འདི་ནི་དཔལ་མགོན་རྫོང་གི་སྲོལ་རྒྱུན་རྒྱན་གོས་ཡིན་པ།

 འདི་ནི་ལྷ་རི་རྫོང་གི་མངོན་མིན་རིག་གནས་ཤུལ་བཞག་གི་རྒྱུན་འཛིན་པས་འུར་རྡོ་སླ་བཞིན་པ།

 འདི་ནི་སྙན་རོང་རྫོང་གི་མངོན་མིན་རིག་གནས་ཤུལ་བཞག་གི་དམངས་ཁྲོད་རྒྱུན་འཛིན་པས་ཀོ་ཆས་འཚེམ་བཞིན་པ།

འདི་ནི་དཔལ་མགོན་རྫོང་གི་མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་གི་ཐོག་སོ་གཉིས་པའི་འགྲེམས་ཁུལ་ཡིན་པ།

 འདི་ནི་ཉི་མ་རྫོང་གི་འཁྲབ་སྟོན་པས་འོམ་བུའི་སྒོར་གཞས་འཁྲབ་བཞིན་པ།

དཔལ་མགོན་གྱི་སྒོར་གཞས་ནི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་རེད་ལ། ནག་ཆུའི་ཁྱད་ཆོས་ཟབ་མོ་ལྡན་པའི་ཞབས་བྲོའི་སྟངས་སྟབས་ཤིག་ཀྱང་རེད། དེའི་རུ་སྟར་སྒྲིག་སྟངས་ལ་སྒོར་སྒོར་དང་། སྒོར་ཕྱེད། སྲོང་པོ་དབྱིབས་སོགས་མང་པོ་ཡོད། སྟངས་སྟབས་ནི་གཞས་ཚིག་རེ་རེའི་ནང་དོན་དང་། ཁྱད་ཆོས། དབྱངས་རྟ་བཅས་ལ་གཞིགས་ནས་གར་འགྲོས་ཡང་ཤ་དོད་ལ་ཉམས་དང་ལྡན་པ་ཞིག་ཡོད། འདི་དག་ནི་སྒོར་གཞས་གཞན་ལ་མེད་པའི་ཁྱད་ཆོས་ཤ་སྟག་རེད།

ནག་ཆུའི་མངོན་མིན་རིག་གནས་ཤུལ་བཞག་མང་པོ་གེ་སར་དང་འབྲེལ་བ་ཡོད་པ་དཔེར་ན་གླིང་བྲོ་ལྟ་བུ་རེད། གར་སྟེགས་སུ་སློབ་ཆུང་སློབ་ཕྲུག་མང་པོ་ཧ་ཅང་མངོན་གསལ་དོད་པོར་སྣང་ཞིང་། ཁོ་ཚོས་གེ་སར་རྒྱལ་པོའི་སྐབས་ཀྱི་རྒྱན་གོས་སྤྲས་ནས་བུ་དང་བུ་མོ་སྣོལ་འདྲེས་ཀྱིས་རུ་སྟར་གྲལ་འགྲིག་པོ་བསྒྲིགས་ཡོད། སྙན་འཇེབས་ལྡན་པའི་རོལ་དབྱངས་ཀྱི་འགྱུར་ཁུག་དང་འགྲོགས་ནས་བྲོ་གར་ལྡེམ་ལྡེམ་འཁྱུག་འཁྱུག་འཁྲབ་སྟེ་དུས་བདེ་འཆམ་མཐུན་གྱི་རྣམ་པ་ཞིག་བཏོད་ཡོད།

“གླིང་བྲོ་འདི་རིགས་ནི་རྙིང་མ་བའི་མཚོན་བྱེད་མི་སྣ་འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་གེ་སར་རྒྱལ་པོར་བསྟོད་གླུ་འབུལ་ཆེད་བརྩམས་གནང་བའི་ཞབས་བྲོ་ཞིག་ཡིན་ཞིང་། དེར་ལོ་ངོ་130ལྷག་ཙམ་གྱི་ལོ་རྒྱུས་ལྡན་ཡོད” ནག་ཆུ་གྲོང་ཁྱེར་གྱི་གེ་སར་གྱི་ལོ་རྒྱུས་སྙན་ངག་རྒྱུན་འཛིན་པས“དེའི་ཁྱད་ཆོས་ནི་སྟབས་བདེའི་སྟངས་སྟབས་དང་གོ་བདེའི་གཞས་ཚིག་ལས་དཔའ་བོ་གེ་སར་རྒྱལ་པོའི་གཟུགས་བརྙན་མཚོན་པར་བྱས་ཡོད”ཅེས་ངོ་སྤྲོད་བྱས། དཔལ་མགོན་རྫོང་གི་ཐོན་ལས་གླིང་དུ་གནས་པའི་དཔལ་མགོན་གྱི་མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་གི་ཐོག་སོ་གཉིས་པའི་འགྲེམས་སྟོན་ཚོམས་ཆེན་དུ་སྐྱོད་སྐབས། གནའ་ཉམས་དོད་པའི་དངོས་པོ་རེ་རེས་མི་རྣམས་ཀྱི་ཡིད་ཀྱི་བརྟན་པ་རབ་ཏུ་འཕྲོག་པ་དང་། རྩྭ་ཐང་དང་། གཏལ་པོ། སྦྲ་ནག ཐབ་སོགས་ཀྱིས་མི་རྣམས་ལ་གདོད་མའི་འཚོ་བར་སླེབས་པ་ལྟར་གྱི་སྣང་བ་ཞིག་ངང་གིས་སྦྱིན་གྱི་ཡོད།

“འདི་ནི་བྱང་རྩྭ་ཐང་གི་ཕྱོགས་བསྡུས་རང་བཞིན་གྱི་མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་འབའ་ཞིག་དེ་རེད” “མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་འཛུགས་སྐྲུན་བྱེད་དོན་ནི། མི་དམངས་མང་ཚོགས་ཀྱི་མངོན་མིན་རིག་གནས་ཤུལ་བཞག་སྲུང་སྐྱོང་གི་འདུ་ཤེས་སྔར་བས་ཟབ་ཏུ་བཏང་ནས། བྱང་ཐང་གི་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་བཏང་སྟེ་མངོན་མིན་རིག་གནས་ཤུལ་བཞག་སྲུང་སྐྱོང་གི་སྤྱི་ཚོགས་རྣམ་པ་གཏོད་དགོས”ཞེས་དཔལ་མགོན་རྫོང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཚེ་དབང་གཡུ་སྒྲོལ་གྱིས་གསར་འགོད་པར་བཤད།

མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་གི་འགྲེལ་བཤད་པས་ངོ་སྤྲོད་བྱས་པར་གཞིགས་ན། མངོན་མིན་རིག་གནས་ཤུལ་བཞག་རྟེན་རྫས་བཤམས་མཛོད་ཁང་གི་འགྲེམས་སྟོན་བཀོད་པར་དཔལ་མགོན་གྱི་སྦས་ཡུལ་དང་། དམངས་སྲོལ། མངོན་མིན་རིག་གནས་ཤུལ་བཞག་རྣམ་གྲངས་ཀྱི་སྲོལ་རྒྱུན་གསོ་རིག དམངས་ཁྲོད་རིག་གནས་སོགས་འགྲེམས་ཁུལ་མང་པོ་ཞིག་ཡོད་ཅིང་། བྱང་ཐང་གི་མངོན་མིན་རིག་གནས་ཤུལ་བཞག་འཕེལ་རྒྱས་ལོ་རྒྱུས་ཀྱི་ཉར་ཚགས་དངོས་པོ་གལ་ཆེན་སྣ་ཚོགས་གཅིག་སྡུད་འགྲེམས་སྟོན་བྱས་ཡོད་པ་དཔེར་ན། “ཏི་ཀའོ་ཅ”དང་། “ཐེ་གེ” སྐུད་རྩེད་སོགས་དང་། བྱང་ཐང་གི་གཉེན་སྒྲིག་ལུགས་སྲོལ་དང་། དཔལ་མགོན་གྱི་ཡུལ་སྐད། དཔལ་མགོན་གྱི་ཤུར་རྩི། འདམ་གླིང་། འཕང་ལོ། ཚ་རུ་སོགས་ཀྱི་བཟོ་རྩལ་170ལྷག་ཙམ་ཡོད།

“‘འུར་རྡོ’ནི་གེ་སར་རྒྱལ་པོའི་དུས་བར་ཁུངས་འདེད་ཆོག་པ་དང་ལོ་ངོ་སྟོང་ཕྲག་གི་ལོ་རྒྱུས་ལྡན་ཡོད”ཅེས“འུར་རྡོ”རྒྱུན་འཛིན་པ་སྲི་ཐར་གྱིས་ངོ་སྤྲོད་བྱེད་ཀྱིན་སྐེད་པ་ནས་འུར་རྡོ་གཅིག་བཏོན་ཏེ། དེ་གར་ཡོད་པའི་ལྟ་སྐོར་བར“འུར་རྡོ”སླ་སྟངས་ངོ་སྤྲོད་བྱས། སྲི་ཐར་གྱི་སྐད་ཆ་ལས་ང་ཚོས“འུར་རྡོའི”དམིགས་བསལ་ཆེ་ཤོས་ནི་ཆ་ཤས་སོ་སོ་དང་ལས་རིམ་སོ་སོར་དེ་མཚུངས་ཀྱི་གེ་སར་ལོ་རྒྱུས་སྙན་ངག་ལེན་དགོས་པ་ཤེས་བྱུང་། དེ་ཡང་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་དང་སྤྱིར་བཏང་ལག་ཤེས་པའི་དབར་གྱི་ཁྱད་པར་རེད།

དཔལ་མགོན་རྫོང་ཉི་མ་ཤང་ལ“གཞས་ཆེན་གྱི་ཕ་ཡུལ”ཞེས་བརྗོད་སྲོལ་ཡོད། དཔྱད་གཞི་ལས་མངོན་པར། གཞས་ཆེན་ནི་གླུ་གཞས་མི་འདྲ་བའི་ཁྲོད་ནས་བསྡུས་ཏེ་གསར་རྩོམ་བྱས་པ་ཞིག་ཡིན་པ་དང་། ནང་དོན་དེ་ལོ་ངོ་ཆིག་སྟོང་ལྷག་ཙམ་གྱི་གོང་དུ་ཕ་མེས་ཚོ་བྱང་ཐང་ནས་ཚྭ་ལེན་དུ་འགྲོ་བའི་ཚྭ་གཞས་དང་། བོད་ལྷོ་རྒྱུད་ཀྱི་འབྲུ་ཚང་དུ་སླེབས་པའི་སྐབས་ཀྱི་འབྲུ་གཞས། བལ་འབྲེག་པའི་སྐབས་ཀྱི་བལ་གཞས། ཞོ་དཀྲོག་པའི་སྐབས་ཀྱི་ཟོམ་གཞས། རི་ཀླུང་ལ་བསྟོད་པའི་ལ་གླུ། ཕྱུགས་རིགས་ཤ་ཤེད་རྒྱས་པའི་རྗི་གླུ་སོགས་ལས་བྱུང་བས། བོད་བྱང་ཐང་མི་དམངས་ཀྱི་བློ་གྲོས་དང་མཛེས་སྡུག་ལྡན་པའི་འཚོ་བར་བཅངས་པའི་རེ་སྨོན་ཡང་མཚོན་གྱི་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ལོ་རྒྱུས་རིག་གནས་ཤུལ་བཞག་ལས་འདས་ཟིན་པའི་གསོན་ཉམས་དོད་པའི་གཏམ་རྒྱུད་ཤེས་ཐུབ་ལ། དེང་དུས་དང་སླད་ཕྱིན་ལ་ཡང་ཤུགས་རྐྱེན་ཟབ་མོ་ཐེབས་བཞིན་ཡོད། དེ་ང་ཚོར་དབང་ལ་བུ་རབས་ཚ་རྒྱུད་ལ་ཡང་དབང་བས། ལོ་རྒྱུས་རིག་གནས་ཤུལ་བཞག་སྲུང་སྐྱོང་ཡག་པོ་དང་རྒྱུན་འཛིན་ཡག་པོ་བྱེད་པ་ནི། ལོ་རྒྱུས་ལ་འགན་འཁུར་བ་དང་མི་དམངས་ལ་འགན་འཁུར་བ་ཞིག་རེད་ཅེས་གསུངས་ཡོད།

དཔལ་མགོན་ཙམ་མ་ཡིན་པར། ཉེ་བའི་ལོ་ཤས་རིང་ནག་ཆུ་གྲོང་ཁྱེར་གྱིས་སྤྱི་ཁྱབ་ཧྲུའུ་ཅིའི་བཀའ་མངགས་བློ་ལ་བརྟན་པོར་བཅངས་ཏེ། མངོན་མིན་རིག་གནས་ཤུལ་བཞག་སྲུང་སྐྱོང་དང་། བེད་སྤྱོད། རྒྱུན་འཛིན་སོགས་ཀྱི་ཐད་ལས་དོན་འབོར་ཆེན་བསྒྲུབས་ཤིང་། ཉི་མ་རྫོང་འོམ་བུ་ཤང་གི་འོམ་བུའི་སྒོར་གཞས་དང་སྦྲ་ཆེན་རྫོང་ཧོར་སྒང་རྩེའི་སྒོར་གཞས་སོགས་ཚང་མ་མངོན་མིན་རིག་གནས་ཤུལ་བཞག་གི་རྣམ་གྲངས་ལ་རེ་འདུན་ཞུས་པ་དང་མངོན་མིན་རིག་གནས་ཤུལ་བཞག་གི་རྒྱུན་འཛིན་པའི་དཔུང་ཁག་ཀྱང་རིམ་བཞིན་སྟོབས་ཆེར་སོང་ཡོད། མིག་སྔར་དཔལ་མགོན་ཁོ་ནར་རྒྱལ་ཁབ་རིམ་པའི་རྣམ་གྲངས་2དང་། རང་སྐྱོང་ལྗོངས་རིམ་པའི་རྣམ་གྲངས་6 གྲོང་ཁྱེར་རིམ་པའི་རྣམ་གྲངས་4 རྫོང་རིམ་པའི་རྣམ་གྲངས་102བཅས་ཡོད་པ་དང་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་1དང་། རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་10 རྫོང་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་105བཅས་ཡོད་པ་རེད།

ནག་ཆུ་གྲོང་ཁྱེར་རིག་གནས་ཡུལ་སྐོར་ཅུས་ཀྱི་ཏང་ཙུའི་ཧྲུའུ་ཅི་གཞོན་པ་དང་ཅུས་ཀྲང་གཞོན་པ་ཁྲེང་ཁྲུང་ཆི་ཡིས་ནག་ཆུས་མངོན་མིན་རིག་གནས་ཤུལ་བཞག་འགྲེམས་འཁྲབ་ཀྱི་བྱེད་སྒོ་དང་མངོན་མིན་རིག་གནས་ཤུལ་བཞག་གི་རྟེན་རྫས་བཤམས་མཛོད་ཁང་འགོ་འཛུགས་སར་བྱས་ཏེ་རྫོང་དང་ཆུས་ཁག་གི་རིག་གནས་ཐོན་ཁུངས་སྔོག་འདོན་དང་འཚོལ་ཞིབ་གཏིང་ཟབ་དང་ཡུལ་དེ་གའི་མངོན་མིན་རིག་གནས་ཤུལ་བཞག་རྒྱུན་འཛིན་ཡག་པོ་བྱས་ཏེ་བྱང་རྩྭ་ཐང་གི་མངོན་མིན་རིག་གནས་ཤུལ་བཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་གི་ཡིན་ཞེས་བརྗོད།