སྲིད་བཞིའི་མཛེས་སྡུག་མ་ལུས་ཚང་བའི་ལྷ།།
ཡིད་འཕྲོག་ངང་པའི་བུ་མོ་དབྱངས་ཅན་མ།།
བདག་ཡིད་དྲན་པའི་རྨོངས་པ་ཀུན་སེལ་ནས།།
བློ་གྲོས་དགའ་བའི་ཤིས་པ་བསྩལ་དུ་གསོལ།།
ཆར་ལྡན་དབྱར་གྱི་ནམ་ཟླ་ཕར་ལ་ཡོལ།།
མེ་ཏོག་རྙིང་པའི་ལོ་འདབ་ས་ལ་ཟགས།།
སྤྲིན་མེད་ནམ་མཁའ་དྭངས་ཤིང་གཙང་ན་ཡང་།།
ཟླ་བ་མེད་པའི་སྟོན་མཚན་ཡིད་ལ་གཟན།།
ཉི་མའི་གཟི་མདངས་ནུབ་རིའི་ཕག་ལ་ཡིབ།།
ལྗོན་ཤིང་ལོ་འདབ་རླུང་གིས་སིལ་བུར་འཁྱེར།།
སྣ་མང་རྒྱུ་སྐར་ཕྱོགས་མཐར་བཀྲ་མོད་ཀྱང་།།
མཚན་མོའི་མགོན་གཅིག་དྲན་པ་སུ་ཡིས་འགོག།
བཅོ་ལྔའི་ཟླ་བ་ཉི་ཤུའི་དཀྱིལ་ནས་ཡལ།།
གཏིང་མ་ཚེས་དུས་མཇལ་བར་ཞལ་བཞེས་མོད།།
སྤྲིན་མེད་མཚན་ནག་སྨག་རུམ་ཚེས་དུས་རེར།།
དྲན་པའི་གདུང་བས་མཁའ་ལ་བཅེར་ནས་ལྟ།།
ཉི་མ་ནུབ་རིར་བཞུད་པའི་དགོང་ཁའི་དུས།།
གློག་འོད་ཆུ་ནང་འཕྲོས་པའི་འོད་མདངས་ཤིག །
སྒེའུ་ཁུང་ངོས་སུ་ཕོག་པ་མཐོང་བའི་མོད།།
བཅོ་ལྔའི་དུང་ཟླ་ཚེས་སྙན་དྲན་བཞིན་ལྟ།།
འཇིགས་རུང་སྨག་གིས་རི་ལུང་སྒྲིབ་པའི་འོག །
ངམ་ནག་བཞིན་གྱི་ཁྲོ་གཉེར་ངོམས་པའི་དུས།།
དུང་སེམས་འོ་མའི་མདངས་ཅན་བསིལ་ཟེར་མཁན།།
དྲན་པའི་ཀློང་དུ་འཁོར་བ་ཐེངས་གཅིག་མིན།།
ལྷིང་འཇགས་མཚན་མོའི་འགྱུ་བ་ཚེས་པའི་རྗེས།།
ཟླ་བའི་འོད་དཀར་དྲན་པའི་འཁྱམས་པོ་བ།།
སྒེའུ་ཁུང་འཁྲིས་སུ་དུབ་ཅིང་ཉལ་མོད་ཀྱང་།།
རྨི་ལམ་མགྲོན་པོས་སེམས་ཀྱི་ཁོར་ཡུག་དཀྲུགས།།
དུང་དུང་སེམས་ཀྱི་རྒྱལ་མོའི་ཁང་བཟང་ནང་།།
འོད་ལྡན་དྲན་པའི་གདུང་བ་འགོག་མེད་ཀྱང་།།
ཚེས་གསུམ་དཀར་ཆུང་མགྲོན་དུ་མ་སླེབས་བར།།
དགུང་སྔོན་མཐོན་པོར་རེ་བའི་མིག་ཞགས་འཕེན།།
སྟོན་མཚན་མཁའ་ལ་འོད་དཀར་འཚེར་བའི་དུས།།
ཉམ་ཆུང་ཀུ་མོད་དགའ་བའི་བྲོ་གར་འཁྲབ།།
དབྱངས་ཅན་མགྲིན་མཚོར་རོལ་བའི་སྙན་ངག་པས།།
དྲན་པའི་སྙན་ཚིག་དགུང་སྔོན་དབྱིངས་སུ་འཐོར།།
མཐོ་བརྗིད་ཤར་རིའི་ཕྲག་པར་བྱོན་བཞེད་པའི།།
རི་བོང་ཅན་ཁྱོད་དྲན་པའི་གླུ་ཆུང་རེ།།
སྒེའུ་ཁུང་འོག་ནས་ལྷང་ལྷང་གྱེར་པའི་དུས།།
རྒྱུ་སྐར་ཚོགས་ཀྱིས་སྐྱོ་ཡའི་གྲོགས་གདན་བྱེད།།