ཉེ་བའི་ལོ་ཤས་རིང་། སྙེ་མོ་རྫོང་གིས་ཕུན་སུམ་ཚོགས་པའི་མངོན་མིན་རིག་གནས་ཀྱི་ཐོན་ཁུངས་ལ་བརྟེན་ནས་མངོན་མིན་རིག་གནས་ཤུལ་བཞག་གི་ཐོན་ལས་གསར་གཏོད་དང་འཕེལ་རྒྱས་གཏོང་བ་དང་། མི་རིགས་ཀྱི་རིག་གནས་རྒྱུན་འཛིན་བྱེད་པ། མངོན་མིན་རིག་གནས་ཤུལ་བཞག་གི་གསོན་ཤུགས་དང་རྒྱུན་འཛིན་ནུས་པ་ཆེ་རུ་ཏན་ཏིག་གཏོང་བ་བཅས་བྱས་ཏེ་ས་གནས་དེ་གའི་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ཡོང་ཆེད་ཐབས་ལམ་ཡངས་སུ་གཏོང་གི་ཡོད་པ་རེད། “སྙེ་མོའི་མཆོག་ནོར་གསུམ”ནི་མཛེས་སྡུག་རྣམ་པར་བཀྲ་བའི་མེ་ཏོག་ཅིག་དང་འདྲ་བར་དེ་བས་ཡིད་དབང་འཕྲོག་པའི་དུས་རབས་ཀྱི་བཀྲག་མདངས་འཚེར་བཞིན་ཡོད།

སྙེ་མོའི་སྤོས། ཕྱུག་འགྱུར་ལམ་བུ་གསར་པ་བཏོད།

ཐོན་པ་གྲོང་རྡལ་ནི་སྙེ་མོའི་སྤོས་ཐོན་ཡུལ་གཙོ་བོ་ཡིན་ཞིང་། ས་གནས་དེ་གའི“ཆུ་འཐག་སྤོས”ལག་རྩལ་ལ་ལོ་ངོ་1300ལྷག་ཙམ་གྱི་ལོ་རྒྱུས་ལྡན། 2008ལོར་སྤོས་བཟོ་བའི་ལག་རྩལ་དེ་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ནང་བཅུག་པ་དང་སྦྲགས། ལོ་ངོ་སྟོང་རིང་རྒྱུན་འཛིན་བྱས་པའི་སྙེ་མོའི་སྤོས་རྒྱལ་ཁབ་ཀྱིས་གཙོ་གནད་ཐོག་སྲུང་སྐྱོང་བྱེད་པའི་མངོན་མིན་རིག་གནས་ཤུལ་བཞག་རྣམ་གྲངས་ཀྱི་གྲས་ཤིག་ཏུ་གྱུར།

གསར་འགོད་པ་ཉེ་རིང་གང་སར་སྐད་གྲགས་ཆོད་པའི“བོད་སྤོས་ཆེ་མོ”ཚེ་རིང་རྡོ་རྗེའི་ཁྱིམ་དུ་སྐྱོད་སྐབས། གྲོང་མི་འགའ་ཞིག་གིས་སྤོས་སྟར་པ་བསྒྲིགས་ནས་སྒོ་རའི་ནང་ཉི་སྐམ་གཏོང་བཞིན་འདུག

“ང་ཚོའི་ནང་མི་མི་རབས་ཁ་ཤས་ཚང་མས་སྤོས་བཟོ་ཤེས་ཀྱི་ཡོད། ང་ལོ་16ལ་སླེབས་སྐབས་སོ་སོས་སྤོས་བཟོ་གི་ཡོད། དེ་སྔོན་ཞིང་དལ་སྐབས་ང་ཚོས་སྤོས་ཁུར་ནས་ལྷ་ས་དང་གཞིས་རྩེར་འཚོང་བར་འགྲོ་གི་ཡོད། ཉུང་ན་ཉིན་དྲུག་བདུན་དང་མང་ན་ཟླ་ཕྱེད་རིང་ཡོང་འབབ་སྒོར་ཆིག་སྟོང་བྱུང་ན་དཔེ་མི་སྲིད་པའི་མང་པོ་རེད”ཅེས་ཚེ་རིང་རྡོ་རྗེས་དྲན་གསོ་བྱེད་བཞིན་དུ“ལོ་འདི་དག་རིང་། སྲིད་གཞུང་གི་རོགས་སྐྱོར་འོག་ངས་སྤོས་བཟོ་བའི་རམ་འདེགས་འཕྲུལ་འཁོར་ཉོས་ནས་སྤོས་ཀྱི་རྒྱུ་ཆའི་སྤུས་ཚད་ལ་འགྱུར་བ་མི་གཏོང་བའི་རྨང་གཞིའི་ཐོག་ཐོན་སྐྱེད་བྱེད་ཐུབ་ཡོད། 2021ལོར་སྤོས་བཙོངས་པའི་ཡོང་འབབ་སྒོར་ཁྲི་53བྱུང”ཞེས་བཤད།

ཡོང་འབབ་མང་དུ་སོང་བ་དང་བསྟུན་ནས་ཚེ་རིང་རྡོ་རྗེས་སྔར་ཡོད་ཀྱི་ཁང་པར་མཛེས་བཟོ་བྱས་པ་མ་ཟད། ལྷ་སར་ཁང་པ་གསར་པ་ཉོས་པ་དང་ད་དུང་ཟོག་འདྲེན་རླངས་འཁོར་ཆུང་གྲས་ཤིག་དང་བྱེས་བགྲོད་རླངས་འཁོར་གཉིས་ཉོས་པས་འཚོ་བའི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ཡོད་པ་རེད། བུ་བྱམས་པ་རྡོ་རྗེས་སློབ་ཆེན་དུ་སྦྱངས་པ་ནི་དྲ་ཐོག་ཚོང་དོན་ཆེད་ལས་ཡིན་ཞིང་། སློབ་གྲྭ་འགྲིམ་རིང་ཁོང་གིས་རང་ཉིད་ཀྱིས་སྦྱངས་པའི་ཤེས་བྱར་བརྟེན་ནས་པ་ཕར་སྤོས་དྲ་ཐོག་ནས་ཕྱིར་ཚོང་བྱེད་པའི་ཐབས་ལམ་ཡངས་སུ་གཏོང་རོགས་བྱས་པར་ལོ་གཅིག་ལ་ཕྱིར་ཚོང་དངུལ་འབོར་སྒོར་ཁྲི་20ལྷག་ཙམ་ཟིན་ཡོད་པ་རེད།

“2021ལོར་ཐོན་པ་གྲོང་རྡལ་གྱི་བོད་སྤོས་མཉམ་ལས་ཁང(ཀུང་སི)30ལྷག་ཙམ་ལ་སྤོས་ཀྱི་ཐོན་རྫས་རིན་ཐང་སྒོར་ཁྲི་3020ཟིན་པ་དང་བྲིན་ཚོང་ཡོང་འབབ་སྒོར་ཁྲི་1713ཟིན་ཡོད” ཅེས་ཐོན་པ་གྲོང་རྡལ་གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པ་ཀྲང་ཧའེ་ཤིན་གྱིས་ངོ་སྤྲོད་བྱས།

ཞོ་ལེགས་ཀྱི་བོད་ཤོག ལོ་ངོ་སྟོང་གི་ལོ་རྒྱུས་རྒྱུན་འཛིན་བྱེད།

“ཞོ་ལེགས་བོད་ཤོག་ཆུས་སྦོངས་ན་མི་རལ་བ་དང་ལོ་ངོ་སྟོང་སོང་ཡང་མི་རུལ” ཞོ་ལེགས་བོད་ཤོག་གི་ཐུན་མོང་མ་ཡིན་པའི་ལག་རྩལ་དང་སྤུས་ཀར་བརྟེན་ནས་བོད་ཤོག་ཆེ་གྲས་གསུམ་གྱི་གྲས་སུ་ཚུད་པ་དང་། ལོ་ངོ་1300ལྷག་ཙམ་གྱི་ལོ་རྒྱུས་ལྡན། དེའི་བཟོ་རྩལ་ཡང་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་གྲས་སུ་བཅུག་པ་རེད།

ཞོ་ལེགས་གྲོང་ཚོའི་ལོ་བདུན་ཅུར་སླེབས་པའི་ཚེ་རིང་སྟོབས་རྒྱལ་ནི་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་རྣམ་གྲངས་ཀྱི་བོད་ཤོག་བཟོ་རྩལ་གྱི་མཚོན་བྱེད་རང་བཞིན་གྱི་རྒྱུན་འཛིན་པ་ཞིག་རེད། ལོ་16ནས་ཤོག་བུ་བཟོ་བའི་ལག་རྩལ་སྦྱངས་པ་ནས་ད་བར་ཚེ་རིང་སྟོབས་རྒྱལ་གྱིས་ཤོག་བུ་བཟོ་བའི་ལས་ལ་འབད་འབུངས་ཆེན་པོས་སྤྲོ་བ་བརྟས། ཁོང་དགའ་འོས་པ་ཞིག་ནི་བུ་གཉིས་ཀའི་ཤོག་བཟོའི་ལག་རྩལ་ཡང་ཉིན་རེ་བཞིན་བྱང་ཆུབ་ཏུ་འགྲོ་བཞིན་ཡོད་པ་དང་། བུ་རྒན་པ་སྐལ་བཟང་བསྟན་འཛིན་ད་དུང་ལྷ་ས་གྲོང་ཁྱེར་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པར་བདམས་པ་དང་ཚ་མོ་ཕུར་སྒྲོན་དང་བསྟན་སྐྱིད་ཀྱང་ལག་རྩལ་སྦྱོང་བའི་གྲལ་དུ་ཞུགས་ཡོད། སྙེ་མོ་རྫོང་སྲིད་གཞུང་གི་རོགས་རམ་འོག་ཚེ་རིང་སྟོབས་རྒྱལ་གྱིས་ཞོ་ལེགས་བོད་ཤོག་ཞིང་འབྲོག་པའི་ཆེད་ལས་མཉམ་ལས་ཁང་བཙུགས་པ་དང་འབྲེལ་རྫོང་གྲོང་དུ་ཤོག་བུ་བཟོ་བ་དང་། འགྲེམས་ཚོང་། བརྒྱུད་ཁྲིད་བཅས་གཞི་གཅིག་ཏུ་འདུས་པའི་བོད་ཤོག་ཚོང་ཁང་ཞིག་གཉེར་གྱི་ཡོད།

ཉེ་བའི་ལོ་ཤས་རིང་། དྲ་ཐོག་ཚོང་ཁང་འཕེལ་རྒྱས་ཕྱིན་པ་དང་བསྟུན་ནས་ཞོ་ལེགས་བོད་ཤོག་བྲིན་ཚད་དང་སྐད་གྲགས་ཆོད་ཚད་ཀྱང་ཟམ་མི་ཆད་པར་ཆེ་རུ་ཕྱིན་ཡོད། “ལོ་ཁ་ཤས་ནང་ཞོ་ལེགས་བོད་ཤོག་དེ་ཐོན་རྫས་རྐྱང་པ་ནས་སྣ་ཁ་10ཙམ་བར་འཕེལ་རྒྱས་ཕྱིན་པས་གནའ་གཞུང་ལེགས་སྒྲིག་དང་། ཡིག་གཟུགས། རི་མོ་བཅས་ཀྱི་དགོས་མཁོ་བསྐངས་པ་མ་ཟད། ད་དུང་ཟིན་བྲིས་དང་ལྒང་བཞུ་སོགས་རིག་གནས་བསམ་བཀོད་ཐོན་རྫས་ཡུལ་སྐོར་ཁྲོམ་རར་བཏོན་ཡོད”ཅེས་སྐལ་བཟང་བསྟན་འཛིན་གྱིས་བཤད། 2021ལོར་མཉམ་ལས་ཁང་གི་གཉེར་སྐྱོང་ཡོང་འབབ་སྒོར་ཁྲི་90ལྷག་ཙམ་ཟིན་ནས་ས་གནས་དེ་གའི་གྲོང་མི་བཅུ་གྲངས་ཐག་ཉེ་སར་ལས་ཞུགས་ཐུབ་པར་སྐུལ་ཁྲིད་བྱས་པ་དང་། སློབ་མ་20ལྷག་ཙམ་ཁྲིད་སྦྱོང་ལག་ལེན་བྱེད་སྒོར་ཞུགས་ཡོད་པ་རེད།

ཕུ་གསུམ་གྱི་རྐོ་དཀྲོལ། བཟོ་བོའི་སྙིང་སྟོབས་སྲུང་སྐྱོང་རྒྱུན་འཛིན་བྱེད།

སྙེ་མོ་རྫོང་ཕུ་གསུམ་ཤང་ལ“རྐོ་དཀྲོལ་གྱི་ཕ་ཡུལ”ཞེས་པའི་མཚན་སྙན་ཡོད་པ་དང་། ཤང་ཡོངས་ཀྱི་དུད་ཚང་ཕྱེད་ཀ་ཙམ་གྱིས་བརྐོས་རྒྱག་པ་དང་དར་ལྕོག་པར་རྒྱག་གི་ལས་ཀ་བྱེད་ཀྱི་ཡོད། ཕུ་གསུམ་གྱི་རྐོ་དཀྲོལ་ལོ་རྒྱུས་སྤྱི་ལོའི་དུས་རབས་བདུན་པ་བར་ཁུངས་འདེད་ཆོག་ཅིང་། དེ་ནི་ཕུ་གསུམ་ཤང་གི་མང་ཚོགས་ཚོས་མི་རབས་ནས་མི་རབས་བར་རྒྱུན་འཛིན་བྱས་པའི་གནའ་བོའི་ལག་རྩལ་ཞིག་རེད། 2009ལོར་ཕུ་གསུམ་གྱི་རྐོ་དཀྲོལ་ལག་རྩལ་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་སྲུང་སྐྱོང་གི་མིང་གཞུང་ནང་བཅུག་པ་རེད།

གསར་འགོད་པ་ལག་ཤེས་ཆེ་མོ་བ་ཀརྨ་ཆོས་གྲགས་ཀྱི་ཁྱིམ་དུ་འབྱོར་སྐབས། ཁོང་བློ་རྩེ་གཅིག་སྒྲིམ་ངང་བརྩམས་ཆོས་ཤིག་ལ་པར་རྐོ་བཞིན་ཡོད་པ་དང་། དེའི་སྤྱི་ཁོག་གསལ་ལ་མཐའ་རིས་འཇམ་པ་དང་མི་སྣའི་གཟུགས་བརྙན་ཇི་མ་ཇི་བཞིན་སྣང་།

བོད་ཡིག་ཡིག་གཟུགས་དང་རྐོ་དཀྲོལ་གྱི་ཁྱིམ་རྒྱུད་དུ་འཚར་ལོངས་བྱུང་བའི་ཀརྨ་ཆོས་གྲགས་བྱིས་དུས་ཀྱི་དྲན་ཤེས་མང་ཆེ་བ་ཡིག་གཟུགས་སྦྱོང་བ་དང་རྐོ་དཀྲོལ་དང་འབྲེལ་བ་ཡོད་པ་རེད། ལོ་13ལ་སླེབས་སྐབས་ཁོང་གིས་རྐོ་དཀྲོལ་དངོས་སུ་སྦྱོང་འགོ་ཚུགས། སྦྱོང་བརྡར་ཡང་ཡང་བྱས་པ་ལས་ལག་པར་ཤ་རོ་སྐྱེས་ཀྱང་། སེམས་པ་ལྷོད་ལ་ཧ་ཅང་བབས་དཀའ། ཀརྨ་ཆོས་གྲགས་ཀྱིས“རྟག་པར་རྩེད་མོ་རྩེ་བའམ་ལེ་ལོར་གཡེང་སྐབས་པ་ཕ་དང་གཅེན་པོས་ངར་སློབ་གསོ་ནན་པོ་རྒྱག་གི་ཡོད”ཅེས་བཤད། ཟླ་ཐོག་ལོ་བརྩེགས་ཀྱི་བསླབ་གཅུན་ནན་པོའི་འོག་ཀརྨ་ཆོས་གྲགས་ཀྱི་ལག་རྩལ་བྱང་ཆུབ་ནས་རང་ཉིད་ཀྱིས་ངེས་པར་དུ་སྒྱུ་རྩལ་རྒྱུན་འཛིན་གྱི་འགན་འཁྲི་འཁུར་དགོས་པ་རིམ་བཞིན་རྟོགས།

“མིག་སྔར་མི་རབས་གསར་པའི་རྒྱུན་འཛིན་པས་རྒན་རབས་ས་ནས་སྲོལ་རྒྱུན་གྱི་ལག་རྩལ་སྦྱངས་པ་དང་དུས་མཚུངས་ཕྱི་ཕྱོགས་སུ་འཚོལ་ཞིབ་ཀྱིས་གསར་གཏོད་ཀྱང་བྱས་ནས་ཕུ་གསུམ་རྐོ་དཀྲོལ་ལ་མི་དེ་བས་མང་བས་དགའ་པོ་བྱེད་པའི་བཟོ་རྩལ་ཐོན་རྫས་སུ་འགྱུར་བ་བྱེད་དགོས” ཀརྨ་ཆོས་གྲགས་ཀྱིས་བརྐོས་པའི་གསོན་ཉམས་དོད་པའི་ཕོ་བྲང་པོ་ཏ་ལའི་བཟོ་རྩལ་ཐོན་རྫས་མཛེས་ལྗོངས་ཁུལ་དུ་བཙོངས་པར་བྲིན་ཁ་རྒྱུག་པོ་ཡོད། དེ་རྗེས་ཁོང་གིས་སླར་ཡང་འབྲི་གཡག་གི་རྐོ་དཀྲོལ་ཐོན་རྫས་བཟོས་པར་ཡུལ་སྐོར་བས་དགའ་པོ་བྱེད་ཀྱི་ཡོད། ད་ཆ་ཁོང་གིས་ཕུ་གསུམ་གྱི་རྐོ་དཀྲོལ་ལག་རྩལ་ལ་བརྟེན་ནས་གསར་སྤེལ་བྱས་པའི་རིག་གནས་བསམ་བཀོད་ཐོན་རྫས་སྣ་ཁ་80ལྷག་ཙམ་ཡོད།

2016ལོར་གྲོང་ཚོའི་ཕྱུག་འགྱུར་སྣེ་ཁྲིད་པ་ཞིག་ཡིན་པའི་ཀརྨ་ཆོས་གྲགས་ཀྱིས་རུ་པ་གྲོང་ཚོའི་བདེ་ལེགས་དཔལ་འབྱོར་བོད་ཡིག་ཡིག་གཟུགས་རྐོ་དཀྲོལ་མཉམ་ལས་ཁང་བཙུགས་ནས་གྲོང་མི་འབབ་འཕར་ཕྱུག་འགྱུར་ཡོང་བར་སྣེ་ཁྲིད་བྱས་པ་དང་། 2021ལོར“མངགས་ཐོ་རྣམ་པའི”ཕྱིར་ཚོང་བྱེད་སྟངས་བརྒྱུད་མཉམ་ལས་ཁང་གི་ཡོང་འབབ་ཁེ་གཙང་སྒོར་ཁྲི་40ལྷག་ཙམ་ཟིན་ཡོད་པ་རེད།

ཉེ་བའི་ལོ་ཤས་རིང་ཀརྨ་ཆོས་གྲགས་ཀྱིས་ད་དུང་གཞོན་ནུའི་ལས་གཏོད་ལས་ཞུགས་ཀྱི་འགྲན་བསྡུར་ཆེ་མོ་སྣ་ཚོགས་ལ་ཞུགས་པ་དང་འབྲེལ་པེ་ཅིང་དང་ཁྲེང་ཏུའུ་སོགས་སུ་མངོན་མིན་རིག་གནས་ཤུལ་བཞག་རིགས་ཀྱི་བརྩམས་ཆོས་འགྲེམས་ཚོགས་ལ་ཞུགས་པས། ཕུ་གསུམ་གྱི་རྐོ་དཀྲོལ་སྐད་གྲགས་ཆོད་ཚད་སྔར་བས་ཆེ་རུ་བཏང་ཡོད་པ་རེད།