རྒྱ་མཚོའི་ངོས་ལས་ཆ་སྙོམས་མཐོ་ཚད་སྨི་4000ཡན་གྱི་བོད་ལྗོངས་སུ་སྨུག་ཕྱིའི་འོད་ཟེར་འཕྲོ་ཚད་ཤིན་ཏུ་ཆེ་བས་ས་གནས་དེ་གའི་མང་ཚོགས་ལ་མིག་ནད་ཕོག་སླ་ཞིང་ལྷག་པར་དུ་སྐྱ་གྲིབ་ཕོག་པའི་ནད་པ་དེ་བས་མང་ལ།  ཞིང་འབྲོག་མང་ཚོགས་ཕལ་ཆེ་བས་ནད་དེ་བཅོས་ཐུབ་ཀྱི་ཡོད་པ་ཤེས་ཀྱི་མེད།

མིག་ནད་ཕོག་པའི་ནད་པར་དྭངས་གསལ་དང་འོད་སྣང་སླར་གསོ་ཐུབ་ཆེད། བོད་རང་སྐྱོང་ལྗོངས་སྨན་རྩིས་ཁང་མིག་ནད་ལྟེ་གནས་ཀྱི་ཀྲུའུ་རེན་ཚེ་བརྟན་གཡང་སྐྱིད་ཀྱིས་སྨན་དོན་མི་སྣ་ཁྲིད་དེ་ཐག་རིང་གི་ལུང་ཁུག་ཏུ་ཐེངས་མང་བསྐྱོད་ནས་ཞིང་འབྲོག་མང་ཚོགས་ཚོར་སྐྱ་གྲིབ་ཀྱི་གཤག་བཅོས་ཐེངས་4884བྱས་ཤིང་། བོད་ཀྱི་མིག་ནད་ཞིབ་འཇུག་ཁྱབ་ཁོངས་ཀྱི་རིག་ཚན་སྣེ་ཁྲིད་པ་ཞིག་གི་ངོས་ནས་ཚེ་བརྟན་གཡང་སྐྱིད་སྐྱ་གྲིབ་ཀྱི་གཤག་བཅོས་རྐྱང་པ་ཁོ་ནར་ཐེངས་ཁྲི་3ལྷག་ཙམ་ནང་ཞུགས་མྱོང་བ་དང་། ནད་པ་དྲག་སྐྱེད་བྱུང་ཚད་99%ཟིན་ཡོད།

ཚེ་བརྟན་གཡང་སྐྱིད་2020ལོའི“ཆེས་མཛེས་པའི་ཚན་རྩལ་ལས་དོན་པའི”ཁྱབ་བསྒྲགས་མཛད་སྒོ་སྤེལ་ཡུལ་དུ་ཡོད་པ།

2020ལོའི“ཆེས་མཛེས་པའི་ཚན་རྩལ་ལས་དོན་པའི”མཚན་སྙན་ཐོབ་པ་ཤེས་རྗེས། ཚེ་བརྟན་གཡང་སྐྱིད་ཀྱིས་བརྡ་ཐོ་ནོར་ནས་བཏང་བ་མིན་འགྲོ་ཞེས་བསྟུད་མར་བཤད་ཀྱང་། དོན་དངོས་སུ་ཁོང་སྔ་ས་ནས་བོད་རིགས་མང་ཚོགས་མང་པོའི་སེམས་ནང་གི་“ཆེས་མཛེས་པའི”སྨན་པར་གྱུར་ཟིན།

མིག་གཉིས་བསྐྱར་མཐོང་ཐུབ་པ་ནི་མདུན་སྐྱོད་ཀྱི་སྟོབས་ཤུགས་ཡིན།

བོད་སྨན་ཁྱིམ་རྒྱུད་ནང་སྐྱེས་པའི་ཚེ་བརྟན་གཡང་སྐྱིད་ནི་ཆུང་དུས་ནས་བོད་ཀྱི་གསོ་རིག་སྨན་བཅོས་བྱ་གཞག་ནང་ཞུགས་རྒྱུར་སེམས་ཤུགས་ཆེ་བས་དེ་ནི་ཁོང་གི་འགྱུར་མེད་ཀྱི་འགན་འཁྲི་ལྟ་བུར་གྱུར་ཡོད། 1988ལོར་ཚེ་བརྟན་གཡང་སྐྱིད་བོད་རང་སྐྱོང་ལྗོངས་བོད་ལུགས་གསོ་རིག་སློབ་གླིང་ནས་སློབ་གྲྭ་ཐོན་ཏེ་བོད་རང་སྐྱོང་ལྗོངས་སྨན་རྩིས་ཁང་དུ་ལས་བགོས་བྱས་པ་དང་། ཕྱི་ནད་སྡེ་ཁག་དུ་ལས་ཀ་བྱས་ཏེ་སྨན་བཅོས་ལས་དོན་གྱི་ལམ་བུར་དངོས་སུ་ཞུགས།

མང་ཚོགས་ཚོའི་མིག་ལ་བརྟག་དཔྱད་བྱེད་བཞིན་པ།

“ཕ་ཡུལ་གྱི་གཉེན་ཉེའི་འཚོ་བའི་ཁྲོད་འོད་སྣང་མེད་པའི་འཇིག་རྟེན་ནི་ཆེས་འཇིགས་སུ་རུང་ལ་ཆེས་ཐབས་སྡུག་ཤོས་དེ་ཡིན་པས། ང་ཚོས་ངེས་པར་དུ་ལས་ཀར་ཧུར་བརྩོན་བྱས་ནས་ནད་པ་དེ་བས་མང་བ་གང་མགྱོགས་འོད་སྣང་མཐོང་ཐུབ་པ་བྱ་རྒྱུ་ཡིན”ཞེས་ཚེ་བརྟན་གཡང་སྐྱིད་ཀྱིས་བཤད་བཞིན་ཡོད་ལ་དེ་ལྟར་བྱེད་བཞིན་མཆིས།

ཆབ་མདོ་གྲོང་ཁྱེར་དང་། ཉིང་ཁྲི་གྲོང་ཁྱེར། ནག་ཆུ་གྲོང་ཁྱེར། མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཀྲོའུ་སོགས་ལྷོ་ནས་བྱང་བར་དང་ཤར་ནས་ནུབ་བར་ཚེ་བརྟན་གཡང་སྐྱིད་ཀྱིས་སྤྱིར་ས་མཐོ་ཞིང་གསོ་རླུང་དཀོན་པའི་མཚོ་བོད་ས་མཐོའི་ས་ཆ་གང་སར་སྤྱིར་བསྐྱོད་ཟིན་པ་དང་། སྐོར་སྐྱོད་སྨན་བཅོས་ཀྱི་ལམ་ཐག་སྤྱི་ལེ་ཁྲི་18ཙམ་ཟིན་ཡོད།

རི་ལམ་ཀྱག་ཀྱོག་དང་གནམ་གཤིས་སྡུག་པ་སོགས་ནི་དཀའ་ངལ་ཅི་ལ་ཡིན་སྲིད། ཡུན་རིང་ཆ་རྐྱེན་ཞན་པའི་ཁུལ་དུ་འཚོ་བ་སྐྱེལ་བ་དང་སྨན་བཅོས་ཀྱི་ལས་ལ་གཞོལ་ནས་ཁྲག་ཤེད་དམའ་རུ་སོང་བ་དང་སྙིང་ནད་ཐོན་པ་སོགས་ནི་རྒྱུན་གཏན་ལྟར་ཡིན་ཞིང་། ཁོང་གིས་ཉིན་ཐོའི་ནང“དཀའ་ངལ་ལས་རྣམ་པར་རྒྱལ་མི་ཐུབ་པའི་མི་ཡོད་པ་མ་གཏོགས། རྒྱལ་མི་ཐུབ་པའི་དཀའ་ངལ་མེད”ཅེས་བྲིས་ཡོད།

ཚེ་བརྟན་གཡང་སྐྱིད་ངོས་ནས་བདེ་སྐྱིད་ཆེ་ཤོས་ནི་ནད་པ་དྲག་སྐྱེད་ཐུབ་པ་དེ་རེད།

2001ལོའི་སྟོན་ཁར། ཚེ་བརྟན་གཡང་སྐྱིད་དང་སྨན་བཅོས་རུ་ཁག་མཚོ་སྔོན་ཞིང་ཆེན་ཡུལ་ཤུལ་ཀྲོའུ་རུ་སྐོར་སྐྱོད་གཤག་བཅོས་སྨན་བཅོས་བྱེད་སྐབས་ལོ་ཕྱེད་ཀའང་མ་འཁོར་བའི་ནད་པ་ཞིག་འཕྲད། ནད་པ་དེ་ནི་སྐྱེ་དུས་ནས་ལྷན་སྐྱེས་རང་བཞིན་གྱི་སྐྱ་གྲིབ་ནད་ཕོག་ཡོད་པས། གལ་ཏེ་གཤག་བཅོས་སྔ་ཙམ་མ་བྱས་ཚེ་ཕྲུ་གུ་དེ་མིག་ཤེད་ཞན་པའམ་ཐ་ན་དུས་ནམ་ཡང་ལོང་བར་གྱུར་སྲིད།

ཕྲུ་གུའི་ཁྱིམ་བདག་གི་བསམ་ཤེས་དང་མོས་མཐུན་ཐོབ་རྗེས། ཚེ་བརྟན་གཡང་སྐྱིད་ཀྱིས་ཕྲུ་གུ་དེའི་མིག་གཉིས་ཀར་སྐྱ་གྲིབ་ཀྱི་གཤག་བཅོས་བྱས། ཉིན་གཅིག་ལས་མ་སོང་བར་ཚེ་བརྟན་གཡང་སྐྱིད་ཀྱིས་ཕྲུ་གུ་དེའི་མིག་ལ་གློག་བཞུ་རྒྱག་དུས། ཕྲུ་གུ་དེས་ལག་ཆུང་གཡབ་གཡོབ་བྱས་ནས་གློག་འོད་བཟུང་བའི་མཚམས་དེར། ནད་ཁང་ནང་ཧ་ལས་ཧང་སངས་པའི་སྒྲ་དང་ཐལ་མོའི་རྡེབ་སྒྲས་ཁེངས།

སེམས་ཁོང་ནས་ཐོན་པའི“ཨམ་ཇེ་ལགས། ཐུགས་རྗེ་ཆེ”ཞུ་བའི་སྒྲ་རེ་རེ་དང་འོད་སྣང་སླར་གསོ་ཐུབ་པའི་ཁྲ་ཆུང་གི་མིག་ཟུང་རེ་རེ་ནི་ཚེ་བརྟན་གཡང་སྐྱིད་དང་ཁོང་གི་ལས་རོགས་ཚོའི་མདུན་སྐྱོད་ཀྱི་སྟོབས་ཤུགས་ཤིག་ཡིན།

ཚན་རིག་ཁྱབ་གདལ་ནང་ཞུགས་ནས་དབུལ་སྒྲོལ་འགག་སྒྲོལ་ལ་རམ་འདེགས་བྱས།

སྨན་པ་ཆུང་བས་ནད་བཅོས་ཤིང་སྨན་པ་ཆེ་བས་མི་སྲོག་བསྐྱབ། སྨན་བཅོས་ལག་རྩལ་ཉིན་རེ་བཞིན་ཡར་རྒྱས་འགྲོ་བཞིན་པའི་ཚེ་བརྟན་གཡང་སྐྱིད་ཀྱིས་ས་གནས་དེ་གའི་མང་ཚོགས་ཚོའི་བདེ་ཐང་ལ་འགོག་རྐྱེན་བཟོ་མཁན་ནི་ནད་རིགས་ཁོ་ན་མ་ཡིན་པར་ཁོང་ཚོའི་གསོ་རིག་གི་ཤེས་བྱ་ངོས་འཛིན་མི་ཐུབ་པ་དེ་ཤེས་རྟོགས་ཐུབ།

1999ལོར་ནད་པ་ཞིག་གིས་ཚེ་བརྟན་གཡང་སྐྱིད་ལ་བག་ཆགས་ཟབ་མོ་བཞག་ཡོད།

དེ་ནི་དབུ་སྐྲ་དུང་ལྟར་དཀར་བའི་རྒད་པོ་ཞིག་བུ་ཕྲུག་གིས་སྐྱོར་ནས་སྨན་བཅོས་བྱེད་པར་སླེབས། བརྟག་དཔྱད་བྱས་པ་བརྒྱུད་རྒད་པོར་རྒན་རྒོན་རང་བཞིན་གྱི་སྐྱ་འགྲིབ་ནད་ཕོག་ནས་ལོ་མང་མིག་གིས་མ་མཐོང་བར་གྱུར། གྲོང་ཚོ་གཅིག་པའི་སྐྱ་གྲིབ་ཕོག་པའི་ནད་པ་ཞིག་ཚེ་བརྟན་གཡང་སྐྱིད་ཀྱིས་གཤག་བཅོས་བྱས་ནས་དྲག་སྐྱེད་བྱུང་བ་ཤེས་རྗེས་སྐྱ་གྲིབ་ཀྱི་ནད་དེ་སྨན་བཅོས་བྱེད་ཐུབ་ཀྱི་ཡོད་པ་གཞི་ནས་ཤེས།

དབུལ་པོའི་ས་ཁུལ་གྱི་སྨན་པ་ཞིག་ཡིན་པའི་ངོས་ནས་ཞབས་འདེགས་ཞུ་ཡུལ་གཙོ་བོ་ནི་ཞིང་འབྲོག་མང་ཚོགས་ཡིན་ཞིང་། ཁོང་ཚོའི་སྨན་བཅོས་ཤེས་བྱ་ཤིན་ཏུ་ཞན་པར་བརྟེན་རྩ་བའི་ནད་སྐོར་གྱི་ཚན་རིག་ཤེས་བྱ་ཁྱབ་གདལ་བྱེད་དགོས་པ་ནི་ཤིན་ཏུ་ནས་གལ་ཆེ་བ་ཞིག་ཡིན་པ་ཚེ་བརྟན་གཡང་སྐྱིད་ལ་མྱོང་བ་ཆེན་པོ་བྱུང་།

སྤྱི་ཚོགས་ཐོག་གྲོང་མི་ཚོར་བརྟག་དཔྱད་བྱེད་པ།

2000ལོའི་ཡས་མས་སུ་བོད་རང་སྐྱོང་ལྗོངས་ཀྱིས་ལྗོངས་ཡོངས་སུ་མིག་ནད་ཡོངས་ཁྱབ་ཞིབ་བཤེར་གྱི་ལས་དོན་སྤེལ་བས། ཚེ་བརྟན་གཡང་སྐྱིད་ཧུར་བརྩོན་ཆེན་པོས་དེའི་ནང་ཞུགས་ནས། སྔ་རྗེས་སུ་ལྷོ་ཁ་དང་། ནག་ཆུ། ཉིང་ཁྲི་སོགས་ས་ཆ་དངོས་སུ་བསྐྱོད་ནས་གནས་ཚུལ་རྒྱུས་ལོན་བྱས་ཏེ་བོད་འབྲེལ་ཁུལ་གྱི་སྐྱ་འགྲིབ་ནད་དེ་ཐོན་པའི་རྒྱུ་མཚན་དང་མི་གྲངས་ཁྱོན་ཡོངས་ནས་ཁོང་དུ་ཆུད་པ་བྱ་ཆེད་ཞིབ་ཚགས་དཔྱད་གཞི་མཁོ་འདོན་བྱས་ཡོད།

ས་གནས་དེ་གའི་མང་ཚགས་དང་ལྷན་དུ་ཡོད་པ།

མང་ཚོགས་ལ་ཚན་རིག་ཁྱབ་གདལ་གྱི་ཕན་པ་ཐོབ་ཁུལ་རྒྱ་ཆེར་གཏོང་ཆེད། 2007ལོ་ནས་བཟུང་ཚེ་བརྟན་གཡང་སྐྱིད་ཀྱིས་གཟའ་འཁོར་རེར་བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་བོད་སྐད་འཕྲིན་ལམ་ཐོག་མིག་ནད་སྨན་བཅོས་དང་འགོག་སྲུང་གི་ཆེད་དོན་འཆད་ཁྲིད་བྱེད་ཀྱི་ཡོད།

རླུང་འཕྲིན་ལས་ཁུངས་ལ་འགྲོ་དོན་ནི་བོད་མི་མང་ཆེ་བ་འབྲོག་མི་སྐྱས་སྤོ་ཡིན་ཞིང་། རླུང་འཕྲིན་ནི་ཐག་རིང་གི་ས་ཁུལ་དུའང་བརྡ་འཕྲིན་ཡོད་པས་ཡིན་ལ། ང་རང་གིས་བོད་སྐད་བརྒྱབ་སྟེ་མང་ཚོགས་ཚོ་སྐྱ་གྲིབ་ཀྱི་ནད་ཟེར་བ་དེ་གང་འདྲ་ཞིག་ཡིན་པ་དང་། སྨན་བཅོས་གང་འདྲ་བྱེད་དགོས་མིན། ལོ་ཆུང་བྱིས་པའི་མིག་ནད་འགོག་སྲུང་གི་གལ་ཆེའི་རང་བཞིན་སོགས་སྔར་བས་གོ་བ་གང་ལེགས་ཐུབ་ཆེད་ཡིན ”ཞེས་བཤད།

ཕྱོགས་མང་པོའི་འབད་བརྩོན་འོག་མང་ཚོགས་ཚོའི་མིག་ནད་ལ་ངོས་འཛིན་སྟངས་མངོན་གསལ་དོད་པོས་ལེགས་སུ་ཕྱིན་ཡོད། མི་མང་ཆེ་བས་མིག་ནད་བཅོས་པའི་དགོས་པ་མེད་པ་དང་མིག་ནད་བཅོས་མི་དགོས་པ་ནས་གཤག་བཅོས་བྱ་རྒྱུ་ཡོད་པ་དང་། གཤག་བཅོས་བྱས་ཀྱང་ན་ཟུག་ཆེན་པོ་དེ་ཙམ་མེད་པ་མ་ཟད། ད་དུང་ཁྱིམ་ཚང་གི་ཁུར་པོ་ཡང་དུ་གཏོང་ཐུབ་བར་འགྱུར་ལྡོག་ཕྱིན་ཡོད་པས་རང་འགུལ་ཐོག་སྨན་བཅོས་བྱེད་ཀྱི་ཡོད་ཅེས་ཚེ་བརྟན་གཡང་སྐྱིད་ཀྱིས་བཤད།

ནད་རིགས་ནི་དབུལ་ཕོངས་དང་མཉམ་དུ་གནས་ཡོད། མང་ཚོགས་ཀྱི་བསམ་བློར་འགྱུར་ལྡོག་བྱུང་བས་ཁོང་ཚོ་ནད་ཀྱིས་དབུལ་པོར་གྱུར་བ་དེ་ཡང་ཐག་གཅོད་བྱུང་ནས་དབུལ་སྒྲོལ་འགག་སྒྲོལ་ཐད་སྐུལ་འདེད་ཀྱི་ནུས་པ་ཤུགས་ཆེན་ཐོན་ཡོད།  འགྱུར་ལྡོག་དེ་དག་གླེང་དུས་ཚེ་བརྟན་གཡང་སྐྱིད་སྔར་བས་གྲུང་ཤ་དོད་དུ་ཕྱིན།

གསར་གཏོད་ལ་བརྟེན་ནས་བོད་ཀྱི་གསོ་རིག་སྨན་བཅོས་དེང་རབས་ཅན་གྱི་འཕེལ་རྒྱས་ལ་སྐུལ་འདེད་བཏང་བ།

2015ལོར། ཚེ་བརྟན་གཡང་སྐྱིད་ལ་གོ་ས་གསར་པ་ཞིག་ཡོད་པ་སྟེ། བོད་ལུགས་གསོ་རིག་དང་བོད་སྨན་ངག་ཐོག་ཉམས་མྱོང་གླེང་བའི་རྣམ་གྲངས་རྒྱུད་འཛིན་བྱེད་པའི་རིགས་གཅིག་མཁས་དབང་ལ་དངོས་སུ་གདན་ཞུ་བྱས།

“དོན་དངོས་སུ་ལོ་ངོ་1600ལྷག་ཙམ་གྱི་སྔོན་ནས་བོད་ཀྱི་གསོ་བ་རིག་པས་སྐྱ་འགྲིབ་ནད་ཀྱི་གཤག་བཅོས་བྱེད་ཐུབ། འོན་ཀྱང་ང་ཚོས་ལག་རྩལ་དེ་ངེས་པར་དུ་མ་ཉམས་གོང་འཕེལ་ཡོང་བ་བྱེད་དགོས”ཞེས་ཚེ་བརྟན་གཡང་སྐྱིད་ཀྱིས་བཤད།

ཤེས་བྱ་གསར་པ་དང་། ལག་རྩལ་གསར་པ། སྨན་བཅོས་གསར་པ་བཅས་རྒྱུན་དུ་ཁོང་དུ་ཆུད་ནས་ཉམས་མྱོང་གསར་པ་གསོག་འཇོག་བྱ་ཆེད། 1997ལོ་ནས་2007ལོའི་བར་ཚེ་བརྟན་གཡང་སྐྱིད་ཀྱིས་སྔ་རྗེས་སུ་བལ་ཡུལ་གྱི་མིག་ནད་སྡེ་ཁག་ལ་གསོ་སྦྱོང་བྱེད་པར་ཐེངས་4ཕྱིན་པ་དང་།  2010ལོར་ཧྲང་ཧེའི་རུའེ་ཅིང་སྨན་ཁང་དང་། 2013ལོར་ཀོང་ཀྲོའུ་ཞིང་ཆེན་ཧྲན་ཐོའུ་རྒྱལ་སྤྱིའི་མིག་ནད་སྡེ་ཁག་ལྟེ་གནས། 2013ལོར་ཧར་པིན་གསོ་རིག་ཚན་རྩལ་སློབ་ཆེན་ཞོར་གཏོགས་མི་དམངས་སྨན་ཁང་དང་པོ། 2015ལོར་པེ་ཅིང་སློབ་ཆེན་མི་དམངས་སྨན་ཁང་བཅས་ལ་སློབ་སྦྱོང་ངམ་གསོ་སྦྱོང་གནང་མྱོང་།

གཤག་བཅོས་བྱེད་བཞིན་པའི་ཚེ་བརྟན་གཡང་སྐྱིད།

སྨན་ཁང་དུ་ཕྱིར་ལོག་རྗེས་ཚེ་བརྟན་གཡང་སྐྱིད་ཀྱིས་ཉམས་མྱོང་དང་སྒྲིག་ཆས་མི་འདང་བ་སོགས་ཀྱི་དཀའ་ངལ་སྣ་ཚོགས་ཁྱད་དུ་བསད་ནས་རྒྱལ་ཁབ་ཕྱི་ནང་གི་ཆེད་ལས་མཁས་པ་རྩེ་གྲྭ་དང་མཉམ་དུ་བོད་དུ་སྔར་བྱེད་མྱོང་མེད་པའི་གཤག་བཅོས་གང་མང་བྱས་པ་སྟེ། 2007ལོར་སྐྱ་གྲིབ་ཀྱི་ཁ་ཆུང་གཤག་བཅོས་དང་མིག་གཟི་ལོག་ཡོ་བསྲང་གཤག་བཅོས། 2012ལོའི་མིག་སྐྱི་ཧྲིལ་པོའི་བང་རིམ་རྩ་སྤོས་གཤག་བཅོས། 2014ལོའི་སྐྱ་གྲིབ་ཀྱི་རིགས་གཞན་གྱི་གཤག་བཅོས། 2017ལོའི་མིག་གི་སྐུལ་འོད་གཤག་བཅོས་སོགས་བོད་དུ་མིག་ནད་གཤག་བཅོས་རྣམ་གྲངས་སྤེལ་བ་དེ་དག་སྤྱིར་ནང་སའི་མིག་ནད་སྨན་ཁང་རྩེ་གྲྭ་དང་ཁྱད་པར་མེད་པར་རྒྱ་ཆེའི་ཞིང་འབྲོག་མང་ཚོགས་ཚོ་མིག་ནད་བཅོས་པར་གཞི་རྩའི་ཆ་ནས་བོད་ནས་ཁ་བྲལ་མི་དགོས་པ་བྱུང་ཡོད་པ་རེད།

ལོ་ལྔ་ཡི་གོང་ཚེ་བརྟན་གཡང་སྐྱིད་བོད་ལྗོངས་གསོ་རིག་སློབ་ཆེན་གྱིས་བོད་རང་སྐྱོང་ལྗོངས་མིག་ནད་ཀྱི་ཞིབ་འཇུག་སློབ་མའི་མཛུབ་སྟོན་དགེ་རྒན་ཨང་དང་པོར་གདན་ཞུ་བྱས་པས། ཁོང་གིས་ཧུར་བརྩོན་ངང་སློབ་ཁྲིད་དང་རྨང་གཞིའི་ཚན་ཞིབ་ལས་དོན་སྤེལ་འགོ་བཙུགས་ཏེ། མིག་སྔར་ཞིབ་འཇུག་སློབ་མ་གཉིས་དང་ཆེད་ཚན་སྨན་གཡོག་གང་མང་གསོ་སྐྱོང་བྱས་ཡོད་པ་དེ་དག་ཆེད་ལས་ལག་རྩལ་གྱི་ལས་དོན་འགན་འཁུར་ཐུབ་ཀྱི་ཡོད་པ་རེད།

དེས་མ་ཚད། ཚེ་བརྟན་གཡང་སྐྱིད་ཀྱིས་སེམས་ནུས་གང་ཡོད་གཞི་རིམ་སྨན་པའི་གསོ་སྦྱོང་ཐོག་བཞག 2000ལོ་ནས་ད་བར་ཁོང་གིས་གཤམ་སྐྱོད་བྱ་རྒྱུ་རྒྱུན་འཁྱོངས་བྱས་ཏེ་ཤང་གྲོང་སྨན་པའི་གསོ་སྦྱོང་འཛིན་གྲྭ་སྒྲིག་འཛུགས་བྱས་ཤིང་ཤང་གྲོང་སྨན་པ་1300ལྷག་ལ་གསོ་སྦྱོང་བྱས་ཡོད། 2000ལོར་ཁོང་དང་ལྗོངས་གསོ་རིག་སློབ་གླིང་གི་ཡིག་སྒྱུར་དགེ་རྒན་རྣམ་རྒྱལ་མཉམ་དུ《འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མིག་གི་བདེ་སྲུང》ཞེས་པ་སྒྱུར་ཅིང་2001ལོར་དངོས་སུ་དཔར་སྐྲུན་བྱས། དེ་ནི་བོད་ལྗོངས་ས་ཁུལ་དུ་བོད་ཡིག་དཔར་མའི་དེང་རབས་གསོ་རིག་གི་མིག་ནད་སྐོར་གྱི་དཔེ་དེབ་ཐོག་མ་དེ་ཡིན་པས། བོད་ཀྱི་གཞི་རིམ་གྱི་མིག་ནད་སྨན་བཅོས་ཀྱི་འཕེལ་རྒྱས་ཐད་སྲ་ཞིང་བརྟན་པའི་རྨང་གཞི་བཏིང་ཡོད། ཁོང་གི་གོམ་སྟབས་རྗེས་མའི་དམིགས་ཡུལ་ནི་གྲོང་ཁྱེར་རིམ་པ་དང་ཐ་ན་རྫོང་རིམ་པའི་སྨན་ཁང་གིས་ཀྱང་སྐྱ་གྲིབ་ནད་ཀྱི་གཤག་བཅོས་བྱེད་ཐུབ་པ་བྱ་རྒྱུ་དེ་ཡིན་པ་རེད།

སྨན་པ་ཞིག་ཡིན་ལ་གསར་གཏོད་རྒྱུན་འཁྱོངས་བྱེད་པའི་ཚན་ཞིབ་ལས་དོན་པ་དང་སློབ་བུ་གསོ་སྐྱོང་གནང་མཁན་གྱི་དགེ་རྒན་ཞིག་ཡིན་པས། ཚེ་བརྟན་གཡང་སྐྱིད་ཀྱིས་བོད་ཀྱི་གསོ་རིག་སྨན་བཅོས་དེང་རབས་ཅན་དུ་སྐུལ་འདེད་བཏང་བཞིན་ཡོད་ལ། བོད་ཀྱི་དེང་རབས་མིག་ནད་ཀྱི་འཕེལ་རྒྱས་ལ་སྐུལ་འདེད་བཏང་བའི་ལས་དོན་ཁྲོད་དམིགས་བསལ་གྱི་ལེགས་སྐྱེས་ཕུལ་ཡོད།

“ཆེས་མཛེས་པའི་ཚན་རྩལ་ལས་དོན་པའི”གཟི་བརྗིད་མཚན་སྙན་དེ་ནི་སྒེར་སེམས་མེད་པར་ལེགས་སྐྱེས་ཕུལ་མཁན་དང་བློ་རྩ་བརྟན་པོས་ཡར་བརྩོན་གནང་མཁན་གྱི་བོད་ཀྱི་ཚན་རྩལ་ལས་དོན་པར་དབང་བ་ཞིག་ཡིན། བོད་ཀྱི་ཚན་རྩལ་ལས་དོན་པ་ཡོངས་ཀྱིས་མཉམ་དུ་དཔྱད་གླེང་དང་འབད་བརྩོན་བྱས་ཏེ་བོད་ཀྱི་གསོ་རིག་སྨན་བཅོས་ཀྱི་ཉིང་ཁུ་སྔོག་འདོན་གནང་བ་དང་དེང་རབས་སྨན་བཅོས་ལག་རྩལ་དང་མཐུན་འགྲིག་དང་མཉམ་འདྲེས་བྱས་པར་བརྟེན། གཞི་ནས་རྒྱ་ཆེའི་བོད་ཀྱི་མང་ཚོགས་ཚོར་མུན་ནག་ནས་འོད་སྣང་བར་གྱི་འབྲེལ་ཟམ་བསྐྲུན་ཐུབ་པ་རེད་ཅེས་ཚེ་བརྟན་གཡང་སྐྱིད་ཀྱིས་བཤད།

( བོད་ལྗོངས་མཉམ་སྦྲེལ་དྲ་རྒྱའི་ཆ་འཕྲིན་གཞུང་ལས་ཁང་གི་ཚེ་རིང་དབང་འདུས་ཀྱིས་སྒྱུར། 

ཀྲུང་གོའི་བོད་ཀྱི་གསར་འགྱུར་དྲ་བའི་ཚེ་རིང་ཆོས་སྒྲོན་གྱིས་ཞུས )