱི་མཐོ་ཚད་ནས་ལྗོངས་ཡོངས་ཀྱི་ཆོས་ལུགས་ལས་རིགས་སུ“འདུ་ཤེས་གསུམ”གྱི་དྲིལ་བསྒྲགས་སློབ་གསོ་གཏིང་ཟབ་སྤེལ་བའི་དོན་སྙིང་གལ་ཆེན་ལ་ངོས་འཛིན་གང་ལེགས་དང་། “འདུ་ཤེས་གསུམ”གྱི་དྲིལ་བསྒྲགས་སློབ་གསོ་སྤེལ་བ་ནི་རང་སྐྱོང་ལྗོངས་ཏང་ཨུད་ཀྱིས་ང་ཚོ་བོད་བརྒྱུད་ནང་བསྟན་ལས་རིགས་ལ་བརྩེ་སེམས་ཟབ་མོ་བཅངས་པ་ཞིག་ཡིན་པ་གཏིང་ཟབ་ཚོར་བར་བྱས་ཤིང་། བོད་བརྒྱུད་ནང་བསྟན་ལས་རིགས་ཀྱི་མི་སྣ་དང་དགོན་སྡེའི་གྲྭ་བཙུན་ཚོའི་སྣེ་ཁྲིད་དེ་ཆེད་དོན་བཅུར་སློབ་སྦྱོང་ནན་ཏན་དང་། ལྟེ་བའི་དོན་སྙིང་ཁོང་དུ་ཆུད་པ་དང་དམིགས་ཚད་ལས་འགན་ཁ་གསལ་ཡོང་བ། “ཕན་འདོགས་པ་ལྔའི”ཚད་གཞིར་བརྩི་སྲུང་ཞུ་བ་དང་ལག་ལེན་བསྟར་བ། “མོས་སེམས་ལྔ”ཟབ་ཏུ་གཏོང་བ་བཅས་བྱས་ཏེ“ཚད་གཞི་བཞི”བོད་བརྒྱུད་ནང་བསྟན་ལས་རིགས་ཀྱི་འཐུས་མིའི་བྱ་སྤྱོད་ཀྱི་ཚད་གཞི་དང“འདུ་ཤེས་གསུམ”དགོན་སྡེའི་གྲྭ་བཙུན་གྱི་གཞི་རྩའི་བླང་བྱར་གྱུར་པར་བྱས་ཡོད།

གཉིས་པ། སློབ་ཁྲིད་གྲ་སྒྲིག་ལ་དམ་འཛིན་བྱས་ནས་བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་གཏོང་བའི་ཆེད་དོན་སྒྲོག་འགྲེལ་གནད་བསྡུས་རྩོམ་སྒྲིག་ཞིབ་ཚགས་བྱས་པ། ང་ཚོས་བོད་བརྒྱུད་ནང་བསྟན་ལས་རིགས་ཀྱི་མི་སྣའི་བསམ་བློ་དང་སེམས་ཁམས་ཀྱི་ཁྱད་ཆོས་དང་ཟུང་འབྲེལ་དམ་ཟབ་དང་གོ་བདེ་ཤེས་སླའི་སྐད་ཆ་ནས“བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་གཏོང་བའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱེད་པ”དང“བོད་བརྒྱུད་ནང་བསྟན་ཀྲུང་གོ་ཅན་གྱི་ལོ་རྒྱུས་འཕེལ་རིམ་ལ་ཕྱོགས་ཡོངས་ནས་ཕྱིར་མིག་ལྟ་བ”“བོད་བརྒྱུད་ནང་བསྟན་ཀྲུང་གོ་ཅན་ལ་རང་འགུལ་ངང་སྐུལ་འདེད་གཏོང་བ”སོགས་ཀྱི་ཆེད་དོན་སྒྲོག་འགྲེལ་གནད་བསྡུས་རྩོམ་སྒྲིག་བྱས་ཏེ་བོད་བརྒྱུད་ནང་བསྟན་ལས་རིགས་ཀྱིས་ཀྲུང་གོ་ཅན་ལ་སྐུལ་འདེད་གཏོང་བའི་བརྒྱུད་རིམ་དུ་གང་ཞིག་སྒྲུབ་དགོས་པ་དང་ཇི་ལྟར་སྒྲུབ་དགོས་པའི་གནད་དོན་ལ་ལན་བཏབ་ཡོད།

གསུམ་པ། སྒྲོག་འགྲེལ་ལ་དམ་འཛིན་བྱས་ནས་རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས་བཅས་རྒྱས་བཤད་གཏིང་ཟབ་བྱས་པ། ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱིས་གོང་གིས་འོག་ལ་སྣེ་ཁྲིད་དང་སྣེ་ཁྲིད་དེ་སྒྲོག་འགྲེལ་མཐའ་འཁྱོངས་བྱས་ནས། དྲུང་ཆེ་རྒན་གཞོན་གཉིས་ཀྱིས་སྒྲོག་འགྲེལ་ཡན་ལག་ཚོགས་པའི་རྒྱུན་ལས་ཚོགས་གཙོ་གཞོན་པའི་འགན་འཁུར་བ་དང་། ཚོགས་གཙོ་གཞོན་པ་12ཀྱིས་སྒྲོག་འགྲེལ་ཡན་ལག་ཚོགས་པའི་ཚོགས་གཙོ་གཞོན་པའི་འགན་འཁུར་བ། འབྲེལ་ཡོད་རྒྱུན་ལས་ལས་འཛིན་དང་ལས་འཛིན་པས་སྒྲོག་འགྲེལ་ཚོགས་པའི་ཁོངས་མིའི་འགན་འཁུར་བ་བཅས་བྱས་ཏེ་དགོན་སྡེར་སྒྲོག་འགྲེལ་བྱས་ཡོད། ངས་སྔ་རྗེས་སུ་ནག་ཆུ་གྲོང་ཁྱེར་གསེར་རྙེད་ཆུས་དང་། ཨ་མདོ་རྫོང་། ལྷོ་ཁ་གྲོང་ཁྱེར་བཅས་སུ་སྒྲོག་འགྲེལ་བྱས་པ་དང་སློབ་གསོ་ཐེབས་མཁན་གྲྭ་བཙུན་མི་ཐེངས་800ཙམ་ཟིན་ཡོད།

བཞི་པ། འགན་འཁྲི་འཁུར་བར་དམ་འཛིན་བྱས་ནས“འདུ་ཤེས་གསུམ”གྱི་དྲིལ་བསྒྲགས་སློབ་གསོར་ཕན་འབྲས་དངོས་ཐོན་པར་སྐུལ་འདེད་བཏང་བ། ང་ཚོས《བོད་བརྒྱུད་ནང་བསྟན་ཁྱབ་ཁོངས་ཀྱི་ཞི་མཐུན་བརྟན་ལྷིང་སྲུང་སྐྱོང་བྱེད་པའི་བྱ་སྤྱོད་དངོས་ལ་བརྟེན་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་བའི་སྐོར་གྱི་གྲོས་འགོའི་ཡི་གེ》བཏོན་ནས། ལས་འཛིན་པ་ཡོངས་དང་བརྟན་ལྷིང་སྲུང་སྐྱོང་གི་འགན་འཁྲིའི་ཡི་གེ་བཞག་སྟེ། འགག་རྩའི་དུས་སུ་ནུས་པ་བཏོན་པ་དང་། གྲྭ་བཙུན་ཚོས་དགོན་སྲོལ་བཙུན་ཆིངས་ལ་བརྩི་སྲུང་ཞུ་དགོས་པའི་སློབ་གསོ་སྤེལ་ཏེ་ཐུན་མོང་ཐོག་དགོན་སྡེའི་ཞི་མཐུན་བརྟན་ལྷིང་སྲུང་སྐྱོང་བྱས་ཡོད། གཞི་རྟེན་གསར་གཏོད་ཀྱིས“འདུ་ཤེས་གསུམ”གྱི་དྲིལ་བསྒྲགས་སློབ་གསོ་སྤེལ་བ་དང་། བླ་མ་སྐྱེས་ཆེན་སྒྲིག་འཛུགས་ཀྱིས་བོད་བརྒྱུད་ནང་བསྟན་གྱི་རྒྱལ་གཅེས་གཏམ་རྒྱུད་འཚོལ་བསྡུ་དང་ལེགས་སྒྲིག་བྱས་པ། སྒྲོག་འགྲེལ་ཚོགས་འདུ་འཚོགས་པ། བླ་མ་སྐྱེས་ཆེན་7གྱིས་བོད་བརྒྱུད་ནང་བསྟན་གྱི་རྒྱལ་གཅེས་གཏམ་རྒྱུད་གླེང་བ་བཅས་བྱས་ནས་རྒྱལ་གཅེས་ཀྱི་བརྩེ་སེམས་ཟབ་ཏུ་དང་རྒྱལ་ཁབ་ལ་དྲིན་ལན་འཇལ་བའི་བསམ་པ་ཆེ་རུ་བཏང་ཡོད། ང་ཚོས་དགོན་སྡེའི་གྲྭ་བཙུན་ལ་སྣེ་ཁྲིད་ཧུར་ཐག་བྱས་ཏེ་རྒྱལ་གཅེས་ཡར་ཐོན་དང་། སྒོམ་སྒྲུབ་སློབ་གཉེར། ཁྲིམས་སྲུང་སྒྲིག་བཀུར་བཅས་བྱེད་པ་དང་། བོད་བརྒྱུད་ནང་བསྟན་གྱི་སྐྱོན་བྲལ་རྒྱུན་འཛིན་ལ་སྐུལ་འདེད་གཏོང་བ། འགྲོ་ཕན་གྱི་སྲོལ་རྒྱུན་བཟང་པོ་དར་སྤེལ་གཏོང་བ། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་བ། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་བཅས་བྱས་ཡོད། རིམས་ནད་ཐོན་རིང་ང་ཚོས་རིམས་ནད་སྔོན་འགོག་དང་ཚོད་འཛིན་སྐོར་གྱི་ཏང་དང་སྲིད་གཞུང་གི་ཐབས་ཇུས་བཀོད་སྒྲིག་ཁག་ལ་མཐའ་གཅིག་ཏུ་བརྩི་བཀུར་དང་དོན་འཁྱོལ་ཡག་པོ་ཞུས་པ་མ་ཟད། གྲྭ་བཙུན་ཚོས་དྲ་ཐོག་ནས་དད་ལྡན་མང་ཚོགས་ཀྱི་ཆོས་ལུགས་ཀྱི་དགོས་མཁོ་སྐོང་བར་ཁྲིད་སྟོན་ཡང་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་ཆེད་ལེགས་སྐྱེས་ཕུལ་ཡོད།

(རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་རྒྱུན་ལས་ཚོགས་གཙོ་གཞོན་པ། བོད་ལྗོངས་ནང་བསྟན་སློབ་གླིང་གི་ཡོན་ཀྲང)