ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་རེ་སྒུག་དང་མངགས་བཅོལ་ཟབ་མོ་བསྣམས་ནས། ཟླ་3ཚེས་3ཉིན་གྱི་ཕྱི་དྲོར་རྒྱལ་ཡོངས་ཚོགས་འདུ་གཉིས་ལ་ཞུགས་མཁན་རང་ལྗོངས་ཀྱི་འཐུས་མི་དང་ཨུ་ཡོན་ཚོ་གནམ་གྲུར་བཞུགས་ཏེ་རྒྱལ་ས་པེ་ཅིང་དུ་འབྱོར་བ་རེད།

2026ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བའི་ལོ་དང“ལོ་ལྔ་ཚན་བཅོ་ལྔ་པའི”འགོ་འཛུགས་ལོ་ཡིན་པས། ད་ལོའི་ཚོགས་འདུ་གཉིས་ཡག་པོ་འཚོག་རྒྱུར་དོན་སྙིང་གལ་ཆེན་ལྡན་ཡོད།

ལམ་བར་དུ་འཐུས་མི་དང་ཨུ་ཡོན་ཚོས “བོད་ཀྱི་དམངས་འཚོའི་བྱ་གཞག་གི་འཕེལ་རྒྱས་གཏམ་བཟང་བརྒྱུད་བསྒྲགས་ཡག་པོ་བྱེད་པ”དང་། “མི་རིགས་ས་ཁོངས་ཀྱི་ཐོན་རྫས་བོད་ནས་ཐོན་པ་དང་འཛམ་གླིང་ཕྱོགས་སུ་སྐྱོད་པར་སྐུལ་འདེད་གཏོང་བ” “སྐྱེ་ཁམས་ཤེས་དཔལ་འཛུགས་སྐྱོང་ལ་སྔར་བས་ཤུགས་སྣོན་རྒྱག་པ”སོགས་ཀྱི་སྐོར་ལ་སྤེལ་རེས་གནང་བ་རེད།

ཕྱི་དྲོའི་ཆུ་ཚོད་གཉིས་པ་ཙམ་ལ། རང་ལྗོངས་ཀྱི་འཐུས་མི་དང་ཨུ་ཡོན་ཚོ་བཞུགས་གནས་སུ་འབྱོར་ནས་ཚོགས་ཆེན་ལ་འབྱོར་ཐོ་བཀོད་པ་རེད།