ཉེ་ཆར་གསར་འགོད་པས་བོད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ནས་ཤེས་རྟོགས་བྱས་པར་གཞིགས་ན། བོད་ལྗོངས་ཟློས་གར་མཁས་ཅན་མཐུན་ཚོགས་ཀྱི་ཀྲུའུ་ཞི་གཞོན་པ་བོད་ལྗོངས་གཏམ་བརྗོད་ཟློས་གར་ཚོགས་པའི་ཚོགས་གཙོ་གཞོན་པ་རིན་ཆེན་དོན་གྲུབ་ལ་གཏམ་བརྗོད་ཟློས་གར《བར་སྐོར་གྱི་སྒོ་ར་བྱང》ཞེས་པའི་ནང་གི་ཕུལ་དུ་བྱུང་བའི་འཁྲབ་སྟོན་དབང་གིས་སྐབས་བཅུ་བདུན་པའི་ཝུན་ཧྭ་འཁྲབ་སྟོན་བྱ་དགའ་ཐོབ་པ་རེད།
ཤེས་རྟོགས་བྱུང་བར་གཞིགས་ན། ཝུན་ཧྭ་བྱ་དགའ་ནི་རང་རྒྱལ་གྱི་ཆེད་ལས་གར་སྟེགས་སྒྱུ་རྩལ་ཁྱབ་ཁོངས་ལ་སྲིད་གཞུང་ནས་སྤྲད་པའི་བྱ་དགའ་མཐོ་ཤོས་ཡིན་པ་དང་། དེའི་དམིགས་ཡུལ་ནི་ཀྲུང་གོའི་ཟློས་གར་བྱ་གཞག་དར་རྒྱས་གོང་འཕེལ་ཡོང་བར་སྐུལ་འདེད་དང་། འཁྲབ་སྟོན་པར་ལྕག་སྐུལ། གཏམ་བརྗོད་ཟློས་གར་གསར་རྩོམ་ལ་ལྕག་སྐུལ། ཟློས་གར་ཚོགས་པའི་མཉམ་སྡེབ་གསར་གཏོད་ལ་ལྕག་སྐུལ་བཅས་གཏོང་ཆེད་རེད།
“གཟི་བརྗིད་མཚན་སྙན་དེའི་རྒྱབ་ཏུ་རིམ་ཁག་འགོ་ཁྲིད་ཀྱི་སེམས་ཁུར་དང་འཁྲབ་སྟོན་པ་གཞན་དག་གི་ཐུན་མོང་འབད་བརྩོན་ཡོད་ལ། བོད་ཀྱི་སྒྱུ་རྩལ་གྱི་ས་རྒྱུ་གཤིན་པོས་ང་ལ་འཚོ་བཅུད་ཀྱང་སྦྱིན་ཡོད། ངས་མུ་མཐུད་གཏམ་བརྗོད་ཟློས་གར་སྒྱུ་རྩལ་གྱི་ཡང་རྩེར་འཛེག་པར་འབད་ཀྱི་ཡིན”ཞེས་རིན་ཆེན་དོན་གྲུབ་ཀྱིས་བརྗོད་པ་རེད།