མ་ཡུམ་མེས་རྒྱལ་རྟ་བདུན་དབང་པོ་འདྲ། །
མི་རིགས་ང་དྲུག་པད་མའི་འདབ་མ་འདྲ། །
ཉི་མའི་འོད་ཟེར་པད་མར་འཕྲོ་དུས་སུ། །
མེ་ཏོག་པད་མའི་འདབ་མ་མཉམ་བཞད་ཡིན། །
མ་ཡུམ་མེས་རྒྱལ་རྒྱ་མཚོའི་མར་གསར་འདྲ། །
མི་རིགས་ང་དྲུག་ཀུ་མུད་འདབ་མ་འདྲ། །
ཟླ་འོད་ཀུ་མུད་ཕྱོགས་ལ་འཕྲོ་དུས་སུ། །
མེ་ཏོག་ཀུ་མུད་འདབ་མ་མཉམ་བཞད་ཡིན། །
མ་ཡུམ་མེས་རྒྱལ་སྤང་ལྗོངས་སྔོན་མོ་འདྲ། །
མི་རིགས་ང་དྲུག་སྤང་རྒྱན་མེ་ཏོག་འདྲ། །
སྦྲང་ཆར་ཟིལ་མས་སྤང་ལྗོངས་བརླན་དུས་སུ། །
སྤང་རྒྱན་མེ་ཏོག་འདབ་མ་མཉམ་བཞད་ཡིན། །
མ་ཡུམ་མེས་རྒྱལ་གངས་དཀར་ལྷུན་པོ་འདྲ། །
མི་རིགས་ང་དྲུག་གངས་ལྷ་མེ་ཏོག་འདྲ། །
གངས་རིའི་དབུ་འཕང་དགུང་དང་མཉམ་དུས་སུ། །
གངས་ལྷ་མེ་ཏོག་འཛིན་མའི་ཅོད་པན་འདྲ། །
མ་ཡུམ་མེས་རྒྱལ་ས་གཞི་ཆེན་པོ་འདྲ། །
མི་རིགས་ང་དྲུག་མེ་ཏོག་ང་དྲུག་འདྲ། །
མུ་མེད་ས་གཞིར་དྲོད་གཤེར་འཛོམས་དུས་སུ། །
མེ་ཏོག་ང་དྲུག་འདབ་མ་མཉམ་བཞད་ཡིན། །
མ་ཡུམ་མེས་རྒྱལ་མེ་ཏོག་ལྡུམ་ར་འདྲ། །
མི་རིགས་ང་དྲུག་སྣ་ཚོགས་མེ་ཏོག་འདྲ། །
མེ་ཏོག་ལྡུམ་ར་གཡང་གི་སྐྱེད་ཚལ་དུ། །
སྣ་ཚོགས་མེ་ཏོག་བཀྲག་མདངས་མངོན་པར་དོད། །