བོད་རང་སྐྱོང་ལྗོངས་མངའ་རིས་ས་ཁུལ་སེང་གེ་ཁ་འབབ་གྲོང་རྡལ་རྒྱ་སྨུག་གྲོང་ཚོའི་སྡོད་ཁང་ཁྲོད་ཚེ་རིང་རྒྱལ་པོའི་སྡོད་ཁང་ཡག་ཤོས་ཡིན་པ་རེད། 2019ལོར་སྤྱིའི་རྒྱ་ཁྱོན་སྨི་ངོས་གྲུ་500ལྷག་ཙམ་གྱི་ཕྱི་ལུགས་ཀྱི་ཐོག་བརྩེགས་གཉིས་ལྡན་གྱི་ཁང་གསར་དེ་བསྐྲུན་པ་དང་། ཁང་པའི་ནང་དུ་མཛེས་བཟོ་གྲ་ཞིང་རྒྱས་པ་བྱས་ཡོད་པས། བལྟས་པ་ཙམ་གྱིས་ཕྱུག་བདག་ཅིག་ཡིན་པ་ཤེས་ཐུབ། 

སྔོན་ཆད་ཚེ་རིང་རྒྱལ་པོའི་འཚོ་བ་ཤིན་ཏུ་ཞན་པོ་ཡོད་པ་དང་། ཁོང་གི་ནང་མི་དྲུག་པོ་ཆུ་དང་གློག་གང་ཡང་མེད་པའི་སྦྲ་གུར་གྱི་ནང་དུ་འཚོ་བ་སྐྱེལ་གྱི་ཡོད། ནང་མི་ཚོར་སྒོ་ཕྱུགས་ཁ་ཤས་ལས་མེད་པ་མ་ཟད་ལོ་གཅིག་ལ་ཡོང་འབབ་སྒོ་བརྒྱ་ཕྲག་ལས་མེད་པ་རེད། 2017ལོར། མངའ་རིས་ཀྱི་དཔལ་འབྱོར་དང་སྤྱི་ཚོགས་འཕུར་མཆོང་ལྟ་བུའི་འཕེལ་རྒྱས་ཕྱིན་པ་དང་བསྟུན་ནས། ས་གནས་དེ་གའི་ཨར་ལས་ཀྱི་ཚ་རླབས་རབ་ཏུ་འཕྱུར་ཡོད་པ་རེད། ཚེ་རིང་རྒྱལ་པོས་གོ་སྐབས་བཟང་པོ་དེ་དམ་འཛིན་བྱས་ནས་ཁ་ལོ་བའི་ལས་སུ་ཞུགས། ཁོང་ནི་ལས་ལ་བརྩོན་མཁན་ཞིག་ཡིན་པ་མ་ཟད། དངོས་ཟོག་རྣམས་བདེ་འཇགས་ངང་སྐྱེལ་འདྲེན་བྱས་སྟབས། ལོ་རེར་ཡོང་འབབ་ཁྲི་གསུམ་ཙམ་ཡོང་གི་ཡོད་པ་རེད། 

ཚེ་རིང་རྒྱལ་པོས་རང་འཁྲིའི་ལས་ལ་གཞོལ་ནས་ལོ་བཅུ་ལྷག་ཙམ་སོང་བ་དང་། ཏང་དང་སྲིད་གཞུང་གི་དམིགས་བསལ་སྲིད་ཇུས་ཀྱི་རྒྱབ་སྐྱོར་འོག་ལོ་རེ་བཞིན་ཡོང་འབབ་འཕར་སྣོན་ཡོང་གི་ཡོད་པ་རེད། ཁོང་གིས་དབུལ་པོའི་ཞྭ་མོ་ཕུད་ཐུབ་པ་བྱུང་བ་མ་ཟད། ད་ཆ་གྲོང་ཚོའི་ཕྱུག་འགྱུར་སྣེ་ཁྲིད་ཀྱི་མི་སྣར་གྱུར། ཁོང་གིས་རྟག་ཏུ་འཚོ་བ་ཞན་པའི་མང་ཚོགས་ལ་རོགས་རམ་བྱས་ནས་འཚོ་བའི་སྤུས་ཚད་མཐོ་རུ་གཏོང་གི་ཡོད། 

སྔོན་ཆད་ཁོང་གིས་གྲོང་ཚོའི་ཉེ་འགྲམ་དུ་བྱེ་མའི་བཟོ་གྲྭ་ཞིག་བཙུགས་པ་དང་། གྲོང་མི་7བཟོ་གྲྭའི་ནང་དུ་བཅུག་ནས། ལས་མི་རེར་ཟླ་རེར་གླ་ཆ་སྒོར་7500སྤྲོད་ཀྱི་ཡོད། ཁོང་གིས་གྲོང་མི་ཚོར་རང་རང་གི་རླངས་འཁོར་སྤྱད་ནས་སྐྱེལ་འདྲེན་ལས་ལ་ཞུགས་རྒྱུར་སྐུལ་མ་བྱས་ཏེ། ཡོང་སྒོ་མང་དུ་གཏོང་དུ་འཇུག་པ་དང་།  ཁོང་གིས་རང་མོས་ངང་གྲོང་ཚོའི་ནང་དྲིལ་བསྒྲགས་པ་བྱས་ཤིང་། ཁོང་གིས་རང་ཉིད་ཕྱུག་པོའི་ལམ་བུར་བསྐྱོད་ཐུབ་པའི་ཉམས་མྱོང་སྤེལ་རེས་ཐེངས་10ལྷག་ཙམ་བྱས་ཡོད། 2019ལོའི་ཟླ་3པ་ནས་བཟུང་། ཁོང་གིས་གྲོང་ཚོའི་ནང་དུ་རང་ཉིད་གཅིག་པུར་འཚོ་བ་སྐྱེལ་མཁན་དབང་མོར་རོགས་རམ་བྱེད་པ་དང་། རྟག་ཏུ་ཁོང་ལ་འཚོ་བའི་མཁོ་ཆས་སྐྱེལ་བར་འགྲོ་ཡི་ཡོད། རིམ་ཁག་གི་ཏང་དང་སྲིད་གཞུང་གི་འགོ་ཁྲིད་དང་། ཕྱུར་འགྱུར་སྣེ་ཁྲིད་པ་ཚེ་རིང་རྒྱལ་པོའི་ཤུགས་རྐྱེན་འོག  2017ལོར་གྲོང་ཚོ་ཧྲིལ་པོ་དབུལ་སྒྲོལ་ཐུབ་པ་བྱུང་བ་རེད།

སླད་ཕྱིན། ཁོང་གིས་འཛུགས་སྐྲུན་ཀུང་སི་ཞིག་བཙུགས་ནས་མང་ཚོགས་གང་མང་ཀུང་སིའི་ནང་ཞུགས་ཏུ་བཅུག་ཏེ་ཁེ་སྤོགས་བགོ་བཤའ་རྒྱག་ཐུབ་པ་བྱེད་རྩིས་ཡོད་པ་རེད། ཁོང་གིས "ཏང་དང་སྲིད་གཞུང་གི་རྒྱབ་སྐྱོར་འོག་རང་ཉིད་ལ་གྲུབ་འབྲས་ཐོབ་སོང་། ངས་རང་གི་ནུས་པ་ལ་བརྟེན་ནས་གྲོང་མི་དང་སྤྱི་ཚོགས་ལ་ཕན་པ་བསྒྲུབས་ཏེ། མཉམ་དུ་ཕྱུག་འགྱུར་གྱི་ལམ་བུར་བསྐྱོད་རྒྱུ་ཡིན"ཞེས་བཤད། ཉི་མ་ཚེ་རིང་གིས་བསྒྱུར།