འདི་ནི་རང་སྐྱོང་ལྗོངས་མང་ཚོགས་སྒྱུ་རྩལ་ཁང(ལྗོངས་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས)གི་2020ལོའི་རིན་མེད་སྒོ་དབྱེའི་རྒྱུན་རྣམ་གསོ་སྦྱོང་འཛིན་གྲྭའི་སློབ་མཇུག་འགྲིལ་བའི་མཛད་སྒོའི་ཐོག་ལོ་ཆུང་བྱིས་པའི་ལྷ་མོའི་འཛིན་གྲྭའི་སློབ་མ་ཚོས་ལྷ་མོ་འཁྲབ་བཞིན་པ།

འདི་ནི་བུ་ཆུང་འབྲིང་བས་འཁྲབ་པའི་སྲོང་བཙན་སྒམ་པོ་ཡིན་པ།

འདི་ནི་གསོ་སྦྱོང་བྱེད་པར་ཡོང་མཁན་སློབ་མ་ཚོས་ལག་ཐོགས་ཁ་པར་གྱི་སྐད་འཕྲིན་ཚོགས་པར་བརྟེན་ནས་རྒན་བུ་ཆུང་འབྲིང་བས་སློབ་ཁྲིད་བྱེད་པའི་ལྷ་མོའི་ཤེས་བྱ་ནན་ཏན་ངང་སྦྱོང་བཞིན་པ།

འདི་ནི་བུ་ཆུང་འབྲིང་བས་རང་སྐྱོང་ལྗོངས་མང་ཚོགས་སྒྱུ་རྩལ་ཁང་གི་རིན་མེད་སྒོ་དབྱེའི་རྒྱུན་རྣམ་གསོ་སྦྱོང་གི་ལོ་ཆུང་བྱིས་པའི་ལྷ་མོ་འཛིན་གྲྭའི་བུའི་ཚོགས་ཆུང་ལ་ལྷ་མོའི་གཞས་གདངས་སློབ་བཞིན་པ།

འདི་ནི་སློབ་མའི་ཁྱིམ་བདག་གིས་རྒན་བུ་ཆུང་འབྲིང་བར་ཁ་བཏགས་གཡོགས་ནས་ཐུགས་རྗེ་ཆེ་ཞུ་བཞིན་པ།

འདི་ནི་ལོ་ཆུང་བྱིས་པའི་ལྷ་མོ་འཛིན་གྲྭའི་སློབ་མ་ཁག་གཅིག་གིས་ལྷ་མོའི་འཁྲབ་ཆས་གྱོན་ནས་མཉམ་པར་རྒྱག་བཞིན་པ།

འདི་ནི་བུ་ཆུང་འབྲིང་བས་རང་སྐྱོང་ལྗོངས་མང་ཚོགས་སྒྱུ་རྩལ་ཁང་དུ་རིན་མེད་སྒོ་དབྱེའི་རྒྱུན་རྣམ་གསོ་སྦྱོང་གི་ལོ་ཆུང་བྱིས་པའི་ལྷ་མོ་འཛིན་གྲྭའི་བུའི་ཚོགས་ཆུང་ལ་ལྷ་མོའི་སྟངས་སྟབས་སློབ་བཞིན་པ།

མི་རིང་བའི་གོང་འཚོགས་པའི་རང་སྐྱོང་ལྗོངས་མང་ཚོགས་སྒྱུ་རྩལ་ཁང(ལྗོངས་མངོན་མིན་རིག་གནས་ཤུལ་བཞག་སྲུང་སྐྱོབ་ལྟེ་གནས)གི་2020ལོའི་རིན་མེད་སྒོ་དབྱེའི་འཆར་ཅན་གསོ་སྦྱོང་འཛིན་གྲྭ་མཇུག་འགྲིལ་བའི་མཛད་སྒོའི་ཐོག་གསོ་སྦྱོང་རེས་སྐོར་གཅིག་བྱས་པའི་ལྷ་མོར་དགའ་མོས་པ་ཆུང་ཆུང་ཚོས་འཁྲབ་ཆས་གྱོན་ནས་གར་སྟེགས་ཐོག་འཁྲབ་སྟོན་བྱས་པ་དང་། གསོན་ཉམས་དོད་པའི་འཁྲབ་སྟོན་ལ་ལྟད་མོ་བ་ཚོས་དགའ་བསུ་ཡང་ཡང་ཞུས་པ་དང་ཁྱིམ་བདག་ཚོས་ཕྲུ་གུ་ཚོའི་ལྟད་མོ་ཆེ་བའི་འཁྲབ་སྟོན་མཐོང་སྐབས་སེམས་འགུལ་ཚད་མེད་ཐེབས་བཞིན་དགའ་བའི་མིག་ཆུ་དབང་མེད་དུ་ཤོར། ལྷ་མོའི་དགེ་རྒན་ཡིན་པའི་བུ་ཆུང་དང་པ་སངས་གཉིས་རང་ཉིད་ཀྱི་སློབ་སྟོན་འོག་ཕྲུ་གུ་ཚོ་འཚར་ལོངས་མགྱོགས་པོ་བྱུང་བ་མཐོང་སྐབས་མིག་ལ་མཆི་ཞག་འཁོར།

1960ལོར་བུ་ཆུང་འབྲིང་བ་གཞིས་རྩེ་གྲོང་ཁྱེར་པ་སྣམ་རྫོང་དུ་སྐྱེས། 1980ལོར་རང་སྐྱོང་ལྗོངས་སྒྱུ་རྩལ་སློབ་གྲྭར་རྒྱུཌ་འཕྲོད་ནས་ལྷ་མོ་འཁྲབ་སྟངས་སྦྱངས། 1985ལོར་སློབ་གྲྭ་ཐོན་རྗེས་རང་སྐྱོང་ལྗོངས་ལྷ་མོ་ཚོགས་པར་ལྷ་མོ་འཁྲབ་སྟོན་གྱི་ལས་ལ་གཞོལ། 2017ལོར་རྒན་ཡོལ་ཞུས་པ་དང་ད་ཆ་རྒྱལ་ཁབ་ཀྱི་རིམ་པ་དང་པོའི་འཁྲབ་སྟོན་པ་དང་། ཀྲུང་གོའི་ཟློས་གར་མཁས་ཅན་མཐུན་ཚོཌ་ཀྱི་ཚོགས་མི། བོད་ལྗོངས་ཡན་ལག་མཐུན་ཚོཌ་ཀྱི་ལས་འཛིན་པ་བཅས་རེད།

བུ་ཆུང་འབྲིང་བ་ཆུང་དུས་གོ་སྐབས་བྱུང་རིམ་བཞིན་ལྷ་མོའི་འཁྲབ་སྟོན་ལ་ལྟ་བར་འགྲོ་གི་ཡོད། གར་སྟེགས་དང་། གློག་འོད། སྒྲ་སྒམ་སོགས་མེད་མོད། འོན་ཀྱང་བཀྲག་མདངས་ཆེ་བའི་འཁྲབ་ཆས་དང་རྣ་བར་སྙན་པའི་རྣམ་ཐར་གྱི་འགྱུར་ཁུག་གིས་ཁོང་ལ་བག་ཆགས་ཟབ་མོ་བཞག སྦུག་ཆལ་དང་རྔ་སྒྲ་དང་སྒྲ་གདངས་མཐོ་བའི་གཞས་གདངས་དག་རྟག་ཏུ་རྣ་བར་འཁོར་ནས་ཁོང་གི་ཡིད་དབང་ཡོངས་སུ་འཕྲོག སྐབས་དེ་དུས་བུ་ཆུང་འབྲིང་བར་ཕུགས་བསམ་ཞིག་ཡོད་པ་ནི་ལྷ་མོ་སྦྱོང་རྒྱུ་དེ་རེད།

སློབ་འབྲིང་དུ་སྐྱོད་སྐབས་སློབ་གྲྭས་རྫོང་གི་ལྷ་མོའི་རུ་ཁག་གཅིག་པུ་དེ་སློབ་གྲྭར་འཁྲབ་སྟོན་དང་རྣམ་ཐར་གཏོང་སྟངས་སློབ་པར་གདན་དྲངས་པ་དང་། བུ་ཆུང་འབྲིང་བས་གོ་སྐབས་དམ་འཛིན་བྱས་ཏེ་ནན་ཏན་ངང་སྐད་ཆ་འདྲི་བ་དང་དཀའ་སྤྱད་སྦྱོང་བརྡར་བྱས་པས་སློབ་གྲྭའི་སྒྱུ་རྩལ་རུ་ཁག་གིས་ནང་སྦྱོང་བྱས་པའི་ལྷ་མོ《འུན་ཤིང་ཀོང་ཇོའི》ནང་སྲོང་བཙན་སྒམ་པོ་འཁྲབ་པའི་གོ་སྐབས་རག་པ་རེད།

སྐབས་དེའི་འཁྲབ་སྟོན་ནང་བུ་ཆུང་འབྲིང་བའི་ཕུལ་བྱུང་གི་འཁྲབ་རྩལ་ལ་རང་སྐྱོང་ལྗོངས་ལྷ་མོ་ཚོགས་པའི་དགེ་རྒན་ཚོ་བློ་ཡིད་མགུ་པོ་བྱུང་ནས་རང་སྐྱོང་ལྗོངས་སྒྱུ་རྩལ་སློབ་གྲྭར་སློབ་ཡོན་མི་དགོས་པར་ཟབ་སྦྱོང་བྱེད་པའི་རྩ་ཆེའི་གོ་སྐབས་ཐོབ། སློབ་ཞུགས་བརྡ་ཐོ་འབྱོར་སྐབས་བུ་ཆུང་འབྲིང་བ་དགའ་སྤྲོ་རབ་ཏུ་འཕེལ་ཞིང་། རང་ཉིད་ཀྱི་ཕུགས་བསམ་མངོན་འགྱུར་བྱེད་པའི་གོ་སྐབས་ཐོབ།

དེ་གོང་ཆེད་ལས་ཀྱི་སྦྱོང་བརྡར་བྱེད་མྱོང་མེད་པའི་དབང་གིས་བུ་ཆུང་འབྲིང་བས་རང་ཉིད་ཀྱི་གཞས་གདངས་དེ་ཙམ་སྙན་པོ་མེད་པ་དང་འཛིན་གྲྭའི་ནང་གི་སློབ་མ་གཞན་གྱི་རྗེས་སུ་ལུས་པའི་སྣང་བ་བྱུང་ཏེ་སེམས་ཁྲལ་ཆེན་པོ་སྐྱེས། བུ་ཆུང་འབྲིང་བས་སློབ་གྲྭའི་ནང་སློབ་སྦྱོང་བྱེད་ཞོར་དུ་འཁྲབ་སྟོན་སྣ་ཚོགས་ནང་ཧུར་ཐག་ཞུགས་པ་དང་སྐྱོར་མོ་ལུང་ལུགས་ཀྱི་ལྷ་མོའི་དགེ་རྒན་གྱིས་སློབ་ཁྲིད་བྱས་པའི་རྣམ་ཐར་གཏོང་སྟངས་དང་འཁྲབ་སྟངས་གང་མགྱོགས་ཁོང་དུ་ཆུད་ཆེད། ཁོང་གིས་ནང་སྦྱོང་ཧུར་ཐག་བྱས། འཁྲབ་སྟོན་པས་ལོ་རྒྱུས་དུམ་བུ་དང་དུམ་བུ་བྱས་ཏེ་བློར་འཛིན་དགོས་ལ། ཁྱད་དུ་འཕགས་པའི་ཐབས་རྩལ་ཡང་སྦྱོང་དགོས་སྟབས་ཧ་ཅང་དཀའ་ལས་ཁག་པོ་ཡོད་པ་རེད། འཁྲབ་བྱའི་མི་སྣ་གཅིག་གི་གཞས་ཚིག་དང་འཁྲབ་སྟངས་རྦད་དེ་ཤེས་པར་མ་མཐར་ཡང་ཟླ་བ་བཞི་ནས་ལྔ་བར་འགོར་གྱི་ཡོད།

འདས་ཟིན་པའི་ལོ་30ལྷག་ཙམ་ནང་བུ་ཆུང་འབྲིང་བས་རང་སྐྱོང་ལྗོངས་ལྷ་མོ་ཚོགས་པས་འཁྲབ་སྟོན་བྱས་པའི་ལྷ་མོའི་འཁྲབ་ཚན་ཆེ་གྲས་མང་པོའི་ནང་འཁྲབ་བྱའི་མི་སྣ་གཙོ་བོ་ཐེངས་མང་འཁྲབ་པའི་ཁྲོད《གཟུགས་ཀྱི་ཉི་མ》དང་། 《ཆོས་རྒྱལ་ནོར་བཟང》 《པད་མ་འོད་འབར》 《འགྲོ་བ་བཟང་མོ》སོགས་ཡོད། འཁྲབ་སྟོན་ནང་ཞུགས་པའི་ལོ་རྒྱུས་ཟློས་གར་ཆེ་གྲས《འུན་ཤིང་ཀོང་ཇོ》དང་། གར་སྟེགས་ཟློས་གར《སྣང་ས་འོད་འབུམ》 བརྙན་འཕྲིན་རྒྱུན་མཐུད་འཁྲབ་ཚན་《སྣང་ས》 དེང་རབས་ལྷ་མོ《རྡོ་གཞོང་གི་དཔྱིད་ཀ》 གསར་དུ་བརྩམས་པའི་ལྷ་མོ་ཆེ་གྲས《གསེར་མདོག་ཁྱིམ་གཞིས》སོགས་ལ་རྒྱ་ཆེའི་ལྟད་མོ་བའི་གདེང་འཇོག་བཟང་པོ་དང་རིགས་གཅིག་མཁས་ཅན་གྱི་ཁས་ལེན་ཆེན་པོ་ཐོབ་ཡོད་པ་རེད། བུ་ཆུང་འབྲིང་བ་ད་དུང་ཨ་རི་དང་། ཁ་ན་ཏ། ཨོ་སི་ཁྲུ་ལི་ཡ། ཨོ་སི་ཁྲུ་རི་ཡ། སི་ཕེན། ཕོར་ཐིའུ་ཀལ་སོགས་རྒྱལ་ཁབ་ཏུ་སྔ་རྗེས་སུ་འཁྲབ་སྟོན་བྱེད་པར་བསྐྱོད་མྱོང་ཡོད་པ་རེད།

2015ལོར་བུ་ཆུང་འབྲིང་བ་རང་སྐྱོང་ལྗོངས་མང་ཚོགས་སྒྱུ་རྩལ་ཁང(ལྗོངས་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས)གིས་ལྷ་མོའི་གཞས་གདངས་དགེ་རྒན་གྱི་འགན་འཁུར་བར་གདན་དྲངས་པར་ཁོང་གིས་དགའ་སྤྲོའི་ངང་མོས་མཐུན་བྱས་པ་རེད། ཁོང་གིས། དང་ཐོག་གསོ་སྦྱོང་འཛིན་གྲྭའི་ནང་དར་མའི་སློབ་མ་དང་བྱིས་པའི་སློབ་མ་ཡོད་མོད། འོན་ཀྱང་ད་ཆ་མང་ཆེ་བ་བྱིས་པ་ཡིན་པ་དང་འཛིན་གྲྭ་གཅིག་ལ་སློབ་མ་50ལྷག་ཙམ་ཡོད། འདི་ལོ་སློབ་འགོ་ཚུགས་རྒྱུའི་བརྡ་ཐོ་བཏང་མ་ཐག་ཆུ་ཚོད་3ཡང་མ་འགོར་བར་སློབ་མ་ཆ་ཚང་བསྡུས་ཟིན་སོང་། གནའ་བོའི་སྒྱུ་རྩལ་དེར་དགའ་པོ་བྱེད་མཁན་ཇེ་མང་དུ་འགྲོ་བཞིན་འདུག་པས་དཀའ་ལས་རྒྱག་རིན་ཡོད་པ་ཞིག་རེད་སྙམ་གྱི་འདུག་ཅེས་བཤད།

བུ་ཆུང་འབྲིང་བས་སློབ་མ་རྣམས་རང་ཉིད་ཀྱི་གཅེས་ཕྲུག་ལ་བརྩི་གི་ཡོད་པ་དང་ཕྲུ་གུ་ཚོ་རིམ་བཞིན་འཚར་ལོངས་བྱུང་བ་མཐོང་སྐབས་ཧ་ཅང་དགའ་པོ་ཡོད་པ་རེད། གཟའ་མཇུག་ཏུ་ཁོང་གིས་ཆར་རླུང་ལ་མ་འཛེམས་པར་སློབ་ཁྲིད་ས་ཚིགས་སུ་སློབ་ཚན་འཁྲིད་པར་འགྲོ་གི་ཡོད་པ་རེད། སློབ་ཁང་ནང་སྦྱོང་བ་ཁོ་ནས་མི་འགྲིག་པར་སློབ་མ་འགའ་ཞིག་གིས་ཁོང་གི་ཁྱིམ་དུ་བསྐྱོད་ནས་ཁེངས་སྐྱུང་ངང་སློབ་ཚན་ཁྲིད་རོགས་ཞུ་གི་ཡོད་པ་དང་། བུ་ཆུང་འབྲིང་བས་རྟག་ཏུ་སྤྲོ་སེམས་འཁོལ་པོས་སྣེ་ལེན་དང་ངང་རྒྱུད་རིང་པོས་སློབ་ཁྲིད་བྱེད་ཀྱི་ཡོད་པ་རེད། ཁོང་གིས་ད་དུང་སྐད་འཕྲིན་གྱི་བརྙན་ལམ་ནས་སློབ་ཁྲིད་བྱེད་སྟངས་སྤྱད་དེ་ཁྱིམ་དུ་ཡོང་བདེ་པོ་མེད་པའི་སློབ་མ་ཚོར་སློབ་ཁྲིད་བྱེད་པ་དང་སུན་སྣང་སྤུ་ཙམ་ཡང་བྱེད་ཀྱི་མེད།

སྦྱོང་བརྡར་འཛིན་གྲྭར་སློབ་ཁྲིད་བྱེད་པ་ཕུད། རྒན་ཡོལ་ཞུས་རྗེས་ཀྱི་བུ་ཆུང་འབྲིང་བས་ད་དུང་རང་སྐྱོང་ལྗོངས་ལྷ་མོ་ཚོགས་པས་སྒྲིག་འཛུགས་བྱས་པའི་སློབ་གྲྭ་དང་གྲོང་གསེབ་ཏུ་ལྷ་མོ་སྐོར་འཁྲབ་བྱེད་པའི་བྱེད་སྒོར་ཧུར་ཐག་ཞུགས་པ་མ་ཟད། ལྷ་མོ་འགྲན་བསྡུར་གྱི་དཔྱད་འདེམས་པའང་བྱས་ནས་གཞི་རིམ་གྱི་དམངས་ཁྲོད་ལྷ་མོའི་རུ་ཁག་ལ་ལས་སྒོའི་མཛུབ་ཁྲིད་ཀྱང་བྱེད་ཀྱི་ཡོད་པས། རྒན་ཡོལ་ཞུས་པའི་རྗེས་སུ་སོལ་དལ་དུ་མི་སྡོད་པར་སེམས་ནུས་ལྷག་མ་བཏོན་ནས་ཐོག་མའི་བསམ་འདུན་དོན་གཉེར་བྱས་པས་ཁོང་ལ“2020ལོའི་ལྗོངས་ཡོངས་ཀྱི་རྒན་ཡོལ་ཞུས་པའི་ལས་བྱེད་པའི་སྔོན་ཐོན་མི་སྒེར”གྱི་གཟི་བརྗིད་མཚན་སྙན་ཐོབ་པ་རེད།