གཅིག་ནས། ནད་ཡམས་ཐོན་རིང་ཏང་དང་སྲིད་གཞུང་གིས་ཆོས་ལུགས་ལས་རིགས་ལ་ཐུགས་ཁུར་ཟབ་བཞེས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ། 2022ལོའི་ཟླ་བ་བརྒྱད་པར་ནད་ཡམས་ཐོན་རྗེས། ཏང་དང་སྲིད་གཞུང་གིས་ཆོས་ལུགས་ཁྱབ་ཁོངས་ཀྱི་ནད་ཡམས་སྔོན་འགོག་དང་ཚོད་འཛིན་གྱི་ལས་དོན་ལ་མཐོང་ཧ་ཅང་ཆེན་པོ་གནང་ནས་ཆོས་ལུགས་བྱེད་སྒོ་སྤེལ་ཡུལ་གྱི་ནད་ཡམས་སྔོན་འགོག་དང་ཚོད་འཛིན་གྱི་ལས་དོན་འཕྲལ་དུ་ཞིབ་འཇུག་བཀོད་སྒྲིག་དང་། འཕྲལ་དུ་དགོན་སྡེའི་གྲྭ་བཙུན་སྒྲིག་འཛུགས་བྱས་ནས“གནས་སྐབས་མཚམས་འཇོག་བྱེད་དགོས་པ་གསུམ”གྱི་བྱ་ཐབས་དོན་འཁྱོལ་བྱས་པ། རང་སྐྱོང་ལྗོངས་དང་། གྲོང་ཁྱེར། རྫོང་བཅས་རིམ་པ་གསུམ་གྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་སྡེ་ཚན་གྱིས་སྔ་རྗེས་སུ་འབོད་སྐུལ་ཡི་གེ་དང“འཕྲིན་ཡིག་གཅིག” ཞལ་པར་ནས་འཚམས་འདྲི་སོགས་བརྒྱུད་རྒྱ་ཆེའི་གྲྭ་བཙུན་གྱི“འདུ་ཤེས་གསུམ”གྱི་དྲིལ་བསྒྲགས་སློབ་གསོའི་ཕན་འབྲས་དངོས་ཡོད་ཀྱི་བྱ་སྤྱོད་ལ་འགྱུར་བར་ཁྲིད་སྟོན་བྱས་ཤིང་། སྣེ་ཁྲིད་དེ་དགོན་སྡེར་ཐོས་བསམ་བྱས་པ་དང་འབྲེལ་དུས་ཐོག་ཏུ་སྔོ་ཚལ་དང་། ཤིང་འབྲས། རྩམ་པ། གསོལ་སྨན་སོགས་དངོས་ཟོག་ཏུན་60ལྷག་ཙམ་བསྐྱལ་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“མི་དམངས་གོང་དུ་བཀུར་བའི”འདུ་ཤེས་གྲྭ་བཙུན་མི་རེ་ངོ་རེའི་སེམས་ལ་ཟུག་པར་བྱས་པས། ང་ཚོའི་ཆོས་ལུགས་ལས་རིགས་ནས་བཀའ་དྲིན་སྙིང་འཆང་ཞུ་བཞིན་ཡོད། བཀྲས་ལྷུན་དགོན་དང་། ས་སྐྱ་དགོན། ངོར་དགོན་སོགས་དགོན་པའི་དགེ་འདུན་པས་ནད་ཡམས་སྔོན་འགོག་དང་ཚོད་འཛིན་གྱི་འཐབ་ས་མདུན་མར་ཞབས་འདེགས་ཞུ་བར་འགྲོ་བའི་རེ་འདུན་ཞུས་པ་དང་། བླ་སྤྲུལ་སྐྱེས་ཆེན་དང་དགོན་སྡེ་ཁག་གཅིག་གིས་སྤྱི་ཚོགས་ཀྱི་འགན་འཁྲི་ཕྲག་ཏུ་ཁུར་ནས་ཐབས་ལམ་སྣ་མང་བརྒྱུད་རིམས་འགོག་དངོས་ཟོག་གྲབས་གསོག་གནང་སྟེ་ཡུལ་དེ་གའི་ནད་ཡམས་འགོག་པའི་འཐབ་ས་དང་པོར་བསྐྱལ་ཡོད། ཆ་རྐྱེན་འཛོམས་པའི་དགོན་སྡེས་ད་དུང་གྲྭ་བཙུན་གྱི་ཉིང་སྐྱུར་བརྟག་དཔྱད་རུ་ཁག་བཙུགས་ཏེ་འབྲེལ་ཡོད་སྡེ་ཚན་ལ་གཞོགས་འདེགས་བྱས་ནས་ཉིང་སྐྱུར་མ་དཔེ་ལེན་རོགས་བྱས་ཡོད། ད་བར་རང་རེའི་གྲོང་ཁྱེར་གྱི་ཆོས་ལུགས་ལས་རིགས་ནས་ནད་ཡམས་འགོག་པའི་འཐབ་ས་དང་པོར་སྒོར་ཁྲི་1040ལྷག་རི་བའི་དངོས་ཟོག་ཞལ་འདེབས་བརྒྱབ་ཡོད།

གཉིས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་ནན་ཏན་བྱས་ཏེ“འདུ་ཤེས་གསུམ”གྱི་དྲིལ་བསྒྲགས་སློབ་གསོར་སྐུལ་འདེད་ཏན་ཏིག་བཏང་བ། གཞིས་རྩེ་གྲོང་ཁྱེར་ནང་བསྟན་མཐུན་ཚོགས་ཀྱིས་ནང་བསྟན་མཐུན་ཚོགས་ཀྱི་འགན་ནུས་དང་འབྲེལ་ཟམ་ལྟ་བུའི་ནུས་པ་བཏོན་ཅིང་། གུས་པས་རང་སྐྱོང་ལྗོངས་སྒྲོག་འགྲེལ་ཚོགས་པའི་སྒྲོག་འགྲེལ་ཡན་ལག་ཚོགས་པ་གཉིས་པའི་ཚོགས་གཙོ་གཞོན་པ་དང་གཞིས་རྩེ་གྲོང་ཁྱེར་སྒྲོག་འགྲེལ་ཚོགས་པའི་སྒྲོག་འགྲེལ་ཡན་ལག་ཚོགས་པ་དྲུག་པའི་རྒྱུན་ལས་ཚོགས་གཙོ་གཞོན་པའི་འགན་ཁུར་ནས། ཏང་གི་ཚོགས་ཆེན་ཉི་ཤུ་པའི་སྙན་སྒྲོན་དང་རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལ་སྣེ་ཁྲིད་ནས་ཞིབ་འཇུག་སློབ་སྦྱོང་ནན་ཏན་བྱས་པ་དང་། ཧྲུའུ་ཅི་ཝང་ཅུན་ཀྲེང་གིས་ལྗོངས་ཡོངས་ཀྱི་ཆོས་ལུགས་ལས་རིགས་སུ“རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཀྱི་སློབ་གསོ་གཏིང་ཟབ་སྤེལ་དགོས་པའི་སྐུལ་སློང་བཀོད་སྒྲིག་ཚོགས་འདུར་གནང་བའི་གསུང་བཤད་ཀྱི་དགོངས་དོན་སློབ་སྦྱོང་བྱས་པ། གཞིས་རྩེ་གྲོང་ཁྱེར་ལ“འདུ་ཤེས་གསུམ”གྱི་དྲིལ་བསྒྲགས་སློབ་གསོའི་ལག་བསྟར་ཇུས་གཞི་བཟོ་རོགས་བྱས་པ། “སྒྲོག་འགྲེལ་བྱེད་སྟངས་དྲུག”དང“སློབ་གསོ་བཅུ་གཉིས”གསར་གཏོད་བྱས་ནས་བཏོན་པ།“དགོན་སྡེ་རེར་ཚོགས་པ་རེ”འཛུགས་པར་སྐུལ་འདེད་བཏང་བ། དགོན་སྡེར“ཁྲིམས་སྐྱོང་འཆད་སྟེགས”བཙུགས་པ། དགོན་སྡེར་ཁྲིམས་ལུགས་བློ་འདྲི་བ་མངགས་ཏེ་གྲྭ་བཙུན་གྱི་ཁྲོད་ནས་ཁྲིམས་ལུགས་ཤེས་མཁན་གསོ་སྐྱོང་བྱས་ཡོད། མིག་སྔར་གཞིས་རྩེ་གྲོང་ཁྱེར་གྱིས་རིགས་ཁག་གི་སློབ་སྦྱོང་དང་སྒྲོག་འགྲེལ་ཐེངས་650ལྷག་ཙམ་བྱས་པ་དང་། གྲྭ་བཙུན་གྱིས་མྱོང་ཚོར་བརྗོད་པའི་ཡི་གེ་4400ལྷག་ཙམ་བྲིས་པ། དྲིལ་བསྒྲགས་དཔྱད་ཡིག་ཁག་8000ལྷག་ཙམ་སྤྲད་པ། རྒྱལ་ཁབ་ཀྱི་སྤྱི་སྤྱོད་སྐད་ཡིག་ལ་ཚོད་རྒྱུགས་དང་གཏམ་བཤད་འགྲན་སྡུར་ཁག་150ལྷག་གཉེར་བ། ཡིག་གཟུགས་བརྩམས་ཆོས་150ལྷག་ཙམ་བསྡུས་པ་བཅས་ལས་མི་ཐེངས་ཁྲི་2.75ལྷག་ཙམ་ལ་སློབ་གསོ་ཐེབས་ཡོད།

གསུམ་ནས། ལས་འགན་དང་འགན་འཁྲིར་གཞིགས་ནས་རང་འགུལ་ངང་བྱས་རྗེས་བཞག་པ། ཏང་གི་ཚོགས་ཆེན་ཉི་ཤུ་པའི་སྙན་སྒྲོན་དུ“རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས”བྱས་ཏེ་ཆོས་ལུགས་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་བྱེད་དགོས་ཞེས་ཁ་གསལ་བཏོན་ཡོད། གཞིས་རྩེའི་ནང་བསྟན་མཐུན་ཚོགས་ཀྱི་འགན་ཁུར་བའི་ངོས་ནས། ངས་ཏང་གི་ཚོགས་ཆེན་ཉི་ཤུ་པའི་དགོངས་དོན་མཛུབ་ཁྲིད་དུ་བྱས་ཏེ“ཚད་གཞི་བཞི”ལ་སྣེ་ཁྲིད་ནས་བརྩི་སྲུང་དང“བཞི་ལྡན་གྲྭ་བཙུན་བཟང་པོ”ཧུར་ཐག་བྱས་ཏེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཆོས་ལུགས་སྐོར་གྱི་སྲིད་ཇུས་ཁྲིམས་སྲོལ་སློབ་སྦྱོང་དང་དྲིལ་བསྒྲགས་དང་། རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་དང་ཁྱབ་གདལ། བསྟན་དོན་དགོངས་འགྲེལ་དང་། ཕྱོགས་ཡོངས་ནས་ཆོས་ལུགས་ནན་པོས་སྐྱོང་བ། ཆོས་སྲོལ་སྡོམ་ཁྲིམས་འཛུགས་སྐྱོང་ལ་ཤུགས་སྣོན་རྒྱག་པ་སོགས་ཀྱི་ཐད་མིག་དཔེ་བཏོན་ཏེ་གྲོང་ཁྱེར་ཡོངས་ཀྱི་ཆོས་ལུགས་ལས་རིགས་ཀྱི་སྣེ་ཁྲིད་ནས“འཛུགས་གཏོད་བཞི”དང“མདུན་གྲལ་དུ་སླེབས་པ་བཞི”ལ་སྐུལ་འདེད་གཏོང་བའི་ཐད་ལེགས་སྐྱེས་ཧུར་ཐག་འབུལ་གྱི་ཡོད།

(རང་སྐྱོང་ལྗོངས་ཀྱི་སྲིད་གྲོས་ཨུ་ཡོན་དང་། ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་གཞོན་པ། གཞིས་རྩེ་གྲོང་ཁྱེར་ནང་བསྟན་མཐུན་ཚོགས་ཀྱི་ཚོགས་གཙོ)