དེ་ཡང་སྙན་གྲགས་སྔར་ནས་གང་སར་ཁྱབ་པའི་བོད་ཀྱི་ལྷ་མོའི་ཡ་གྱལ་ཡར་ཀླུང་བཀྲ་ཤིས་ཞོལ་པ་ནི་འབག་དཀར་པོའི་ལྷ་མོ་ཞིག་ཡིན་ལ། འབག་དཀར་པོའི་ལྷ་མོ་ཚོགས་པའི་ནང་སྐད་གྲགས་ཆེ་ཤོས་དང་། འཁྲབ་རྩལ་གྱི་ཚད་གཞི་མཐོ་ལ་རང་གི་ཐུན་མིན་ཁྱད་ཆོས་ལྡན་པའི་ཚོགས་པ་ཞིག་ཀྱང་ཡིན་ཞིང་། དེར་དེ་སྔོན་ཆོས་རྒྱལ་ནོར་བཟང་ཞེས་པའི་འཁྲབ་ཚན་ཆ་ཚང་བ་ཞིག་འཁྲབ་པའི་ཆོག་མཆན་ཐོབ་ཡོད་པ་དང་། ལྷག་དོན་དུ་དེའི་དབྱངས་རྟ་དང་བོད་ཀྱི་གནའ་བོའི་སྟོད་གཞས་གཉིས་ཧ་ལམ་འདྲ་ཆེ་ཞིང་། ནང་དོན་ཟབ་པ་དང་། བབ་བརླིང་ལྡན་པ། ཞི་ལྷོད་པ་བཅས་ཀྱི་ཁྱད་ཆོས་ལྡན་ཡོད། དེའི་ནང་གི་ཆ་ཤས་ཤིག་ཕྱིས་སུ་ནང་དོན་གཏིང་ཟབ་པའི་བོད་རིགས་ཀྱི་དམིགས་བསལ་འགྱུར་ཁུག་ཅིག་ཏུ་འཕེལ་རྒྱས་ཕྱིན་ཁར། དེར་འབག་སྔོན་པོའི་ལྷ་མོའི་ཤུགས་རྐྱེན་ཐེབས་འགོ་ཚུགས་ཤིང་། རང་གི་ར་ལྤགས་དཀར་པོའི་འབག་གྱོན་པའི་སྲོལ་གཏོད་ཡོད་ལ། འབག་དཀར་པོ་ནས་འབག་སེར་པོར་བསྒྱུར་ཡོད། འཁྲབ་སྟོན་གྱི་རྣམ་པའི་ཐོག་ནས་བརྗོད་ན། དེས་འབག་སྔོན་མོའི་ལྷ་མོ་འཁྲབ་པའི་ཁྱད་ཆོས་མི་ཉུང་བ་ཞིག་བསྡུ་ལེན་བྱས་ལ། དེའི་འཁྲབ་སྟངས་དང་ཉམས་འགྱུར་བོད་ཀྱི་ས་ཕྱོགས་གང་སར་ཁྱབ་ཅིང་། དཀར་མཛེས་རྫོང་ཁམས་པའི་ལྷ་མོར་ཡང་ཤུགས་རྐྱེན་ཐེབས་ཡོད།

རྒྱལ་མཆོག་ལྔ་པ་ཆེན་པོའི་སྐུ་དུས་ལ། ཡར་ཀླུང་བཀྲ་ཤིས་ཞོལ་པ་ལོ་ལྟར་ལྷ་སར་འབྲས་སྤུངས་ཞོ་སྟོན་གྱི་ལྷ་མོའི་ཁྲལ་འཇལ་བར་འགྲོ་དགོས་ཀྱི་ཡོད་པ་དང་། སྐབས་རེ་ལྷ་སའི་དགོན་སྡེ་ཁག་དང་བོད་ས་གནས་སྲིད་གཞུང་གི་དཔོན་པོའི་གཟིམ་ཤག་ཏུ་འཁྲབ་སྟོན་བྱེད་དགོས་ཀྱི་ཡོད། ཡར་ཀླུང་བཀྲ་ཤིས་ཞོལ་པའི་རྔ་དང་སྦུབ་ཆལ་རྡུང་དཀྲོལ་དང་། དབྱངས་རྟའི་འགྱུར་ཁུག རྒྱན་གོས་ལ་སོགས་ལྷ་མོ་གཞན་དང་མི་འདྲ་བ་ཡིན་ནོ།