-
དཔལ་མགོན་གྱི་གཞས་ཆེན། བྱང་ཐང་གི་འོད་མདངས་བཀྲ་བའི་མུ་ཏིག
-
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། | རྩོམ་པ་པོ། བསོད་ནམས་མཚོ་མོ། | སྤེལ་དུས། 2022-06-25
▲ དཔལ་མགོན་གཞས་ཆེན་གྱི་རྒྱུན་འཛིན་པ་ཆུང་ཆུང་།
རིག་གནས་དར་འཕེལ་ཆེ་བའི་དེང་གི་དུས་སུ། བྱང་རྩྭ་ཐང་ནས་དར་བའི་དཔལ་མགོན་གྱི་གཞས་ཆེན་ནི་ཉི་མ་ཤང་དང་དཔལ་མགོན་རྫོང་ཙམ་མ་ཟད། ཐ་ན། ནག་ཆུ་གྲོང་ཁྱེར་གྱི་རིག་གནས་ཀྱི་མཚོན་བྱེད་ཅིག་དང་། བོད་ཀྱི་རིག་གནས་ཀྱི་མཚོན་བྱེད་ཀྱི་གྲས་ཤིག་ཏུའང་བགྲང་ཆོག
ངག་རྒྱུན་ལྟར་ན། དཔལ་མགོན་གྱི་གཞས་ཆེན་ནི་ལོ་1000ལྷག་ཙམ་གོང་དུ་བོད་ཀྱི་མེས་པོ་ཚོས་བྱང་ཐང་ནས་ཚྭ་ལེན་སྐབས་ཀྱི་གླུ་དང་། བལ་འབྲེག་སྐབས་ཀྱི་གླུ། འོ་མ་འཇོ་སྐབས་ཀྱི་གླུ། རི་ཆུ་ཀླུང་གསུམ་ལ་བསྟོད་པའི་གླུ། རྟ་ནོར་ལུག་གསུམ་ཤ་ཤེད་རྒྱས་པར་བསྔགས་པའི་རྫི་གླུ་སོགས་གླུ་མི་འདྲ་བ་སྣ་ཚོགས་ཀྱི་སྙིང་བཅུད་འདུས་ནས། བྱང་ཐང་དུ་འོད་མདངས་བཀྲ་བའི་མུ་ཏིག་ལྟ་བུའི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་དཔལ་མགོན་གྱི་གཞས་ཆེན་དར་བར་གྲགས། 2011ལོར། དཔལ་མགོན་གྱི་གཞས་ཆེན་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་དུ་ཚུད་པ་རེད།
དཔལ་མགོན་རྫོང་ཀྲུང་གོ་རྡོ་སྣུམ་སློབ་ཆུང་གི་འགོ་ཁྲིད་ལྕགས་ཐར་འབུམ་གྱིས། མངོན་མིན་རིག་གནས་སློབ་གྲྭར་དར་སྤེལ་གཏོང་དོན་གཙོ་བོ་ནི། རྒྱུན་གཏན་འཚོ་བའི་ཁྲོད་གཅིག་ནས་གྲོང་མི་མང་ཆེ་བ་ལས་བྲེལ་ཆེ་བས་ཁོམ་པ་མེད་པ་དང་། གཉིས་ནས་ཁ་གསབ་རོགས་དངུལ་སྤྲོད་དགོས་པས་དཔལ་འབྱོར་གྱི་ཁུར་པོ་ལྕི་པོ་ཡོད། དེར་བརྟེན། སློབ་གྲྭའི་ངོས་ནས་བརྗོད་ན། མི་ཚོགས་མང་བ་དང་། སྒྲིག་འཛུགས་བྱེད་བདེ་བ། སློབ་བདེ་བ། སློབ་མའི་ལོ་ཚོད་སྙོམས་ཤིང་དགའ་ཞེན་དང་ལྡན་པས་མངོན་མིན་རིག་གནས་རྒྱུན་འཛིན་བྱེད་པར་ཆ་རྐྱེན་བཟང་པོ་འཛོམས་ཡོད་པ་རེད། དེ་སྔ་ཆེད་མངགས་དཔལ་མགོན་གཞས་ཆེན་གྱི་དགའ་མོས་འཛིན་གྲྭ་གཉེར་ནས་གཟའ་འཁོར་རེར་ཞབས་བྲོ་ཐེངས་གཅིག་ལས་སྦྱོང་ཐུབ་ཀྱི་མེད། སླད་ཕྱིན་དཔལ་མགོན་གཞས་ཆེན་རྒྱུན་འཛིན་དེ་བས་ཡག་པོ་ཐུབ་ཆེད། གཞས་ཆེན་འདི་ཉིད་སློབ་མ་ཚང་མར་ཁ་ཕྱོགས་པའི་སློབ་གསེང་ལུས་རྩལ་ལ་འགྱུར་ཐུབ་པ་བྱེད་ཀྱི་ཡིན་ཞེས་བརྗོད།